محمد عبدالماجد نقطة (مدرب) جديد . الموسم الرياضي في السودان سوف يبدأ يوم 23 نوفمبر. . أي بعد 18 يوما فقط. . ح ندخل في مفاوضات جديدة مع مدرب جديد…(مسلسل تركي قادم). . البطولة الافريقية سوف تبدأ يوم 27 نوفمبر. . أي بعد 22 يوما. . ولسه ح نقعد نفتش ونفاوض ونتفق. . الموسم القادم ضاغط وصعب مع هذا اطاح اشرف الكاردينال بالمدير الفني للهلال لامين انداي واعلن التعاقد مع المدرب المغربي حسن عموته. . وحسن عموته بيحضر في الماجستير. . وحسن عموته محلل في قنوات بي ان سبورت. . ومرتب حسن عموته كبير ولن يصبر عليه الكاردينال. . وحسن عموته نفي. . ضجة..ومفاوضات. . وكلام. . والله يستر. . ليت الصدمة تخفف علينا ويكون مجلس الهلال فعلا قد تعاقد مع المدرب المغربي عموته. . نسأل الله ان ينجح الهلال في التعاقد مع عموته لنستطيع ان نبلع قرار الاطاحة بالسغالي انداي. . نخشى ان يكون قد ذكر اسم حسن عموته لتمرير اقالة السنغالي لامين انداي. . كلام والسلام. . زي المدافع الجزائري عبدالعزيز القشي. . وساماتا. . والاخطر من ساماتا. . نسأل الله ونرجوه ان لا يكون عموته كبرى وخلاص. . لكن حتى ان تم التعاقد مع حسن عموته يبقى الاطاحة بالمدير الفني للهلال في هذا التوقيت (كارثة) حقيقة ظللنا نتجرعها بصورة مستمرة ودائمة مع رئيس نادي الهلال اشرف الكاردينال. . بغض النظر عن من مشى. . ومن اتي. . المبدأ مرفوض. . والطريقة غير مقبولة. . والقرار صادم. . والسيناريو اصبح يكرر كل 45 يوما في الهلال. . نحن لسه بنتعامل مع المدرب الجديد زي (اللبسة). . زي اللبسة الجديدة. . نفرح بيه. . ونعتبره هو الحل. . علينا ان نفرح ونزغزغ لي أي مدرب جديد يعلن التعاقد معه. . فهمنا كدا. . عاوزين الجديد بس. . والكورة عاوزة (الاستقرار). . عاوزة النظام. . عاوزة الاحترافية. . مازلنا نحمل اراء سلبية دائمة عن المدرب الحالي. . عندنا رأي فيه. . اذا حقق نتائج جيدة قالوا الاداء. . اذا كان الاداء جيدا قالوا النتائج. . اذا كان الاداء جيدا والنتائج ايضا جيدة ، اتجهوا الى نواحي (شخصية) في المدرب. . شخصيته صعبة. . او شخصيته ضعيفة. . او سلوكه غريب. . اسطوانات معادة. . هكذا تسير الامور في الهلال. . او هكذا هو اشرف الكاردينال. . في الهلال (الافراح) لا تستمر ، رئيس الهلال اشرف الكاردينال يبني ويهدم في نفس الوقت في الهلال. . اشرف الكاردينال هو عدو (الاستقرار) الاول. . اذا لم يطح بالمدرب اثناء الموسم شاله في فترة الاعداد. . الكاردينال استغل افراح الاهلة بكاس زايد – قام شال المدرب. . فعلها الكاردينال من قبل مع الفرنسي كافالي (المدرب القصير الما عندو نضارات) الذي بسببه خصم من رصيد الهلال 6 نقاط بعد مباراة ودية في افتتاح الموسم في بورتسودان خسرها الهلال. . الكاردينال نفسه بقى ما عارف اسماء المدربين الذين تعاقد معهم واطاح بهم بعد ذلك. . ياتو دا. . القصير ام الطويل ابو نضارات ، بهذا يوصف الكاردينال مدربين الهلال في قناة الهلال الفضائية. . مدربين عندما يتم التعاقد معهم يوصفوهم باجمال الصفات ويمنحوهم ارفع الشهادات. . ووقت المدرب يفوت الكاردينال يقول ليك ياتو فيهم القصير وإلّا الطويل ابو نضارات. . الزلفاني مع المريخ فقد الدوري الممتاز بعد خصم 6 نقاط من رصيد الهلال. . وفقد كاس زايد. . وقاعد. . ولامين انداي حقق البطولتين وشالوه برة. . طيب انت يا الكاردينال كنت فرحان على شنو؟. . الرقيص في شنو؟. . مهرجان للممتاز. . ومهرجان لكاس زايد. . والمدرب الذي حقق تلك الانجازات شالوه برة. . الكاردينال يفعلها الآن مع المدرب السنغالي والهلال في مرحلة الاعداد وبعد فوز الهلال بكاس الشيخ زايد. . تخسر يشيلوك. . تكسب يشيلوك. . المدرب يتصرف معاكم كيف؟. . يعمل ليكم شنو؟. . المدرب الفرنسي لافاني (الطويل ابو نضارات) تعادل في الدوري امام الاهلي شندي شالوه. . قالوا النتيجة. . المدرب الروماني بلاتشي (القصير وما عندو نضارات) الراحل كسب مباراة الفريق امام الاهلي شندي برضو شالوه. . قالوا الاداء. . وفي الحالتين الهلال هو الضائع. . يخسر الهلال ويخرج من البطولة يشيلوا المدرب. . يكسب الهلال ويفوز بالبطولة برضو بشيلوا المدرب. . في كل الاحوال تتم الاطاحة بالمدرب. . الكاردينال الذي نزل من المقصورة وشال درع الشيخ زايد الفائز بيه الهلال من بشه كابتن الهلال. . حام بيه في الملعب كله. . ومشى بيه على الجمهور. . وظهر بعد ذلك في قناة ابوظبي وقال ما حققه الهلال بهذا الفوز لم يحققه الهلال في زمن كسلا وقاقارين. . الكاردينال حفّز لاعبي الهلال ب 250 الف دولار كاكبر حافز في القارة الافريقية على ما اعتقد. . جاء بعد كل هذه الافراح. . والصور. . والحوارات. . والحوافز الدولارية شال المدرب الذي حقق له هذا الانجاز. . مدرب حقق بطولة الدوري الممتاز بعد ان خصم من رصيد الهلال 6 نقاط بسبب خطأ اداري. . مدرب اشرف على التسجيلات. . وجاب المحترفين. . واختارهم. . وابقى على محمد دراج. . واشرف على فترة الاعداد في الامارات. . وشالوه بعد ذلك. . لن اتحدث عن امكانيات لامين انداي. . ولن اتوقف عند شخصيته. . او من يأتي بديلا له ، وان كان اسما كبيرا في القارة عموته او غيره ، ولكني اتحدث بالطريقة المعتادة لاشرف الكاردينال في الهلال. . اتي لامين انداي وقالوا عنه افضل مدرب. . مدرب مازيمبي السابق..الذي حقق معه العديد من الالقاب القارية. . وشالوه بعد ذلك في فترة الاعداد. . ما قيل عن لامين انداي سيقال بالحرف عن حسن عموتة المدرب الذي اعلن مجلس الهلال التعاقد معه وما معروف حقيقة الخبر وصدقه. . حسن عموتة افضل مدرب في القارة. . حقيقة. . حسن عموته حقق كاس الاندية الافريقية مع الوداد المغربي. . حقيقة. . لامين انداي حقق نفس هذه الاشياء. . يعني ما تحاولوا تقنعونا بنفس الاسطوانة. . ما فعله عموته فعله انداي. . ويتفوق الاخير لأنه خبر الهلال وعرفه. . سوف يقولوا ان لامين انداي شخصيته ضعيفة. . وان المسيطر على الاوضاع هو التونسي الزغفوري وهو المدرب الرسمي للفريق. . اسطونة مشروخة. . مدرب اسم. . ومدرب معروف. . حقق تلك الانجازات هل يمكن ان يكون بذلك الضعف؟. . انتوا عاوزين المدرب يقيف في الخط. . يقيف في صنية الغداء. . ويمسك الباب. . ينهر. . ويرفع صوتو. . ويكورك في اللاعبين. . هذا هو مفهوم المدرب عند الكاردينال واعلامه. . وان فعل المدرب ذلك برضو ح يشيلوه. . ح يقولوا ليك مدرب شخصتيه صعبة. . الكاردينال مرة شال مدرب (ما عارف اسمو منو) حسب راي الكاردينال ، عشان تعامله صعب مع اللاعبين. . يعني في الحالتين الكاردينال بشيل المدرب. . ما تسمعوا لي الكلام. . ح يقولوا ليك اداء الهلال ما كويس مع لامين انداي. . الاداء يكون كويس كيف والكاردينال عاوز يسجل. . وعاوز يشطب. . المحترف ما بيستمر مع الهلال 40 يوم ، وعاوزين الاداء يكون ممتاز. . تسجل اللاعب وتعيره بعد 48 ساعة من التسجيل…وعاوزين الاداء يكون كويس. . يخصموا من رصيد الهلال بسبب الكاردينال 6 نقاط..وعاوزين الاداء يكون كويس. . تجيب السمؤال ميرغني تمرين الهلال وتنقل ذلك على قروبات حماة الهلال الهواء في قناة الهلال التى تعلن فيها عن شطب اللاعب سمؤال. . وعاوزين الاداء يكون جيد. . تنقولوا في فضائية النادي تمرين الهلال من العين بقيادة لامين انداي. . وتقطعوا التمرين فجأة. . زي الانقلاب العسكري. . عشان يعلنوا في خبر عاجل اقالة لامين انداي. . نحن ما بنتقدم. . ولا بنمشي لا قدام. . سوف نظل ندور في هذا الفلك. . ييجيبوا ليك مدرب يقولوا ليك احسن مدرب. . مرة صائد البطولات. . ومرة احسن مدرب في افريقيا. . ومرة حقق لقب الاميرة السمراء. . ويشيلوه ليك بعد كدا. . يقولوا ليك دا اسوأ مدرب. . تاني يجيبوا ليهم مدرب جديد. . بي نفس الالقاب. . يطلعوه ليك احسن مدرب. . ويشيلوه في فترة الاعداد. . المشكلة ما في المدرب. . لا في نداي. . ولا في العشري. . ولا في باتريك. . او بلاتشي. . او عموتة. . المشكلة في الهلال. . في مجلس الادارة. . في اشرف الكاردينال. . الهلال عاوز استقرار. . عاوز ثبات. . عاوزين مدرب يستمر مع الهلال اكتر من موسم. . عاوزين تعامل حاضري مع المدربين. . عاوزين احترام للتعاقدات. . ما في مدرب بقيموه بي مباراة ودية. . او في فترة اعداد. . ما في مدرب بشيله في بداية الموسم. . وبعد مباراة ما رسمية انتصر فيها على الند التقليدي. . ……… . ملحوظة : كفاية …كفاية اقالات. هوامش . عندما يفشل الهلال. . او يخرج الفريق من البطولات الافريقية. . لا ادري لماذا يتم تحميل المدرب المسؤلية. . الاخفاقات التى تحدث في قروبات حماة الهلال الهلال في البطولات الخارجية سببها مجلس الادارة. . سببها عدم الاستقرار الفني. . المدرب ما عندو ذنب. . ولو المدرب هو السبب لماذا يستمر خلفه الذي يأتي في نفس الفشل. . معقولة 30 مدرب اتوا للهلال ما كويسين. . معقولة في كل تلك الاطاحات …الغلطان هو المدرب. . والكاردينال ما غلطان. . تسجلوا براكم. . وتشطبوا براكم. . وتتعاقدوا براكم مع المدرب. . وتشيلوه براكم. . ووقت يحصل الاخفاق يشيلوا المدرب. . وقت تتحقق البطولة ، ينزل الكاردينال من المقصورة عشان يشيل الدرع. . يعمل ليه احتفال. . ويجيب السفراء. . والفنانين. . ما يخلوا ليهم شيء. . وبعد هذا يقولوا ليك المدرب ما كويس. . يخصموا من رصي الهلال 6 نقاط. . ويشيلوا المدرب. . تغلطوا انتوا يا حلوين..نجيكم نحن بالاقالة. . الساقية لسه مدورة. . ما في فايدة. . ولا ح نعمل حاجة في البطولات الخارجية. . بنكرر في اخفاقاتنا في كل موسم. . والمشكلة في الكاردينال. . وابقوا على سفر. . …………. . عاجل : ان شاءالله ..ان شاءالله ..ان شاءالله يكون خبر حسن عموته صاح..ويتم التعاقد الرسمي. ً———————————