في السلك بابكر سلك قولوا اذن وامرقوا * قلوبنا مع الاهله الشرفاء * الجاتم تجي للعدو * موقفهم صعب شديييييد * والثوار ديل لابعرفوا ارض ولا بعرفوا جمهور * احفاد عمر المختار مابخافوا من الموت * الاخوه الاهله في ضيقه شديده * اسي هم زاتهم ماعارفين كورتهم من عصرا بدري ولا بالليل * كده وووب * وكده وووووبين * كان لعبوا عصر * الحكام مابجوا * والثوار مابجوا * عندهم الكورة ليل * والليل كلامو كتير * وكان قالوا يلعبوا ليل * الا يلعبوا غمدت لبدت * الكشافات وقفوها زي الزعافات وماعرفوا يوصلوها من وين * وكان وصلوها ما بتلحق * وكان لحقت ما بتولع * وكان ولعت ما بتستمر * وكان استمرت مابتنستر * اللمبات الصينيه بنعرفها * واللمبات الماصينيه بنعرفها * الصينيه بتطفي براها * مابتخليك تسأل الطفا النور منو * الطفا النور بكون اب كسكته * لانو استجل الموضوع * غايتو الا تلعبوها بضو الشموع * اعتبروها عيد ميلاد صفركم التسعه وتمنين * او اديكم فكره * عشان ماتدخلوا في عصر وليل * اول ما يأذن المغرب قولوا أذن... أذن وقوموا جاريين * الكاف لابعرفكم جريتو عصر * ولا بفرزكم جريتوا ليل * تجروا بس * المهم * بقولوا فلان شال اصبعو طبز بيهو عينو * الهلال شال ابيكو وطبز بيهو عينو * الزول ده ابعدوهوا من الحته الخطره ياروشا * الزول بطبز ليكم التانيه تاني الكسكته ماتشوفوها * المهم * موضوع المطار بتاع التاكسي والمحترفين ما موضوع بتخلي ساكت * الموضوع ده لو ثبت بثبت الاهمال الذي يرفل فيه الزعيم * وبتر هكذا اهمالات واجب علي مجالس الادارات * ولنا عوده حاسمه لهذا الموضوع * المهم * جماهيرنا اعدت العده لاعلان التأهل * موقفنا جيد * ولكن هذا لا يعني ضمان التأهل والنوم علي العسل * كل مجتمع المريخ عليه اعداد العده للمعركه * وحقو مانفكر في القسمة قبل انتهاء المعركه * عشان العدو مايقوم يغدرنا علي طريقة الافلام ويودينا في داهيه يلحقنا اولاد ناس طه لا سمح الله * ايها الناس * قررت المجموعه الغاء التيفو في مباراة الفريق النيجيري * ويعود ذلك بكل شفافيه * الي ان اهل التيفو يصرفون عليه من مصادرهم الخاصه * واستغل البعض القصه وحاموا يجمعون التبرعات من الشفوت تحت بند التيفو * وحتي يكون الامر واضحا وشفاف * قررت المجموعه الغاء التيفو مع التأمين علي توزيه الاضاءه الملونه علي الجماهير مجانا * ايها الناس * من يريد التبرع للزعيم * يتبرع من خلال قروبه الذي يثق فيه * او يحضر لدار النادي ويسلم دعمه بنفسه ويستلم ايصاله * وده كلو من اجل ضمان وصول تبرعك للكيان * ومن اجل سد الباب امام بعض النفوس التي قد تضعف * وبالذات النفوس اليومين دي مضغوطه لمن جابت الزيت * وضعفها وارد شديد * والحته دي حسمها بعد التأهل ان شاء الله ساهل جدا * ايها الناس * ماننوم في العسل * ومانعتمد علي نصرنا الهناك * نقفل باب مدينة بوكو حرام * ونفتح باب نصر جديد يدعمنا شديد المهم * يفرح الوطن يوم السبت * ليجدد الفرحه يوم الاحد * وتبقي فرحة الوطن فرحتان * عشان نخلف رجل علي رجل في وطن الافراح * وطنا يمتاز بالفرحه * نلقي الحافله نفرح * بتاع الحافله مايقطعوهوا ايصال يفرح * الكمساري يتخرج من الجامعه ويشتغل كمساري يفرح * المويه تنقط نفرح * تقطع نفرح * عشان لما تجي بنفرح * الكهربا تقطع جزئي نفرح * ولما تقطع عام نفرح اكتر * عشان الكانت قاطعه جزئي بترجع مع باقي الكهربا الكانت ماقاطعه * المدرسه تفتح نفرح * تقفل نفرح * ننوم نفرح * نحلم بالفرحه في نومنا * نقوم من نومنا نفرح * وهو في زول بقوم من النوم في بلدنا ما بفرح??? * الموتات والجلطات كلها بتجي والناس نيام * مويه ساي تعمل سيوله في الدم ان وجد مافي * ايها الناس * ان تنصروا الله ينصركم * اها * نجي لي شمارات والي الخرتوم * كان شفت يا والينا * الجلطات كترت علينا * عدم السيوله بعمل اكتر من كده قالوا لينا سلك كهربا ننساك كيف والكلب قال لاسيوله في الجيب لاسيوله في الدم بالطريقه دي بتصلبوا والي لقاء سلك
