بالعربي الكسيح محمد الطيب الأمين العيب في (المقعد) ما في الشريحة !! * حكمة الله .. (التمساح) بكل هيبته وقوته (يُبيض) ولا (يلد) .. * زيو وزي (الجدادة) .. * وقالوا في واحد لما عرف معلومة إنو التمساح يبيض ولا يلد ذهب للبحر وإنتظر خروج التمساح فقال له : والله أنا عارفك أنت شفت وأسد البحر وبتخوف الناس والسمك لكن أنا مما عرفتك بتبيض صدقني سقطت من نظري .. * كمان هسه هلال الفاشر لما عرف (حقيقة) المريخ قام إتعادل معاهم وديا داخل الرد (كسل) .. * المريخ أمام أى هلال أفضل نتيجه له ستكون مُحبطة مثل معلومة التمساح الذي يبيض .. * والله يكفينا شر (المُصدِي) اللمعتو الأيام .. * وجه الشبه بين وليد الشعلة وهيثم طمبل هو أن كلاهما (حرامي أقوان) بدرجة (نشال) .. * ووجه الخلاف بينهما هو : طمبل عندو شجاعة أدبية وثقة بالنفس ، والشعلة خجول ومهتز حبتين .. * إذا دعم جمهور الهلال وليد الشعلة (ربع الدعم الذي دعمه لهيثم طمبل) سيكون الشعلة هو حديث السودان في الفترة القادمة .. * قد يكون الجانب المهاري المتعلق بالمراوغة غير متقن عند وليد الشعلة ولكنه (زول شبكة ما ساهل والله) .. * نتمنى أن يحظى وليد بإهتمام جمهور الهلال العظيم حتى يدخل (الشبكة) .. * مدرب المريخ برهان تيه قال في تصريح له : مباراة هلال الفاشر كشفت لنا السلبيات .. * أها وبعد داك يا كوتش ؟؟ * حكاية كشف السلبيات دى معروفة لكن كده ورينا علاج السلبيات دى شنو ؟؟ * السودان ده كلو عارف سلبيات المريخ وما في ولا زول عارف ليهم إيجابيات يا برهان تيه .. * برهان تيه عقب كل تعثر بيقول ليهم : المباراة كشفت لينا السلبيات ولما يجو المباراة الجاية بتكون السلبيات نفس السلبيات وربما زايدة شوية .. * واضح إنو برهان تيه زول بتاع (تشخيص) لكن ما بتاع علاج .. * برهان زول بتاع كشف سلبيات لكن ما بتاع علاج .. * عشان كده أنا بقترح تخلو برهان تيه لكشف السلبيات وتجيبو شرف الدين موسى للإيجابيات .. * هكذا أقترح .. * وأى زول طبعا حر في (مقترحاتو) .. * أنا حر .. * إن شاء الله أقترح لناس الرابطة كوستي لما يجو لمباراة المريخ يكتبوا في شعارهم : (نادى الرابطة كوستى الشهير بالهلال) .. * لو قلتوا : (الرابطة كوستي الشهير بالهلال) أنا بضمن ليكم تلاتة نقاط قدام المريخ .. * أى فريق عايز يقابل (الإصيفر) ممكن يستعين بأسم الهلال ك(لقب) حتى يساعده على (خُلعة المريخ) ويخرج منتصرا أو متعادلا على اسوأ الفروض .. * حاجة تكسف .. * مطلوب من الهلال أن يُسخر كافة إمكانياته البشرية والفكرية والمالية من أجل دعم سعادة الفريق المدهش عبد الرحمن سر الختم للفوز برئاسة الاتحاد العام .. * الكاردينال بقوته المالية الرهيبة يستطيع أن يأتي بالفريق المهدش رئيسا للاتحاد .. * وطبعا أصلا الإنتخابات بقت قروش ، والقروش بحمدلله عندنا .. * يبقى الواجب مجتمع الهلال لازم يقف وقفة رجل واحد مع الفريق المدهش ليس طمعا في مساعدته للهلال عندما يصبح رئيسا وإنما طمعا في تخليص الكرة السودانية من هذا الكابوس المُقلق جدا .. * وداعا للقيمات … و(سر الختم رئيسي) .. * من باب (نقطة قصاد كل عضو) وبما أن مجلس المريخ فيه (28) عضوا فنحن نرجو أن يكون هذا العام فارق النقاط بيننا والإصيفر (28) نقطة ، وهذه مسؤلية الأخ غير الشقيق شيبولا .. * شيبولا ب(الباء) .. * مرات في الموبايل (مقعد الشريحة) بيكون ما ثابت ، وبالتالي الشريحة ما بتقرأ .. * أنت ممكن تفتكر (شريحتك حرقت) لكن لما تدخل الشريحة في تلفون تاني وتقرأ بتعرف العيب في (مقعد الشريحة حقت تلفونك) .. * العيب في المقعد وليس الشريحة .. * وهذه الثقافة الهاتفية تجسدت بصورة طبق الأصل في المهاجم محمد عبد المنعم عنكبة .. * عنكبة كان ( مهاجم يتلتل) في الخرطوم الوطني ، قاموا ناس المريخ شافوا وسجلوا .. * عنكبة أول ما سجل في المريخ بقي (يجري جري الحوش وغير التعب ما بحوش) .. * قاموا ناس المريخ زهجوا منو وودوهو إعارة هلال الأبيض .. * مع هلال الأبيض تألق عنكبة وسجل أهداف بالجملة جعلته ينافس على لقب الهداف .. * يعني لما مشى هلال الأبيض تاااانى بقى (مهاجم يتلتل) زي ما كان في الخرطوم الوطني .. * قاموا ناس المريخ شافوا متألق مع هلال الأبيض طالبوا بإنهاء الإعارة وجابوهو راجع تانى .. * عنكبة لما رجع المريخ للمرة التانية بقى (يجري جري الوحوش وغير التعب ما بحوش) .. * وهذا يقطع الشك باليقين ان العيب في المريخ وليس عنكبة .. * العيب في (المقعد) وليس (الشريحة) .. * طلعوا (شريحة) عنكبة من موبايل المريخ وركبوها في موبايل (النسور) ح يدور زي الما حصل شي .. * والله يكفينا شر (المُصدِي) اللمعتو الأيام .. * يستطيع الهلال أن يلعب مباراته في الأسبوع الأول للدورة الثانية أمام هلال كادوقلي اليوم بتشكيلة ، ويلعب مباراته الثانية في الأسبوع الثاني أمام هلال الأبيض بتشكيلة مختلفة .. * السؤال الذي يطرح نفسه : هل يستطيع المريخ أن يلعب مباراة ودية شرفية في غياب رمضان عجب ؟؟؟ * أشك في ذلك والله .. * عيب والله فريق يعتمد على لاعب واحد .. * كده عيب يا (عزو) .. * هسه رمضان عجب ده لو أخد كرت ووقف ح تعملوا شنو يعني ؟؟ * ح تنسحبوا مثلا ولا ح تطلبوا التأجيل ؟؟ * رمضان عجب ده يا الكاردينال شهر أطناشر لازم تشوف ليهو إعارة لشبيبة القيروان .. * وديهو إعارة وخلينا (النشوف آخرتا) .. * نشوفهم تانى بيلعب كيف بدون رمضان عجب (ولدنا) ده .. * بمناسبة (رمضان) عجب .. * أنا ما عارف حكاية (الستوت) دى فاتت كيف على محسن سيد .. * محسن سيد كان ممكن يقول : (تعثرنا بكادوقلي نسبة لصيام عدد من اللاعبين للستوت) .. * دى شماعة مناسبة جدا يا محسن سيد فلماذا لم تستغلها ؟؟ * فاتت عليك كيف يا محسن ؟؟ * و الله يكفينا شر (المُصدِي) اللمعتو الأيام .. * ونركب صافنات ونجيبة (بورتسودانية) وأصلو الزول بيموت والذكرى تفضل حية .. * و..و.. * وغدار دموعك ما بتفيد في زول …(بقى ينوم بعد المغرب مباشرة) ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore