بالعربى الكسيح محمد الطيب الأمين السرطان ما بعالجو بالبندول !! * من أشهر (التعابير) في السياسه السودانيه قول احدهم : (الدمقراطيه دى لو شالها كلب ما بنقول ليهو جر) .. * والكلب (القلبو كبير) لو قلت ليهو جر بجدع (قطعة اللحمه) وبجرى .. * ومرات انت عينك في الكلب بيشيل منك حاجه وما بتقول ليهو (جر) لانو قناعتك الحاجة الشالها الكلب ما بتستاهل كلمة (جر) .. * ولعل هذا ما جعل احد السياسين يقول قولته الشهيره : (الدمقراطيه لو شالها كلب ما بنقول ليهو جر) .. * والسيد رئيس نادى الهلال مساء أمس قال ما هو يشبه مقولة هذا السياسي .. * الكاردينال ومجلسه قالوها بيان بالعمل : (كأس الممتاز لو شالو كلب ما بنقول ليهو جر) .. * وكأس السودان كذلك .. * والله صحى .. * وبكل المقاييس يعتبر قرار نادى الهلال الخاص بالإنسحاب من كل منافسات إتحاد كرة القدم هو قرار تاريخي فيه كثير من (الهيبه والعزه والوقار) .. * وفي العادة الذى (يسكت على الظلم فهو ظالم) ، والذى يجالس (الما محترمين عليه ان لا يطلب من الناس إحترامه) .. * والزول يا جماعة ما برضى الكعب إلا لما الكعب ده يبقى ليك طبعه .. * وإذا كان المريخ متعود على الكعب حتى صار الكعب طبعه من طباع المريخ فأن الهلال غير .. * والهلال الآن رفع يده من (أكل اللحم الميت) .. * الأسد ما بيأكل الميته .. * وكبرياء الهلال يمنعه من (أكل لحم جثه ماتت وشبعت موت) .. * (جثه ميته) طبخها الاتحاد العام في (حله وسخانه) فكان من الطبيعى ان يرفض الهلال (تناول هذه الوجبه المتعفنه) لانه نادى الاخلاق والأدب قبل ان يكون نادى كرة قدم .. * وعظمة الهلال تكمن في كونه إنسحب وهو في (موقف قوه) .. * بمعنى ان الهلال إنسحب هو متصدرا للبطولة ما يعنى إن دوافع الإنسحاب ليس لها اى علاقة ب(المستطيل الاخضر واللقب) .. * إنسحاب المتصدر هو رسالة اراد من خلالها الهلال ان يؤكد ان الرياضه بدون اخلاق هى مثل (العروس بدون شرف) .. * وشرف الرياضيه أخلاقها ، ويوم ان (ينتهك المغتصبون هذا الشرف) فأن الرياضه تفقد عذريتها وشرفها تماما .. * الهلال هو أكثر نادى فاز بالممتاز وأكثر نادى مثل السودان خارجيا ، بل ان الهلال نال شرف توفير (مقاعد) اضافيه للانديه السودانيه في بطولات (الكاف) فإستفاد من ذلك (المريخ الما بخجل) واهلى شندى والخرطوم الوطنى وغيرها من الانديه التى شاركت افريقيا بفضل الفتوحات التى قادها الهلال .. * يبقى إنسحاب الهلال وهو متصدر يثبت ان الموضوع عندنا هو ليس كره .. * وأقسم لكم بالله لو كان المريخ متصدرا وتعرض لستين نوع من انواع الظلم لن ينسحب .. * وذلك لان المريخ في الاصل هو ناى (مهزوز الشخصية) ونشاطه محصور في كرة القدم فقط وليس له نصيب في القياده والرياده .. * هو ضل ، ولذلك سيظل ضل إلا ان يرث الله الأرض .. * المواقف الكبيره تشبه الهلال لان الهلال (قراره في يده) عكس المريخ الذى (رضع من ثدي الحكومة) حتى (يبس صدر الحكومة) ولم يشبع المريخ .. * كنا نظن ان (فطام المريخ سيكون في عامين) ولكن (حنطور العرضه) لم يشبع من الرضاعه رغم تطوال السنوات .. * الهلال يعود الآن ويؤكد للناس ان (الاخلاق والأدب) هى وراثه في نادى التربيه الوطنيه .. * وكل من ينشد الاصلاح لابد ان يقدم تضحيات .. * والتضحيات تتفاوت حسب حجم الاصلاح .. * وفي سبيل ان تعود هيبه القانون وشرف المنافسه اصدر الهلال هذا القرار ولن نخشى الثمن لان (قرارانا) ستكون له فائده عظيمه في تاريخ الكره السوانيه الحديث .. * هذه ثوره تصحيحيه تشبه ثوره الربيع العربى وبأذن الله سيجنى الوسط الرياضى ثمار هذه الثوره التى يقودها (الكبير جدا الهلال) .. * (95%) من جماهير الهلال هم مع هذا القرار الشجاع و(5%) ضد القرار ، وهذه إحصائيه كفلتها لي المتابعه ومخالطتي للناس وبالضروره هى نسبة غير دقيقه قد تزيد وقد تنقص .. * ولكن نقول الذين هم ضد القرار يقولون ان الهلال ليس له دخل في هذا الصراع حتى ينسحب لانه في الاصل غير متضرر أو هكذا يقولون .. * وهذا حديث غير دقيق .. * عود الهلال في هذه المنافسه هو (عود راجل وليس عود مرا) وطبيعى ان يكون الهلال هو (الناهى والأمر) لان هذه المنافسه (المتعفنه) لن تقوم لها قائمه بعيدا عن الهلال .. * البطوله في السودان ممكن تمشى بدون مريخ لكن ما بتمشى بدون هلال .. * والله صحى .. * وذلك لان الحياة نفسها في السودان مرتبطه إرتباط كبير جدا بالهلال .. * نقول : الهلال كان يحتاج لنقطة واحده او ثلاث نقاط ويفوز باللقب كالعادة دون إنتظار باقى المباريات .. * وبقرار لجنة (الإستعفانات) كما يقول استاذنا شجرابي ، سينتظر الهلال حتى المباراه الختاميه لحسم اللقب .. * يبقى من الناحيه دى في ضرر للهلال .. * الهلال لو فاز في مباراته القادمه بامكانه ان يلعب بقية مباريات الدورى بما فيها مباراة القمة بفريقه الرديف لانه سيكون حسم الدورى تلقائيا .. * ولكن لجنة (الاستعفانات) قصدت ان تقدم الكأس هديه للمريخ (غصبا عن القانون) وهذا ما لا يرضاه الهلال .. * يبقى الهلال متضرر ، وحتى لو لم يكن متضرر فهو (قدوه) ولابد ان يقوم بدوره الطبيعى تجاه مثل هكذا قضايا .. * وللأمانه لو المريخ كسب ال(6) نقاط والهلال حسم الدورى قبل (4) اسابيع برضو كنا سنطالب بالانسحاب حتى ينكشف هذا الاتحاد الفاسد .. * وأنا والله أخجل إنابه عن هذا الاتحاد .. * ما يحدث عندنا في السودان لا يحدث في اى دولة اخرى .. * حتى جوبا .. * الجنوب وعاصمته جوبا هى اخر واصغر دولة في العالم ومع ذلك النشاط الرياضى فيها افضل مليون مره من نشاطنا .. * والسبب إنو إحنا البنعمل فيهو ده ما كرة قدم .. * دى ممكن تكون اى حاجة لكن ما كوره .. * وللأسف كله كنا نود ان ننقل الاخلاق الرياضيه للوسط السياسى ولكن للأسف نقلنا الاخلاق السياسيه للوسط الرياضى فأصبح كل شي مصالح وبيع وشراء .. * واذا كان معتصم واسامة ومجدى لا يخافون من (لعنة التاريخ) كيف لهم إذا (صحصح الضمير النائم) ؟؟ * صحوة الضمير ممكن تكون بعد فوات الاوان وساعتها لا ينفع الدمع ولا الاعتذار .. * ونحن لا نعفى الحكومه التى ظلت تتفرج على (هوان الاتحاد) وتجاوزاته .. * الحكومه شريك اساسى فى هذا الذى بلغناه .. * ونقولها بالفم المليان : لو الحكومه خايفه من الفيفا فأن الهلال هو زاتو (فيفا) .. * والفينا مشهوده .. * وكضابين الهلال إنسحب ولن ينزل الدرجة التانيه واعلا ما في خيلكم اركبو .. * ننسحب السنة دى والسنة الجايه سنشارك (رجاله) لان القانون اصلا ارادو له ان يكون (تحت الجِزم) .. * وكضابين ما بقدرو يعملو حاجة للهلال لانو الهلال دوله وشعب وبلد .. * والفيفا فاسده والكاف فاسد واتحادنا اكبر فاسد .. * والهلال سيحارب هذا الفاسد مهما كان التمن .. * فقط نطلب من مجلس الهلال ان يتمسك بموقفه .. * نعم (الجوديه والتحانيس والوساطات) ستتدخل ولكن قرار الهلال لا رجعه فيه يا الكارينال .. * يجب ارسال خطاب الانسحاب للاتحاد وبعدها مباشرة نرجو ان يغادر الكارينال إلى لندن وعماد الطيب الى بروكسل وبقية اعضاء المجلس إلى باريس ودبي وإنجمينا .. * لا واسطه ولا تحنيس .. * واليحصل يحصل .. * يا جماعة السرطان ما بتعالج بالبندول .. * والبيعمل فيهو الاتحاد ده سرطان يحتاج للعلاج بالكيماوى ، والكيماوى هو الانسحاب .. * وما هو دون الانسحاب يعتبر بندول لا يعالج سرطان الاتحاد .. * يلا كده ورونا بتلعبو الممتاز كيف ؟؟ * كده نشوف مريخ الحكومة بيلعب كيف في ممتاز ما فيهو هلال .. * ورينا شطارتك يا معتصم جعفر .. * هو عليك الله معتصم جعفر (خان) شداد معقوله يكون عادل ونزيه ؟؟ * شداد علمو العمل الادارى (دى اذا كان إتعلم اصلا) ، علمو وجا خانو .. * تشوفهم لابسين (البِدل والقمصان) تحلف تقول ديل (ناس الشي زاتو) .. * وين ؟؟ * خسارة بدل وقمصان ساكت .. * ياخى الحكم قال ليهم : بكرى (المديده) إعتدى علي جسديا ولفظيا ، قالو للحكم لا إنت كضاب .. * حكم تابع ليهم ، قالو ليهو لا (بكورى) ما بعمل كده .. * أمبارح بكرى (المديده) في صحيفة الدار إعترف وقال : (نعم انا اعتديت على الحكم لفظيا) .. * بكرى قال كده بعضمة لسانو .. * غايتو جنس غايتو .. * قلت لي يا سمير فضل ما متذكر مش ؟؟ * خلاص كويس ، وكت تتذكر تعال قول لينا .. * قال ما متذكر قال ؟؟ * قانون ما متذكرو انت شغال ترزي ولا شنو ؟؟ * سألوك من القانون ولا سألوك من قصة حب قديمه عشان تقول ما متذكر ؟؟ * إحنا بنقول للكارينال وعماد الموضوع ده ما فيهو هظار ولا مجامله عشان ما تعملو لينا زي موضوع بكرى (المديده) وموضوع فيتا كلوب .. * اى نادى ما داير ينسحب بطريقتو .. * بس الهلال يثبت موقف للتاريخ .. * و..و.. * والقليب الراسمو حِنه يبدو من قلبك احنه بيهو عايز تمتحنه وإحنا …(قمنا وإنسحبنا) ..
