دق الدلجة محمد عبد الماجد تموا الناقصة وجيبوا (قوش) (13) سنة بيدعموا في المريخ بالسيخ والطوب والاسمنت. بي فوق وتحت التربيزة. وضربات الجزاء.. وحاجات تانية … عملوا ليهم الطابق التاني. والمقصورة الطائرة. ونظموا ليهم سيكافا. سيكافا بطلها يمنح 10 الف دولار – الحكومة منحتهم مليون دولار لتنظيم سيكافا. ثم منحتهم (6) مليار عشان فازوا بيها. وبرضو ظل المريخ (وصيف) – محل ما يقابله الهلال بيغلبه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (13) سنة بيدعموا فيهم بالدولار والاموال والنفط – جابوا ليهم (وارغو) بي (3) مليون دولار. علي النونو. عبدالكريم النفطي. علاء الزهرة. واخر حاجة وقت كل هؤلاء المحترفين ما عملوا حاجة ..جابوا ليهم (هيثم مصطفى). قالوا السر في هيثم مصطفى. (13) سنة فتحوا ليهم (جناح) خاص في مطار الخرطوم. منحوهم (الجنسية) السودانية في رمشة عين. بتصديق خاص. لا قانون. ولا لائحة. ولا (4) صور بسبورت. من مطار الخرطوم تمنح (الجنسية السودانية). (13) سنة ..يلعب عصام الحضري في المريخ بالحريات الخمس. ويلعب رمزي صالح بقوانين جامعة الدول العربية. وجمال سالم بالقوات الصديقة. وبرضو المريخ (وصيف). والممتاز هلالي في كل الظروف. يمشي هيثم طمبل للمريخ …كلتشي ….مجاهد …ريتشارد. والممتاز هلالي. والمريخ (وصيف). وصلنا معاهم لغاية هيثم مصطفى الذي وجد ان القعاد في بيته افضل من المواصلة مع المريخ. والممتاز هلالي. والمريخ وصيف. اديناهم (بكري المدينة) سجله جمال الوالي بعد ان وقع عقد مع الهلال وانتشرت الصور والخبر في الصحف واستلم بكري المدينة (800) مليون من الهلال. والمريخ وصيف بي لجنة استئنافاتو. بقت بحمد الله وفضله الصدارة هلالية ..خسر المريخ في ملعبه امام مريخ الفاشر وهلال الابيض. خسر في شندي. وخسر في عطبرة. وبقى الفارق (6) نقاط. الهلال بقيادة اطهر الطاهر ووليد علاءالدين وصهيب الثعلب يتصدر للممتاز بفارق (6) نقاط على بكري المدينة وجمال سالم وامير كمال وضفر وكوفي واسامة عطا المنان وغارزيتو وجمال الوالي الذي حكم المريخ 13 سنة. والكاردينال لم يكمل عامه الثاني. والمريخ وصيف. (13) سنة عملوا ليهم اي شيء …ضربة جزاء في اي مباراة للمريخ …حالات طرد ..تأجيل. لجنة استئنافات. لجنة التحكيم. (13) سنة واهلي شندي يقدم (الطاعة) كاملة للمريخ ..يلعب بكل الدوافع والحوافز امام الهلال ويخسر امام المريخ بي الاربعة. والمريخ وصيف. والهلال بطل. والفارق مرة (6) نقاط ..ومرة (18) نقطة. مرة نشيل الممتاز بدون خسارة ومرة بي تعادل واحد. مرة نغلبهم اربعة. ومرة تلاتة. ومرة يشيلوا (الكورة) ويطلعوا من الميدان. والمريخ وصيف. (13) سنة …والمريخ وصيف (شبعوا وصافة) ..والهلال يفوز بالممتاز خمس مرات على التوالي. مع كل هذا الدعم والعطاء وضربات الجزاء والسيخ والاسمنت والجنسيات و5 نقاط هدية. (13) سنة …يطلع جمال الوالي ويرجع جمال الوالي. يرجع ويطلع تاني. جمال الوالي رئيس …المريخ (وصيف). جمال الوالي مستقيل …المريخ (وصيف). جمال الوالي زعلان …المريخ (وصيف). في كل حالات جمال الوالي ..المريخ (وصيفا) في حي الصفا في لندن ..في المجلس ..برة المجلس. المريخ شنو؟. المريخ (وصيف). في كل الحالات ….الهلال بطل للممتاز. (13) سنة يستقيل جمال الوالي ويسحب جمال الوالي استقالته. متعودة دائما. والهلال بطل. والمريخ (وصيف). ولا حاجة بتتغير. (13) سنة جمال الوالي يطلع من مجلس منتخب ويرجع بي لجنة تسيير. ثم يطلع من لجنة التسيير ويرجع بمجلس منتخب. والمريخ وصيف. والهلال بطل. يمسك الهلال عبدالرحمن سرالختم …وجمال الوالي رئيس للمريخ ….الهلال بطل والمريخ وصيف. يمسك الهلال صلاح ادريس …وجمال الوالي رئيس للمريخ …الهلال بطل والمريخ وصيف. الامين البرير….الهلال بطل والمريخ ىوصيف. يوسف أحمد يوسف …الهلال بطل….والمريخ وصيف. يمسك الحاج عطا المنان …الهلال بطل ..وجمال الوالي في المريخ وصيف. يمسك الكاردينال …الهلال بطل والمريخ وصيف. وجمال الوالي في نفس الحالة ..يستقيل يسحب الاستقالة ..يرجع تاني. في كل الاحوال …المريخ (وصيف). (13) سنة ونحن في نفس الحالة. (13) سنة – عملوا ليهم اي شيء ، قدموا ليهم كل الدعومات…اخر (ابتكار) قالوا يمنحوهم (5) نقاط. 5 نقاط (قوالات). الناس ديل ما بتخجل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بنعرف الانتصار ممكن يكون بهدف تسلل. وممكن ان يكون بضربة جزاء غير صحيحة. لكن انتصار يمنح ب (القوالات)..دي اول مرة نشوفها ..ونسمع بيها. سمع اضان. ومريخاب الجنوب. واتحاد القضارف. هكذا تحقق الانتصارات في المريخ وتمنح النقاط. اخر طرق الدعومات ومنح النقاط …اصبح يتم عبر خدمة تحويل النقاط عبر لجان اتحاد كورة القدم السوداني. ما يحدث في الرياضة يمكن التكلم فيه والحديث عنه – وهو انعكاس حقيقي لما يحدث في جوانب اخرى. الخدمة المدنية فقدت (شرفها) – هكذا تمضي الاشياء وتسود. الفساد ضرب كل المؤسسات بما في ذلك المؤسسة الرياضية التى اصبحت (مرتع) للفساد والقيل والقال والرشاوي والظلم. والقوالات. بعد قرارات لجنة الاستئنافات والتى كشفت (مسرحية الاتحاد العام) وكيفية ادارة الاشياء في السودان دعونا نقول ان السلطة لم يتبق لها غير ان يأتي (صلاح قوش) ليكون رئيسا لنادي المريخ. دا الفضل!!. هذا هو الشيء الوحيد الذي تبقى لهم. المريخ يدار بهذه الطريقة – حيث تتحكم السلطة في القرارات وفي اصدارها في وجود لجان لا ضمائر لهم ولا اخلاق. لا اعرف كيف يتقبل اهل المريخ ان يسلبوا من هلال كادوقلي نقاطه التى تحصل عليها في الملعب. كيف راق لهم ان يحرموا الامل عطبرة من انتصار حققه في ملعب بعرق لاعبيه وجهدهم واهداف رزاق. ينتصروا عليهم في الملعب يشيلوها في المكتب. لو كانت هذه (النقاط) تمنح للهلال لرفضناها – لا يشرفنا الحصول على (نقاط) بهذه الطريقة غير الكريمة. وبصورة غير مشروعة ولا قانونية. اهل المريخ انفسهم غير مقتنعين بهذه (التمثليات) التى قصدت ان تمنح المريخ (5) نقاط بغير حق. حقا لم يبق لهم غير ان يكون صلاح قوش رئيسا للمريخ. نقاط لا جابوه بي خطة غارزيتو ولا شقلبة بكري المدينة. نقاط تحصلوا عليها بشقبلة سمير فضل. مرض (سمير) اصاب الكورة السودانية. بلعبوها ناس الفاتح خضر. بعكسوها. ويمنحوا المريخ (النقاط). ناس رزاق تعبانين ساكت. ناس عنبكة ..حارقين دمهم في الفاضي. اتخيلوا بكري المدينة يضرب ليه حكم (بونية) ويعتدي عليه لفظيا ..مع ذلك يمنح فريقه (5) نقاط. يضرب بونية. يوقع عقد مع الهلال ويستلم منه 800 مليون جنيه. ويمنح بعد كل هذه التجاوزات (5) نقاط. الكورة السودانية وصلت القاع. ترى كيف سوف يلعب المريخ في (عطبرة)؟. الجماعة ديل عندهم دم. عندهم احساس. عندهم قدرة على ان يلعبوا في عطبرة بعد ان سلبوا الامل حقوقه. المسرحيات سوف تتواصل. سوف تنتقل عروض المسرحية الى عطبرة. المريخ لو لعب عشرين مرة في عطبرة لن يستطيع ان يحقق انتصار على الامل. إلّا عبر طرق اخرى يعرفها المريخ. انتصار المريخ في عطبرة اما عبر (الحكام) او عبر افساد المباراة وعدم اكمالها لتحسب على الامل عطبرة. توقعوا من بعد اي شيء من المريخ. ممكن يعملوا اي حاجة. واضح ان المريخ قنع من الكورة ومن الموسم بعد رحيل جمال الوالي. هم يقصدوا ان يفسدوا الموسم وان يحرموا الهلال من بطولته المحببة. المريخاب بعد جمال الوالي ..قطعوا علاقتهم بالمريخ وبالكورة. عاوزين يبوظوا بس. امير كمال ماشي. وكوفي. وراجي عبدالعاطي. وجمال الوالي. وابوجريشة. الزول وقت يقنع من الحاجة بيعمل على انو يبوظ (الحفلة). قاصدين يبوظوها. لذلك على مجلس الهلال واعلامه وجماهيره الانتباه. الناس ديل ما عندهم كورة. نحن عندنا كاريكا وبشه ومكسيم. عندنا صهيب الثعلب وبشه الصغير ومحمد عبدالرحمن. عندنا ولاءالدين وابوعاقلة. ديل عندهم شنو؟. علاقتهم بالمريخ (جمال الوالي). فات جمال الوالي – كلهم بيفوتوا. ابوجريشة ذاتو غبلو الصبر. نهاية الموسم ما عاوز ينتظرها. غادر طوالي. المريخ اتفرتك – عاوزين يفرتكوا الموسم. جابوا ليهم لجنة استئنافات عشان تسوط الموسم كله. لجنة بتعمل بالقوالات. في ظل هذه الاوضاع ..افضل من يقود المريخ صلاح قوش. قالوا ليكم جمال الوالي عندو فرق من صلاح قوش. العقلية واحدة. احسن تعملوها ظاهرة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و في وجود هذا الاتحاد اقنعوا من الكورة. الهلال وعبر اتحادات الشمال والغرب والوسط والشرق عليه الاطاحة بهذا الاتحاد. ناس اسامة عطا المنان اتحاد مدرسة ثانوية كتير عليهم. ناس مجدي (دولارات). وسمير فضل. فضل شنو عليكم الله بعد كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. السيدة (ل) – الموية ليها حق تقطع ..لو دا قانونكم. وقرّط على كدا.
