بابكر سلك في السلك الهلالاب لو العروس شينه بزغرتوا *ايها الناس *احباطات ما بتنفع معانا *حصل ايه يعني عشان كتير من الناس اعصابها تبوظ *وتحبط وتقنع من المطار *المطار شامين ريحتو ومصرين عليهو *ليس منا من ييأس ويرفع الرايه البيضاء *مكجنين الرايه البيضا وسنينا *فرصة تصدر المجموعه لسه قائمه *وحاتشوفوا *ايها الناس *المجموعه التانيه زي الجلابيه الانصاريه *بتتلبس بي جاي وبي هناك *مجموعه كلها زي بعض *زناطير ساي *تلبس مقبل كده وتبقي مارق *تلبس مقبل كده وتبقي مارق *كلو مافارق *مجموعه لو علموا منها منتخب *العلمه تديهوا اربعه رايح جاي *ايها الناس *الاهله ناس لذيذين خلاص *قابلوا كي ام *عارفنوا حمام *وطلعوا مسيرات فرح *وتيت تيت تيت *بعدو الفشنكات *ديل كمان قصتهم قصه *وبرضك تيت تيت تيت *وبعدو سانغا *في بلدو زول بشجعو مافي *وتيت تيت تيت *اسي قابلوا سموحه *فريق اسمو سموحه مدربو ميمي *وتيت تيت تيت *الاهله عارفين ده كلو كرور *وعارفين لو قابلوا نصف فريق بطيروا براهم *وبعد ده بحتفلوا *تيت تيت تيت حقتهم دي *بتذكرني اهل العريس لما تكون العروس شينه *تلقاهم في نص الحفله يقطعوا سااااي *يقطعوا تحت تحت *في الجابر ولدهم شنو *واول من يشوفوا زول من ناس الحله المعازيم يتنفنسوا ليك *ايوووووووووي يوووووي يووووووي *كأنوا العروس عاجباهم *تلقاهم يقطعوا *عليك الله دي عروس دي *الولد ده مطرطش ولا قريشاتو ناقصه !!! *شوف القدوم لا اله الا الله *هي زاتها ظنيتها اكبر منو *وفجأه يجيهم زول من المعازيم *ويشقوا حلاقيمهم *ايوووووي يوي يوي يوي *يوي بتاعت العرس دي زي تيت بتاعت الهلال *تلقا الاهله ماشين في الشارع ينتقدوا في فريقهم *والله غلبنا ساي *اي فريق غير ده كان ادانا عشره *واول ما يشوفوا ليك كوم ناس *يشقوا حلاقيمهم *سيد البلد سيد البد *وبعد يفوتوا من جمب الناس يرجعوا لي موضوعهم *شوق القدوم لا اله الا الله *هتافات يوي عروس شينه ساي *ويوي العروس الشينه عمرها مابتجيب جويه يا ناس توت *ومهمها علت الزغاريد العروس الشينه تظل شينه ولو زغردتوا بالساوند سيستم *ايها الناس *نغلب وفاق سطيف في ارضو *نعمل سته نقاط *وفاق يقعد في تلاته نقاط *العلمه يتعادل مع اتحاد العاصمه * الاتحاد يعمل سبعه نقاط *العلمه يعمل نقطه *يبقي روليت المجمعه بعد الجوله التالته *الاتحاد ثم المريخ ثم وفاق ثم العلمه *اما مجموعة العروس الشينه *-التطواني يغلب في بلدو *موش بلدو *يغلب ابو الهل *التطواني يعمل اربعه نقاط *ابو الهل يقعد في اربعتو *مازيمبي يغلب سموحتو *مازيمبي يعمل خمسه نقاط *سموحه يقعد في تلاتو *يبقي الروليت بعد الجوله التالته *مازيمبي التطواني ثم الزنطور ثم سموحتو *عرفتوا مافات شئ كيف ؟؟؟؟ *بطلوا شفقه *واجهزوا للمطار *للمريخ رب يحميه *المهم *قالوا قون نزار ماحصل *تتذكروا قون طمبل في منتخب مالي لما حاور الدنيا كلها بي حارس المرمي *وقرب يحاور الجهاز الفني ؟؟؟ *تتذكروا اول قون احرزو وارغو في شباك اتحاد مدني ؟؟؟ *وارقو من خط طمنطاشر بتاع المريخ بحاور وجاري للقون *تتذكروا عيسي جاري والباك جاري وراه ؟؟؟ *ايوي سااااكت بدون تعرفوا التاريخ ؟؟؟ *ايها الناس *ان تنصروا الله ينصركم *اها *نجي لي شمارات والي الرختوم *كان شفت يا والينا *امس السوتها الكهربا فينا *ماسوات نصاح يا والينا *يهود مابسووا فينا السوتا الكهربا يا والينا *الدنيا سخانه والناس عطاشانه تقطعها كيف بس ورينا ؟؟؟ *من قبال رمضان بنشكي ليك منها يا والينا *لو الموضوع اكبر منك *خلينا نمشي فوق شويه ونرفع الموضوع لجهات عليا يمكن ترضينا *او خلينا نرفع ايدينا فوق شويه يمكن ايدينا ترجع بالفرج لينا سلك كهربا ننساك كيف ولسه الكلب بجي في مواعيدو,,,, والكهربا لاجات ولا ملينا الباغات لكن (ملينا ) التصريحات والي لقاء سلك
