محمد عبدالماجد بيحبو (الغلاط).. متل يوم الجمعة العصر، بتلقى ليك في الغالب زول بدون مناسبة كدا بيقعد يغالط فيك. طلع من وين؟. ما عارف. الموضوع شنو؟. ما عارف. المناسبة ايه؟. ما عارف. المهم زول ظهر فجأة كدا ، عشان يقعد يغالطك بس. دمك يفور. و(شبطك) يتقطع. زول مهمتو الأساسية في الدنيا دي، يغالطك ويرجع يكمل شغلو. ليه الزول دا بيظهر يوم الجمعة العصر بالتحديد؟. السر في ذلك شنو؟. كل ما ألقى لي زول غالط، بيظهر لي يوم الجمعة العصر. ناس المريخ هسع قاعدين يتغالطوا. البقول ليك السيستم قفل. تقول (حلة رز). والبقول ليك المريخ عنده فرصة لي يوم الاحد. والبقول ليك أي محترف انتهى عقده في التسجيلات الحالية عندو فرصة التوقيع في الفترة القادمة في التسجيلات. بفكروا في شيبولا. والبقول ليك الغلطة غلطة الاتحاد. والبقول ليك : أبداً الغلطة غلطة المريخ. السيستم من الغلاط الكتير ريحتو بقت بصل بصل. الناس ديل بيحبو الغلاط زي عيونهم. يوم داك واقف في صف. الصف كلو قاعد يتغالط. ناس بقولوا دا صف (البنزين). وناس بقولوا دا صف (الجاز). عارفين لمن وصلنا الماكينة لقيناه صف شنو؟. لقيناه صف للرغيف. أي واحد شال ليه 10 رغيفات وطلع من الصف. البكاسي بقت تعاين لينا شذرا. يتخيل لي البلد دي ازمتها أزمة غلاط. من الصباح – الناس بتقوم تتغالط. افتح أي موضوع. أعمل أي (بوست) وأبعد بعيد. ح تلاقى الناس خلوا الموضوع الرئيس وقبلوا على (الغلاط). يتغالطوا لمن تصبح. نحن كدا. عندنا جارنا من الغلاط الكتير، (صلعتو) بقت زي ماكينة التصوير..كل ما تضغط عليه بطلع ليك (مستند) جديد. صلعتو اتعودت على كدا. مشكلة المريخ الحالية ما في (السيستم). السيستم دا اصلو ما قاعد يزعل ليه زول. شغال صاح…السيستم بفتح معاك صاح. شغال غلط السيستم بقفل معاك. النظام كدا. يعني ما تعلقوا مشاكلكم في (السيستم). شوفوا مشكلتكم وين؟…وعالجوها. واضح ان مشكلة المريخ في (البلف). البلف قفل. عشان كدا ظهرت ليكم مشكلة في السيستم. الهلال عندما احضر عبدالعزيز القشي للسودان ما مشى على (السيستم) ، لأن اجراءات (القشي) ما اكتملت. وكان من الطبيعي لو الهلال ذهب على السيستم يقوم نظام الفيفا يرفض تعاقد القشي مع الهلال. لأن القشي عندو ارتباط مع نادي مستقبل قابس. ان شاءالله عقده باقى منه اسبوع – السيستم ما بفتح معاك. إلّا اذا وصل مجلس ادارة نادي الهلال لاتفاق مع ادارة نادي مستقبل قابس. واضح ان الهلال لم يصل لاتفاق مع نادي مستقبل قابس التونسي، عشان كدا التعاقد مع القشي ما اكتمل. كان يمكن ان يقول مجلس ادارة نادي الهلال ان السيستم رفض بيانات القشي، ويعلق المشكلة على السيستم. لكن مجلس ادارة نادي الهلال لم يفعل ذلك، واتجه نحو لاعب بديل يوغندي طلع (مصاب). ثم كان الاتجاه الى المدافع النيجيري سيرجو. السيستم الخطوات دي كلها ما عندو علاقة بيها. بياناتك صاح، بيفتح معاك. بياناتك غلط ..السيستم بيقفل. أزمة المريخ الاخيرة في (البلف). استقال محمد جعفر قريش. وآدم سوداكال واضح انه لم يقم بالالتزامات التى وعد بها، (قفل البلف). واتجهوا بعد ذلك الى (السيستم) عشان يشيل الليلة كلها. اذا لم يحسم مجلس ادارة نادي المريخ أموره مع الأندية التي يلعب لها المحترفون الذين ينوي المريخ تسجيلهم، السيستم ح يشتغل ليكم كيف؟. التسجيلات انتهت، ومجلس المريخ ما حسم أموره مع تلك الاندية مالكة العقود، فكيف يمنح المريخ فرصة اضافية. هل في الامكان ان يمنح (القشي) فرصة أخرى، بعد ان جاء اللاعب للاتحاد ووقع على بعض العقود. الاتحاد أوقف اجراءات القشي ولم يتعامل مع تعاقد الهلال مع اللاعب، فلماذا لا يفعل الاتحاد نفس الشيء مع المريخ. محاولة اعلام المريخ مهاجمة الاتحاد العام المقصود منها ان يتجاوز الاتحاد اللوائح والقوانين من أجل المريخ. السيستم ما عندو كلام زي. والفيفا ما بتلعب في المواضيع دي. حلوا مشكالكم وافتحوا (بلفكم)، ومن ثم تعالوا وتحدثوا عن (السيستم). السيستم اتعمل عشان ايقاف التلاعب في التسجيلات. حكاية الاتحاد الجديد والاتحاد القديم والموظف المشرف على (السيستم) ما عندو خبرات كافية للتعامل معه، ضحك على الدقون. خبرات شنو؟. بيانات بتنزل في موقع الفيفا، وعلى اثرها بتعرف ان كانت بيانتك صحيحة او غير صحيحة. كم لاعب جاء للسودان ورفضه (السيستم). سيدي بيه قعد مجمد (6) اشهر بسبب رفض السيستم لبياناته. واليأسو المحترف الذي جاء به غارزيتو للتعاقد مع المريخ، قالوا السيستم رفض قبول بياناته. يعني حكاية (السيستم) دي ما جديدة. ولا هي (لعبة). اللوائح والنظم واضحة في الحتة دي. شوفوا (بلفكم) بعيد مننا. وانسوا حكاية (السيستم) دي. الشيء الغريب ناس الهلال ديل دخلوا ليهم بيانات ثلاثة محترفين للسيستم. والمحترفون الثلاثة قبلهم نظام الفيفا. ونشر موقع تنقلات اللاعبين ذلك. تلاتة، اتنين منهم من مالطه …النظام قبل بيهم. وفي آخر يوم للتسجيلات. ناس المريخ عندهم اتنين محترفين قاعدين في البلد ليهم اسبوع. اسبوع قاعدين في البلد. مع ذلك طلعوا في آخر يوم وقالوا (السيستم) قفل. انتوا قاعدين وين؟. الشيء العجيب اننا انتقدنا مجلس ادارة نادي الهلال وقلنا ان المريخ هذه المرة حسم أمور تسجيلاته قبل الهلال. وقلنا الهلال المشارك في الكونفدرالية لم يحسم أمور محترفيه. الهلال في آخر يوم للتسجيلات عمل الكشف الطبي لاربعة محترفين. وجنس جيوفاني واوتارا. وسحب جنسية شيبولا ومكسيم. الهلال فعل كل ذلك وانهى التعاقد مع ثلاثي محترف (خطير). وناس المريخ عندهم خانتين فاضية. وما عاوزين جنسية. وجماعتهم وصلوا من النيجر ومن توغو قبل اسبوع. مع ذلك فشلوا في حسم أمورهم. والسيستم قفل ليهم. ديل (كيتا) فشلوا في انهاء التعاقد معاه. كيتا فشلتوا في توفير 5 الف دولار له لانهاء التعاقد معه، هل يمكن ان تستطيعوا في هذا الوضع التعاقد مع محترف يكلف خزينة النادي 40 الف دولار. 40 الف دولار في الاوضاع دي ييجبوها ليكم من وين؟. قد يكون مجلس المريخ مفتقد للخبرات في هذا المجال خاصة بعد توقف قريش وطارق المعتصم اصحاب الخبرة. وقد تكون هناك ايادي (مريخية) تدخلت لعرقلة انتقال اللاعبين للمريخ. جائز. وفي كل الأحوال الاخفاق هذا يتحمل وزره المريخاب. بالمناسبة برنامج (أغاني وأغاني) لو فيه سيستم، سيستمه كان رفض بيانات عبدالسلام. عبدالسلام دا زي ما قال احد الفنانين بالكتير يشارك في برنامج (نجوم الغد). الموضوع ما حوامة ساكت. ويا سلام يا عبدالسلام. وهائل يا عبدالسلام. المواضيع ما بتمشي كدا. ……… ملحوظة : ح تصب متين؟. هوامش بنفس الاجادة التى حسم بها مجلس الهلال التعاقدات مع الاجانب مطلوب ان يحسم الهلال تسجيلاته المحلية. فترة التسجيلات المحلية اسبوع واحد فقط. يعني أي أمر لا بد ان يكون جاهزاً ومحسوماً قبل انطلاقة التسجيلات يوم 4 يونيو. من ثم لا بد من حسم أمر المدير الفني الأجنبي مبكراً. استفيدوا من الزمن. وعجلوا بذلك، حتى يدخل الهلال لمعسكر خارجي مقفول عشان يدخل الهلال مرحلة المجموعات ودورى النخبة وهو في كامل الجاهزية. الهلال عليه ان لا يهمل مباريات النخبة. وقبل ذلك لا بد من التركيز في الجولتين القادمتين للهلال أمام أهلي مروي وكوبر. لا بد من المحافظة على سجل الهلال خالياً من الهزائم ليرتفع رصيد الهلال الى 54 مباراة باذن الله وتوفيقه بدون خسارة. مباراة الأهلي مروي غداً مباراة ما ساهلة. فريق أهلي مروي فريق ممتاز ويلعب بارضه وسوف يقاتل بقوة من أجل التأهل لمرحلة المجموعات. فريق الشرطة القضارف كان يستحق ان يكون بين الكبار في دوري النخبة. لكن الفريق لم يحافله التوفيق في الكثير من المباريات. الأمل عطبرة عليه ان يحسن في التسجيلات القادمة وان يضيف عناصر ممتازة حتى لا يغادر الفريق الممتاز بعد سنوات صموده في الدوري الممتاز. مجموعة العشرة التي سوف تلعب من أجل البقاء في الدوري الممتاز سوف تكون مبارياتها ملتهبة. الأمل والأهلي عطبرة والشرطة والأهلي الخرطوم وهلال كادوقلي ومريخ نيالا ومريخ كوستي وحي الوادي وود هاشم سنار وربما كوبر أيضاً اندية ما ساهلة والصراع بينها سوف يكون قوياً. لذلك أي فريق يريد ان يبقى في الممتاز عليه باختيار عناصر جيدة في التسجيلات القادمة. نكرر ونعيد ونقول ان تسجيلات هذه الفترة سوف يستفيد منها الهلال بشكل أكبر في دوري ابطال افريقيا في الموسم الجديد. البطولة في الموسم الجديد سوف تنطلق قبل التسجيلات القادمة. كما ان تسجيل عناصر جيدة في هذا التوقيت سوف يجعلها تبلغ الموسم القادم بعد ان تكون اكتسبت لعناصر الخبرة والتجانس والتفاهم. فكروا في الموسم القادم. الهلال عليه ان يجتهد ويعمل من أجل الفوز ببطولة الكونفدرالية هذا الموسم. لكن علينا ان نعلم ان بطولة الكونفدرالية ودوري النخبة هذا الموسم سوف تكون أفضل المداخل للهلال في الموسم القادم في دوري أبطال افريقيا. وابقوا على سفر. ………. عاجل: السيستم البيجيب الريح اقفلو واستريح.
