دق الدلجة محمد عبد الماجد رفعوا الدولار ونزلوا الهلال من حكايات محمد وردي انه حكي مرة في قناة الشروق قوله وهو في حضرة الشاعر الكبير محمد علي ابوقطاطي قوله انه عندما غني للشاعر ابوقطاطي في عام 1976 ..واجه وردي انتقادات قوية من الاعلام واعتراضات كبيرة كيف لمحمد وردي الذي غنى للدوش ومحجوب شريف وصديق مدثر ومحسي وصلاح احمد ابراهيم وعبدالقيوم ان يغني لمحمد علي ابوقطاطي. وابوقطاطي يصنف من الشعراء الشعبيين. عبقرية ابوقطاطي في بساطته وفي امانيه العذبة – وناسه القيافة. كفى انه قدم لي وردي (سواة العاصفة في ساق الشتيل الني). مع ذلك تعجب الاعلام والناس في ذلك العام وقالوا ان عام 1976 عام غريب حدثت فيه اغرب الاشياء – انخفض فيه الجنيه وارتفع الدولار وغني فيه محمد وردي لمحمد علي ابوقطاطي. تلك مفارقات عجيبة …وانخافض الجنيه في عام 1976 كان من المفارقات ..اذ الطبيعي وقتها ارتفاع الجنيه وليس انخفاضه مقابل الدولار. ابوقطاطي ظلمه النقاد في ذلك العام لأنه عبقرية (شعرية) جديرة ان يغني لها وردي وقد كان الفنان محمد وردي ذكيا عندما غني لمحمد علي ابوقطاطي الذي حقق بكلماته انتشار اخر وحقق نجاحات كبرى. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). وبمثل مقارنة النقاد الفنيين في عام 1976 بين الدولار وغناء وردي لمحمد علي ابوقطاطي واعتراضاتهم على ذلك نفعل الآن نفس الشيء ونقارن. ومن عجب ان الدولار هذه الايام يشهد ارتفاع جنوني لدرجة انك لو ما شبيت شوية ومديت رقبتك وسليتها من كتوفك ما بتقدر تقول كلمة (دولار). في الوقت الذي يحقق فيه (الجنيه) انخفاض مخيف وتراجع لمن شفقنا. الجنيه تدخلو في جيبك 100 قرش تطلعو 10 قروش. تراجع مخيف. الجنيه دي ماشى وين؟. الجنيه ذاتو بقى عندو (نفسيات). بالطريقة دي تاني الزول لمن يكون ماشي يشتري ليه (كبريت) بشيل معاهو (دفتر الشيكات). وعشان الموضوع يبقى ليكم واضح ، وصريح وزي (الشمس)…خلوني اقولها ليكم عديل كدا. معقولة بس ..يرفعوا (الدولار) وينزلوا (الهلال). دي حالة دي. ناس محمد سيد احمد ..(وناس تانية ما عاوزين نجيب اسمهم) عاوزين ينزلوا الهلال ويرفعوا (الدولار). يا معتصم. يا اسامة. اللقيمات دي ما بتسمك ليها زول. محمد سيد أحمد قال ح ننزل الهلال عشان يلعب في الدرجة الاولى. انت منو يا محمد؟. يا محمد سيد احمد لو الهلال بنزل بالسهولة دي …كان شفنا لينا (لوتري) واتخارجنا من البلد دي. وقت تنزلو الهلال فضل ليكم شنو تاني؟. النيل الازرق والنيل الابيض ما فضل فيهم شيء. كل يوم يردموا ليك (النيل) ويستقطعو ليك منو حتة. النيل بقى متل (الخور). فضل ليكم شنو غير (الهلال). لا وردي لا عثمان حسين. لا عبدالعزيز محمد داؤود ولا ابراهيم عوض. عندكم شنو غير (الهلال)؟. لا صلاح احمد ابراهيم ولا علي المك ولا الطيب صالح. عندكم شنو تاني؟. والله لو دي طريقتكم ليه حق (الدولار) يرتفع. ويطير السماء. والنيل يبقى زي (الشريط). كمان الهلال دا لو نزل من الممتاز يمين الدولار يبقى ب الف جنيه سوداني. بي مليون يعني. ديل خلوا الجنيه قلبوا (دينار) ما نفع. خلوا الدينار رجعوا للجنيه برضو ما نفع. زي الزول الساكن في بيت الايجار يحولو فيه من بيت لي بيت. بدلوا القيمة ..واشتغلوا بالعملة القديمة والقيمة الجديدة – برضو ما نفع. الجنيه جنيه ..لكن تسعريتو جديدة. يعني الالف جنيه بالقديم مليون جنيه. عاوزين يجمركوا الموضوع. ونحن ولا فاهمين. يحولوا فينا من قيمة لي قيمة. من موقف لي موقف. مرة يجيبونا استاد الخرطوم ومرة يرجعونا السكة الحديد. تاني يرجعونا استاد الخرطوم. نولف شوية. يجوبنا السكة الحديد. هي ذاتها السكة حديد وين؟. ونحن نشل ونتحول من موقف لي موقف. (بس تشيل فيني وتودي). جماعتك لقوا تحويل (المواقف) ماشي معاهم – قالوا يحولو الهلال من الممتاز للدرجة الاولى. عشان ناس المريخ يرتاحوا في الممتاز. ويلقوا ايديهم. الجماعة ديل عملوا ليهم اي شيء. طلعوا الشرطة – يطلعوا ليهم الشرطة. جيبوا لينا الحكم الفلاني – يجيبوا ليهم الحكم الفلاني. ما تبرمجو مباراة الامل ..جدا ما بنبرمج مباراة الامل. برمجوها …يبرمجوها تاني اليوم. ليه (الحقارات) دي. نحن شغالين عندكم. الجماعة وقت لقوا الحاجات دي كلها ما جابت حاجة الفرق برضو (6) نقاط – قالوا يشيلوا الهلال من الممتاز وينزلوا الهلال للدرجة الاولى. عشان المريخ يأخد راحتو للاخر مع ناس هلال الابيض وهلال الفاشر وهلال كادوقلي. ناس محمد سيد احمد عاوزين يخلوا الجو تماما للمريخ. قالوا نعمل شنو يعني؟. ننزل الهلال. والله دا الفضل. اتخيلوا الهلال بلعب في دوري الدرجة الاولى – اتخيلوا الموضوع دا ..وتعالوا شوفوا البحصل شنو؟. اول حاجة الهلالابي يجي ليك من دار الرياضة ام درمان – الهلال يكون عندو مباراة مع ام بدة. الراجل يدخل البيت – يلقى ليك (المرا) في وشو ..يقول ليها يا ولية انتي بتعملي في شنو؟. تقول ليه ما قاعدة اعمل في اي شيء؟. يقول ليها كمان حصلت بتردي علي – انت طالق. يوديها ليك بيت ابوها بي شفعها السبعة. شنطتها من الدولاب ما تنزلها. يا زول الهلال وقت يلعب في الدرجة الاولى المواضيع ح تكون صعبة ..والنسوان اول شيء ح يدفعن الثمن غالي. كلهن بمشن بيت ابوهن. طبعا هسع في جماعة ح يسمعوا الكلام دا – ويقولوا يا ريت الهلال ينزل. في ناس نيتهم كعبة – وعاوزين ليهم سبب مع النسوان. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلال وقت يلعب في الدرجة الاولى …الموظف بمشي مكتبو الساعة 11. المدير يقول ليه مالك متأخر كدا؟. يقول ليه اتأخر على كيفي ..الهلال بلعب في الاولى – عاوزني اجيك الساعة تمانية صباحا. عشان شنو؟. دا كان زمان. الواحد فيكم يركب المواصلات..الكمساري من غير ما يسألك ..تقوم تدورها معاه. وتشاكل السواق. يقولوا ليك مالك؟. فوتوك محطة؟. ما رجعوا ليك الباقي؟. تقول ليهم الهلال …بلعب في الدرجة الاولى. الكماسرة تاني ح يتعبوا ونزول الهلال دا ح يقع ليهم في رأسهم. الهلال لو لعب في دوري الدرجة الاولى – المواطن بمشي السوق يسأل من كيلو اللحمة؟. يقول ليهم كيلو اللحمة بي كم؟. يقولوا ليه ب (80) جنيه. يقول ليهم : ليه؟. يقولوا ليه يا زول انت عمرك كلو بتشتري كيلو اللحمة ب (80) جنيه الحصل شنو يعني؟. يقول ليهم دا كان زمان قبل ما ينزل الهلال. والله تاني (تعريفة) ما نخليها ليكم. نحاسبكم بالمليم. شفتوا حكاية مكتب الوالي. ومكتب مدير الجمارك…دي تاني ما بنفوتها. ولا بنجامل. انتوا قايلين شنو؟. الساعة ستة يجيك بتاع اللبن. تقول ليه اديني تلاتة ارطال. يكب ليك ربع رطل لبن والباقي يتمو ليك موية. تدورها معاهو لمن عجاجتكم تربط. يقول ليك يا زول في شنو؟..انا عمري كلو بزيد في اللبن موية ..الليلة مالك؟. تقول ليه دا كان زمان – قبل ما ينزل الهلال. الكهربة تقطع. تمسك المروحة تفرتكها جناح جناح. كمان دي شيء بسكتوا عليها. يا زول وقت الهلال يلعب في دوري الدرجة الاولى ..الناس بتكون صعبة وبتكون بتفتش ليها في موضوع. يعني الزول الخاطب بفسخ خطوبتو ..بقول لي خطيبته والله احسن نتفرق من الآن نحن ما بننفع مع بعض. كلام واضح. وصريح. يعني بقت على (الخطيبة). اقول ليكم شنو عاد؟. الزول الفي السعودية ..بيجي راجع ..يقول بدل ناس الجمارك يستفيدو مني ساكت ..احسن اقعد في بلدي دي. ……….. و الكاريدنيال ما عاوزنو يقيف من مفاجأته. كل يوم عاوزين نشوف لينا لاعب جديد. والجديد خطير. والخطير جديد. صورة امير كمال ما تشتغلوا بيها كتير. لجنة التسيير جديدة ..ما عارفة (الصور) ما بتعمل حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. السيدة (ل) – الكهربة قطعت لكن ما ح اشتغل بالموضوع كتير. وقرّط على كدا. � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore � � � � � � �