المهم (خلاصة الحواري) كدا – اقصد خلاصة الكلام ...جمال سالم دا ما عندو اي (علاقة) بالكورة """""""""""""""""""""" اذا كان عصام الحضري لاعب ب (5) حريات – جمال سالم دا لاعب ب (3) جنسيات """"""""""""""""""""""""""""" نحن حرية واحدة ما لامين فيها – انتوا عاوزين تجيبوا ليكم اجنبي في البلد دي وتمنحوه الحريات الخمسة """""""""""""""""""""""""""""" جايبين ليكم حارس عندو (3) جنسيات..ليه ؟..وعشان شنو؟..عاوزين تمشوا بيه عطارد..الموضوع ما بستاهل كل هذه الجنسيات """""""""""""""""""""""""""""
· قلت ما استعجل – (هي الدنيا طارت). · ملوة البصل عملت كم؟. · قلت ما نبقى ناس (انطباعيين) ساكت – ونحكم على الاشياء من منطلق (هلال مريخ). · وحيث نحن في الحتة دي – واحتمال ويمكن في اي لحظة تجي (مطرة). · كيلو الضان عمل 80 جنيه – (يعني الضحية السنة دي خبر). · هسع (المطرة) الدخلها في السطر الفوق داك شنو؟...(السطر القبال دا). · قلت نعطي جمال سالم فرصة – ما نبقى ليه زي الزول العاوز منو قروش. · تتلحو (ملاحقات) لمن يفهم حاجة. · وقت تقفل التلفون – يرسل ليك (رسالة). · اول ما تفتح التلفون – الرسالة تجيك ناطة. · ومرات الزول من (دغالتو) يرسل ليك رسالة فاضية – عشان من تفتح التلفون يضرب ليك. · يا زول مالك قافل التلفون من الصباح. · ان شاءالله خير. · شوية كدا – يدخل ليك في الموضوع طوالي – اها قروشي عملت لي فيها شنو؟. · ناس ما عندها (رحمة). · ناس ما بتعرف (المقدمات). · ناس مستعجلة كدا. · جمال سالم دا – نحن قعدنا ليه – قلنا ما نستعجل عليه. · قلنا نعطيه فرصة شوية ..وما نحكم عليه بالشبيح البعمل فيه دا. · الزول دا تقول (موظف في بنك) اي كورة بمسكها بفكها ليك. · طبعا الموظفين بتاعين البنوك ما عندهم اي علاقة بالكورة – الواحد فيهم يربط ليه (كرفتة) ويقعد يعاين في (الشيك). · علاقة الكرفتة بالشيك شنو؟. · ما عارف في (علاقات) كدا بتظهر ليك من غير اي مناسبة. · زي علاقة الزول الطويل بالجبنة. · الواحد يكون (طويل وعريض) ويجي يقول عاوز ليه جبنة ب (2) جنيه. · ليه الناس بعملوا كدا في (المطر). · يا ود الناس هسع علاقة المطر بالجبنة شنو؟. · ما تقعد تقطع لينا حاجات من رأسك – وتحاول تقنعنا بيها. · المهم (خلاصة الحواري) كدا – اقصد خلاصة الكلام ...جمال سالم دا ما عندو اي (علاقة) بالكورة. · فكرتو في الكورة في (يوغندا) بتاعتو ما بتلعبو ...انتوا جايبنوا لينا هنا كمان. · خمس رغيفات بي كم؟. · الغريبة والشيء البنفهمها ..انو يفترض ما يكون في حارس اجنبي في الدوري السوداني. · رمزي صالح – اقنعوا ليك الناس انو بيلعب في البلد دي بي قاعدة من قواعد جامعة الدول العربية. · رمزي صالح دا تقول (سفير). · لعبوها لينا في الدوري السوداني بواسطة جامعة الدول العربية. · جامعة الدول العربية في السياسة ما عندها (وجود) – لا حس ولا خبر. · عاوزين تعملوا ليكم وجود لجامعة الدول العربية في (الرياضة). · غزة بضربوا فيها صباح ومساء – ما شفنا لينا فيها (فصل) من جامعة الدول العربية. · وينها جامعتكم البتلعبوا بيها حارس مرمى فلسطيني في السودان؟. · مشيّنا موضوع رمزي صالح – لكن حفظناه في الارشيف. · نحن حقنا ما بنخلي. · ولا بننساه. · رمزي صالح طبعا عمل ليه امتحانات الجامعة بشه. · بشه جاب ليك فيه قون بي اي طريقة. · قون بي هنا – وقون بي هنا. · نحن القاعدين في التلفزيون ما فهمنا حاجة. · بي اي حتة بشه جاب ليك قون في رمزي صالح. · ناس جامعة الدول العربية طوالي ادخلوا – قالوا معقولة ..نحن نجيب ليكم حارس عشان تبهدلوه لينا كدا. · ناس جامعة الدول العربية طوالي عملوا (اجلاء) لرمزي صالح. · قالوا (الرجم) البعمل فيه بشه دا في سوريا ما في. · انتهينا من موضوع رمزي صالح – قالوا المرة دي يجيبوا ليهم حارس (طاعن) في السن – عشان يبقى راكز شوية. · عشان يركز. · تفتكروا حابوا منو؟. · تلقاكم انتوا هسع قلتوا جابوا (احمد شوبير). · بتقطعوا من رأسكم. · شوبير يجيبوه في المطرة دي يعمل شنو؟. · هسع الدخل (المطرة) هنا شنو؟. · بتتكلم ساكت. · تلخبط الزول في (سنونو). · ناس المريخ جابوا (عصام الحضري). · قالوا دا الحارس الوحيد البحلها لينا. · افضل حارس ثلاث مرات على التوالي في بطولة الامم الافريقية. · حارس القرن. · حارس الاهلي المصري. · حارس الزمالك. · حارس الاسماعيلي. · حارس سيون السويسري. · قلنا ليهم دا شنو الحارس الزى (المدرسة الابتدائية) دا في اي حتة عندو فصل. · قالوا لينا ما في غيرو. · بس الحضري بحلها لينا. · جابوا الحضري. · قلنا ليهم دا كمان ح يلعب معاكم بي ياتو قاعدة. · قالوا بالحريات الخمس. · قلنا ليهم حراسكم ديل والله مفروض تجيبوهم من وزارة الخارجية. · حريات خمس بتاعة شنو؟. · نحن حرية واحدة ما لامين فيها – انتوا عاوزين تجيبوا ليكم اجنبي في البلد دي وتمنحوه الحريات الخمسة. · اولاد البلد ما لاقين الحريات دي ..عاوزين تعطوا (الحضري) خمس حريات. · قعدنا فكرنا. · قلنا نشوف لينا مخرج في (المطر) دي. · مطر شنو يا زول؟. · ما تدخل (المطر) ساكت – البلد ما ناقصة. · طيب يا جماعة فهمونا. · اشرحوا لينا (الحريات الخمس) دي شنو؟. · قالوا لينا اول الحريات دي ..(حوض سباحة). · قاموا عملوا ليهم (حوض سباحة) في شقة عصام الحضري. · الحضري دا في بلدو وقت كان بلعب في الاهلي القاهري ايام شبابو ومع كل البطولات التى حققها مع الاهلي ما كان عندو (حوض سباحة). · حوض سباحة شنو؟. · ديل (دش) ما كان عندهم. · كانوا بستحموا بالجردل. · تجوا يا ناس المريخ تعملوا ليكم (حوض سباحة) للحضري – والبلد غرقانة. · طيب دي حرية. · الحرية التانية شنو من الحريات الخمس؟. · قالوا لينا الحرية التانية الحضري اي كورة يستملها ان شاءالله من زميلو يصرفو ليه عليها (حافز) بالدولار. · طيب والحرية الثالثة. · قالوا لينا الحرية الثالثة – الزول دا عندو حق الاعتراض ممكن يقول اي حاجة. · وممكن يتدخل كمان في التشيكلة ..والتبديلات والغيار. · والحرية الرابعة. · الحرية الرابعة كل اسبوع يغيروا ليه عربيتو. · والحرية الخامسة. · الحرية الخامسة يجييوا ليه (تورتة). · والحضري زول شفت – لقى التورتات دي بقى كل اسبوع يحتفل بي عيد ميلادو. · بلة جابر دا بلعب في المريخ (9) سنوات – مرة واحدة ما سمعناه قال عندو (عيد ميلاد). · بلة شنو؟..باسكال ابو شعر مصبغ دا (عيد ضحية) ما عندهم. · المهم ناس الهلال (شفوت) مسكوا ليك كل هذه الحريات ووزعوه بالتساوي بيناتهم. · بشه مسك ليه (حرية). · سانيه (حرية). · بويا (حرية)...حرية بويا كمان من (سقط لقط)..حرية بيعاقب عليها القانون عديل كدا. · وباقى الحريات استملها ليك (مهند الطاهر). · مهند الطاهر دا بقى كل ما يلاقى ليك الحضري دا بجيب ليك فيه قون. · لو قابلو في (المولد) بجيب ليك فيه قون. · ولا بتلفت. · وبجيب فيه قون كمان من اي حتة. · الحضري (اتنتف) ليك ريشو – قال لا بقعد في البلد دي ولا حاجة. · الحضري قال لو عملتوا ليه (120) حوض سباحة ما بقعد. · ناس (بويا) ديل جنوا. · بويا دا جاب ليك قون في الحضري – ناس المساحة الى الان ما وصلو للمسافة. · الي الان قاعدين بيسحبوا في المسافة. · وقالوا ليك (ضفر) بدون مناسبة بقى قاعد يغني للحضري (والله بيناتنا المسافة). · هي لكن (مسافة) نصاح. · قون بويا دا (الكاميرا) قطعت فيه الصورة..لمن لحقوه ليك بالراديو. · الشيء جاء من بعيد خالص. · والحضري نوع الحاجات دي ما متعود عليها. · زولكم اليوم التاني لملم (حرياتو) واتخارج. · يلا بلا حريات معاك. · هو ناس الصادق المهدي وابراهيم الشيخ ما لاقين (الحريات) دي ..يجوا يدوك ليها انت يا عصام الحضري. · غايتو جمال الوالي دا بعمل في حاجات. · اها بعد الكلام دا ...المرة دا قالوا جييبوا ليهم حارس (ملخبط) شوية. · حارس زي (الكشري). · موش الكشري بكون فيه عدس ورز وبليلة وحاجات كدا ما معروفة. · حارسكم دا (ملخبط) بنفس التشيكلة. · المريخاب غلبتهم الحكاية عديل كدا. · جابوا ليك حارس المرة دي عندو اكتر من جنسية واضافوا ليه مع جنسياتو دي الجنسية السودانية. · تقول (جالية). · حارس يوغندي الجنسية يمني الاصل سوداني المشاركة. · تلات جنسيات في حارس واحد. · اذا كان عصام الحضري لاعب ب (5) حريات – جمال سالم دا لاعب ب (3) جنسيات. · حارس (امم متحدة) بس. · ويا ريت لو بي جنسياتو دا كان نافع. · زولكم دا اي كورة عالية اتلعبت قدام المرمى بفكها. · بقبض في الكور على (دفعات). · الكورة بقبضها في (6) دفعات...تقول كلية حربية. · بقول ليكم من هسع..(قبل ما نفتح ملف الحارس المشربك دا). · حارسكم دي يمين تجيبيوا لينا في مباراة هلال مريخ ..تقولوا فيضان (القاش) الجابو هنا شنو؟. · نفرتكو ليكم جنسية – جنسية. · ناس بشه ديل بدون (جنسيات) ما بلعبوا – جايبين ليكم ليهم حارس عندو (3) جنسيات..ليه ؟..وعشان شنو؟..عاوزين تمشوا بيه عطارد. · الجنسيات الكتيرة دي جنسيات اخصائي مخ واعصاب – ما جنسيات (حارس مرمى). · حارسكم دا شهادة سكن كتيرة عليه – تقوموا تطلعوا ليه (3) جنسيات. · لاقين الجنسيات الهاملة دي تشيلوا وتطلعوا. · لكن الحاجات دي كلها حدها قريب. · اول مباراة قمة – ح تفهموا حاجة. · يمين لو طلعتوا ليه تاني (21) جنسية ..ناس بشه ديل ح يأدبوه ليكم. · جايبين لينا حارس بثلاث جنسيات شيء يوغندي وشيء يمني وشيء سوداني تقول (شيرنق) فطور. · ..... · ملحوظة : لكن المطرة بالغت معانا. هوامش · اذا كان هذا هو حال (التحكيم) الرجاء منح المريخ منذ الان كأس الممتاز. · ما في داعي تتعبوا لينا ساكت في المطرة دي. · المباريات دي محسومة برة الملعب. · الخرطوم الوطني تعرض لظلم كبير من الحكم بدرالدين عبدالقادر. · بدرالدين عبدالقادر عوض غياب انغا وتراوري. · يا صلاح احمد محمد صالح لو دي تحكيم ...ان شاءالله (السيل) يشيل مباني الاتحاد العام. · ويشيل الاستادات ذاتها. · دي لا كورة ولا حاجة. · نشوف (سيحة) يوم الجمعة. · اكيد يظهر مع رضا ويقول ليك اللقطة ما واضحة. · او رضا ذاتو يقول الليلة الجهاز بتاع الاعادة (بايظ). · يكون اثرت فيه المطرة. · .... · عاجل : المطرة ما خاطية عليكم.
