في السلك بابكر سلك نحنا شعب فنااااااااان *كلنا بنتكلم عن الشعب السوداني من زوايا مختلفه *الشعب الكريم *ناس حرم نضبح ليك *الشعب الشجاع *محمد علي باشا لما دار الرجال مامشي تكساس ولا برلين *جا السودان *الشعب اللماح الفطن *وليست قصص ود حبوبه الا تأكيد علي فطنتنا وحكمتنا وحسن توقعنا وتنبؤنا *واذكر انهم قالوا لينا ود حبوبه قال *آخر الزمان الكلام بالخيوط والسفر بالبيوت *وكان يقصد التلفونات والقطر *ولو قعدوا معاهو شويه *كان تنبأ ليهم بالزمان البعد آخر الزمان *وكان قال فيهو *الكلام بدون خيوط *موبايلات يا عمك ونت وكده *والسفر بدون بيوت *ياحليل القطر *نحنا شعب اوصافهو كتيره *جدنا تهراقا العلم الناس الحرابه *ماعلمهم المحبه *علمهم الحرابه *وشعب ينادي بالاتحاد من زمنا بدري *ويؤمن بان قوتنا في وحدتنا *مرفعينين ضبلان وهازل شقو بطن الاسد المنازل *نحنا ما هينين *ونحنا شعب نفخر باننا مأمونين علي بت الحله وبت القبيله وحتي المره الغريبه *قال الشاعر في فخره بشجاعته وامانته علي المرأه *أنا الدابي الرصد تحت الحجر والسارا *انا المابخاف الموت وكت الرجال تضارا *انا اخو البت المعاي شدت رحالها *انأ المأمون علي مرة الفريق والجارا *ومانفاج امدرمان القديمه الا تعبيرا عن تلك الامانه الشرفيه وقدسية شرف الاسر *برغم من انو اليومين دي امانه نهي بالكل نهي عند البعض *ولكنهم قله *تفرط تلقي الامانه لحقت مدارس بيت الامانه *ايها الناس *نحنا ما ساهلين *نحنا فنانين شديد ومميزين *بلادنا برضك مميزه *حتي الطير من اطراف تقيها شبع *بلادي سلام برغم الاحداث التي قادتنا للخلف طويلا *بلادي امان برغم تفلتات البعض واعتداءات العصابات التي تطلق علي نفسها نيقا *نحنا شعب فنان *حتي في الاختلاس ده بنختلس بي فن متفرد *صاحب المنصب البحب يختلس بتفنن في اختلاسو *يحير ليك المال العام قبل ما يحير الدوله *ويخلي الشعب ممحن *الشعب كلو بقي خاتي يدو في خدو وخدو يبس لو دايرين نشلخو الا بي مبرد *نبرد بس *موس مابتشيل من الخشب *نحنا شعب فنان شديد *في السوق ده تقول للزول بي كم *يقول ليك بي مية وخمسين *تقو ليهو خليتها *يقول ليك تعال شيلها بي تلتين *تقول ليهو بي سبعه *يقول ليك شيلها بي تمنيه *ويضيف *والله انا استوسمت في خير وداير ابايعك *ده دحين مافن !!! *نحنا الشعب الوحيد الفي الدنيا بسأل عن الحاجه بي كم *لانو اي زول ببيع حسب هواهو *في شعب لاقي هواء زي ده ؟؟؟ *وفي شعب بلقي هواء زي ده لو ما فنان ؟؟؟ *ياقوم *فنون الشعب السوداني في مناحي كثيره *الليله دايرين نمسك واحد من تلك الفنون *الشعب المخرج *ياخ بنخرج ليك الاحداث بصورة هوليود وبوليود ما فكرن فيها *صورة بت لابسه دهب *نتداولها في الفيس *نقول دي بت فلان الفلاني *والدهب ده جابو ليها هديه فلان الفلتكاني صاحب ابوها *ونحدد اسم البت واسم ابوها واسم صاحب ابوها *وتطلع الحقيقه انو البت دي ما بت فلان *واللابساهو ده ما دهب *ده دهب الجمل ساي *دهب صيني *وفي الاخراج نثبت انو ده دهب الشعب *ونتكلم عن مناجمنا في جبيت *وعن تعديننا العشوائي المن الصحاري خلانا نحفر خشم البيت *راجين الجهاز يصفر *ولا يصفر الا الاسعاف والتلاته تسعات والسارينات *وراجين الجهاز يصفر *دهب الشعب خليهو *سمعتو قصة سرقة دهب سوق امدرمان ؟؟؟؟ *علي بال ما الشرطه قبضت الحرامي *شخصيا سمعت سبعه روايات بسبعه قراءات مختلفه عن السرقه وتفاصيلها *نحن شعب مخرج فلته *وتعال شوف موهبة الاخراج عند المسئولين *ياخ بقولوا كلام كاتب السيناريو ماقالو *وبخرجوا ليك المواقف والاحداث بطريقه *نور الدمرداش ما فكر فيها *تتذكروا بتاع اللحام الطارت منو شراره حرقت اليرموك ؟؟؟ *اخراج من امو يا عمك *لكن *اكتر حاجه عجبتني في مواهب الشعب السوداني الفنان *هي الشعب المونتير *شعب بمنتج ليك القصص بي موسيقي تصويريه ومؤثرات صوتيه ما خطرت علي بال زول *شوفوا القصه دي *احمد : شفت الحادث بتاع شارع الشنقيطي يا حسن ؟؟ *حسن : كيييييييف ,,,وحضرتو كمان *احمد : احكي لي احكي لي *شفت جمب حديقه امدرمان الكبري في التقاطع *بتاع الدفار كان جاي من علي المنطقه فاتح ليك تيكه فووووووووووووو *الاستوب بنققققققققققققق ولع ليك احمر *بتاع الهايص فيو جا داخل الشارع *بتاع الدفار كرووووو كبسو ليك *بتاع الهايس فقد توازنو وتووووش دخل ليك في بتاع الكليلك طااااخ *بتاع الكليلك اوردولب اتقلب ليك *بتاع الحركة صفر تووووووووت *كان في كلب جاري *طششششششششش دخل ليك في الميه *في واحد خاف من الكلب *جمبلوق وقع ليك في المويه *كان في بتاع ركشه ماشي *وررررررررررررر *لفه ليك من الحفره وقبض فرمله *حيييييييييييييييييييييك *نزل كبس ليك بتاع الدفار بونيه *تووووف *كان في بتاع مباحث متلبد *بس كحل ليك بتاع الركشه *دنق دنق *وجيييييييييغ خنق ليك بتاع الركشه *جا الاسعاف ناني ناني ناني *شالهم كلهم وروووو قفل ليك الباب *وفوووووو فحط *ايها الناس *ان تنصروا الله ينصركم *اها نجي لي شمارات والي الخرتوم *كان شفت يا والينا *واحد سألنا وقال لينا *ماهي مخرجات الحوار الوطني الفينا *قلنا ليهو هو انتهي يا اخينا ؟؟؟؟ سلك كهربا ننساك كيف والكلب قام علي زول فيييو والزول جري فرررر والكلب عضاهو جك والزول صرخ جاااااااك والي لقاء سلك
