في السلك بابكر سلك الطائرة السودانيه * قد يكون هذا العدد هو الاخير وندخل في عطلة العيد * كل عام والوطن بخير * وطالما الوطن بخير نبقي كلنا بخير * كل عام ونحن نرفل في سلام وامان ومحبه * يسود السلام اهلنا في دارفور * لتعود آمنه كما عهدناها * كريمة مضيافه معطاءه كما عودتنا * دايرين نعود لديوان الميرمات في فاشر السلطان * حيث الادب والتأدب والاحترام وحسن الضيافه والامن والامان * دايرين نركب قطرنيالا يدودر بينا من الخرطوم والجزيره ويشق النيل الابيض بكبري كوستي العتيق ليعانق خير كردفان الجوه والبره ومن الرهد يفرد جناحاتو مختارا الطريق الطويل المؤدي لنيالا الجمال والوقار * كل سنه ووطنا بخير يجري في رحابه النيل والقطر في امان * ويخضر مشروع الجزيره من جديد قطنا لتدور محالجنا من جديد ولتدور مصانع يوركشير ولانكشير من جديد ويردد المذياع * في الجزيره نزرع قطنا نزرع نتيرب نحقق أمالنا * وشعارنا لن تسقط لوزة قطن واحده * كل عام والوطن بخير طالما سودانير تحلق في الافق اشراقا علي مطار هيثرو لتتبوأ مقعدها القديم * كل عام والوطن بخير مشتعلا قمحا وقطنا ووعدا وتمني * كل عام والمواطن بخير مبرطعا في ساحات الوطن بمنتهي الحريه معربدا في طلاقه تواقه للانطلاق يحلم بوطن واسع يجري فيهو القطر وطن شاسع تحلق سودانير في فضاءاته بآمال المواطن وطن لامهموم ولا مجروح بي ضراع اولادو تخدر الجزيره من جديد * ايها الناس * تعالوا نتعافي ونتقالد ونحب بعض * عشان نتقدم * وياوطن في قلبي دقات اسمك ايقاعها بيزيد * ياوطن ساعاتنا دقت واعلنت انك في عيد * انت انت وانت لينا وليك من الافضال علينا ويا وطن يكفينا انك في بطاقاتنا الاسم * نحنا نفخر بيك سمعه وانت شمعه تضوي لينا ويا شرف اسمك يدقدق في جوازاتنا الختم * ياشرف اسمك يدقدق في جوازاتنا الختم * لله درك اخي شاعر الابيات اعلاه اكرم زكي * ايها الناس * تعالوا نجعل من هذا العيد اعلانا لخدمة الوطن * تعالوا نلغي السؤال القديم * البلد دي عملت لينا شنو * لنستبدله بسؤال جديد * نحنا قدمنا للبلد دي شنو * ايها الناس * للاوطان في دم كل حر يد سلفت ودين مستحق * فهل نفكر في سداد دين الوطن??? * المهم * كرياضيين نتمني تطورا ملموسا * وعشان يحصل لابد للتحكيم من ان يتطوز * يبطل يخطئ ولا يظلم دي * ويعطي كل ذي حق حقه * لان العداله هي الاساس الذي تقوم عليه اي نهضه حقيقيه * شرطة القضارف برضو اصابتها حمي ضربات الجزاء * حالتها وديه * بس كيف نتطور * ايها الاهله * كل عام وانتم بخير * لكن ربنا يحقق الاماني مابتلقوها مننا * لاننا بنعرف امانيكم كويس * ربنا يحفظ ليكم كردنه ويخلي ليكم الصفر الدولي * ايها الناس * الاتحاد العربي متين قال داير بطل 2016 ? * الاتحاد العربي قال داير بطل البلد دي * وبطل البلد دي هو المريخ * ناس قريعتي راحت حقو يشوفوا ليهم شتله معقوله * حق تمثيل السودان في البطوله العربيه حق اصيل للمريخ * المنسحبون يمتنعون * ومن الشتلات ان الاتحاد العربي يرفض مشاركة المريخ لما بدر من بعض لاعبيه في مباراة الكوكب * معقوله بس * مباراة الكوكب تتبع للكاف * الدخل الاتحاد العربي فيها شنو??? * وثم انو الاتحاد العربي يرفض المريخ ويقبل بي ناس تعاطوا المنشطات في منافساته وهربوا من اداء مباراه معلنه في منافساته ايضا?? * ده اتحاد عربي ولا عوير!!! * ايها الناس * ان تنصروا الله ينصركم * اها * نجي لي شمارات والي الخرتوم * كان شفت يا والينا * كنت نايم حلمت حلمه مجنونه * حلمت ليك بالدول دي كلها قاعده مع بعض تتونس يا والينا * وواحدات يشكن ويسألن ربهن يوفر لي شعوبن حق السخينه * تشاد قالت ماشفتوا العملوهوا ناس دبي فينا * فعلوا وتركوا وجهجهوا انجمينا * الريحه كانت من فرنسا بتجينا * اسي بت السودان مايتريح بيها الا مغندل عندينا * نطت غانا يا والينا * وقالت ماشفتوا العملوهوا ناس جمارك غانا فينا * والكاميرون تبكي وتشكي لينا * الارجنتين زعلانه من ميسي يا والينا * قالوا مع برشلونه يحير فينا * ومع المنتخب يبخل علينا * الدول كلها تشكي يا والينا * وامريكا تتفرج فينا *مصر ماخلت شئ يا والينا * زيادات محروقات وترشيد كهربات والسيسي جي والسيسي فات هو كل الجديد العندينا * قام السودان يجعر يا والينا * يتنهف وينف والدموع عشرة عشره يحنن فينا * شكي جنس شكيه يا والينا * كلو مايقول حاجه تنط دوله مستغربه وتقول لأ ياخ * ويشكي ويبكي يا والينا * تنط دولة تانيه تقول اصلو مابصدق يا اخينا * ويشكي ويبكي يا والينا * امريكا ربتت عليهو في كتفو وقالت ليهو معليش * الجاتك في مالك سامحتك سلك كهربا ننساك كيف والكلب قال فضل لينا من سودانير بس مدحة الطائرة السودانيه والي لقاء سلك
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
