– زولكم قال عاوز يشوف ناس عمار الدمازين ديل…الزول دا بتكلموا عنو كلام ..(عقد الجلاد) ما بتكلمو عنها كدا – المريخاب ديل قدر ما ابدعوا في الموضوع دا ..ما قدرو يطلعو بي شيء غير (عطرون) – كان لكريم الحسن …احسن تودوه الدهب ..وتستفيدو من وقتكم ساكت ..الزول دا قاعد ليكم (مغصة) بس – التوم قال احسن اشوف ناس ابوعاقلة – في واحد من ناس الجرايد ديل ..قال ابوعاقلة دا مفروض يفتحوا ليه (كلية حربية) التوم ود الحسن جاء من البلد – شايل ليه شوال دوم وكرتونة (ابري ابيض). ما عارف (الابري الابيض) الدخلو شنو في الموضوع؟. تجيبو للزول رمضان من غير ما يشعر. يكون قاصد حاجة تانية ب (الابري الابيض) دا. الله اعلم. التوم ود الحسن جاء نازل من البلد – قال جاء يشوف الهلال. عاوز يشوف الهلال بي نفسو. شوف عين عديل كدا. فتر من كلام الجرايد. ناس الجرايد ديل بتكلموا ساكت. يمين الكلام الفي الجرايد دا لو كان حقيقة – كان نلعب في كاس العالم. ولو ما فزنا بالبطولة – نصل للنهائي. عشان كدا التوم ود الحسن جاء شايل دومو وابريهو الابيض ..عشان يشوف الهلال. عاوز يشوف ناس عمار الدمازين ديل…الزول دا بتكلموا عنو كلام ..(عقد الجلاد) ما بتكلمو عنها كدا. التوم قال احسن اشوف ناس ابوعاقلة – في واحد من ناس الجرايد ديل ..قال ابوعاقلة دا مفروض يفتحوا ليه كلية حربية. وكان لي ولاءالدين ..مفروض يعملوا ليه كلية موسيقى ومسرح. الموسيقي عندو. والمسرح بتاعو قوى. بقدم ليه في عروض خيالية. سينمائية عديل كدا. انتوا ناس الهلال الاولاد ديل بجيبهم من وين؟. المريخاب ديل قدر ما ابدعوا في الموضوع دا ..ما قدروا يطلعوا بي شيء غير (عطرون). عليكم الله مدافع يقعدو علي جعفر كنبة …في باب مدرسة ثانوية ما بوقفو. وكان لكريم الحسن …احسن تودوه الدهب ..وتستفيدو من وقتكم ساكت ..الزول دا قاعد ليكم مغصة بس. الزول دا اوعكم تكونو سجلتوه بي اربعة صور. والله دي صورة واحدة كتيرة عليه. واوعكم تكونوا دفعتوا فيه رسوم ارنيك محترف؟. محترف شنو؟…لو عملتوا عمليتكم دي تكونوا بالغتو. الزول دا كان تسجلوه بالمساء. زولكم دا اصلو ما قراية صباح. قراية الصباح نحن بنعرفها. التوم ود الحسن ..قال جاء من البلد – قال عاوز يحضر ليه مباراة للهلال وحفلة لي محمد النصري. ويمشي على كدا. تاني ما عاوز اي شيء. وكان للدوم والابري الابيض …بيمسكو اسبوع كامل في الخرطوم دي. ناس الخرطوم ديل ..مالهم جاريين كدا؟. البيشوف جريهم دا يقول ما بقعدوا ليهم في حدائق. ولا بياكلو ليهم اسكريم. هسع الاسكريم الدخلو في الجري شنو؟..لو ما حركات منكم ساكت يا ناس الجرايد. التوم ود الحسن …مع الدوم والابري الابيض…شايل ليه (عريضة) من ناس البلد. قالوا ناس البلد – رفعوا ليهم عريضة للحكومة ..قالوا عاوزين (بشه) يزيد حصتهم من الاهداف. وقت ما جابوا ليهم الكهربة والموية ..يزيدوا ليهم حصتهم من اهداف بشه. اهداف بشه دي بتريح الزول في السلسة الفقرية. يعني يا بشه بدل الهدف الواحد – تجيب ليهم في المباراة هدفين. الناس ديل ما بيشبعوا. جمهور الهلال دا ما بقيف ليك في هدف. زيد الحصة. ارفع المعدل. هدف بشه في المريخ ..مرق ليك بي موسى الزومة للنيل شندي. وبلة جابر …في الخرطوم..ناس المريخ مقلبوه. العمايل دي كلها طلعت من رأس بشه. عندنا مريخابي بعد قون بشه الملاريا طارت ليه في (موبايلو). قلنا ليه الملاريا البي تطير في الرأس سمعنا بيها … لكن ملاريا تطير في (الموبايل) دي اول مرة نسمع بيها. موبايلو بقى يضرب براهو. والرسالة بيستقبلها في (خشم الباب). والرصيد بتاعو بدون ما يضرب ماشي منحسر. التوم ود الحسن ..قال جاء من البلد عشان الحاجات دي. الزول دا قبل كدا مشى فحص السكري ..الدكتور قال ليه تبعد لي من (السكريات). التوم ود الحسن قال ليه ..اوعك يكون (السكريات) دي فيها اقوان بشه. والله اقوان بشه دي لو كتلتنا عديل كدا ما بخليها. لو بقت (باسطة) ما بسيبها. بقعد ليها في الواطة. وبشرب بيها الشاي. التوم ود الحسن ..دخل مباراة الهلال ومريخ نيالا …من حسن حظو المباراة كانت عصر. احسن ليه بيدور يرجع بدري ..قبل ما تضلم. المواصلات زحمة ..والزول عيوناته بقن كعبات ..بشوف بيهن مسارقة ساكت. شوفو تاميها سمع. التوم ود الحسن ..دخل استاد الهلال ..وشاف ليه كرسي ناصية ..ما بحب ملافحة الكلام. عاوز يستمتع بالكورة. يستمتع بالفرجة. زي (القهوة) بعد فطور رمضان. الواحد لو ما قعد ليها في (البرش) ..ما بقدر يستوعبها ليك. التوم ود الحسن ..وقت بشه جاب قونو الاول – مشى وقف ليه في السياج ..وقال ليه يا بشه القون دا ما بحلك. نحن جاينك من بعيد. الناس ديل قالوا ليك ارفع الحصة. التوم ود الحسن قال كلامو دا ..ومشى قعد في الكرسي بتاعو. ما في زول قال ليه بتقول في شنو؟. التوم ود الحسن ..منتظر الهدف التاني. هدف واحد ولا بقتنع بيه. الزول جاكم بي دومو وابريهو الابيض – عاوزنو يرجع بي هدف واحد. بشه سمع الكلام. مسك ليك الكورة ودخل بيها غرفة العمليات. اي مدافع قابلو شايل منو رقم الفانلة. في مدافع من مريخ نيالا ..شرق…ومدافع تاني مشى غرب. الحارس مسكين ..ما عرف الحاصل شنو؟. معقولة الكلام دا بيحصل في الكورة. التوم ود الحسن وقت شاف الهدف دا …فتش جيبو ..قال انا جبت كرت بي ان سبورت معاي وإلّا شنو؟. الكلام دا ما بيحصل إلّا في الدوري الاسباني. التوم ود الحسن ..شاف الهدف وطلع من الاستاد. قال ما بقعد تاني. ومن استادو مشى الميناء البري ..قال راجع البلد …الامانة وصلت. ووصيتو اتنفذت. تاني قاعد ليها شنو؟. الدوم انتهى. والابري الابيض ..انتهى. والخرطوم غالية. مواصلات ساكت …الواحد عاوز ليه ميزانية. يمين لو ما الرصيد الرسلو لي التاج ود خليفة وهدف بشه ..الواحد كان اتقطع في البلد دي. والخرطوم قطعتها كعبة. التوم ود الحسن ..وصل البلد. واول ما وصل ..عملوا ليه (الغداء). ما عارف ليه …الزول البرجع من الخرطوم للبلد ..اول حاجة بيعملوها ليه (الغداء) ليه. الخرطوم دا فيها ازمة غداء وإلّا شنو؟. ما تسألوني. في حاجات ما معروفة. مجهولة الاسباب. لكن الناس كلها متفقة عليها. ومتوافقة. التوم ود الحسن زي كأنو اول مرة ياكل ..ضرب ليك في الغداء ..لمن اضنينو غطسن في وشو. ودعا التوم ود الحسن الى (ندوة) فورية. قال عاوز يكلم اهالي القرية والحلال المجاورة عن هدف بشه الاول. واشترط ما في اي زول يسألوا في الندوة عن هدف بشه التاني. عشان الهدف دا بالذات ما فهم فيه اي حاجة. ح يقول شنو عاد. مدافعين مريخ نيالا الاربعة لو شالوا الشريط ومشوا الاممالمتحدة بشوفوا ليهم عذر. وما بعيد فرنسا تمنحهم حق اللجوء السياسي. ……. ملحوظة : وانتهت الندوة على كدا. هوامش الوسط الرياضي لم يفقد عوض احمد طه فقط. الوسط الرياضي فقد الادب والثقافة والخبرات التى كانت متمثلة في شخص عوض أحمد طه. عوض احمد طه كان مثال للاداري (القدوة). نسأل الله الرحمة والمغفرة لعوض احمد طه. مباراة الهلال امام الاهلي مدني مباراة ما ساهلة. ما تسمعوا الكلام دا. الاهلي مدني عندو مدرب – عارف بيعمل في شنو؟. بقفل شديد. وبعد مباراة الاهلي مدني سوف يلعب الهلال امام الاهلي شندي. ومباراة الاهلي شندي هي المباراة الاصعب للهلال في الخرطوم. مباراة الاهلي شندي اصعب من مباراة القمة. عشان كدا اي زول يركز في ورقتو. شيدوا حيلكم. واعملوا حسابكم. النتائج قبل العرض. لكن العروض الجميلة قادمة باذن الله. اصبروا بس. وشيلوا (البلح). بلح شنو يا زول. ما تدخل لينا حاجات من رأسك في العمود دا. نحن فترنا من الكلام الساي. الواحد من يعمل ليه سيوتر…البرد يختفي. عشان كدا خلينا (السيوترات). والكلام الساي. في النقعة تحلو الوقعة. لن تصرف لك غير نقطة واحدة في الفاشر. ……… عاجل : الكورة القادمة ..كورة ولاءالدين.
