قال وليم فوكنر : ( أنا لا اهتم كثيرًا برأي أي شخص في أعمالي أو أعمال غيري من الكتاب ، فمعياري التقييمي هو حتمية الشعور بسير العمل بالطريق الذي لا بد أن أسلكه)...
هنا تحتاج إلى ألف (وليم فوكنر) عشان تشرب ليك (كباية شاي)..وتحتاج إلى ألف (وليم فوكنر) تاني عشان تفتح (شباك) الشارع.
وتحتاج إلى ألف (وليم فوكنر) آخر (احتياطياً).
محمد
شبه
قال ليه ما عارف شايفك وين؟....شبهك دا ما غريب عليّ.
أنت ..أنت عندك علاقة بي جبنة (لباشكري).
اقتراح
لو كروجر قدم (موسى الزومة) عشان يلعب في (الهجوم) بكون بالطريقة دي حل مشكلة دفاع المريخ بشكل جذري..لكن مشكلة (الهجوم) في المريخ ح تتضاعف ..ح يبقى عليكم عنكبة وموسى الزومة كمان.
هسع دا (اقتراح) ليك.
باقى ليه (الرصيد)
جابوا ليه...عصير في جك ..قطع (الجك) بي عصيرو.
جابوا ليه ..شاي معه (زلابية)....شرب الشاي والزلابية في لمحة عين.
جابوا ليه ..(سمك) ..ضرب ليك السمك في لحظة.
ما بتلفت.
جابوا ليه (قراصة) بي خدرة كاربة ...ضرب ليك القراصة بي الخدرة في دقيقة.
ما عاين.
جابوا ليه (فواكه) شيء موز..وشيء برتقال وشيء منقة وشيء جوافة وشيء شمام وشيء بطيخ ....ضرب (الفواكه) ما خلى فيها قطعة.
ساعة كدا مرت ما جابوا ليه أي حاجة ..قال ليهم خلاص أنا عاوز امشى ..لكن ما عندكم (رصيد) تنزلوه لي في موبايلي دا.
لو لقيت لي رصيد (ام تي ان) بريحنا شديد.
الحزن عندما يصبح ذو لون (وردي)
سعيد أني حاورت محمد وردي مرتين ...مرة في بداياتي الصحفية ..وقد كان الحوار لصحيفة عربية ..ووردي وقتها لم يكن متاح للصحافة السودانية إلّا ما رحم ربي ..وظني أني لولا مدخل (الصحيفة العربية) لما وافق وردي على الحوار ..فقد كان وردي وقتها يعارض النظام بشيء من المقاطعة ..كما يفعل الفنان الكبير أبوعركي البخيت منذ أن جاءت الانقاذ ..فاقطعها أبوعركي وصلاً في كل وسائل الإعلام.
المرة الثانية التى حاورت فيها الفنان محمد وردي كان الحوار لصحيفة (الأحداث) السودانية المتوقفة، وقد كان ذلك قبل وفاة الفنان محمد وردي بشهور قليلة.
إجابات الفنان محمد وردي على الأسئلة خرجت للناس (نشرًا) ونبحث أن يكون ذلك في كتاب نجمع فيه تلك (الورديات)...إن مد الله في الآجال.
أما انطباعاتي عن الفنان وردي فإني أخرج منها كل حين بعض الشيء ..لأني في كل يوم أو قل في كل لحظة اكتشف أشياء جديدة في ذلك الفنان العملاق.
لعل أعظم ما خرجت به عن الفنان محمد وردي ...هو (عبقريته) الواضحة التى تبدو تمشى في الأرض حراكاً.
تلحظ عبقريته ..حتى وهو يجلس في (كرسيه) في حديقته التى كانت أمام منزله في المعمورة.
كان يمنحنا شيء من العبقرية في سوح داره الجميل.
وردي كان حسب ما وجدناه عنده ..وما نقل لنا برايات موثوق فيه ..شخص (كريم).
قال الأستاذ حسين خوجلي في حوار لنا معه عن الفنان وردي في ذكرى رحيله الأول أن وردي عندما كان يسكن في الكلاكلة في بداياته الفنية ..كان بيته مفتوح لكل أبناء بلدته..حتى أن وردي كان عندما يعود إلى بيته بعد أن ينتهى من حفلته ..يجد كل (الأسرة) (جمع سرير) عليها بعض أقاربه من أبناء بلدته ..فيجعله ذلك أن يفترش الأرض ...وهو بنجومية طاغية ينوم على الأرض من أجل أن ينام ضيوفه على (الأسرة). مشهود لوردي ذلك ..بيته مفتوح للطلبة للقادمين للخرطوم من أجل بعض الأغراض للتعليم أو للسفر أو للعلاج. وردي ليس كما هو يشاع عنه ...ليس فيه ذرة من (الغرور) ..كان التواضع أوضح ما فيه ..لكن الناس خلطوا بين عزته وشموخه وكرامة الفنان فيه ..فظنوا أن ذلك (غرور) وهم لم يعرفوا ذلك (الكبرياء) في فنان من قبل.
من الأشياء التى تبقى في ذاكرتي أيضاً ..هو حوارنا للموسيقار محمدية ...والذي شهد لنا بعبقرية وردي اللحنية..أما أكثر ما أوقفني في حوارنا مع محمدية ..هو انشاده بلحن أغنية (بناديها) التى كتبها العبقري الاخر عمر الطيب الدوش.
أيضاً توقف الموسيقار محمدية بشكل خاص عند لحن أغنية (قلت ارحل) وهى العمل الذي لحنه وردي في سجن كوبر ..عن طريق (فمه) دون الاستعانة بي عود أو آلة موسيقية.
قلت ارحل كتب كلماتها الشاعر العزلة الجميل التجاني سعيد ..صاحب ديوان (قصائد برمائية). البروفيسور علي شمو ..أيضاً حدثنا في حوار سابق حديث العارف والخبير والعالم عن الفنان محمد وردي. قال البروفيسور علي شمو: إن وردي عندما تقدم للاذاعة من أجل اجازة الصوت..كان ذلك يوم جمعة ..غنى وردي للجنة التى كانت كلما انتهى من أغنية طلبت أن يغني لها أغنية أخرى فمضت الجمعة كلها في الاستماع لوردي. أما مدير الإذاعة وقتها فقد كلف علي شمو بمتابعة الفنان محمد وردي ومرافقته ..لأن هذا الصوت الذي خرج من ذلك الشاب النحيف والطويل ذو الشعر الكثيف ..سوف يكون له شأن عظيم في المستقبل القريب. وقد كان ..استطاع الفنان محمد وردي أن يجعل حياتنا لونها (وردي) بأغنياته التى كانت فيها فتوحات كثيرة في عالم الحب. الفنان محمد وردي بدأ غنائياً ب (يا طير يا طائر) الأغنية التى كتبها إسماعيل حسن ولحنها خليل أحمد الذي وضع (اللبنة) اللحنية الأولى للفنان محمد وردي. من بعد انطلق الفنان محمد وردي وقدم مجموعة من أغنيات إسماعيل حسن التى لحنها وردي بنفسه...لعل أبرزها كانت أغنية (بعد ايه) والتى قدمت في عام 1957م بالمسرح القومي بأم درمان.
وردي قدم سلسلة طويلة من الأغنيات الناجحة والجميلة للشاعر إسماعيل حسن الذي كوّن مع وردي أنجح الثنائيات الفنية في خارطة الأغنية السودانية..فكانت القمر بوبا الأغنية التراثية التى تداخلت فيها حروف إسماعيل حسن ووالدته (حد الزين) ثم الحنين يا فؤادي ، وصدفة ونور العين ..والوصية التى لحنها برعي أحمد دفع الله واخريات إلى أن جاءت المستحيل وخاف من الله في الستينات ..ثم كانت اخر عمل جمع بين وردي وإسماعيل حسن بعد خلاف استمر أكثر من (13) عاماً بين وردي وإسماعيل حسن ..وانتهى بأغنية (وا اسفاي) التى كانت اخر كلمات تغنى بها وردي لإسماعيل حسن.
في فترة خلاف وردي إسماعيل حسن ...اتجه وردي نحو اسحاق الحلنقي الذي قدم له أكثر من (17) عملاً أولها كانت (أعز الناس) ثم جاءت بعدها الصورة وقطر الندى واقابلك ودوري دوري يا أيام ...وغيرها من الأعمال الكبيرة. غنى وردي أيضاً لمحجوب شريف عاطفياً (جميلة ومستحيلة) ..وأغنية (أنا مجنونك) والكثير الجميل من الأغنيات الوطنية الخالدة ..والأناشيد العظيمة التى كتبها محجوب شريف فكانت أجمل ما كتب في عاطفة (الشعب) وفي (حب) السودان. غنى وردي لعلي عبدالقيوم ومحمد علي أبوقطاطي سواة العاصفة في ساق الشتيل الني والمرسال والناس القيافة. وغنى من غير ميعاد وقلت ارحل للتجاني سعيد وقدم أجمل (فتوحات) عمر الطيب الدوش الود وبناديها والحزن القديم. سوف أتوقف عند (الحزن القديم) ونحن حزننا يتجدد يوماً بعد يوم ..محمد عثمان ..يجعل حزننا لونه (وردي) في ذكرة رحيله الثانية. على أن أعود مفصلاً للكثير من المواقف والمدارس والشعراء في كتابات أخرى عن محمد وردي ومدارسه الفنية المتعددة.
فقط اكتب (ملمح)..حتى لا تمضى السيرة دون أن أدون فيها شيء من الوجع.
المريخابي دا عندو سبعة أولاد ...واحد اسمو عثمان زكي وواحد اسمو سانتو وواحد اسمو زيكو وواحد اسمو هيثم الرشيد وواحد اسمو عبدالحميد السعودي وواحد اسمو تراوري ..وواحد اسمو محمد عبدالمنعم عنكبة..الجماعة ديل مرة (سيف مساوي) سجل ليهم زيارة في البيت ...كلهم طلعوا (تسلل).
هسع وينو (الاحتمال) هنا؟.
تنطط في عيونك زي مرتبة الاسفنج.
في السلم
ليه أي زول يكون (مستعجل) ويكون الناس منتظرنو ...ليه وقت الناس يضربوا ليه يقولوا ليه : أنت وين؟.
ليه بقول ليهم طوالي : (أنا في السلم).
سؤال
قال ليه (العالمي) دا شنو؟.
قال ليه والله العظيم ما عارف ...لكن (العالمي) البطيّر من (التمهيدي) دا بكون نوع من أنواع (الحمام).
أها نحن من اليوم داك عندنا (حمام) في البيت سميناه الحمام (العالمي).
استعراج
تعالوا نعرج كدا ..ونطلع من الموضوع ونكتب لينا حاجة بعيدة عن (التمهيدي) حق المريخ...نتجاوز الحتة دي ..ما صاح (ننجهم) كدا ..لذلك تاني ما ح اكتب ليكم عن (التمهيدي) ..ح اكتب ليكم فقط عن دور ال (64).
ومرة ..مرة كدا ح اكتب ليكم عن (التمهيدي).
مرة في الشهر.
اتفقنا.
هسع تلقى (الهلالاب) ما رضوا من كلامي دا.
فيلم هندي
(25) نفر ...مشوا ليهم (مطعم) ..طلبوا ليهم (طلب فول) واحد.
سيد المطعم قال ليهم معقولة ...(25) راجل وتطلبوا ليكم (طلب فول) واحد.
ال (25) رجل قالوا ليه بصوت واحد : (انت مالك يمكن طلب الفول دا عاوزين معاه 25 رغيفة).
والفيلم انتهى على كدا.
اكيد انتوا منتظرنهم لمن يضربوا طلب الفول بي ال (25) رغيفة.
عليكم الله هسع دا (طلب فول) ولّا (كتيبة) دفاع شعبي.
رقم غريب
ليه الزول وقت يضرب ليه (رقم غريب) ويظهر ليه في شاشة التلفون ..ليه بعاين للتلفون كدا ..ويرجعو تاني في جيبو؟.
في ناس مع المعاينة للرقم ..قاعدين (ينقنقو).
نظرية
عصام الحضري سألوه وقالوا ليه عمرك كم سنة؟.
قال ليهم (44) سنة ..لكن في تلات سنوات ما تحسبوها لي ..لعبتها في المريخ.
شعر
رأيكم شنو لو محمد عبدالله ضفر ..شال موضوع الكورة دا من رأسو ..وفكر يتفرغ لكتابة (الشعر).
يمكن ينجح في أن يكون (شاعرًا) سودانياً.
خاصة أن الشعر الايامات دي أي (باك) ما حريف ممكن يكتبو.
كدا يا (ضفر) جرب الشعر ...واكتب ليك قصيدة عاطفية كدا في (مقصورة) استاد المريخ.
شعرك ح يطلع اخطر من كورتك.
حاجة حريصة
حاجة حريصة اشترت ليها رصيد ب (5) جنيه ..قالت ما بتنزلو في الموبايل هسع...ح تنتظر لمن الرصيد البي (5) جنيه يبقى ب (7) جنيه ..بعد داك ح تنزلو في الموبايل.
حاجة كدا.
فهم غريب...لكن برضو فيه (حرفنة).
فكرة
في واحد شالوا ليه (اللوز).
الدكتور بعد (7) يوم ..قال ليه : أها كيف إن شاء الله بقيت كويس؟.
زولكم قال للدكتور ..والله أنا يا دكتور لو ما شالوا لي (كروجر) ما ببقى كويس.
استفسار مستعجل
سأل ليه زول ..قال ليه أنت تعال هنا (الفسيخ) من الطيور؟.
قال ليه : ما من الطيور ..لكن من البعملوا فيه ناس المريخ ديل.
روسي ما عندو شيء
روسي (غريب) عندو نضارة ...وصلعة ...وكرش.
في واحد قال ليه : والله لو غيّرت (نضارتك) دي ...تنفع (مدير فني).
شنطة المدرسة
مفروض ناس الروضة يضيفوا ليهم (مقرر) جديد في دراستهم ...مفروض يعملوا ليه حصة (ضربات جزاء).
ما معقول باسكال في الخرطوم في مباراة الذهاب يضيّع ليه (ضربة جزاء)...وتراوري في كمبالا في مباراة الاياب يضيّع ليه (ضربة جزاء)..
المقرر بتاع (التمهيدي) دا فيه حاجة غلط.
معقولة تطيروا من دور ال (64) وتضيعوا في (ضربات الجزاء) كمان.
قندران ماشي غلط
بتاع (قندران) جابو ليه (ولد).
الولد من سمايتو ...أبوه جاب ليه (ركشة) ونزلو ليك السوق ..قال ليه (طلع مصاريفك) ما تقعد لي كدا ، زي ناس المريخ.
هسع ناس المريخ الدخلهم هنا شنو؟.
ترلة مقطورة
لو ناس المريخ ..عاوزين يحلوا مشاكلهم...يدفعوا ليهم (12) مليار جنيه للشركة الراعية ويلعبوا مباراة تاني مع (بايرن ميونخ) يشغلوا بيها الناس شوية.
اتغلبوا اتنين تاني ..وقولوا المريخ قدم عرض جميل.
إن شاء الله (العرض الجميل) يبقى ليكم (فطير بي لبن).
سطر مسخن شوية
تراوري لو رجعتوه للدفاع ولعبتوه (باك) يمكن يخلي الحركات البعمل فيها دي.
على الأقل تاني لو ضيّع ليه (فرصة) ما بعمل حركاتو دي ...ما في زول لائم ليه (باك) لو ما جاب ليه قون ..أو حتى لو ضيّع ليه (ضربة جزاء).
هسع وينها (السخانة) هنا.
تبش
روسي طقتو (كهربة)...
قام بعد (21) يوم ...يتنفض ..الناس اتلموا فيه..قال ليهم : ما في (زلابية) هنا.
الزلابية عاوز بيها شنو يا ود الناس..لو ما عدم موضوع؟.
أنت (روسي) مولود في الميناء البري ولّا شنو؟.
شوال دغالة
الزول الدغل بتعرفو من (موبايلو).
بتلقاه عاملو (صامت).
وإن شاف المكالمة ما برد.
تلاقيه بعد (14) يوم تقول ليه : مالك ما بترد؟ ..يقول ليك والله عامل التلفون (صامت).
عاملو (صامت)...تلفون هو ولّا أمينة رزق.
صفيحة غتاتة
قالوا ناس الولاية ..جهّزوا من هسع أغنية (عجبوني الليلة جوا ترسوا البحر رجعو)...للخريف القادم.
الغريبة طلّعوا (21) مليار جنيه استعدادًا للخريف.
هسع (عجبوني الليلة جوا ترسوا البحر رجعو) عاوزة ليها (21) مليار جنيه.
