محمد عبد الماجد * غرابة الأشياء في المريخ وجلاحة (المنطق) جعلهم يتجاوزا هزيمة فريقهم من الهلال 0 / 2 ويتجهوا الى معاتبة وانتقاد فريق الخرطوم الوطني الذي خسر أمام الهلال 0 / 1. * ليه الخرطوم الوطني تخسر؟. * وكان يمكن ان تقفل أحسن من كدا. * وكانوا يلعبوا بقوة. * وأمير ابوالجاز مفروض ما يطلع حمزة داوود. * وحمزة داوود مفروض ما يتصاب. * وصلاح الامير ليه قعد في الكنبة. * وقلق ما كان يطلع الكورة. * ولوكا كان يتقطع. * الكلام دا كان تقوله لأحمد آدم ورمضان عجب. * قولوه لي صلاح نمر وعلاءالدين يوسف. * عاوزين ناس حمزة داوود يتقطعوا ليكم. * ومحمد ابراهيم يقيف الف أحمر. * عشان يغلبوا ليكم الهلال او يتعادلوا معه. * وبعدين يجي التش يفوز بنجومية المباراة. * التش يا معلم. * التش يا خطير. * والتش يا صعب. * ترفعوه لينا السماء. * والغربال تعملوا ليه توم وشمار. * هداف الدوري. * دا هداف الحكام. * ناس المريخ ..شايفين الخرطوم الوطني قصرت، وجازمين بأن الخرطوم الوطني كان يمكن ان تكون أفضل من الصورة التى ظهرت بها أمام الهلال من أجل ان يهدي لقب الممتاز للمريخ. * قابلتكم قوة عين زي دي. * لاقتكم حاجة بالشكل دا. * في (جلاحة) كدا. * أنا (جلاحة) زي دي عمري كلو ما صادفتني. * يعني المريخ يعسكر في تركيا 21 يوم. * ويمشي القاهرة. * والدوحة. * والقاهرة. * واديس ابابا. * ويلعبوا في البطولة الافريقية. * ويلعبوا في البطولة العربية. * ويسجلوا التش ب 4 مليار من الخرطوم الوطني. * ويسجلوا أحمد آدم من الخرطوم الوطني ب 4 مليار. * وبعد دا كلو ...عاوزين الخرطوم الوطني تغلب ليهم الهلال. * فالحين. * وشاطرين شديد. * وناس بكري المدينة ومحمد عبدالرحمن يطلعوا يتفاصحوا في الجرايد. * جنس دا شفتوه في حتة؟. * دي (شلاقة) شنو الوقعنا فيها دي؟. * انتوا (المنطق) عندكم فيه (فروقات). * بتشيلوه (بدل فاقد). * المريخ الذي فاز على الأهلي الخرطوم في الدورة الاولى 5 / صفر بكل يسر وسهولة (مباراة ما فيها أي عرق) ..وجاء وفاز على الواقف على الأهلي الخرطوم في الدورة الثانية 2 / 1 بعد ان أبعدت 4 عناصر أساسية من تشكيلة الأهلي بقيادة موسى الزومة وبلة جابر وبكري حماد وفريد، معتقدين ان خسارة الخرطوم من الهلال 0 / 1 هي المشكلة. * لكن فوزهم هم على الأهلي الخرطوم عادي. * عادي بتحصل. * هم عندهم التش الخطير. * بيحسبوا ان هدف بويا هو الذي أضاع على المريخ لقب الممتاز. * تقول (بويا) جايبنو (طبيب) للفريق. * تقول (بويا) دا بيلعب في نيوكاسل. * المريخ مباراة القمة دخل للقاء بفرصتين. * الخرطوم الوطني يعمل ليكم شنو؟. * نجيب ليكم فرصة زيادة. * يا جماعة دي (جلاحة) شنو الوقعنا فيها دي؟. * معقولة بس. * انتوا هسع مصدقين. * عاوزين الخرطوم الوطني تغلب ليكم. * وتمشوا تضربوا (اللحمة) في قندهار. * وتعملوا احتفالات. * وترقصوا وتغنوا. * ويقولوا ليكم الخرطوم الوطني غلبت الهلال او اتعادلت معاهو. * ويوم مباراة القمة بين الهلال والمريخ تجوا (تنبرشوا) قدام الهلال. * والغلطان منو؟. * غلطان فريق الخرطوم الوطني. * صلاح نمر أصلو ما غلطان. * دا كرشوم. * علاءالدين يوسف أصلو ما عندو ذنب. * دا حمزة داوود. * احمد آدم لا يسأل. * يسأل حاتم رحال. * انتوا عارفين كان تجيبوا ليكم حكم ...من ناسكم. * من ضربات الجزاء بتاعاتكم الكتيرة ديك..تعطوا الخرطوم الوطني 5 ضربات جزاء عشان تغلب ليكم الهلال. * وتشيلوا الدوري الممتاز. * جماعتكم خلوا كورتهم...وركزوا في مباراة الهلال والخرطوم. * كلهم قعدوا يقولوا هسع أمين ابراهيم لو جاب الفرصة التى اتيحت له ..دا كلو ما كان حصل. * أمين ابراهيم ضيعها. * دي كورة تضيع. * قبلوا على أمين ابراهيم ...وتركوا التش الذي اضاع فرصة سهلة. * والتكت. * ومسكوا في أمين أبراهيم. * ناس المريخ ثقتهم في الخرطوم الوطني أكبر من ثقتهم في فريقهم. * عاوزين الخرطوم الوطني يحسم ليهم الموضوع. * هم عارفين ومقتنعين انهم ما بقدروا يعلموا حاجة قدام الهلال. * وينو التش؟. * وينو الغربال؟. * وينو التكت؟. * وينو السماني الصاوي؟. * وينو بكري المدينة؟. * وينو رمضان عجب؟. * محمد موسى مدرب المريخ منذ ان تولى الاشراف على المريخ شابكنا سوف نحقق بطولة الدوري والكأس. * أي تصريح ليه بعد المباراة يقول ليك ح نفوز بالممتاز. * الممتاز بي فرصتين طار منكم. * كأس السودان كيف؟. * انتو بي فرصتين ..ما انسترتوا ...عاوزين تنستروا بي فرصة واحدة. * كدي أول حاجة امرقوا من شندي وتعالوا علينا. * ان شاءالله ناس شندي ما يعملوا لينا المباراة (الصلات الطيبة). * يا أحمدونا أوعكم من حفلات الشاي. * والصور الجماعية. * والعلاقات الأخوية بين الأهلي والمريخ. * أوعكم من دي. * شوفوا الهلال أمام المريخ في قمة الممتاز عمل شنو؟. * بيلعب مباريات ضاغطة. * من مدني للفاشر. * ومن الفاشر للخرطوم الوطني...وناس المريخ مرتاحين ما طلعوا قريب من الخرطوم. * الهلال مباراة القمة الأخيرة لعبها بعد 48 ساعة فقط من مباراة الخرطوم الوطني الصعبة. * والمريخ لعب مباراة القمة بعد 72 ساعة من مباراة الأهلي الخرطوم. * والهلال كان قادم من الفاشر. * بعد تعادل وايقافات واصابات. * مع ذلك جاء الهلال وتغلب على المريخ. * اتعلموا يا ناس الأهلي شندي. * ما تقعدوا تتلفتوا لينا ساكت. * شوفوا الهلال. * نحن هلال مريخ زي دي ما شفناها قريب. * دفاع مهلهل. * وسط تائه. * وهجوم ضيف شرف. * الهلال عمل فيهم أي حاجة. * قون في الشوط الاول. * وقون في الشوط التاني. * أي حاجة بي نظام. * ما في لفح ساكت. * ما تقطعوا لينا حاجات من رأسكم. * نحن كلام زي دا ما عندنا. * كلام زي دا ما بنفع معانا. * ولا بخارج. * دخلوا مباراة القمة بفرصتين ..مع ذلك بفتشوا ليهم في فرصة في مباراة الهلال والخرطوم الوطني. * المريخاب قاعدين يتجرسوا براهم. * في الحلة. * وفي القروبات. * وكلهم يشيلوا ويختوا في اللوم في بويا. * قالوا لو ما (بويا) دا كلو ما كان حصل. * هسع اوتارا لو ما اتصاب. * بويا لو ما شارك. * كان المريخ شال الممتاز. * محمد ابراهيم لو كان طلع استلم عكسية مدثر كاريكا...كان شلنا الممتاز. * ومدافع الخرطوم الوطني هو ذاتو ما كان يعمل مخالفة. * مخالفة ما في ليها أي داعي. * كلو من بويا. * بويا لو ما جاب القون دا.. جمال الوالي كان أعلن عن حافز للاعبي المريخ. * وسلك كان كتب عن التش. * وما كان بيزعل كدا. * وأبوشيبة ولا كان بجيب سيرة للحكام. * لو بويا ما جاب قون في الخرطوم الوطني ...هسع مزمل ابوالقاسم كان بتحدث عن (أبوزرد). * وخالد عزالدين كان رجع يكتب عن جنسية باسكال. * وجمهور الهلال كان بترقب قرار لجنة الاستئنافات. * بويا ما كان يعمل كدا. * بويا ما كان يحرم المريخ من انو يدخل لمباراة القمة بي 3 فرص. * يمين لو دخلتوها بي 110 فرصة ..ما بتشيلوا الممتاز. * الممتاز حقنا. * ما تتعبوا ساكت. * معسكر في تركيا. * ومعسكر في القاهرة. * واديس والدوحة. * والبطولة الافريقية. * والبطولة العربية. * وبعدين ما عندكم في الدوري غير (الوصافة). * تعسكروا ..او ما تعسكروا. * تسجلوا التش..او ما تسجلوا. * وصافتكم ما بتفوتوها. * ........... * ملحوظة : لكن برضو كلو من بويا. هوامش * مريخابي قال لي هو بويا دا مالو بيبكي بعد هدفو في الخرطوم الوطني ...والله نحن المفروض نبكي. * الزول دا أدانا السهر. * الزول دا أصلو ما ادانا راحة بي هدفو دا. * الهلال يلعب اليوم أمام هلال الابيض مباراة لرد الاعتبار. * الهلال هذا الموسم هزم كل الأندية عدا نادي هلال الابيض. * الهلال تعادل مع هلال الابيض في الابيض وتعادل معه في أم درمان. * وليس امام الهلال خيار اليوم غير الانتصار. * اليوم نتمنى ان تتاح الفرصة لاوكرا وشيبوب وابراهومة ومؤيد الصيني. * عناصر الهلال الأساسية تحتاج للراحة. * الراحة من أجل النهائي. * وان شاءالله الهلال قادر على حسم المباراة اليوم بي أي تشكيلة. * ابراهومة أمام المريخ يلعب بالبدلاء. * وامام الهلال ابراهومة يقوم باراحة العناصر الأساسية في المباراة التى تسبق مباراة فريقه أمام الهلال. * في نيالا قام ابراهومة باراحة عناصر هلال الابيض من اجل مباراة اليوم. * الليلة عاوزين الرد. * عاوزين نشوف الحماس والروح التى لعب بها الهلال امام المريخ. * ننتظر ان يجمع الهلال باذن الله وتوفيقه بين الدوري والكاس كما فعل الموسم الماضي. * اذا حدث ذلك فان الهلال لم يسبق له هذا التوالي الذي يجمع فيه بين الدوري والكأس. * عشان كدا ..ألعبوا من أجل هذا الانجاز. * الريدة والثعلب ووليد علاءالدين ..كل هذه العناصر أمنحوها الفرصة اليوم. * الهلال يلعب بدون ضغوط اليوم بعد ان حقق البطولة الأكبر. * البطولة المحببة للهلال. * لكن مع ذلك عاوزين الكأس. * الناس ديل لو خلينا ليهم كأس السودان ممكن يبيعوه. * كأس السودان ما بنسمح ليكم ببيعه. * وان كنا نتوقع مغادرة المريخ ان شاءالله للكأس من مدينة شندي. * ................ * عاجل: دوري وكأس يا هلال.
