توقيع رياضي معاوية الجاك التحية لصواميل الوصيف * كردنة قال حا يعتمد على الشباب.. وشطب ناس أبيكو المسكين. * هسع أبيكو لو موجود كان إتغلبتوا واحد بس * أها شطبتوه وإتغلبتوا تلاتة.. رجعوا أبيكو عشان ما تتغلبوا كتير * طيب يا وصيفاب كيف ما تتغلبوا وإنتو مركزين مع الصواميل أكتر من فريقكم؟ * والأرباب حالف يلاحق الوصيف دار دار.. زنقة زنقة.. مدينة مدينة.. شندي شندي.. صامولة صامولة * طبعًا في ناس حا يقولوا علاقة الأرباب شنو بهزيمة الوصيف؟ * الأرباب هو راعي الأهلي شندي.. وهو داعم النيل بمجموعة من النجوم * الوصيف إتعقد من كور شندي وفشل يفوز على الأهلي من صعود الفريق للدرجة الممتازة حتى اللحظة. * المرة الوحيدة الفاز فيها الوصيف على النمور في شندي كانت في البطولة الأفريقية.. وطبعًا الحكام كانوا حاضرين بقوة أكتر من الوصيف * النمور بهدلت الوصيف جوة الزريبة وجوة إستاد الخرطوم * وآخر كورة بهدلوا الوصيف جوة الخرطوم لولا الحكم رجل الراية الضعيف وهزيل المستوى المدعو هيثم النور شقيق عاطف النور مدير الكرة السابق بالوصيف * هيثم النور الهلالابي رفع رايته الظالمة وسلب عرق النمور وما فعله هيثم النور يندرج تحت بند الظلم التحكيمي وأمثال شقيق مدير الكرة السابق بالوصيف أحد أزمات الكرة السودانية لأنه فاشل بدرجة كبيرة في العدالة * نرجع لبهدلة النيل للوصيف أمبارح جوه دار جعل وكده العقدة زادت وجابت لها نيل كمان. * كنا فاكرين عقدة الوصيف مع النمور فقط لكن ناس النيل زادوها وعقدوا الجماعة * تاني كور شندي إلا تجيبوا ليها حكام أفارقة عشان يقوموا بالواجب أصلو الحكام الأفارقة بتعرفوا ليهم كويس وبتغلبوا بيهم طوالي * الكورة الجاية كلموا مجدي شمس الدين يعيِّن ليكم حكام من بره البلد * أها نرجع لي كردنة شطبوا أبيكو المسكين.. والشيخ موكورو وسيسيه وبرضو النيل فاض وقالوا في إيشيا * هزيمة النيل للوصيف أكدت براءة أبيكو. * يعني شنو لاعب يسجل هدف في مرماه * والله ظلمتوا أبيكو ساي.. لازم تعتذروا ليهو فوراً * أما العشري.. قالوا كيسو فاضي. * برضو كويس طلع عندو كيس عشان يفضى. * والله كنا فاكرنو ما عندو كيس زيو وزي كافالي المسكين وغيرهم * الشاف العشري على الخطوط المصرية ما كضب.. معقولة من بدري كده يا عشري؟ * لسه جيرانك ما سمعوا بيك مدرب للوصيف * قالوا العشري لسه ما فتح شنطة ملابسو * مسكين الراجل يفتحها في القاهرة * الغريبة شنطتو طلعت (مليانة).. لكن كيسو (فاضي).. حاجة عجيبة؟ * بالمناسبة علاقة مدربين الوصيف بالكيس الفاضي شنو؟ * سمعنا مدربين كتار قالوا كيسهم فاضي.. يعني لسه ما لقيتو مدرب كيسو مليان؟ * المرة الجاية جيبوا مدرب كيسو مليان.. ولعيبة كيسهم مليان * طيب ليه بترموا أي هزيمة في المدربين الكيسهم فاضي واللعيبة الكيسهم فاضي وتسيبوا الإداريين الكيسهم برضو فاضي * يعني إداريينكم كيسهم ما فاضي؟. * ننصحكم تجربوا تغيير الإداريين بعد غيرتو المدربين واللعيبة إحتمال الكيسهم فاضي هم الإداريين؟ * طيب إعلامكم كيف يا روشا وفطومة.. ما تقولوا لي كيسهم فاضي برضو؟ * أقول ليكم حاجة سيبك من فطومة وروشا.. نسأل آدم زول كردنة من الكيس الفاضي * آدم طلع بتاع كاميرات تصوير وتوثيق (للتكاويت والقبض) وما عندو علاقة بالكيس الفاضي * الكيس الفاضي قالوا مسئولية فطومة والرشيد * كبير يا وصيف.. أي زول بي تخصصو وما يتدخل في تخصص التاني * روشا وفطومة للكيس الفاضي.. وآدم للتوثيق.. بالصورة والكاميرا * بالصورة والكاميرا ذكرتنا الحبيب مبارك البلال.. اليومين دي هايج وقايم على الجماعة * الحبيب مبارك البلال بيكره الجعرانية طلعت ليهو سيكافا. * دنيا ضيقة يا بركة * مبارك قال هو أحسن من العشري.. يعني كيسو ما فاضي * يا فطومة بركة جاهز يدرب الوصيف لأنو كيسو مليان أكتر من كيس العشري * شغلتونا يا روشا وفطومة وبركة من كورتنا بكرة * نحنا عندنا كورة أفريقية مع وفاق سطيف.. يعني برنامجنا (مليان) ما (فاضي) زي كيسكم * خليكم مع المحلي وما تشغلونا لو سمحتو خولنا نركز مع البطولة الأفريقية الكبرى للأندية الأبطال * وإنتو شوفوا كورتكم الجاية مع منو في المحلي *بكرة إستادنا حا يكون (مليان) بي خمسين ألف شفت * وإنتو زمنكم فااااضي.. تعالوا أحضروا كورتنا عشان تملوا زمنكم لأنكم فاضيين وما عندكم حاجة تشغلكم لا بطولة أفريقية لا غيرو * قلتوا لي حا تعتمدوا على الشباب؟.. جميل. * أهو الشباب ما قصروا وحققوا نتيجة كويسة من أول مشاركة.. إتغلبوا بالتلاتة.. يعني المرة الجاية بالخمسة * حافظ عبد الغني ما قصر.. أداكم تمنية دقائق زمن ضائع وبرضو كيسكم طلع فاضي * الجماعة ديل أحرجوا حافظ عبد الغني يا جنابو حسن خلف الله * ديل الصواميل.. أقصد الشباب ولاّ بلاش
