البرهان يتفقد مستشفى الرباط ويوجّه بتطوير الخدمات الطبية الشرطية    (أماجوجو والنقطة 54)    الأهلي يخسر من ساردية بدوري شندي    مجلس الهلال يترقب قرار الانضباط ويعلن الاستعداد للتصعيد.. والكاف في مأزق كبير    حاكم إقليم دارفور يجتمع مع المديرة العامة بالإنابة لمكتب تنسيق الشؤون الإنسانية بجنيف (OCHA)    شراكة استراتيجية بين "الشباب والرياضة" و"الصناعة" لتمكين المبتكرين ودعم الإنتاج الشبابي    من إيطاليا إلى بولندا.. سرقة 413 ألف قطعة شوكولاتة.. ما القصة؟    ترامب: إيران منحتنا 20 ناقلة نفط والشحن يبدأ غدًا    بوتين: روسيا مستعدة لاستضافة الألعاب الأولمبية في المستقبل    شاهد بالفيديو.. طبيب بمستشفى نيالا يشكو من انتهاكات أفراد الدعم السريع ويحكي قصة نجاته من القتل بعدما رفع أحدهم السلاح في وجهه    شاهد بالصورة والفيديو.. الراقصة الحسناء "هاجر" تشعل حفل طمبور بفاصل من الرقص الاستعراضي والجمهور يتفاعل معها بطريقة هستيرية    الهلال السوداني يفجر أزمة منشطات ضد نهضة بركان في دوري أبطال إفريقيا    أزمة منشطات تشعل دوري أبطال إفريقيا.. الهلال السوداني يشكو نهضة بركان المغربي ل"الكاف"    برشلونة يتلقى دفعة معنوية قبل مواجهة أتلتيكو مدريد    كريم عبد العزيز وفريق مطلوب عائليا يبحثون عن دولة أوروبية للتصوير الخارجى    أيهما أكثر فائدة القهوة أم عصير البرتقال صباحًا.. والكميات المناسبة    آلام الدورة ليست دائمًا طبيعية.. إشارات تكشف بطانة الرحم المهاجرة مبكرًا    فصيلة الدم تكشف احتمالية الإصابة بالسكري    مجهولين ينبشون قبر رجل دين بولاية الجزيرة وينقلون جثمانه إلى جهة غير معلومة    السيسي للرئيس ترامب: لا أحد يمكنه وقف الحرب في المنطقة إلا أنت    "فيفا" يتّخذ موقفًا حازمًا بشأن مشاركة إيران في كأس العالم    شاهد بالصورة والفيديو.. بعد إيمي سمير غانم.. "كورال" مصري يغني أغنية الفنانة السودانية توتة عذاب "الترند" وشاعر الأغنية يعبر عن إعجابه    شاهد بالفيديو.. حمزة عوض الله يهاجم الشاعرة داليا الياس بسبب تبادل السلام بالأحضان مع المطرب شريف الفحيل ويصف المدافعين عنها بأصحاب الفكر الديوثي    قوى سياسية في السودان تعلن عن مقاطعة مؤتمر في برلين    عثمان ميرغني يكتب: حلفا .. والشمالية..    شاهد بالفيديو.. في ظهور مثير.. رجل يمسك بيد الفنانة هدى عربي كأنه عريسها ويدخل بها لقاعة الفرح والشائعات تلاحق السلطانة هل هو زوجها؟    دار الأوبرا تحتفى بذكرى رحيل عبد الحليم حافظ بحفلين اليوم وغداً    مصر.. الدولار يقترب من 54 جنيها لأول مرة    نتفليكس تزيل الستار عن أول صورة لشخصية جو كينيدى الأب فى مسلسلها الجديد    سارة بركة: أحمد العوضى مجتهد بشكل كبير وبيحب شغله جدا    اختيار غير متوقع لمستقبل "الملك المصري"    وجبة سمك تُنهي حياة 3 سودانيين بالقاهرة وتتسبب في إصابة 4 آخرين بحالة تسمم غذائى حاد    بسبب ضعف الراتب.. وزير الثروة الحيوانية بالسودان يبحث عن عمل إضافي    رئيس الوزراء يصدر قرارًا بشأن الرسوم الجديدة في المعابر    محمد عبد الباسط يكتب: لهذا تحركت باكستان الآن للوساطة بين أمريكا وإيران    السكوت على هذا الأمر لا يرضي الله ولا رسوله!!    ارتفاع أسعار الذهب في السودان    الخليج الضحية الكبرى: إيران وجهت 83% من هجماتها إليه… و17% فقط إلى إسرائيل    مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية    ضبط 2800 قندول بنقو بالجزيرة في عملية نوعية لمكافحة التهريب    ترامب يصدر أوامره ويكشف تطورات مثيرة مع إيران    الأمن يداهم مخزن يبيع الوقود المهرب لعصابات التنقيب عن الذهب    تراجع معدّل التضخّم في السودان    رئيس الأهلي مدني وابنه يتعرضان لحادث مروع    المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة    ضبط 238 كجم من "الآيس" وأسلحة بجانب نحاس بولاية البحر الاحمر    ضبط 238 كجم من "الآيس" وأسلحة بجانب نحاس بولاية البحر الاحمر    الشيخ بن زومة.. إلى جنة الخلد    قيم الهلال المتوارثة يجب أن تبقى أبد الدهر    في زمن الضجيج.. القرآن بوصلة المعنى والسكينة    السودان.. الدفاع المدني يستعين ب"التوك توك"    د.مزمل أبو القاسم يكتب: دموع الباز.. وزاهر! (2)    طفح جلدي في رقبة الرئيس ترمب يثير تساؤلات حول صحته    صوت لا يغيب.. محمد رفعت ورحلة الآذان الخالد في رمضان    أجهزة الأمن السودانية تنهي مغامرات لص الصيدليات في عطبرة    شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم    شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم    السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



مازن شمس الفلاح ..خلاص كبرت وليك 19 سنة
كورة سودانية نشر في كورة سودانية يوم 03 - 01 - 2016


دق الدلجة
محمد عبدالماجد
مازن شمس الفلاح ..خلاص كبرت وليك 19 سنة

تفتكروا الفنان الراحل محمد وردي عندما غنى اغنية (خلاص كبرتي وليك 19 سنة)...تفتكروا غناها (لعب).
وردي دا ما عندو اغنية ساكت.
اصلو ما بقول ليه شيء ساكت.
الشكل الخارجي للاغنية – بقول ليك الاغنية (عاطفية).
الاغنية فيها (عمق) اكبر من الشكل الخارجي دي.
اغنية (خلاص كبرتي وليك 19 سنة) – نحن بي فهمنا المحدود دا شلناها وطبقناها ليك في الجماعة.
نزلنا ليك فيهم (تشليع).
ما خلينا ليهم زول.
اي لاعب في الرديف فيهم يصل ال (19) ويكون فيه فايدة بنجيبو الهلال.
اي موهبة (شابة) كدا ...تجي (الجوهرة الزرقاء).
دي حاجة ولا بنكضب فيها.
ولا بنجامل.
زمان حمودة بشير كان بيلعب (تحت السن) – ايام (الناصية) بتكون فاتحة في شارع – في ركن.
هسع (الناصية) بقت محاطة من الاربع جوانب.
البلد دي بقى ما فيها (ناصية).
حليل زمن (الناصية) فاتحة في شارعين.
زمان اي زول يوصف ليك بيتو – بقول ليك بيتنا (ناصية).
الدنيا كانت بخيرها.
ما كانت في (زحمة) كدا.
تعال شوف هسع دي.
زول يوصف ليك بيتو داخل بيت.
البيت تطلعو من (19) بيت.
زي (كرت النص).
هسع دا ما موضوعنا في البرد دا.
حمودة بشير عندما كان في المريخ بيلعب تحت السن ...وجدنا فيه المواصفات الهلالية التامة.
خلينا كمل المرحلة (التمهيدية) في المريخ – ونقلناه الهلال.
اصلو ناس المريخ ديل ناس (تمهيدي) ساكت.
محمد عبدالوهاب كابتن فريق الرديف في المريخ ...برضو (تحت السن) – نقلناه الهلال ليلعب في رديف الهلال.
احمد ميسي موهبة فى (رديف) المريخ – ما كضبنا قررنا ننقلها الهلال.
الناس الكبيرة في السن في المريخ ما عندنا معاهم قضية.
ديل بنخسر بيهم ناس المريخ ساكت.
ناس رمضان عجب وامير كمال وراجي عبدالعاطي ومصعب عمر.
المريخ ما بغطي (رديفه).
رديفه (مكشوف).
السنة دي سجلنا منهم باسل واباذر واحمد ميسي.
احسن اتنين في رديف وشباب المريخ انتقلوا للهلال.
الضربة الكبرى كانت في انتقال (شيبوب) لاعب رديف المريخ واساسي الفريق الاول (الهاوي) للهلال.
الضربات دي كلها في (الصميم).
في الرديف يعني.
ضربة شيبوب فرتكت ليك الجماعة – وفصلت ليك الاكوام.
جمال الوالي بقى كوم ..وسوداكال كوم .. وابوجريشة كوم ...واسامة ونسي كوم.
الفادني ذاتو عمل ليه كوم.
دا ما كان (شيبوب).
المريخ الايامات دي (داعش) عديل كدا.
تهديدات...وتصريحات.
وشكاوي.
وتسلق (مواسير).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
حمودة بشير ...محمد عبدالوهاب ..... أحمد ميسي ...باسل ..اباذر..شيبوب ..ديل كلهم تنطبق عليهم اغنية محمد وردي (عمر الزهور ..عمر الغرام.. عمر المنى).
ممكن نقول ان هذه السن (عمر الزهور) هو عمر الانتقال للهلال.
والعمر دا معروف (عمر صعب)...ما (عمر بخيت) يعني.
العمر دا فيه (تقلبات) عجيبة.
اهم ملامحه تتمثل في الآتي :
تنط من الطابق الثاني.
تتسلق على المواسير.
اختفاء من الفندق الساعة الثانية صباحا.
فقدان الشاحن.
إلتقاط عدد من الصور مع شخصيات غير معروفة (عبدالتام نموذجا).
تصريحات غير مسؤولة.
كل هذه الصفات بتتجسد وتظهر في الزول (الهاوي) – والذي يكون في (عمر الزهور).
لذلك يبقى انتقاله للهلال ساهل.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن هسع بي نفس الفهم.
والنط من الطابق الثالث.
والتزحلق على المواسير...عاوزين نحدثكم عن (زول) كدا.
الزول في الاغنية السودانية – شخصية غير محددة.
وغير معروفة.
يمكن نبحر ليكم في الحتة دي.
زول (شجرابي) الحايم في (الاعمدة) ظل الى وقتنا هذا مجهول.
ما معروف هو منو؟.
وجنسو شنو؟.
ومشكلتو ايه في الحياة؟.
زول ساكت.
نحن على طريقة لغة شجرابي (الزولية) بنقول ليكم الزول دا امسكوه عليكم.
الزول دا شوفوا مشكلتو شنو؟.
الزول دا اقعدوا معاهو.
الزول دا اسمعو ليه.
الزول منو؟.
الزول هو مازن شمس الفلاح – عشان افصل ليكم بين زولنا دا وزول عبدالمنعم شجرابي.
نحن اصلو (زول) من المريخ ما قاعدين ندورو.
ولا بنرحب بيه.
إلّا الزول يبقى علينا شديد كدا.
ويكون مُصر يقطعها مع المريخ.
شرط اساسي اللاعب يكون في عمر الزهور ...(19 سنة 22 سنة)..اكتر من كدا ما بدقها معانا.
نحن ناس المريخ ديل ما عاوزين منهم لاعب إلّا يكون بيلعب في (الرديف).
مازن شمس الفلاح هسع جاب ليه حركات.
زولكم في (عمر الزهور).
ايوا عمر الزهور – ما عمر بخيت.
بدأت عليه ملامح (التزحلق) على الماسورة.
القفز من الطابق الثالث.
زولكم دا شوية كدا ويلبس (الكسكتة).
باقى ليه شوية.
ابوجريشة ذاتو شايلها معاه شديد.
مازن شمس الفلاح ..ما اديتوه قروشو.
وما طلعتو ليه جواز (ازرق).
ومسجلنو باسم اخوه.
البقعدو معاكم شنو؟.
الجابرو شنو يلعب مع ناس ما عندها اي فكرة في الكورة.
عاوزنو يلعب ليكم مع ناس ضفر.
وكريم الحسن.
وعطرون.
خلوه يشوف مستقبلو.
انتوا ما عارفين ناس بشه الصغير وولاءالدين وابوعاقلة في تونس بيعملوا في شنو؟.
مصطفى سعيد ذاتو ...هيثم مصطفى قال الزول دا كورتو اكبر من سنو.
في الهلال التألق والابداع من نصيب الشباب.
الفرق بين الهلال والمريخ ان اللاعب الموهوب واللاعب الشاب في المريخ بيلقى كل ذلك الاهمال.
اهمل شيبوب حتى مشى بي كرعينو مرتين للهلال.
وهذا مازن شمس الفلاح يجد تلك المعاملة القاسية من المريخ ومن ابوجريشة.
انت يا ابوجريشة – الزول دا شايلها معاهو كدا مالك؟.
معسكر المريخ في اثيوبيا الآن ما فيه اي لاعب من (الرديف).
اللاعب الوحيد الذي كان يمكن ان يكون في اديس ابابا مع المريخ هو اللاعب (شيبوب).
وشيبوب بالذات هو مع الهلال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الظاهر والواضح كدا ان (كسكتة) الكاردينال قادرة على جذب عدد كبير من لاعبي المريخ.
قالوا ليك مازن شمس الفلاح جابوا ليه ارقام الفنائل كلها.
قالوا ليه عاوز تلبس ياتو رقم.
4 ام 7 ام 11 ام 14 ام 22.
عاوز تلبس شنو؟.
10؟؟؟؟.
مازن شمس الفلاح قال ليهم لا عاوز البس (7) ولا عاوز البس (8) ولا عاوز البس (10).
مازن شمس الفلاح قال ليهم عاوز ألبس (الكسكتة).
المريخاب ختوا ايديهم في رأسهم – وقالوا ليهم (الكسكتة) نجيبها ليك من وين؟.
الكسكتة دي يا مازن شمس الفلاح إلّا تمشي ليها في (قاردن سيتي).
موضوع الكسكتة يا ريت لو وقف على مازن شمس الفلاح ..الموضوع دا ماشي على (ابراهومة).
ابراهومة ذاتو بيعمل في نفس الحركات.
الكسكتة دي وقت ظهرت في رأس (شيبوب) ..تاني ما في زول بيقعد ليكم في المريخ.
البقعدهم في المريخ في (البرد) دا شنو؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
...........
و
الاصابات مازالت تهدد معسكر الهلال.
لا بد من كونسلتو طبي كامل يتابع هذه الحالات.
محمد عبدالرحمن – وليد علاءالدين – محمود ام بدة – موكورو – كينيدي – مالك – كلهم تعرضوا لاصابات في معسكر الهلال.
التسجيلات تبقى لها 5 اشهر فقط.
منذ الآن رتبوا اوضاعكم.
وجهزوا خططكم واعملوا اللازم.
بكري بشير لاعب هلال الابيض قدم موقفا كبيرا في التسجيلات الماضية.
بكري بشير فضل البقاء في هلال الابيض من الانتقال الى المريخ.
وشيبوب فضل القعاد ساي من اللعب في المريخ.
قرعة الممتاز ..منذ الآن اتوقع ان لا يلعب الامل في الدورة الاولى في عطبرة مع المريخ.
طابخنها.
واتوقع ان يلعب الهلال اول مبارياته خارج الخرطوم امام الاهلي شندي.
طابخنها.
وسوف يلعب الهلال كذلك في الاسابيع الاولى مع الخرطوم الوطني.
انتوا فاكرنها (قرعة).
قرعة شنو؟.
القرعة بقت طبخة معروفة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
.........
السيدة (ل) – السنة دي مالها جارية كدا؟.
وقرّط على كدا.

انقر هنا لقراءة الخبر من مصدره.