محمد عثمان بلل جماهير الوصيف تاني إلا تشجع الهلال بعد التسجيلات دي ..!! تاني رجعنا لناس الوصيف. لو عملنا مقارنة بين تسجيلات الوصيف وسيدالبلد دي لو في مباراة في الميدان ساي بتنتهي 10 / صفر. مافي أي مقارنة. الموسم الجديد برضو ح تتواصل نغمة (أي دمعة حزن لا). أهلي مروي سينافس على مركز الوصيف المحبب. لا مدرب أجنبي ولا رئيس. صعبه والله. قلنا ليكم زمان أطلبوا الدعم من كردنه (الجار للجار) مافيها حاجه. عادي بنقيف معاكم. إنتوا بس قولوا عايزين شنو. اتركوا التشاؤم يا جماهير الوصيف. مافي مستحيل في كرة القدم. دي إسمها المجنونة. تعالوا شوفوا تسجيلات سيدالبلد. ما شاء الله تبارك الله. أصبحنا نحسب في الأيام عشان قمة الممتاز. وكردنه كمان جاب ليكم مورينهو. أي مورينهو عديل كدا. تاني في شنو. مفروض (الكاف) يمنح الهلال بطولة دوري أبطال أفريقيا من أسي. يا زول دا ما مورينهو البرتغالي داك بتاع مانشستر يونايتد. مش إسمو زي داك معناها إمكانياته زي سيد الإسم. غايتو الموسم الجديد ح تحصل فيهو حاجات. أصبروا بس. تعالوا بكرة بدري. (صمت أخير) .. جماهير الوصيف تاني إلا تشجع الهلال بعد التسجيلات دي ..!!