في السلك بابكر سلك فاتحه بي تانكر بنزين ؟؟؟؟ *الدعم *توفير الدعم *رفع الدعم *كلها اضحت عبارات لا تفارق السنتنا *لا سياسيا ولا رياضيا *بل ولا منزليا *لانو الشفع بقت لغتهم هي خطاب اليوم *يختوا العشا *يقولوا لبعضهم لو بابا دعم لينا العشا ده بي زرقه يكون ماقصر *امهم تناديهم للغدا *يقولوا ليها الغدا مدعوم ولا ياهو بتاع كلو يوم !!! *واحد فيهم بتونس مع اخوانو *قال ليهم مشيت ناس جدو *رقعني ليك بي عشرايه دعمت موقفي شديد *كلامنا كلو بقي الدعم والداعمين *توفير الدعم ورفع الدعم *في السوق ده *تقول بي كم ؟؟؟ *يقولوا ليك بي ميه وخمسين *تقول ليه ؟؟؟ *يقولوا ليك مامدعوم *يا حليل الدعم وايام الدعم *حتي في مصر *بقولوا يقطع الدعم ويقطه سنينو *المهم *ونسي قال انهم صارفين قرابة العشره مليارات *وانو مافي زول دعمهم غير جمال وسوداكال واخيرا الفادني بي فرد مليار *كلها كم دولار يا فادني !!! *المهم اخير من عدمها *لكن ونسي ماورانا اين تم صرف العشره مليار ؟؟؟ *هل كانت في ديون يا سي ونسي وانت قلت لينا الخزنه ما استلمت فيها قرش ؟؟؟ *اذا في ديون *بتاعت شنو يا حبيب ؟؟؟ *الشفافيه مهمه شديد *وبرضك بتدعم موقفكم *المهم *المريخ يحتاج لدعم عاجل *والمواطن يحتاج لدعم *مشكلة المريخ محلوله *استنهاض رؤوس الاموال المريخيه بحل الاشكاليه *وتفعيلها في الاستثمار بحل المشكله من اساسها *فلا تعطني سمكه *ولكن علمني كيف اصطاد *جيب السناره يا ونسي *علمنا نمسكها كيف *وورينا محل الصارقيل *وبرانا بنعرف مكان البلطي ضارب *بلطي كفه *يكفينا ويملي عيننا *ولكن ان نستقطب الدعم *لنصرفه في التسيير *فحليمه بترجع لي قديمه *وتجور الساقيه *من البحر وللبحر *فاهمني يا مجلسنا ؟؟؟ *ايها الناس *وزارة الماليه تتحدث عن الدعم *والمواطن يسأل ياتو دعم ؟؟؟؟ *وزارة الماليه ترفض رفع الدعم *والمواطن يسأل *المقصود برفع الدعم زيادته ام شيلتو كلو كلو ؟؟؟ *وفي الحالتين اين هو الدعم ؟؟؟ *اي شئ تجاري بالسعر الجاري *حتي العوائد البتتشال لحفر المجاري *بتمشي محل تاني ونفتقد للمجاري في الحواري *الدعم يا سيدي الوزير *هو التقليل من اوجه الصرف الحكومي الجنوني *صدقني بوفر ليك اموال تحيرك *اذا في زول كبير ماشي بكا * تلقي قدامو خمسين سارينا *وسته اوبامات وعربيتين مارسيدس *ووراهو سطاشر اوباما *غير الملاكي البالجمبات البنسبه لينا مامعروفات *ده كلو بنزين حكومه *شوف الصرف ده *زول يشيل فاتحه بتانكر بنزين *لزومو شنو اذا كان رئيس الجمهوريه بنلاقيهو في المناسبات الاجتماعيه بدون الهيلمانات دي *داير تدعمنا يا وزيرنا *وقف تانكرات البنزين البنسدد تمنها من ضرائبنا ومن رسوم نفاياتنا ومن اسعار سلعنا ومن رسوم انتاجنا ومن تمن جالون بنزينا ومن دمنا *الفاتحه بي تانكر البنزين ما ضروري *تلاته بكيات بالطريقه دي تكلفة العذاء ليهم بتخدر من الباقير الوراني وحتي مدني *بالطريقه دي لو حصلت خمسه بكيات *الا تجينا اغاثه من بره *ايها الناس *ان تنصروا الله ينصركم *اها *نجي لي شمارات والي الخرتوم *معقوله يا والينا *فاتحه بي تانكر بنزين من مالا لينا ومفروض يلينا ؟؟؟؟ سلك كهربا ننساك كيف والكلب لو سمع بي بكا بقول سجمكم صرف زي الصرف وياريت لو فيهو خته في الكشف والي لقاء سلك