دق الدلجة محمد عبد الماجد مجلس جابوا (مكتب الوالي) بهددنا ب (الفيفا)… ○ من رأسي : صلاح نمر لو شارك في مباراة القمة بي (تقلتو) دي مع (امير كمال) ، اعتقد افضل للمريخاب يجهزوا (سيحة) من يوم التلاتاء عشان يقول ليهم هدف سادومبا (تسلل). ○ من كراسي : إن الموت ليس هو الخسارة الكبرى .. الخسارة الأكبر هو ما يموت فينا ونحن أحياء. محمد الماغوط لجنة تسيير المريخ (26) عضو (بص الوالي) خلوا شغلتهم ومسكوا ليك في (شيبوب). شيبوب عمل. شيبوب شارك. شيبوب ما لعب. شيبوب طلع. لجنة تسيير المريخ (بص الوالي) قبل التعيين كانوا بحدثونا عن النادي الاجتماعي والاسري في (الحتانة). وعن (المول التجاري). وعن تحويل نادي المريخ الى فندق خمسة نجوم. اول ما استلموا الشغل …خلوا النادي الاجتماعي الفي الحتانة. ونسوا (المول التجاري). والنادي الذي يريدوا تحويله الى فندق خمسة نجوم ..ومسكوا ليك في (شيبوب). وين النادي الاجتماعي؟. وين المول التجاري؟. وين الفندق الخمسة نجوم؟. موضوع (شيبوب) دا ما عاوز ليه (بص والي) يتكون من (26) عضو…الموضوع دا موضوع (مخستك) يعني مجلس اسامة ونسى ممكن كان يقوم به. ما عاوز ليه اصلو (26) عضو. مجلس جمال الوالي عندما كان (منتخبا) – اضاع (شيبوب) سجلوه (هاوي). وفشل المجلس المنتخب في تسجيل (شيبوب) كمحترف لأن المجلس لا يملك قيمة اورنيك اللاعب المحترف. وفشل مجلس اسامة ونسي في (اصلاح) خطأ جمال الوالي. شيبوب قعد مع عبدالحي عبدالتام. وقعد مع ابوجريشة. وقعد مع اسامة ونسي في البيت. وجمال الوالي اعلن عن تكفله بقيمة الصفقة. مع ذلك (شيبوب) اتسجل في الهلال. المجلس الذي يضيع لاعبا في قيمة وموهبة (شيبوب) وهو في (كشفه) ، تفتكروا بقدروا يجيبوا وهو محترف في كشف الهلال. احسن ليكم شوفوا (مولكم) وين؟. شوفوا النادي الاجتماعي. احفروا (ساس) الفندق…واشغلوا الناس بالموضوع دا…موضوع (شيبوب) دت ما بتقدروا عليه. شيبوب قفز ليكم من الطابق الرابع. جبتوه من (جوبا) عبر اربع مطارات. وصورته مع اسامة ونسى وعبدالحي عبدالتام ..وفشلتوا في اعادته للمريخ. اللاعب كان بين ايديكم ..في بيوتكم .. في كشفكم فشلتوا في (اعادته) للمريخ ..عاوزين ترجعوه الآن وهو في الهلال. انتوا بتلعبوا على منو؟. بتضحكوا على مين؟. لو (المول) غلبكم ..اعترفوا. لو النادي الاجتماعي طلع كلام جرايد ساكت ..اعتذروا. شيبوب دا اصعب من فندق خمسة نجوم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مجلس المريخ امس اجتمع ..وطلع هذه القرارات …جماعتكم لسه بوزعوا في (المناصب). فرحانين بالمناصب. بص الوالي امس اجتمع واخرج هذه القرارات. استمع المجلس الى تنوير من الامانة العامة بشان قضية لاعب المريخ شرف شيبوب ووجه بالمتابعة والتقاضي علي المستوي المحلي والدولي . – اجراء تعديل فى بعض المناصب بصفة التكليف علي النحو التالي الفريق / عبدالله حسن عيسي امينا عاما مكلفا. الفريق / طارق عثمان الطاهر مساعد الرئيس للعلاقات الخارجية ورئيس الدائرة القانونية. السيد / عصام الحاج مساعد الرئيس للشؤون الاقتصادية ومسؤول مجلس الشرف. السيد / عوض الكريم عثمان رمرم امينا للمال . اجازة لائحة ومهام واختصاصات مجلس الادارة والقطاعات والدوائر. – اجازة لائحة مجلس الشرف المقدمة من الامانة العامة . – تكليف السيد رئيس مجلس الادارة ومساعد الرئيس للشؤون الاقتصادية بتشكيل مجلس الشرف والعمل علي تفعيله بعد عيد الفطر المبارك. – كلف المجلس رؤسا الدوائر باكمال تشيكل الدوائر بالتنسيق مع الامانة العامة. – تعين د. علي البلوله ازيرق مستشارا قانونيا للنادي . – اخذ المجلس علما بنفرت القروبات يومي 18 و 25 من يونيو الجاري وكلف هاشم الزبير وحمد السيد مضوي للمتابعة . …دي قرارات المجلس …كلها توزيع مناصب. الجماعة ديل فرحانين ساكت. الشغلة جديدة عليهم. لغاية الآن بوزعوا في مناصب (كرتونية) ما عندها اي قيمة. ومنتظرين دعم القروبات…(طب فرقكم شنو من اسامة ونسى). عليكم الله ارجعوا لتلك القرارات ..شوفوا القرارات دي كلها فيها (مول). المول خلوه. القرارات دي كلها فيها (دكان). والله (طبلية) ما فيها. قالوا شنو؟. ..( استمع المجلس الى تنوير من الامانة العامة بشان قضية لاعب المريخ شرف شيبوب ووجه بالمتابعة والتقاضي علي المستوي المحلي والدولي). يا بص الهنا…الكلام دا انتوا قلتوه الف مرة. في زول حايشكم. يعني ما معقول اي اجتماع ل (بص الوالي) يقولوا ليك المجلس وجه بالمتابعة والتقاضي. متابعة شنو؟. متابعة (شيبوب) دا احسن تخلوها لي (ضفر) يوم الاتنين القادمة في الجوهرة الزرقاء. انتوا بي عممكم الكبيرة دي وبي تقدمكم في السن …شيبوب دا ما بتقدروا تتباعوه. الموضوع دا ممكن يكون فيه (ضغط). وممكن يكون فيه (سكري). شوفوا الارهاب ..والكلام الفارغ الما عندو قيمة. قالوا شنو؟…( كلف مجلس ادارة نادي المريخ السوداني المحامي الايطالي المعروف مونقيميرى بمتابعة اجراءات شكوي المجلس في لاعبه السابق شيبوب لدي الفيفا وبدأ المحامي الايطالي فعليا في الاجراءات ويتوقع ان تظهر مستجدات جديدة في هذا الملف خلال الايام القادمة ). يا جماعة الفيفا دي ما في زول ماسكم منها. انتوا قايلين الفيفا دي (لجنة استئنافات). مجلس غير (شرعي) وجاء بقرار (حكومي)…عاوز يمشي (الفيفا)!!. انتوا عارفين (بص الوالي) دا لو مشى (الفيفا) اول حاجة بعملوا ليه شنو؟. اول حاجة بقولوا ليهم وينها (جمعيتكم العمومية)؟. نحن ذاتو مفروض نمشي (الفيفا) عشان نطعن في هذا المجلس. نطعن في (بص الوالي). يقطعوا ليهم اسم محامي من رأسهم ..ويقولوا ليك كلفوه بالملف. يخشوا (النت) يشوفوا ليهم (اسم) ويلعبوا عليه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الشيء الظريفة جابها متوكل أحمد علي. متوكل صرح في احدى صحف المريخ وقال : (وصف متوكل أحمد علي نائب الأمين العام لمجلس إدارة نادي المريخ والناطق الرسمي باسم المجلس الشكوى التي تقدم بها أهلي شندي ضد مشاركة ألوك مع المريخ بأنها غير مزعجة للأحمر الذي يثق تماماً في سلامة موقفه وفي صحة الإجراءات التي اتبعها في التعاقد مع ألوك مؤكداً أن المريخ سيمضي قدماً في إشراك لاعبه في جميع المباريات وعلى المتضرر اللجوء للفيفا التي أفتت بصحة تعاقد المريخ مع اللاعب، وتحدى متوكل أحمد علي الهلال أن يقدم على إشراك شرف شيبوب في أي مباراة برغم التأكيدات التي تلقاها من الاتحاد بصحة تعاقده مع اللاعب مؤكداً أن قضية شيبوب لم تنته بعد لافتاً إلى أن المريخ كوّن لجنة خاصة لهذه القضية برئاسة الفريق طارق عثمان الطاهر وستستعين هذه اللجنة بالعديد من بيوت الخبرة الأجنبية في مجال المحاماة والقانون لملاحقة شيبوب وتابع: عدم إشراك الهلال للاعب أمس الأول أمام الخرطوم الوطني دليل على عدم ثقتهم في صحة الإجراءات التي اتبعها الأزرق في التعاقد مع هذا اللاعب وعلى الهلال أن يقدم على إشراك شيبوب في أي مباراة رسمية حتى يتيح لنا استعادة الصدارة لأننا نعرف كل أركان هذه القضية وسنصل بها إلى أعلى المستويات). انتوا الناس ديل موش قالوا مزمل ابوالقاسم هو الناطق الرسمي …متوكل دا (الناطق الرسمي) جابها من وين؟. السيد متوكل …ما عارفو قاعد وين في (بص الوالي)…لكن متوكل دا افتى بي صحة اجراءات تسجيل الوك. عمدة والله!!. يا زول انت قائل نفسك بتتكلم ليك عن قطعة ارض. الوك اللاعب (الاجنبي) وقع في اورنيك لاعب (وطني) …يفتي العمدة متوكل بصحة تسجيله. الوك اللاعب (الموقوف) والذي تمت معاقبة (مريخ كوستي) على اشراكه في مباراة امام الرابطة واشركه المريخ دون حتى ان يصحح مساره …العمدة متوكل يقول ان تسجيله صحيح في المريخ. ويقول متوكل في نفس الوقت الذي افتى فيه سيادته بصحة تسجيل (الوك) ان تسجيل شيبوب في الهلال غير صحيح. انتوا قايلين الهلالاب ديل دخلوا البلد دي بي (فيزا). الوك صاح. شيبوب لا. بالله!!. شيبوب لعب (6) شهور في شبيبة القيروان انت كنت وين يا عمدة؟. بعدين لو فرحان شديد كدا ..لم قضيتك عليك ..وما تحذر الهلال من اشراكه صفحة الهلال عشقي الأبدي …انتظر مشاركته وامشي (الفيفا). جماعتكم ديل فاكرين الفيفا فاتحة ليها (دكان) في سوق الكلاكلة اللفة. عليك الله لو مشيتوا الفيفا ..جيبوا لينا (عينة) من عينتكم دي. متوكل قال : (على الهلال أن يقدم على إشراك شيبوب في أي مباراة رسمية حتى يتيح لنا استعادة الصدارة لأننا نعرف كل أركان هذه القضية وسنصل بها إلى أعلى المستويات). اصحابكم عاوزين يطبقوا (طبيظ) الموسم الماضي. فاكرين انهم ممكن يجيبوا (الصدارة) من البرلمان او (مكتب الوالي) زي ما عملوا الموسم الفات. يا متوكل ..انتوا عندكم لاعب ضرب ليه حكم وموقوف وجوبا لمدة اسبوع وشارك قبل انتهاء الاسبوع في مباراة رسمية ..وما في (اتحاد) عمل ليه شيء. تفتكر الاتحاد (المهبب) دا بقدر يعمل ليه حاجة للاعب سجل بصورة شرعية وانتقل للهلال من شبيبة القيروان. علما ان الاتحاد (المهبب) ذاتو اكد صحة تسجيل (شيبوب)…انتوا على شنو؟. لو غلبكم (المول)…ولو ما قدرتوا على (النادي الاجتماعي)…شيبوب ما بحلكم. ولو الموضوع (جرسة وخوف) من مشاركة شيبوب يوم الاتنين القادم ..برضو ما بحلكم. احسن استفيدوا من وقتكم..وامشوا (الفيفا) طوالي …عشان هناك اول شيء يقولوا ليكم انتوا منو؟. والجابكم هنا شنو؟. وبتعملوا في ايه؟. الفيفا دي ما مكتب الوالي. احسن الامور تبقى ليكم واضحة. وعممكم الكتيرة دي ..لو مشيتوا بيها (عزاء) احسن من تقعدوا تعملوا بيها البتعلموا فيها دي. قال شييبوب قال!!. ………… و مجلس المريخ ببحث عن شماعة الهزيمة من الآن. بفتشوا ليهم في (مخرج) يضللوا بيه الجمهور. خلاص يا ناس امير كمال وضفر ..عليكم الله لمن تشوفوا (شيبوب) في مباراة القمة ..نوموا قفا. ما تلعبوا. تلعبوا ليه ومتوكل بقول ليكم مشاركة شيبوب بتمنح المريخ النتيجة. الهلالاب خلوهم يشتغلوا على الحتة دي. مجلس جابوا (مكتب الوالي) بكلمنا عن (الفيفا). والله كلام. ………. السيدة (ل)..واحد اتزوج ليه واحدة في (استاد) ، بقى كل ما يختلف معاها بدل ما تقول ليه بمشي (بيت ابوي) ..بتقول ليه بمشي (الفيفا). وقرّط على كدا.
