(أنشر الفصل الثالث والأخير من كوميديا سياسية كتبتها في نحو 2007. أرجو أن يطلعني باكراً الراغب في استثمارها في عمل مسرحي بأي صورة وفي أي منبر) الفصل الثالث المشهد الأول (في مكتب الهيئة الرئاسية لمكافحة الفقر. إعلان عن ندوة يقدمها أمين الفكر والمنهجية بالمؤتمر الأهلي لموظفي الهيئة بخط بارز. يدخل عوض على بدوي) عوض: فاجأتك. جينا نتحسس ونتجسس. إنت ما سمعت نميري قال إسلامو إسلام نطيط الحيشان. نحن خوتنا برضو بتاعة نطيط المكاتب. الجكس وين؟ بدوي: دي هنظبة والا شنو؟ عوض: (كأنه يصوب مسدساً): طَلَّع الجكس. ورينا بت الحور القالوها دي. ناس استشهدوا عشانها وواقفين صف قٌرعتهم ما جات. وإنت يا محظوظ تجيك لعن مكتبك. بدوي: وإنت المقعدك لهسع شنو. ما سافرت ليه؟. عوض: أول التبادي مشيت للدكتور قال تكشف الفسحة. وتانياً قلنا نكحل العين بأختنا إن لو in law (رقصة كشف). ونشوف واتوسها إن لو (كشف). وبعدين شقتها إن لو (كشف). إن لولي إن لو والسلم نا يلو في نايلو ، دنيا دبنقا قال دردقي بشويش. بدوي: ودا ما يطلبه المتبطلون. عوض: يا أبو البدوي زورنا مرة. (يلتفت تظهر سلمي من بعد) أوعك تقولي الجايا دي. بموت. بموت ليك. بموت علي دين محمد. بستشهد عديل. دا انا ذاتو الفقري ذاتي ما بقدر عليها. إنت قدرته عليها كيف يا . . . ضلالي. بدوي: بَطِل. ما تحرجنا ورانا محاضرة زي ما شايف (يشير للإعلان) (لسلمي) دا اخويا عوض الكلمته عليك. ودي سلمي (اخليكم دقيقة اشوف تجهيزات المحاضرة). عوض: اتشرفنا. سلمي: بالأكتر. بدوي قال لي مفكر تغترب. عوض: لكين ما كلمك أنا ناقص اسم اغتراب. دي أهم اسم في اللغة العربية. أهم من فوك وابوك بتاعة الاسماء الخمسة الخمشة مدد يا عاصمة الثقافة العربية (يرقص): فوك وابوك وحموك إلخ. سلمي: (تضحك) ما مهم. يمكن البلد تمشي كويس. عوض: دي حتمشي وين يا سلمي. دي عندها عمي كباسة. ولو سألتيني مين كباسة دي محاربك من اسع. سلمى: كباسة كباسة وهو نحنا الما عارفنو شوية. عوض: دي ماشه لورا (مشية الفراعنة) ولو كانت ماشي لورا صاح كنا عرفنا أولنا من آخرنا. كنا وصلنا لميس، أي ميس مش مهم. سمعتي بالقال لواحد يشكى حالو. قال لصاحبه والله معلق بين السما والواطة. داك قام قال ليهو والله سمح إنته الإتجيهته. سلمى: (تضحك) ودا عِلقيتو كيف يا ربي. عوض: بسبيبة. سلمى. ليه متشاءم كده. عووض: (لنفسه) مش قلتلك يا بدوي مش قلتلك دي من ناس الحته دي المتفائلين بمستقبل سعيد للانسانية. طبعاً مرفوعين بالشقة ومجرورين بالإوتس. (لسلمى) سافر ففي السفار خمشة فوائد. سلمي (تضحك) ولو قالو ليك تهاجر يا تو بلد. عوض: بلد أبو صلعة مع إنو نازل الأيام دي . ناس الإنقاذ قدرو عليهو والله. وشايف ديون الإمريكان كترت زي حالنا كده. لكين أي بلد تاني كويس بس. معاي. سلمى: والله ما تلقى زي هنا. عوض: إنت بجدك. دي بلد مستمنحة فقط لاغير. جني وجن سكنة البلد المستمنحة. كل صباح رحمان يدنا على باب كريم: امنحونا مما منحكم الله. مناي يارب بلد مانحة إن شاء الله سكسونيا السفلي الطالعة في الكفر دي. والغريبة هي سفلى وما عندها واحدة عليا. إيه الشذوذ الجغرافي دا؟ سلمى: مع البترول دا حنمنح قريب جداً. عوض: يا سلمي تنقسم البلدان إلى ثلاث: مانحة وممنوحة ومستمنحة. وقسمتنا طلعت في الأخيرة لأنو قدر ما عاوزين منحة ما منحوها لينا. قالولنا منحناكم كتير وما فيش فايدة. إنتو ما استفدتو مما منحناك. يعني زي الطيش عند ربو يعيش. وقالو كده تعالو نادي باريس نشوفلكم دبارة. شفت اللؤم ده. يعني شوف التلتله دي؟ نادي الزهرة بأم درمان مالو؟ زمان جانا من باريس عريس ومن هئية التدريس ولبيس وبعد شوية لقيناهو شال سلاحو وطلع جبل واللا غابة. دا البتعلمو الناس في باريس؟ (من أغنية دكتور صلاح الشايل السلاح). يا اخونا باريس خلوها نمشي أي نادي في ام درمان العاصمة الوطنية دي بتاعة ود نفاش والهادي الضلالي. نحن ذاتو ناقل وطني يودينا باريس ذاتو ما في. قالو إلا باريس. باريس باريس. وحنغالط ليه. في طالب منحة يغالط. ولما مشينا نادي باريس عاينو كده في أوراقنا وقالو والله البوكسن بتاعم بدخلكم الدول المستمنحة بس. والله بدر الدين سليمان شاهد على الكلام دا. زي ما داير طب الجزيرة البوكسن يوديك طب الخرطوم وما تخلنيش اقول. وزينا مستمنح كتير. تشاد وبركينا فاسو وبنغلاديش. اقول نادرة. سلمي: شنو؟ عوض: بس قبل ما أجي اخدت فطور على كفتيريا قريبة وسمعت خبر عن بنغلاديش مستمنحة لود عينها. الخبر قال أن السيول اجتاحت غرب البلاد وشرق البلاد ضربها زلزال بدرجة 5 ونص بمقياس ركتر وإنو منظمة الصحة العالمية تشتبه أنو أتنين من المواطنين بتاعينها ماتو بأثر أنفلونزا الطيور وإنو في دكا في مظاهرات لإزاحة رئيس الجمهورية. سلمي: دا كلو؟ عوض: والله حزنت. ووقفت الأكل وعاينت للمذيع شذرا وقت ليهو قفلت نفسنا الله يقفل نفسك. والله لو يدوني مليون دولار ما اذيع خبر زي ده. بوم. غراب البين إنته. هو المذيعين ما عندهم ميثاق شرف يمنع من تبليغ زفارة ذي دي! عالم فصيحة فصاحة. سلمي: (ضاحكة) دا البيخلينا نستمنح بكرة وأصيلا (يدخل بدوي) بدوي: مواعيد المحاضرة. نمشي. باي عوض. عوض: عاوزك في كلمة قبل أمشي. عن إذنك يا سلمي. (يختليان) عوض: يا اخي انا ماشي لكشف الفسحة. بيدوك طبعاً علبة سجاير ومره كوز صلصة ومره مصيبة تاخدهم. البحيرني أديهم من البتاع بتاع البتاع قدر شنو؟ يعني المناسب! (بدوي متحيراً) أنا عارف هم طبعاً مش عاوزين لوري منو؟ مش زبالة طبعاً. حيبلطوبو بيت. لا. تفتكر شنو؟ نص والا ربع؟ والله حيرونا! بدوي: (ليصرفه عنه): ومقرطه ليه ما تديهم البتاع بتاع البتاع كلو. ياخي. واللا عاوز الباقي لعند اللزوم. عوض: ثقيل (يلوح لسلمي) باي. فرصة سعيدة. نشوفك ( بدوي وسلمي في طريقهما للخروج. عوض يلوح لبدوي بيده ويجعلها في شكل كوب الفسحة كأنه يقول كل الإناء، نص، ربع، أو شنو؟). بدوي (خارجا): قَدِّر ظروفهم وخلاص. (يتحرك لمقدمة المسرح) حكاية الاسماء دي ما تخلص أبداً. كان في خالنا ساكن العرضة سميناهو الجار الملاصق. كان متحسر بشكل أنو جارو اصلو ما طلب من البلدية يفتح دكان واللا طاحونة واللا طابونة ولا حتى سبيل موية. بيت ناصية وحاااف كده. قلنالو مالك بيه. يا اخي دا حتى ريحك. يعمل ليك طاحونة تدقدق فيك طول اليوم. قاللنا هو الثقيل الحيخليهو يعمله منو. قلنالو الله! ما قلت إنته عايزو يعملها. لا قال أنا عاوزو يطلب والبلدية تنشر في الصحيفة إذا كان الجار الملاصق عندو اعتراض وتشوف كترابة اعتراضي يوم داك. جار ثقيل. والله اعترض اعتراض ليهو ضل. والنتيجة أنو ما حيفتح أي حاجة. دا زول حاسد حسادة. يعني حتى ما عاوز يعترف بي جار ملاصق. والله جار ملاصق عاجباني عجب. أعجب قصة سمعتها عن البيوت مره واحد بوصفليهو في بيت واحد صاحبنا سكن جديد في أم درمان. ماشين كويس كويس. قلت ليهو بعدين لمان تدخل الشارع دا عِد على يدك اليمين البيت الأول سيبو والتاني سيبو التالت دا هو بيت صاحبنا. أشوف ليك الراجل ما عادي. وانفعل. قال لي أنا كل ما واحد يوصف لي بيت يقوم يقول أدخل الشارع البيت الأول خليهو التاني خليهو البيت الدايرو يا هو التالت. اتهيج فيّ الزول وقال إيه الحكاية. ليه البيت الأول والتاني أصلو ما يطلعن البيت الدايرو. دا التالته واقعة واللا شنو؟ هم الساكنين في البيت الأول والتاني ديل منو؟ يا خي العالم فيهو إرهاب وكده والإمريكان قبل كده ضاربننا في موضوع هايف جداً. لو واحد قال ليهم البيت الأول والتاني ديل مشبوهة ومسكونة بناس غامضين حيعملوا فينا عمائل النجار في الخشب ما عملها. حيضربو البيت الأول والتاني في كل حارة. دا خسارة كبيرة ولاحظ البيت الأول دا فيهو دكاكين الناصية. لما لقيتو سخن كده واتملا بنظرية المؤامرة قت ليهو براحة كده (كأنه يهمس له) ولا ارهاب ولا حاجة دي بيوت الأشباح ولا يهمك. حكاية مسكونة دي ذكرتني كان في بيت في أم درمان كل ما يأجرو واحد تحصل ليهو مصيبة يوقفوا ترقيتو. ولدو يربت، مرتو تشكوت، وبتو تختوت. ودي جابها السجع ساكت. يقوم يرحل منو. ويجي التاني يوقفو ترقيتو وأهو إنتو فهمتو. يقوم يرحل منو. طلعت سمعة البيت إنو مسكون. وقعد فاضي. وفي أيام عبود أجروهو عزابة عاملين تغطية لشيوعي متفرغ ومطلوب القبض عليه من الحكومة. وما في زول عارف الموضوع دا طبعاً. أها الناس منتظرين الجديدين ديل يرحلو زي السبقوهم. ناس بسم الله طبعاً. ومرت سنة وسنتين والعزابة مستمرين ساكنين لامشكلة ولا حاجة. بعدين واحد مرة بيقول للتاني والله البيت دا سمعة إنو مسكون دي ساكت. ما شايف الشيوعيين ديل ساكننو في أمانة الله. المشهد الثاني (مشهد المحاضرة) (طاولة بجانب المسرح يجلس عليها محاضر ومدير إدارة هئية مكافحة الفقر. أمام الطاولة صفوف كراسي. تجلس سلمى وبدوي علي كرسيين وعلى مسافة منها شخص آخر. بقية الكراسي عليها دمي قماشية وبلاستيكية). المدير: أنا شاكر نيابة عنكم للأستاذ على باب الله شحاته أمين الفكر والمنهجية بالمؤتمر االأهلي على تفضله بتقديم هذا التنوير الرائع لنا في مسالة الفقر. ما عارف لكين أنا شخصياً استفدت غاية الفائدة من هذه المحاضرة. أفتكر تفريق المحاضر بين الفقر النسبي والفقر المطلق حيساعدنا جداً في جهودنا بإدارة مكافحة الفقر عشان ننفذ استراتجية الدولة في إزالة الفقر، هذه العاهة التي تشوه وطننا. نفتح الباب لبعض الأسئلة. الرجل: أنا أعتقد أنو حقو تكون هذه المحاضرة وثيقة معتمدة من وثائق هذا المؤتمر. سلمي: دي محاضرة والا مؤتمر. بدوي: ديل ما بفرقوا. كلو عند العرب صابون. خلي بالك دا من فلول الاتحاد الاشتراكي بتاع نميري. كان زمان كلو ما نميري يقول خطبة في مؤتمر ينط واحد زي ده يقترح أن تكون خطبة الرئيس واحدة من وثائق المؤتمر. وهو المؤتمر ذاتو ما يكون عندو وثائق. دا واحد سادن وخرمان لتحالف الشعب العامل. الرجل: جزاك الله خير أخونا باب الله. أوافق السيد المدير أن سعادة المحاضر بيأتي بتدقيق في المفاهيم مثير. وأضيف لما قاله السيد المدير تفريق المحاضر بين الفقر المستقيم والفقر المعوج. بدوي: وهو دا جا في المحاضرة. سلمى: يطرشني. بدوي: دا راجل مفتري ساكت. الرجل (يواصل). ومع أنو دا مفهوم غربي إلا إنو يكاد يكون ترجمة حرفية لقول الرجل الصالح فرح تكتوك وهو الفقر يا فقري يا دغري. هذا بلد خير يا جماعة وطيب. وتراثه منجم لو نجمناه لأغنانا من الاستلاف من الغرب كلو كلو. جزاك الله خير. بدوي (يرفع يده ويأخذ الفرصة): الإستراتيجية التي تفضل المحاضر بتقديمها لا بأس بها لولا أنها لا تفرق بين الفقر والافقار. التقديرات تقول أن نسبة الفقر عندنا 90% وهذا لا يمكن ان يكون مجرد فقر هذا افقار. فما هي خطة الدولة لوقف الافقار. فمن دون ذلك تصبح كل خططنا لمحاربة الفقر مستحيلة. (المنصة منزعجة ويتزايد انزعاجها مع كل عبارة من بدوي. المدير يتحرك نحو بلف كبير مثبت عند المنصة ويلفه يمينا ثم يسارا. ثم يعود) المحاضر (يبدأ بعد لف البلف مباشرة): كشتم كشتومتو كشيما مكاشيمو بدوي: الله. إنت برضوا اتكشمت يا ابن الظربونة. شغلولك الجمرة الخبيثة دي واتكشمته. ما كنت بتصرف عربي من قبل شوية. المحاضر: (ينظر إلى بدوي بحدة) كشتمينا كشوماتو سلمي: دي اللغة بتاعة الاسبتالية الكلمتني عنها. دا وباء واللا إيه. بدوي: يا ها ذاتها لكن اللهجة مختلفة شوية. لغة الكشامت عندها لهجات وخبراء يأولاد أم زقدة. المحاضر: كوشماتو طبقات ود ضيف الله . . بدوي: ودا ليه ما كشمات كش ضيف الله. يا مفترين. سلمي: الحكومة اتشفرت يا بدوي. نقول شِفوا تصحو تقومو تتشفرو مرة واحدة. بدوي: إلا تكون دي رجعة تراثية للغة مروي. إنتو فكيتو شفرتها؟ يا اولاد الهرمة. جبهة تحرير النوبة بتاعة جعفر عباس فكتها ليكم. المحاضر: كشامي كشامي كشامي (صفقة من الرجل المدير والدمي) سلمي: عرفتو ليك. دا تاري دا المشروع الحضاري يا أبالسة؟ بدوي (بغضب للجمهور) وبتسالو أنتو ورا ورا ورا دايما ليه (مشية الفراعنة). وإنتو دولة ممنوحة ومش ما نحة ليه. وأنت في خشم الناس كتير كتير ليه. وأبوك مين؟ برونك وأماتكم مين؟ رايس ليه؟ وبتسالو ليه الناس ما شين لقدام ونحنا ما شين لورا ليه؟ (صمت يلتفت لسلمي) سلمي الكلمة جاتني جاتني. جاتني يا سلمي. الكلمة جات: القهقري. أبو الزفت. من زمان اسمع بيها القهقري. ومشتهي ادخلها في جملة مفيدة. وما قايلها بتقع لي. أنتو بتسالو ما شين القهقري ليه. سلمي، دي البفتشليها من زمان يا سلمي. ماشين القهقري (يركع ويقبل الأرض) يا الله نزلت مني كترة هم. نحن مش عاملين خطوات تنظيم نحن بنمشي القهقرى. المحاضر: كشماني كشتم شكراً شعبي. (صفقة من الرجل والمدير والدمي. مشهد من توم آند جيري) بدوي وسلمي: الناس ماشية لقدام ونحنا راجعين القهقرى (مشية الفراعنة). الفصل الثالث المشهد الأول (ليل. يصحو بدوي من نومه بعد هضربة ينهض منها بقبضة مشدودة كأنه كان يخطب في جمهور): حلم واللا علم. إجعلوا علم يارب. (علي طريقة مارتن لوثر كنق الذي يظهر على الشاشة) I have a dream حلمان بعالم خال من الفقر. عمال بيمشو الورش (يكرر شعار مارتن لوثر) زراع بيمشو الحقول (مارتن لوثر) رعاة بتمشي المراعي (مارتن) (يعيد كلمة لوثر) والرزق طيب والصينية عليها فطور وغداء وعشاء وشاي صباح مقنن وزلابية وشاي مغرب وونسة. وتلاميذ بتمشي مدارس بإجلاس مية مية وعلم نضيف لا رسوم ولا بروش ولا دروس مساء ولا مدرس خصوصي. (عبارة مارتن لوثر) شباب بتمشي الجامعات بتقرا عن محمد والمسيح وعيسي وبوذا وماركس وفوكو وارستطاليس وأنشتاين والغزالي وابن تيمية ومعاوية محمد نور ويوسف فضل ودارون وطه حسين ومحمود درويش لا سيخ لا شهداء. يعيشو شبابهم ويحبوا بنات معاهم من هنا (يكرر) من بلدنا ما من اكتر. ويعيشوا في تبات ونبات ويلدو ألاد وبنات. ومستشفيات حديثة فاتحة آناء الليل واطراف النهار ودكاترة زي بقراط والتيجاني الماحي وبعشر. طب زي قيادة السيارة فن وذوق. لا مستوصفات ولا تطاول في رسوم الدواء (مارتن لوثر). وحكومة من برلمان منتخب الشعب عندها أسبقية وبتعمل جراحة دقيقة يومياتي لإزالة أورام الفقر والتشوهات الخلقية والخلقية لوباء المسغبة (مارتن لوثر). عالم يصبح الفقر فيهو مادة لحفريات الآثار. يصبح ماض جد (مارتن لوثر). إيه صعب في دا؟ ليه دا مستحيل؟ (يتهدج بالغضب) ليه دا المش قادرين نحاربو. حاربنا بعضنا ياأراذل (صورة لاجتماعات متعددة: بروقراطيين، أمم متحدة، الجامعة العربية، الاتحاد الأفريقي الخ. وهو يخاطبهم) كلاشات وطائرات بلا طيارين وغواصات وأباشي وشبح (يصمت) دي مش عملتوها ماركة عطر يا ضلالية. حروب كلفتتنا ترليون دولار أبو الزفت. دي بذمتكم بتعمل زي كم دكان عقلان الكان قاشرلنا في سوق الداخلة في عطبرة. بشيليون، دشليون، سلسيون. بتجيب كم زلابايية، كم طعميايية، كم رغيفاية، كم لحماية، كم قلم؟ كم كراس؟ بتقش كم دمعة؟ بتزيل كم ورم خبيث؟ بتقدر ظروف كم محتاج؟ يا دون. ( مارتن لوثر).(ويعلو صوته آمراً). أنا عاوز منكم تزيلوا الفقر الآن nowيا قطط سمينة أنته وهوه. (كأنه يستجيب لاعتراض من أحدهم) لا لا يا ولوفويتز. تسمح ممكن. ما تقولي البنك الدولي عندو خطة مرحلية وهلمجرا. انا مش فاضي لي دا. اليوم وليس غداً. مش عاوز ومن لفه لفه بتاعتكم دي. دي ثعلبة وشغل سبع لفات: الثعلب فات فات في ديلو سبعة لفات. ما اسمعش انو عندنا خارطة طريق لإزالة الفقر. هو الفقر عاوز خرطة عشان تصلوه، هو كنز. دا الكل يوم معانا. وما أسمعش بتخصيص سنة لمحاربة الفقر. لا يا كوفي عنان. دا تسويف. دا شغل بتاع بتوضيحاتها وبأعجل ما تيسر. أنا عاوزكم تلغو الفقر. كده. مش عاوز أشوف الفنان الإسمو بونو دا أبداً يعرض علينا أبداً عامل بحارب الفقر وحايم مع وزراء الدول الغنية. سفير نيات حسنة للفقر. كفاية we are the world . يغنى على كيفو على عينا وراسنا. الغاء الفقر عليكم إنتو وإنتو مش عاوزين وصاة. والسابقات روابح (يصمت) وشوفو ولا عاوز أسمع عبارة من كل حدب وصوب. انا مش عارف مناسبتها هنا شنو. لكين برضو ما اسمعها من واحد ابداً. كلمة غياظة بشكل. كلمة بتاعة استهبال كده (يستمع لأحدهم من الشاشة بانتباه واضعاً إصبعه على أذنه) لا لا يالزبير أحمد الحسن المال موجود، موجود. دا عذر أقبح من الذنب. ليس بعد الفقر ذنب. المال راقد. دا موبوتو بتاع الكنغو كان عندو رصيد في بنوك سويسرا ترفع ديون بلدو مرتين. المال راقد لكين عند منو وين وليه دا البيقوم العفار. البيعزم عشرميتم رئيس دولة في أقل من شهر وينزلهم اهلاً وييختهم سهلا ويضبحلهم دا المال عندو، جزلانو ملان يالزبير. جزلانكم كبير يا الزبير (للاجتماع) المال قرمطتوه وكنترتوه. وسيللتوه وكنزتوه ودلوقت ناس بتغسل فيه؟ ليه هو وسخان؟ بتطهروه من الذنوب الراكمها وانت بتهبرو وتملو؟ دي ذنوب من دعاء مغلوبين ومساكين ومعوقين وأيتام وأرامل ومعلمين الله ومتعففين. باب السماء مفتوح ليهم. طير الجنة بحمل دعاهم لحوش السماء. الكنار بيلحن غضبهم. والسماء بهش لمطلبهم. بيتهلل ليهم. دا الدعا المستجاب. الذنب بحق مساكين الله والرسول دم ما بتغسل. دا سخط. سيؤرقكم ليوم الدين (كأنه يتحدث إلي احدهم) لا لا يا قيتس. أنا مقدر عاطفتك تجاه الفقر. إنت والسيد تيرنر بتاع السي أي إن سي وطليق جين فوندا إنتو بذلتو الكتير جزاكم الله خير. المال عندكم. كالّكم بالمكيال الكبير. لكن قدر ما عملتو مش كفاية مش كفاية. أنا بسألك الواحد منكم بيدفع كم في الليلة في الأجنحة الملوكية أو الرئاسية في فنادق ماريوت وهلتون ومن لف لفها؟ (يرخي أذنه) كم يا قيتس؟ خمستاشر الف دولار لليلة الواحدة! إيه الفجور دا. يعني هو الواحد يبيت ليلة ليلتين في فندق يعصي الله كده عديل؟ يمرق من الملة والعياذ بالله؟ لازم الواحد في فندق بتاع ليلة ليلتين لازم غرفتو تكون فيها ال . . . ال . . . راحت علي. المصيبه دي؟ هي اسمها واللا إيه. البتاعة الهي حوض قزاز وبيملوه موية ويجدعو فيها السمك الصغار دي يعوم لغاية ما يدوخ. (للجمهور) في زول ناقش في الحاجات دي يورينا؟ (يلتقطها من الجمهور) أيوه المسمكة! والله دا البيحصل يا جماعة. والله جايبها ليكم عديل من النيو يورك تايمز. المسمكة دي واحدة من الطرق البغروبيها الجماعة الفي الشاشة دي عشان يدفعو 15 الف دولار في الليلة. دي بتقش دمعة كم غلبان؟ بتفش وجع كم موجوع؟ بتجيب شيلة كم عروس؟ بتحول دون كم شاب من يغترب ويحزن للعمر ويحزن أم شايله الحليلة مع الصباح؟ الشايقي دا شكايّ شكية. بتطبع كم كتاب مدرسي؟ بتفتح كم مستشفي كم؟ بتفتح رياض اطفال كم؟ بتحمى آثار من التلف كم؟ وما عارف العاجبم في المسمكة دي شنو؟ والله دي بيت اشباح عديل. سمك عيلين صغيرونين صفر وحمر وخضر ولون زينب مضيقين عليهو الوسيعة دايخ يجري من ركن لركن. ولاحظ أنو فاقد البوصلة. وناس تعاين كده مستمتعة ومستعدة تدفع 15 ألف دولار لغرفة فيها مسمكة! ليه، يعني واحد يقول أنا عندي حلم إنتو عندكم مسمكة. أيه شغل العيال ده. (يتهدج و يلتفت إلي الشاشة) يا بروقراطيّ العالم وأغنياءه الفاحشين اسمعوني دقيقة (علي الشاشة صورة الشعراوي يشرح حديث الرسول "ما من قوم بات فيهم جائعاً حتى برئيت من ذمة الله") . الشعراوي: دا الرسول الكريم بيوول "ما من قوم" شايف كيف. ما من قوم بات فيهم جائعاً. كان ممكن يقول إذا بات جائع في قوم. لا ما تجيش. بآ نشوف البلاغة هنا. لأنو هو عاوز ينفي الجماعة التي بات فيها جائع من رحمة الله. ينفيها من إيه؟ رحمة الله التي وسعت كل شئ. عشان كده استخدم ما النافية للموضوع من أساسه. ما من قوم، شايف كيف. ما من قوم بات فيهم جائع. ما نحن حنشوف بأ. ما من قوم سمحوا بهذا. قبلوا أن يبيت بينهم جائع، إلا برئيت منهم ذمة الله. شوف نفي هناك "ما من قوم" نفي هنا بآ إيه أن تشمل مثل القوم ذمة الله" بدوي: (للشاشة): إنتو مش قوم واللا إية؟ إنتو قيمان، جنجويد؟ إنتو يبيت الواحد منك بخمستاشر الف دولار، الدولار يكشتم في الدولار، ويبيت 90% من سكان العالم جوعي؟ أنت ما يهمكم إنو تطلعو يا مكشتمين من ذمة الله، إنو عاوزين ذمة الله تتبرأ منك؟ أنتو أيه؟ أنتو بتفتكروا مش حتعرضو علي الله في يوم القيامة؟ إنت قايلين مالكم حيسكنكم شقق ملوكية برضوا؟ لا انتهت اللعبة هناك؟ جنس سافل؟ إنتو أئه. (تظهر صور من عجائب الدنيا السبعة علي الشاشة) يا بروقراطي الدنيا. اسمعوا واعوا. أنا عاوز تلغوا الفقر اليوم قبل الغد. لأنو اليوم حصحص الحق. وأمبارح كان خمر وشقق رئاسية واليوم أمر. ابو الزفت. انتو لما خوفو قالكم أبنو الهرم، بنيتوه صاح ؟ ولما الامبراطور الصيني، الله يديني اسمو ، يجي ويروح. وهو انا متذكر اسمو ايه بكره ناس آسيا ديل يغيروا يمقلبونا. طيب لما قالكم ابنو سور الصين العظيم بنيتو؟ صاح؟ ولما نميري قال لكم ابنو الاتحاد الاشتراكي؟ بنيتوه، صاح. قلتو بغم؟ ولما البشير قالكم جيبو يختين تلاته رئاسية، جبتوها بأعجل ما تيسر وما سالتو بتمر بتحت كبارينا واللا لا؟ ليهو بتبغمموا لما اقوليكم الغو الفقر اليوم قبل الغد؟ (يرخي إذنه) إسمع يا (. . .) المهدي. ولا قيمة مضافة ولا حاجة. دي طق حنك ساكت، قيمة مضافة والرقابة المتبقية ودمغة الفقير. دا مضمضة لفظية ساكت؟ دي (كالحمامة) دي بغ بغم بغم، بغبغوغ. دي بغمغة وبس. دي بغم ومش عايز اسمعها ابداً (كلمة مارتن لوثر) تلغو الفقر هسع ده وخليها تكون من عجائب الدنيا وربنا يجعلها في ميزان حسانتكم. (يلتفت إلى الجمهور) والله انا دائما محتار لما أمر بالبجراوية بتاعة آثار مروي وأشوف أهرامنا. ليه صغنتوته كده؟ كده ليه زي بت ام لعاب. والله بحزن ليها شديد زي حزني لسمك المسمكة بتاعة المفترين ديل (يلتفت ويرخي أذنه للشاشة ثم للجمهور) دا المقاول بتاع أهرامات البجرواية أخد فرصة وقال إنو بيتذكر إنو بناها عملاقة حسب المواصفات ومش عارف حصل إيه. يا جماعة الخير دا كلام؟ يمكن حست؟ اتبرربرت بالبرورة؟ وحست؟ والله اقولك يمكن المهندسين بتاعين كوش غشوا في الأسمنت برضو؟ وبنوها كده أي أهرام ولهطوا الباقي. كوش برضو كان فيها العمايل السودة دي؟ طيب حنعمل هوية كوشية كيف وإنتو بتغشوا في الإهرامات؟ حد يغش في الإهرامات واحدة من عجائب الدنيا السبعة ويمكن يكون حرام ويقطع من خلاف ؟ دي كوش بتاعتك يا على عثمان محمد صالح ومن لفه لفه. الأهرام لازم تظهر ليها شهادة بحث وتصريح مباني ونشوف بقي ليه تبربرت بالكشوشة (كأن هناك من يعترض علي الشاشة) أسمعني يا برونك. إنت عاوز خطتي لإلغاء الفقر أولك. إنتو قايلين حتعجزونا بحكاية البديل والواقعية والبروقماتية والثعلب فات فات. عاوز البديل أديك البديل، أمسك لي واقطعلك. أديك البديل. أنا خطتي اسمها "براعة االشبل بندر" وأوضحها ليك. إنت قعدت معانا كتير ودلوقت يالازم تكون هلالابي يا مريخابي؟ واحد فيهم. أنا مريخابي علي كل حال. كان زمان فريق الهلال مزنوق جداً في لعبة حاسمة في الدوري. ماخد قون ناشف من المريخ في أول الشوط الأول. وغلبو يدرن وهو غالب كسبان مدرن كسبان. والبلد كلها اعصابها تلفانة (صورة لطه حمدتو على الشاشة يصف إحراز قون بواسطة بندر ويختم بعد انفعال: ولولا براعة الشبل لخرج الهلال وشو يلعن قفاه." دي خطتي يا برونك. براعة الشبل بندر. أنتو ناس فاهمين والواعي ما بوصوه. كورة خد وهات والشبل بندر توش في القون. كل شئ بإيدكم ودي الدقائق الأخيرة وقد اعذر من أنذر. يلا ورونا براعة الشبل بندر. (للجمهور): مش حينفع فيهم ولاد الحنته ديل (يرجع للشاشة) ورونا إنتو اصلوا إيه؟ المسلطكم علينا مين يا أراذل؟ حتحلوا من رقبتنا متين ووين وليه. (يسألهم): إنتو إيه؟ إنتو المر؟ (يستمع إليه بإذن صاغية) قتو لا. إنتو الأمر منو؟ برضو لا. طيب أنت الواو الضكر يا المتخلوناش أقول ليكم؟ (للجمهور) عملتولنا زهجلوجيا؟ دي هويتنا نحن لا عرب لاأفارقة لا افرو عرب لا زنجران ولا سودانوية. وتسألونا من هويتنا؟ زهجلوجيا يا مفترين؟ بين ايديكم مال النار ما تكلوا ولسه تكنزوا فيه. زمان بنسمع أن روسيا واللا امريكا عندها قنابل ذرية تفني الكون عشرة مرات مع أنو حيلة الكون دا فناء واحد وبيد رب العالمين. أنت دلوقت كنزتوا مال مبالغة تكوي به جنوبكم كم مرة،بشليون! دشليون! سلسيون! كم دكان زي بتاع حاج عقلان في الداخلة! أنتو إئه؟ محور الشره. أنتو ما بتسمعو كلام الله ليه؟ قالكم حنحمي به جنوبكم؟ أنتو ما عندكم جنوب؟ أنتو عدمانين جنوب؟ إلا القرود العدمانة جنوب والله اعلم. إنتو قرود! نحن في نظرية دارون بتاعتنا أصلو القرد كان إنسان سوي فكفر بالنعمة واستحم باللبن والله سخطو قرد. في ناس عندها دريم وإنتو عندكم ايس كريم. ممكن دلوقت زول يطلع على الناس كده ويقول I have an ice cream الناس تقول عليكم إيه؟ أطفال؟ ما بتكبروا وتشوفوا العوجة! نحن تعبنا منكم خالص. أنتو مش بشر. أنتم أيه؟ إنتو الشديد؟ (يستمع إليهم في الشاشة) لا. طيب إنتو القوي؟ (يستمع إليهم) برضوا لا. طيب إنت الواو الضكر يا اولاد الهرمة؟ إنتو ما عندكم إنسانية؟ دا كان في الأبيض زمان الواحد يطلب طلب من المطعم وإذا ما شبع يديهو إنسانية، وصلة زيادة؟ أنتو ما شفتو الأبيض ابدا ولا زرتو ابو صفيةً؟ وأكلتو إنسانية في مطاعهم؟ الله يجيبلكم السلطان علي دينار تاني ويعملكم الخير خنقاه. دا سجن في نص السوق في الفاشر للبخنقم الخير. أنتو عايزين خير خنقاه وشالا وودانا لشالا وعزتنا ما شالا. ما لقينا فيكم مضرب ابداً يا أولاد الحنته. قدر ما حاولنا. لازم تكونوا إنتو أمات درينقات. متحصنين بدرقكم تقولوا للهمفبي وين. ما تتعضوا إلا لبعض يا بتاع الإنرون! غلبنا فيكم حيلة. إنتو ما لعبتو زمن الطفولة شريكك شريكك، لعبكم كلو مسمكة. بتلعب شريكك والواحد لو لقي مليم او بلحة او دومة زميلو بيقولو شريكك وبيبلل ذمتو بالبصاق. ودا عهد للاشتراك. ودا بيحصل والله العظيم. طلعنا من دينا وعملناه شيوعية. محاولة اهو. قدرتوا عليها يأراذل. بالجينز والكوكا كولا والكيتي كولا والببسي كولا سيحتو ركبها، الله ما تغز فيكم بركة! ناس قلبها فارغة بشكل! وبرجنيف قال إيه قال هوايتو يجمع العربات الغالية. يا ابن المجنونة أنته، دي هواية زول شايلو حمالة لينينية قدر كده. والله الفارغة التراب ما يملاها. صح. حتى بل قيتس ارحم والله (بتهدج وغضب) كملتو حيلتنا. دا غضب والدين والعياذ بالله! (يجري الدعاء القادم على طريقة عمرو خالد) يا من تحب العفو أعفو عنا (يتهدج أكثر). نعوذ بك ربي من شرور انفسنا (دامع) ربي هذا ضعفنا ظاهر بين يديك ولا تجعل الدنيا اكثر همنا. (يشرق بالدمع). نأتيك حزاني فأنزل رحمانك في قلوبنا، نأتيك جوعي فأطعمنا من منك وسلواك، نأتيك جرحي فانثر الثلج على جراحنا، ونأتيك مرضي فاشفنا بأقاحي لمستك، نأتيك عشاقاً ربى فاسكب الشعر في وجداننا واسكن واحدنا إلى الآخر بالمودة. نأتيك شكاكاً فأقبلنا حتى نستبين نورك وترفق بنا وضع ملائكة في تفاصيل إعجازك. ربي لا تكلنا إلي هؤلاء الطغاة من آكلي السحت يا رب. (يتهدج طوال الدعاء ويتقاصر نحو الأرض ويقول وهو راكع) ربي هذا غلبنا ظاهر بين يديك، (ينتحب) ربنا أرنا نصرك الذي وعدت للمستضعفين الآية. بدوي (غاضباً يتهدج قريباً من أن يبكي. (عادل إمام على الشاشة) اقفل يا أسامة الستار، عوز اعيط يهبط الستار (صوت عادل إمام: أنا غلبان) المشهد الثاني (في محكمة. قاض وحاجب وكراسي. بدوي في قفص الإتهام) حاجب: محكمة! القاضي عندك إيه! شرطي نظام عام: المتهم دا كتب خطاب غزلي فاضح لبت الجيران. القاضي: والتهمة الموجهة ائه؟ الشرطي: الشروع في الحب. القاضي: ومادتها إيه في القانون. دي كانت زمن المكاشفي عليه السلام. لا بببح دلوقت. شروع ما فيش إلا المرواد في المكحلة. دا كان زمن العدالة الناجزة. خلص دلوقت. حاجة تغم. بعدو. (ينصرف الشرطي وبدوي الصغير.يدخل تور الجر وبت قضيم وود اب قبورة والسميح مسوقين إلي قفص الإتهام. المدعي عليهم صحفي يقعد في الجهة المقابلة) الحاجب: محكمة. بت قضيم: (مخلوعة): هجمتنا الهجيمة، مالك يا ربي يا سيدي؟ الحاجب! حاجبك ينزلط. تصيح فينا نامن قلبنا وقف. يصيح فيك عزرايين في يوم لا والد لا ولد. الحاجب: محكمة. تور الجر: شوف الشليق دا نان نحنه قايلين داخلين عفراء. من يومها عرفناه محكمة. المحكمة بتكلمني بيها انا محمد ود الأمين تور الجر. انا ياتو محكمة ما دخلتها إلا كانت محكمة لاهاي الجاتنا جديدة. نحن مع حجج الطين وقفنا من المحاكم متين؟ وبعدينتك أنا ما جيت مسرح إلا أنا الببدأ. أنا بالتبادي بقول أنا محمد ود الأمين ود تور الجر حتين النضم يبدأ. إنت أظنك جديد في الشغلة؟ إلا تكون من معهد التمثيل دا العملو الماحي اسماعيل. ماك عارف الأصول. القاضي: بطل كلو. صمت. قضيتم شنو ديل؟ أب قبورة: أنا ما عندي قضية معاهم. جيت أتفرج علي أولاد العوض ديل يا جنابو مسكوني. القاضي: قضيتك من عدمها حنعرفه بعد ما نسمع من المتحري. المتحري: بتاريخ 20-6-1963 قام المذكورين مَحَمَد (بفتح الميم والحاء) تور الجر: مُحُمد (بضم الميم). المتحري: مُحمد مَحمد ما كل واحد. تور الجر: مو واحد. لو مَحَمد تكونو قبضتو زول تاني. أنا مُحُمد. القاضي: مُحُمد. اسمو مُحُمد. هو عاوز كده. المتحري: مُحُمد الأمين تور الجر. تور الجر: محمد ود الأمين. القاضي: إنت تور الجر بتاع الفكاهات. حصلنا الشرف دي قضية متلفزة. المتحري: محمد ود الأمين تور الجر وبت قضيم القاضي: وكمان بت قضيم. دي قضية والله دي عروض دبلوم. والثالث لازم يكون ود اب قبورة وداك السميح مش كدا. لا معلومين لينا. وين بلبل وضربه وعمك تنقو وجعفر عزالدين، وين الناس دي كلها. واصل. المتحري: بتاريخ 20-6-1963 وفي حوالي السادسة مساء. السميح: نحن جينا عصراً بدري. والله ننتظر للساعة ست بص كلوجة يفوتنا إلا نبيت في حوش البقر. المتحري: ذهب المتهمون إلى مكاتب صحيفة "الزمان" واعتدوا علي محرر المنوعات فيها الأستاذ عمر محمد حسين، المدعي. بت قضيم: يعني اعتدينا كدي على محرر المستنوعات دا مجانين واللا مجانين. ما بسببنا! ما تكلم القاضي المبروك دا بسببنا. تور الجر: أيا. إنت قايلنا ربش، ولاد العوض ساكت. الزول دا استفزانا خلاص يا جناب المامور. القاضي: القاضي بت قضيم: إيا. هو اسفتزانا شديد خلاص. ودا كان دفاع عن النفس الأمارة بالسوء. يا جناب المامور . . . القاضي: القاضي.. بت قضيم: الفاضي يا ولدو يعمل قاضي. القاضي: ما تخلونا نفهم من المتحري. ما هي اقوال المتهمين. المتحري: قالوا أنو المتهم نشر عموداً بالجريدة يهزأ بقرية أولاد العوض. فقد قال إنهم كانو يجتمعون كل مساء بعد بيع ما بيدهم والتسوق وقبل ركوبه بص كلوجة للقرية. كانوا يجتمعون عند نور الحركة الجديد في تقاطع الجمهورية وعلي عبد اللطيف. السميح: رحمه الله عليك يا علي عبد اللطيف وأنزلك الجنة مع الصديقين والشهداء.. بت قضيم: وافتحلو يا ربي بجاه النبي شارعو علي الرحمات يا ربي يا سيدي (بصوت خافت) بطلعونا من البلد والبلدين لو فتحنا خشمنا. المتحري: وكانو كلما ولع النور قالوا معاً: أوب ولع. ولما يطفي يقولوا لأوب طفا. وبعد النشر تجمع وفد لمقابلة رئيس التحرير للاحتجاج. وتسلل المتهمون من الاجتماع واقتحموا مكتب المدعي واوسعوه ضرباً. بت قضيم: ما ضيقها علينا كيفن ما بنوسعه ضرب الملعون. يعني دا ما تشهير يا حضرة المامور. القاضي: القاضي. بت قضيم: يعني إنته دا براك بلا قانون قولينا دا تشهير واللا ما تشهير واللا ما تشهير يا حضرة المامور. القاضي: القاضي. تور الجر: والله أنا بذاتي محمد ود الأمين ود تور الجر ما زول مفاهمة. ومن هناك قلت لناس العوض والله الأقي الزول المتشهر بينا ده إلا عصاتي تاباه. شوف الحقارة. إنت يتشهر بي انا محمد ود الأمين ود تور الجر. إنتو علا كان تغيتو. القاضي: وإنتو كنتو بتقولا فعلاً أوب ولع وأوب طفا. بت قضيم: نقولها واللا نقولها واللا نقولها يا حضرة المامور. القاضي: القاضي. بت قضيم: والله سكينة بت خالتي الربيجود وكت تلحنه كدي وهاك بإيدايتا فوق وبالجنب وكشف يا جناب المامور القاضي: القاضي. بت قضيم: وتتلفت جاي وجاي وجاي زي سايق البوباي الإشارة جاي وجاي بتاع الغنا رحمة الله عليك يا عبد العزيز سيد أحمد (تقوم بالدور): أوب ولع أوب طفا أوب ولع أوب طفا. القاضي: (يتأملها مبتسماً ثم يقلدها) أوب ولع أوب طفا. كده. (ينفجر ضاحكا). أيه دا؟ دا يوم إيه العسولي دا؟ دا معروضات عينة يا جناب المامور (بحزم) القاضي. دي قضايا واللا الكاميرا الخفية. قضية بتاعة شروع في الحب ودلوقت قضية الشروع في المسرح القومي (يقلد بت قضيم) أوب ولع أوب طفا (يلتفت إلي ود اب قبورة) ودي قضية تتخرط منها يا ضلالي. دي كوميدي يا قبر بر (يرقص على الإيقاع): أوب ولع اوب طفا بجاه المصطفي ياربي تلطفا الحالة العارفه أرواحنا مشحتفه موازينا مطفطفة عملتنا مزيفة نفوسنا مزخرفة ومن جوه متفتفة (تستكمل) (يتجه نحو الجمهور. يتخذ شخصية المايسترو وفي يده آلة القاضي. يشير للصف اليمين: أوب ولع أوب طفا (وينتظر حتي يسمع منهم يقولونها بعده. ثم يلتفت للصف الشمال. نفس الشيء. ويغني بقية الأغنية. ثم يعود مثل فنان يطلب مشاركة الجمهور في المطلع يشاركه في ذلك المدعي والحاجب والمدعى عليهم بحركاتهم المعهودة في شكل "القطر قام" مع رقيص قرد وكشف وهيصة بينما ينادي الحاجب بين حين وآخر: محكمة). المشهد الثالث (بدوي على المسرح. حالم العبارة) دي السكة الخطرة يا سلمى. حنمشيها وحيدين لوقت طويل. سكة تملاك رعب من الصمت والهجير والوحدة. الناس حتقولك مالك مالك يازول. ديل ما بِتحَاربوا. اتضارف على نفسك. هي كده وحتكون كده حتى يرث الله الأرض. محور الشر دا حيسلمها عيسى. وإذا قلت لا حيقولولك ذنبك على جنبك وحيديروا وشهم للجهة التانية منك بعد داك. حيقولو راكب راسك. وفي ناس حتبيعك رخيص. وحتتمنى زي عثمان دقنة إن يبيعوك غالى. قال دقنة لزميلو في المهدية ود محمد السلموا للإنجليز يا خائف يا طمعان الجائزة لمن يرشد إليه "يا ود محمد أنا انقبضت ما تكون بعتني رخيص". في موضوع وحشة الطرق الجديدة بذكر فيلم عاجبني جداً عن محنة مدرس فصلوه في الجنوب الأمريكي عشان بدرس نظرية دارون للتلاميذ. قالولو كفرت. صبأت. وشاكا مكتب التعليم في مدينتو في المحكمة. وكان محاكمة بجلاجل في سنوات الثلاثينات من القرن الماضي. محكمة مشهورة اسمها محكمة القرد. واثناء المحكمة المحامي لا حظ أنو المدرس، راجل على قدر حالو، راسو لجه شوية. زي الخوف دخلو من التركيز على المحكمة في الإعلام، ناس بلدو ما راضين أو على الأقل منقسمين. حاجة تحزن وما تتمني تكون في نصها أو متسبب فيها. بدا المدرس يلاوز كده. يارب دا طريق صاح طريق غلط! أنا ماشي بالموضوع دا وين! المحامي، مثلو في الفيلم سبنسر ترسي حاجة وقار، حاجة كبيرة زي عابدين اسماعيل ، زي ابل الير، زي عبد المجيد أمام: شعر أبيض زي الفضة. مسك المدرس من كتفوا وقال ليهو هوي يا ولدي. الطريق الماشي فيو تطلب حقك من اللئام ديل دا متعب وموحش وطويل. حينبذوك والبتحسبو معاك الليلة يبيعك رخيص باكر. حتمشي فيو وحيد لمدة طويلة. دحين يا ولدي اللأكلمك. لو عاوز ترفع الراية البيضاء وتسلم أحسن تعجل بالموضوع وما في داع نطاول موضوع ما عندو مستقبل. وإذا رفعت الراية البيضاء وسحبت القضية وقته التوبة يا حبوبة دارون القاشر دا تاني ما بدرسوا البلد دي كلها حتقيف تديك سلام تعظيم وبكرة ترجع لشغلك أفندي محترم. التلاميذ يقوللك فندي فندي. عاوز تواصل الموضوع دا لنهايتو حبابك. لكين ما تلج. أمش رابط الجأش، بشجاعة قلبية، أمش عدل، امش سِيدة. حتمشي نامن تحفا ما حتسمع في الشارع الطويل دا غير طرقعة جزمتك. الناس بتعاين: الإشتغلك نضيف يا فلان والباعك رخيص والباعك غالي والقال ذنبو على جنبو كلمناهو لكين راكبو راسو. طرقعة جزمتك في الطريق الموحش طق طرق طق طرق. إن قت الروب الناس دي البتعاين ليك من ورا الابواب والشبابيك كلها حتتنفس الصعداء، ينزل منها هم، حتنفتح الابواب والشبابيك والشارع المعتم حينور بأضواء البيوت والبسمات التي افرجت عنها بالاستسلام. وإما تعضي على حقك وتمشي رابط الجاش واثق الخطى والزارعنا غير الله اليجي يقلعنا. ديل لاقوك متحزمين يا ولدي لاقيهم عريان. المدرس قالو للمحامي والله بعد كلامك دا ما ناطيهم. سجن سجن غرامة غرامة. والله اولع فيهم عن بكرة أبيهم. سلمى، دا الطريق الداير الرفقة. تمشي فيهو ومن طولو ومشقتو تيأس وتقول مالي ومال كده. تقول الروب وتفتش عن ضل في الطريق تنتهي عندو. قبيلة، طائفة، عصابة، نهب مسلح، جنجويد، حزب، فقشة حزب. أي خرارة تنحشر فيها، تتلم عليه، لتخرج من الوحشة إلى الأنس، أي أنس! لكين الدرب لسه والألفة بعيدة. مرة سمعت محادثة طريفة في تاكسي. واحد زي من الريف شاف الترلة عاصره على القندران وهم طالعين كوبري المسلمية. قال للتكاسي: القاطر الترلة على القندران لازم شتيتن شديد خلاص. التاكسي قاللو: إلا الولف. أهو دي الكلمة، أهو دا السر، اهو دي كلمة السر الحنعملبيها الانقلاب الخاتمة في حياتنا. سلمي، مليتني خوة، مليتني زمالة، مليتني رفقة. إنت الرفيق القبل الطريق. حركت ساكني. قال محمد عبد الحي الشعر رزق. وكنت سببي للشعر الليلة ياسلمي. ذكرتيني كلام (الشاعر) القال لها: فتحت منطقة الغنا الانسدا. عاوز أشعر فيك، عاوز أدوبي فيك. (تسجيل) صه يا كنار وضع يمينك في يدي. [email protected]
