محمد عبدالماجد المرة دي الجرعة زايدة شوية .إعلام المريخ بعد أن فاز الهلال ببطولة الدوري الممتاز والتي خصمت الفيفا 6 نقاط من نقاط الدوري الممتاز ظل إعلام المريخ يتحدث عن لجنة المسابقات وعن لجنة الإستئنافات . .وكيف ان الدوري قدمه الاتحاد العام في طبق من ذهب للهلال . .فريق خصمو من رصيده 6 نقاط وفاز بالدوري ويحدثون عن مجاملته . .انتو الناس ديل ماعندهم سماعات موبايل؟ .ماقاعدين يشوفوا حالتهم دي في المرايا .ماعندهم حاجة إسمها (الخجل). .مابعرفوا الحياء..؟ .ماسمعوا بيه ساكت .تحدثوا عن الهلال المدعوم وأعلنوا وراهنوا علي لقدرة المريخ للإنتصار علي الهلال في أبوظبي لأن المباراة هناك لا ينظمهت الاتحاد السوداني .والمباراة يديرها طاقم مونديالي من الإمارات .يغشغوا في المريخاب يوم بعد الاخر .ويطلعوا من جميع المناسبات بدون حمص .إستعملوا (مخدر) قدرة المريخ علي الانتصار علي الهلال، رغم ان الجميع يعرف الظروف الصعبة التي يمر بها المريخ والكل يعرف أن فرصة المريخ للإنتصار علي الهلال في ملعب بن زايد ضعيفة .لاعبو المريخ جري جري الدراويش…وقعوا في الواطة وانهاروا وأصبح يطلع واحد تلو الأخر من المباراة .من رمضان عجب .ومرة صلاح نمر .واي واحد ماسك بطنو قدم لاعبو المريخ أقصي ماعندهم وماعرفوا ينتصرو علي الهلال .بل تحقق الإنتصار بواسطة لاعب من المريخ .وبرضو مابتعلموا .وبرضو مابتعظوا .كان إعلام المريخ فضل ان يستعمل (مخدر) الإنتصار علي الهلال في الامارات هكذا بدون فهم وبدون وعي .والكروال يفعل ذلك بدون دراسة ومن غير حسابات .فاكرنها شطارة .فاكرنو انتماء للمريخ .يعني كل ما أغالط أكتر فهذا يعني اني مريخابي شديد .تغليط كتير تربح كتير .فاهمنها كدا .انتصر الهلال في أبوظبي وفاز بدرع الشيخ زايد في الدقيقة 96 من عمر المباراة بهدف عكسي سجله مهاجم المريخ (المدافع) خالد النعسان في مرماه .مباراة نقلت في أكثر من 14 فضائية .مباراة شاهدها من الملعب 37 الف مشجع .مباراة شاهدها في قناة أبوظبي لوحدها 60 مليون مشجع .مباراة شاهدها علي اليوتيوب 3 مليون . مباراة بطاقم مونديالي .مباراة بتقنية الفار .إنتصر الهلال وشال درعها السامي .إعلام المريخ طلع بعد المباراة ليتحدث عن اداء المريخ في الشوط الثاني فقط .وعن نسبة الاستحواذ .وعن الضربات الركنية التي احتسبت لصالح المريخ في المباراة .هكذا هو إعلام المريخ وهكذا هو مجتمعه أصلو مابقتنع .براهنوا دائما علي جواد خاسر ودائما هم مابتعرفوا .بغالطوا في كل الأحوال .يغلبوهم في أمدرمان يقولوا الاتحاد السوداني .يغلبوهم في أبوظبي يقولوا الشوط الثاني المريخ كان أحسن .في كل الأحوال هم إختاروا جانب الجدل والتخدير .إعلام المريخ يدمن إستعمال (المخدر) في كل الجراحات والصدمات حتي بالنسبة للأزمات التي يفترض أن يتم علاجها بمخدر أو مسكن .لهذا يتقدم الهلال .ويتأخر المريخ .يتقدم الهلال رغم أن الهلال عنده رئيس لا يؤمن بالإستقرار ويهدم دائما وابدا إستقرار الفريق بقرارات إرتجالية وهادمة .مغالطات أهل المريخ ومكاجراتهم أكدت للجميع أن لاعب المريخ السماني الصاوي سوف يشارك مع المريخ في أبوظبي امام الهلال .أكدوا أن اجراءات عودة السماني الصاوي لكشوفات المريخ إكتملت وان اللاعب جاهز للمشاركة .وقد تأكد إستحالة مشاركة السماني الصاوي مع المريخ في ابوظبي علي الأقل في الوقت الحالي .لكن إعلام المريخ يؤكد عكس ذلك الي أن جاء السماني الصاوي بالبدلة فل سوت مع فريق المريخ المشارك أمام الهلال في أبوظبي .اكتفي السماني بمصافحة اللاعبين بعد إنتهاء المباراة بالمباركة للاعبي الهلال بعد الفوز .مخدركم عينة لكن .إعلام المريخ كان قد قطع بالتحاق البرازيليين التر وماركوس بكشوفات المريخ .سافروا مع المريخ الي أبوظبي .وشاركوا في تمارين الفريق .اتصوروا معاهم زي شيبوب في المطار .وفي الملعب .وعملوا معاهم حوارات .وأكدوا في حواراتهم جاهزيتهم التامة للمباراة .وأنهم اتو من اجل هزيمة الهلال .وقطع إعلام المريخ بشكل رسمي جاهزية الثنائي للمشاركة امام الهلال وان لا شئ يمنعهما من ذلك .بل إعلام المريخ تحدي بهما وراهن علي إعتماد تسجيلهما بخطاب قيل انه وصل لهم من الفيفا .قالوا الفيفا سمحت لهم بضم الثنائي البرازيلي .حتي إذا حان موعد مباراة الهلال والمريخ إتضح للناس أن كلام إعلام المريخ وحديث مجلس إدارته لا أساس له من الصحة .هواء ساكت .مجرد (مخدر) لا أكثر .وأن كل ما كان يقال عن مشاركة اللاعبين امام الهلال كان مجر هراء .مع ذلك لم يخرج احد من مجلس المريخ أو من الكورال الإعلامي ليعتذر للناس عن هذا التضليل الذي كان يمارس في وضح النهار .أنه إدمان للتخدير .التضليل .وخداع الناس .وقبل السفر إلي أبوظبي دخلنا إلي مخدر جمال سالم .مسلسل أخر .بدأ المخدر من التأكيد علي إعادة قيد جمال سالم في المريخ . ثم ذهبوا إلي التأكيد علي سحب الجنسية من جمال سالم .وأتوا بمخدر جديد للقضية قالوا فيه أن جمال سالم عقده لم ينته مع المريخ .مرة قالوا 3 شهور .شافوها كتيرة .قالوا شهر .بقت ليهم صعبة قالوا 24 ساعة .قطعوا أن جمال سالم لن يلعب للهلال .وانهم ح يمشوا الفيفا .حتي ظهر جمال سالم في الأمارات بعد إعتماده من قبل الإتحاد السوداني .بل بعد إعتماد من السستم .من الفيفا زاتها .الجماعة لغاية الان شغالين تخدير .يطلعوا من (مخدر) ويدخلوا (مخدر) .قبل ذلك يتحدثون عن أن المريخ أصبح قاب قوسين أو ادني من الفوز ببطولة الدوري الممتاز .وأن المريخ ذاهب إلي الفاشر فقط من أجل التتويج .خسروا في الفاشر .طلعوا واكدوا أن المريخ سوف يكسب نتيجة المباراة وبطولة وبطولة الدوري الممتاز بشكوي هشام جنية .وقطعوا أن الشكوي صحيحة وأن الاجراءات مكتملة .لجنة المسابقات رفصت الشكوي شكلا .ذهبوا كليا نحو لجنة الإستئنافات ليؤكدوا للناس أن اللجنة سوف تنصف المريخ وأن الاستئنافات سوف تؤكد فوز المريخ بالدوري الممتاز .الإستئنافات رفضت الشكوي وأيدت قرار اللجنة المنظمة إتجهوا نحو (مخدر) عالمي أخر .الفيفا .ليتم الضحك علي العقول .إذ نحن علي موعد من (تخدير) عالمي جديد .تخدير الفيفا .المرة دي الجرعة زادت شوية .فكت من إيدكم .المحكمة الرياضية قبلت الطعن .والمحكمة عينت محكم .مسلسل أخر سوف يتم عرضه في الساحة المريخية التي تدمن مثل هذه المسلسلات .مسلسلات التخدير .ونقطع منذ الأن أن المسلسل يمكن أن يكون فيه عدد من الحلقات .ويمكن أن يكون فيه عدد من الأجزاء علي طريقة المسلسلات التركية .ولكن في كل الأحوال وهذا رهان يمكن أن ندخل فيه مع أي طرف إن المريخ لن يجني (شولة) من هذه الشكوي ناهيك عن (نقطة) .وان الامر كله عبارة عن إستنزاف للمريخ .ذر للرماد في العيون .ضحك علي الدقون .رسوم الشكوي ماكتيرة الف فرنك .لكن الاكيد ان تتابع الإجراءت سوف يكلف المريخ كتير .دولارات المشاركة امام الهلال في أبوظبي راحت شمار في عدار علي طريقة مانشيت صحيفة (الاسياد) .والمريخ ممكن يفعل اي شئ من اجل (الخداع) والتضليل .من أجل (التخدير) بيعملوا اي شئ .طبعهم كدا .حالتهم .وضعهم .الناس ديل قاموا علي هذا الامر .تخدير .المضحك انهم بعد كل قضية يخسروها بنسحبوا لا حس لا خبر .ولا بيعتذروا .ولا برجعوا للموضوع .أحسن ليكم إستفيدو من وقتكم .شوفوا فريقكم .وماتتعلقوا في حبال بالية .حبل الكضب قصير .وكل شئ سوف ينكشف لاحقا .أنتو بقي ماعندكم ضهر للحكاية دي .ماعندكم حيل .ماتقعدوا تغشغشوا في جماهير المريخ ساكت .الناس بتصدق اي شئ .عاوزة ليها قشة بس تتعلق عليها وإنتوا في ( التخدير) مافي زول بلحقكم ……….. .ملحوظة :أساتذة في الحتة دي هوامش .إقالة انداي لسه مازالت تشكل (صدمة) في الهلال .المعارضة لوكانت ماسكة الهلال ماكانت اصدرت هذا القرار .الكاردينال يبني ويهدم في نفس اللحظة .الأسواء في الاقالة كانت تبريرات الكاردينال .التفريط في شيبوب بالإحتراف او غيره سوف يكون كارثة اخري في الهلال .شيبوب يجب أن يستمر في الهلال .مافي فريق عايز يحقق ليه بطولة خارجية بفرط في لاعب أساسي في قيمة شيبوب .الهلال كشفه في 25 لاعبا .مافي طريقة للتفريط في أي لاعب .لهذا نرجو ان يتم قفل هذا الباب لا فرنسا .ولا الخليج .كمال الشغيل اعتذر عن العمل في الجهاز الفني للهلال .وصعب أي مدرب أن يعمل في الهلال في ظل العقلية التي تدير الهلال الأن .أتوقع بعد إقالة الزعفوري أن يطلع الكاردينال ويقول الزعفوري مدرب احمال ساكت .كلموه من الآن .عشان مايكتشف الموضوع دا بعد إسبوع يقوم يشيل المدرب .ويقول اتغشيت في الزعفوري .أتمني أي مدرب ان يأتي للهلال يخرج من الهلال بصورة جميلة .اتمني أي محترف حتي لو لم يقدم شيئا مع الهلال ان يخرج راضيا من الهلال .مامعقول أي مدرب يقال أو يستقال …. الكاردينال يقطع في سيرته ويشكك في قدراته .كذلك بالنسبة للمحترفين .هذا أسلوب لا يشبه الهلال .زمان أي مدرب الهلال ينهي التعاقد معه بيعملوا ليه حفل وداع .عشان كدا مشاكل الهلال وقضاياه بقت تصل الفيفا التعامل غير جميل من مجلس الهلال .هذا شئ يحسب علي مجلس الادارة وليس الاجهزة الفنية وأبقوا علي سفر ……… .عاجل : والله يكون في العون
