محمد الطيب الأمين * أزمة السيولة التي مرت بالبلاد ولم تزل علمت الناس كثيراً من الأشياء .. * الكسر، والشيك، وسعر الدولار، والشيك المصرفي و.و.و… * كل هذه الاشياء كنا نجهلها .. * قبل سنوات قليلة ما كان في زول بيعرف سعر الدولار يعني شنو ، ولا في زول بيسأل من دولار ولا في زول شاف دولار أصلا .. * أنا أول دولار شفتو في حياتي كان قبل سبع سنوات في احدى المسلسلات المصرية .. * والله صحي .. * إحنا كنا الدولار لو لقيناهو واقع بنتفكرو (عملة قديمة) .. * الآن صبي الورنيش بيتكلم عن الدولار وسعر الصرف .. * أزمة السيولة خلقت ثقافة جديدة وفهم جديد .. * يقول ليك داير لي اسمنت بالشيك .. * فراخ بالشيك .. * كبدة بالشيك .. * فحم بالشيك .. * يقول ليك : الحمدلله القروش في لكن ما في كاش .. * أو يقول ليك عندي قروش لكن الصرافات ما فيها .. * بسبب الحاجة دي في ناس (غرقت ديون) .. * يدين من المغلق ومن الدكان ومن الجزارة .. * يدين علي أمل أن (يفك الشيك) ويحل الديون .. * العندو شيك بالدين عليهو .. * ولما مواعيد سداد الدين تأتي يبدأ رحلة البحث عن فك الشيك .. * وفي ناس عندهم كاش لكن تديهو شيك بي (30) مليون عشان يديك (23) مليون كاش .. * أزمة السيولة هذه عانى منها المريخ بشكل مباشر وذلك لسببين اتنين .. * السبب الأول الحكومة وقفت دعم المريخ .. * والسبب الثاني لا محمد الشيخ مدني عندو قروش ولا محمد جعفر قريش .. * ما عندهم قروش .. * ولذلك أعتمد المريخ بشكل كامل علي (شيك البطولة العربية) .. * كل مرحلة بيرسلوا ليهم شيك .. * والجماعة حماس ساكت ابعدوا الجيش السوري والاتحاد الجزائري .. * حماس ساكت .. * حاجتهم للقروش جعلتهم يتحمسون للمضي قدما في درب البطولة .. * ولكن الحماس وحده لا يحقق البطولات .. * من الغباء أن تراهن على الحماس لتصل الفاينل .. * حماس ومعاهو خيال واسع .. * اتحمسوا واتخيلوا .. * اتخيلوا أنهم ابعدوا النجم وبلغوا المباراة النهائية .. * سرحوا بخيالهم .. * وقالوا ح يغلبوا النجم ويسافروا العين الإماراتية لمواجهة الهلال السعودي في النهائي العربي .. * ووزعوا القروش بتاعة النهائي .. * حساباتهم بقت حسابات نهائي .. * وادينوا علي قروش النهائي كمان .. * رجعوا سومانا بالدين ووعدوه بأن يستلم متبقي حقوقه من حافز النهائي العربي .. * قالوا ليهو: الحمدلله القروش عندنا ح نغلب النجم ونصل النهائي ونستلم ونسلمك .. * ادينوا علي قروش لسه ما جاتهم .. * وقاموا عملوا حشد واتلملموا من كل حتة .. * وجاء النجم وقام حلق ليهم .. * حلاقة بدون مرايا .. * وأنا والله شايف إنو أكتر حاجتين أضرت بالمريخ هي (الخيال الواسع والفار) .. * المريخ ركز علي الفار واهمل النجم .. * خلوا اي حاجة وبقوا مركزين مع الفار .. * الفار شغلكم .. * شبكتونا نحن أول فريق سوداني يجيب الفار، ونحن لعبنا بالفار ونحن غيرنا ما في فريق لعب بالفار .. * انشغلوا بالفار وقام النجم التونسي ضبح ليهم الكديسة .. * لا نفع رمضان عجب ولا شفع أمير كمال .. * النجمة دون النجم .. * النجم الذي أهدر فوزاً تاريخياً أمام المريخ في لقاء الذهاب كان يمكن أن يحقق فوزاً معقولاً في لقاء الإياب .. * الجماعة لقوا القروش دي وصدقوا أنهم ممكن يصلوا النهائي .. * مشوا عسكروا في أديس أبابا .. * واجروا ليهم غرفة ومعاها برندا عملوا فيها قناة (نص كم) .. * ومن شدة الفرح بقوا كشافات الإستاد يولعوها بالنهار .. * نظام أنهم ح يصلوا النهائي وكده .. * في عز السخانة دي بيولعوا الكشافات بالنهار .. * ويصرحوا .. * وجاء النجم حلق ليهم .. * والحجار دورت .. * شي طوب ،وشي قوارير ، وشي كرستالات .. * الحكم انضرب .. * حكم اماراتي عمرو كلو ما في زول قال ليهو في وشو التحكيم فاشل .. * عمرو ما سمع النغمة دي .. * ديل جوا ضربوه وفلقوه .. * وده كلو بسبب العشم .. * بسبب العشم والخيال الواسع والتركيز مع الفار .. * لما تعشم في حاجة وما تلحقها بتغضب شديد .. * نفسيا بتتعب .. * وأنا والله مستغرب في العشم ده .. * فريق آخر نسخة من هذه البطولة أخد فيها سبعة .. * هسه مفكر وعشمان يصل النهائي .. * قلنا ليكم (البخور) ما بحقق بطولة .. * واتحداكم السنة الجاية لو شاركتوا ح تطيروا من الدور الأول .. * وطبعا بسبب سوء سلوكم أصلا الاتحاد العربي لن يسمح لكم بالمشاركة مستقبلاً .. * أحسن تشوفوا ليكم سيكافا .. * مدوا كراعكم قدر لحافكم .. * أما بالنسبة لأي زول يقول ليك وطنية وما وطنية ح نقول ليهو الوطنية في الطحنية .. * شخصياً بالنسبة لي الوطنية في المنتخب فقط .. * من يوم جماهير المريخ استقبلت مازيمبي في المطار أنا حددت موقفي من الوطنية مع المريخ .. * مازيمبي لما جا يلعب مع الهلال وانتو شلتوا التفاح والعنب ومشيتوا ليهم في التمرين .. * من اليوم داك أنا قررت التعاطف مع خصوم المريخ .. * واضح معاكم .. * لا اغشكم ولا تغشوني .. * وطنية في المنتخب فقط .. * واصلاً البطولة العربية دي زي الدورة المدرسية .. * زي الدورة الرمضانية .. * ما في زول مقتنع بيها .. * قلتوا لي الفار مالو ؟ * فار ب(الكاء) .. * ونركب صافنات ونجيبة (تونسية) واصلو الزول بيموت والذكرى تفضل حية .. * و..و.. * سبحان الله حتى (الفار) بقي يطير ..
