محمد الطيب الأمين (القش) قبل (الخروف) !! * أكثر ما كان يدهش الناس في (عثمان حسين) أنه يُغني دون أن يفتح (خشمه) كاملاً.. * كل ذلك الوجع والشجن يخرج من عثمان حسين دون أن تحس بأن (خشمه فاتح) .. * بتحس إنو عثمان حسين ما بيغني بخشمو .. * بجيك إحساس إنو عثمان حسين بغني ب(النية بس) .. * ولعل نزار حامد يفعل شئ أشبه بذلك الذي كان يفعله عثمان حسين .. * بتحس إنو نزار حامد ما بيلعب الكورة ب(كراعو) .. * والله صحي .. * نزار (يلعب) وكأنه (ما قاعد يلعب) .. * نزار بيعمل في حاجة لا هي محسوبة (كورة) ولا هي محسوبة (غنا) ماشاء الله تبارك الله .. * عودة نزار بهذه الحيوية والجمال أضافت الكثير للهلال من حيث (الشكل والمضمون) في مباراته الودية أمس أمام فريق عجمان .. * ملامح الهلال القديم موجودة عند نزار حامد ولولا الإصابة التي إستهلكت منه كثير من الوقت لما عانى الهلال في الموسم الماضي .. * ربنا يحفظك يا نزار ويحفظ كل نجوم الهلال .. * المهم .. * قبل التعاقد مع المدرب الجديد (الما معروف هو منو) سيفكر الكاردينال في (مبررات الإقالة) .. * أظن وليس كل الظن إثم أن الكاردينال يجهز (المبررات) قبل التعاقد مع الضحية .. * الكاردينال قبل ما يجيب (الخروف) بيجهز (القش) ولذلك هو يرتكب كل هذه الحماقات ويقدم كل هذه المبررات الفطيرة ويريد منا أن نقتنع .. * نتمنى أن تكون (مسرحية السنغالي الهزيلة جداً هي الأخيرة) .. * نتمنى ذلك .. * أصداء فوز الهلال بكأس السوبر لا تزال هي حديث الناس .. * كأس السوبر .. * أكرر.. كأس السوبر .. * مئوية شيخ زايد وإحتفالات الامارات على العين والرأس ولكن ديربي أبوظبي هو (كأس سوبر) جاء على هامش المئوية .. * وبهذا يكون الهلال هو أول فريق يحقق كأس السوبر في السودان .. * بالمناسبة .. * إعلام المريخ السالب لما يسخر من الكأس ويقول درع وكرتون هو يسخر من فريقه بطريقة غير مباشرة .. * نفترض كأس السوبر (كرتون) .. * نفترض كده .. * طيب (وصيف كأس الكرتون) منو ؟؟ * حتى في الكرتون إنتو وصيف .. * وغايتو جنس غايتو .. * ظهر الهلال بشكل مميز جدا أمام فريق عجمان وقدم نجومه عرضاً راقياً للحد البعيد .. * الجميل في اللقاء تلك الحيوية والرشاقة التي لعبت بها المجموعة .. * وقد كان (البديل) في قامة (المستبدل) وكل اللاعبين كانوا نجوم .. * صحيح إن التجربة لا تعتبر قياساً نهائياً ولكنها تمنح كثير من المؤشرات الإيجابية .. * كما أن جودة أرضية الملعب كان لها الدور الأكبر في ظهور الفريق بهذا الشكل الأنيق .. * نجوم الهلال أصحاب مهارات وقدرات عالية فكلما ساعدتهم أرضية الملعب كلما كان الإبداع حاضرا .. * قدم بشة الصغير مباراة كبيرة وأظهر صهيب الثعلب لمحات ذكية تؤكد علو كعبه وكان البرازيلي جوفياني نجما فوق العادة .. * وأعتقد أن الغزل سيظلم ديارا هذا النجم الكبير وصاحب الحضور الباهر .. * الفترة لا تبدو فترة تقييم للأجانب ولكن نتحدث عن إنطباع .. * نتحدث عن إنطباع وليس تقييم .. * ما ظهر به ديارا يؤكد أن الهلال بالفعل كسب لاعب وسط على أعلى مستوى .. * ديارا يشبه كبار اللاعبين فهو هادئ ومتمكن ويستخلص الكرات بسهولة ويبني الهجمات بهندسة واضحة وينوع اللعب في تشكيل بارع .. * أما إنطباعنا الأول عن المهاجم أدريسا فهو خطير وخطير جدا .. * نسأل الله أن يوفق أجانب الهلال حتى تكون لهم بصمة وحضور في الحلبة الأفريقية لأن المشوار طويل وصعب .. * الظريف في مباراة الأمس أن الزعفوري (نجيض) شديد في حكاية (أكل العيش) .. * الزعفوري ركز تركيزاً كبيراً على اللاعبين الذي ذكرهم الكاردينال في آخر تصريحاته المتعلقة بتبرير ذهاب السنغالي .. * الزعفوري عايز يأكل عيش وهذا من حقه .. * وطالما هو الآن مدربا للهلال لا نملك إلا أن ندعو له بالتوفيق والسداد ونرجو أن يوفق في قيادة الهلال من نجاح إلى نجاح .. * ونرجو أن يراجع مجلس الإدارة قراره الخاص بتعيين كمال الشغيل الذي يتوقع أن ينضم لإعداد الفريق اليوم .. * كمال الشغيل لا يُحسب مع المدربين الناجحين .. * ثم إن الزعفوري في الأصل (مساعد) وكمال الشغيل (مساعد) والهلال يحتاج لمدرب .. * ما تخلونا ندخل الموسم الجديد ب(اتنين مساعدين) .. * لابد أن يحسم الهلال ملف التدريب .. * الزعفوري ضعيف الشخصية والسيطرة عليه سهلة جداً.. * لو كانت شخصية الزعفوري قوية لما إستمر مع الهلال .. * والأكيد المؤكد أن أي مدرب مستباح من قبل المجلس والإعلام لن يحقق النجاحات المنتظرة .. * طبعا في حاجة في لقاء الكاردينال حيرتني جدا .. * الزول ده قال لو السنغالي سمع كلامنا وكلام الفنيين لهزمنا المريخ شر هزيمة .. * كلامكم كان شنو يا ريس ؟؟ * والفنيين ديل منو ؟؟ * طيب الفنيين ديل وقت هم بيصرفوا تعليمات للسنغالي إنت جبتو لشنو والفنيين قاعدين ؟؟ * نقول للكاردينال من هسه لو داير تجيب مدرب شوف سيرتو الذاتية وشوف تاريخ آخر مرتب أخدو مع فريقو السابق .. * عشان ما تجي تقول ما كنت عارف إنو المدرب ده كان عاطل .. * أهم حاجة أي مدرب داير تجيبو شوف تاريخ آخر مرتب إستلمو من فريقو السابق .. * لأنو حكاية ما كنت عارف دي ما ظريفة .. * عموماً.. مش يفترض نواجه المريخ في السعودية ولا الجماعة هربوا ؟؟ * قالوا النعسان لسه ببكي .. * ما فضلت فيهو دمعة .. * مسكين نام والنوم موت .. * وغايتو الله يكفينا شر (المُصدي) اللمعتو الأيام .. * ونركب صافنات ونجيبة (هوارية) وأصلو الزول بيموت والذكرى تفضل حية .. * و..و.. * وكلو من ديلا ..
