بابكر سلك * يوم النكسة كانت لياقتنا البدنية متدنيه * وساعد علي ذلك نشاط لاعبو الهلال الزائد والغير طبيعي * قد يكون اعدادهم النفسي هو سبب النشاط الغير عادي * وقد يكون خوفهم من الشطب الجماعي هو السبب * وقد تكون قناعتهم بالفارق الكبير بين امكانيات ناسنا الفنية وبين الفاقد الفني العندهم هي سبب النشاط الغير طبيعي * واسباب النشاط كثيرة * تؤخذ دوما في شكل جرعات * سواء كانت نفسيه او بدنية او او او * المهم ان النشاط يكتسب باي وسيلة من وسائل التنشيط المتاحه وفي شكل جرعات * عمك بشة يظهر عليهو لم يتحمل الجرعه التنشيطية ايا كانت نفسيه ام بدنية ام ام ام * فسقط كثيرا طالبا التدخل الطبي * وبالذات لما وقع في التش وقعت برج التجارة * اتكوم في الشافع زي الجد لما يقع في حفيدو الكان قايدو في الشارع * لكن ظهر ذلك النشاط جليا في الجري الجراهو الحاج كاريكا * وفي حوامة الطاهر الحاج والتحاماته وهو الذي عرف بالضعف في الالتحام بل وتفادي الالتحام * ايها الناس * اسباب الخسارة كتيييرة * اولها نحنا ما عرفنا انو ما خاب من استشار * فحضر الهلال بكونسلت فني كامل اكتر من عدد اللاعبين * وحضرنا نحنا بمدرب واااحد لا مساعد له ولا شورة ولا مشورة ولا يحزنون * ففقدنا السيطرة علي الوسط بالاصرار علي امير التقيل والتكت الغير مركز كمحاور * وتوهنا السماني بين هذا وذاك * وزدنا الطين بله باخراج واحد من الوسط المتهالك لندخل مهاجم * لو في شورة مابحصل كده * صحيح نحنا مامدربين * لكن شقينا المقابر * تقلة امير وعدم تركيز التكت كان بغطيهو رمضان بالحركة الدؤوبه * جينا ختينا رمضان طرف لنكشف عن عورة بطء امير وعدم تركيز التكت * عدم الشورة كعب شديد * ومن الاسباب عدم وجود الاعداد النفسي اللازم * غير امير و رمضان وجمال وبكري وعلاء (المتهالك ) ما كان عندنا زول عندو خبرة في النهائيات * لذا كان الاعداد النفسي والتهيئة مهمة * غفلنا عنها لاننا انشغلنا بسوداكال و مشاكله وكاس السد وكوارثه وفتح البلاغات في بعضنا البعض * ايها الناس * الخطأ اصلو ماعيب اذا الناس استفادت منو * فهل تركنا الفارغة و التبعية للافراد التي تفرقنا وتفرغنا لنمارس عشقا نبيلا للكيان ??? * المهم * امامنا تنافس لسه * الانفعال سيقونا لخسارته مثلما خسرنا الممتاز * التعقل والاستفادة من التجارب والشورة هي اسباب انتصارات ننتظرها لتمحو عار الخسارة من فريق ضعيف لا مبرر لها مهما كانت الاسباب * ايها الناس * ظهر الانسجام علي دفاعنا في وجود باسكال الذي نعتقد انه اصبح ركيزة دفاعيه هامه في عهد محمد موسي * فقدنا باسكال لانه يطالبنا بمتأخرات عجز المجلس عن توفيرها له وطال انتظاره لها * فطال انتظارنا ليلة السبت * وان كان جمال يا جماعة سوداكال يسدد متأخرات وارقو * وينحصر دور المجلس في توقيع قريش علي المخالصة * وان سافر باسكال بسبب المتأخرات التي عجزتم عن سدادها * ويفترض ان يسددها جمال * تاعبين روحكم ومرشحين انفسكم في شنوووو? * كان تخلونا نقفل النادي لما جمال يرتاح ويجي يواصل نواصل * قلتوا جرجيركم بالكونتينرات * لاشفنا جرجير ولاسيد الجرجير * قلتوا جيتوا تخرجوا النادي من الجيوب * ادخلتوه في متاهات * لا استطعتم لم الشمل واستقطاب الدعومات * لا دفعتوا انتوا * ولا شرعتوا في استثمار * برغم اننا ايدناكم وبايعناكم لقيادة السفينه * علي الاقل يكسب المريخ كوادر جديده وخيارات عديدة لادارته والتحليق به في فضاءات ارحب * ولكن يا خوفي من غد * لن اتحدث عن ضلمة الجوهرة الفالقننا بيها * المصور محتاج يصور بفلاش * لكن غمتونا في الضلمة * وقال كراسي قال * خمسة صفوف زي كراسي ست الشاي * والزول الصورتوهوا قلتوا بكسر في الكراس انا قابلتو * حلف لي بالتقطعو قال ما كان بكسر في الكراسي * كان بكتل في الجقور * واتنشطي * ايها الناس * تدهور مردود السماني شديييد * ممكن نعيرك يا كابتن لما يقوي عودك * بنوديك لمكان تحبه ولا تشعر بالغربة فيه * رايك شنو نعيرك للديم وسط يا نجم ?? * العب ليهم بالجمبه دي * الجمبه الشمال * ايها الناس * ان تنصروا الله ينصركم * اها * نجي لي شمارات والي الخرتوم * كان شفت يا والينا * زمااان ايام طلع البترول من بير ودخل في بير اعمق يا والينا * قاعدين نتغدا كاسرة كلنا الغدا لامينا *قلنا لي خالاتنا البترول طلع جد لينا * قالت بترول ماشفتو في صينيتي دي غمست فيهو رغيفتي ما طلع ابدا لينا * اها دحين يا والينا * سياسات ما خلت جنيهنا يجيب علي الاقل دولار زينه في زينه * تبقي سياسات ما اتعملت لينا سلك كهربا ننساك كيف والكلب قال جابت ليها شلب كمان !!!! والي لقاء سلك * ايها الناس * ايهم احق بالجلوس في الكنبة * اسد وشمس الدين ام خالد وهيثم ?? * طيب ليييييه