بابكر سلك السكري محافظة *السكري مرض صديق زي ما بقولوا الأطباء *صديق *صديق يمنعك الباسطة والكنافة والعصائر المركزة *ويمنعك العنب والبطيخ والمنقة والمدائد *يمنعك الكسرة والعصيدة *كان غرقت في الكسره بغرقك *ده صديق شنو ده *لكن برضو الأطباء شابكننا السكري مرض صديق *ونحن بنعرف أكتر من الدكاترة ؟؟؟ *صديق صديق *المهم *مجتمع المريخ موضوعو اليومين دي سوداكال *اتفقت أمة المريخ إنّها تشيل سوداكال *وسوداكال عارف إنو ما في حاجة بتشيلو إلا اتفاق المريخاب *عشان كده طويل العمر مطمئن *ما حا يحصل اتفاق لأنّو الاختلاف من أسى دور *اختلاف في لجنة العضوية *اختلاف حول الجمعية العمومية التي يحق لها إجازة أو إسقاط تعديلات نظام 2019 *واختلاف حتى على التسمية *هل هو النظام الأساسي 2019 المؤكد 2020 *أم هو النظام الأساسي 2021 *عشان كده انعم بطول سلامة يا سوداكال *وبالحالة الشايفها أنا دي *سوداكال ده سكري المريخ *يا تحافظوا عليهو *يا يوديكم *والكلام ده إلى أن تدركوا جيدا معنى الاتفاق ومعاني أدب الخلاف وسلوكيات الاختلاف المحترم *تاكلوا حلويات تمشوا *تفتحوا للسكريات نهائي *يجيكم هبوط يوديكم *لذا حافظوا علي سكريكم *المهم *قالوا مازيمبي وصن داونز شغالين إعداد لمرحلة ما بعد المجموعات *مرحلة المجموعات دي اتخطوها بمجرد إعلان المجموعات *وطبعا لدواع وطنية أنا الكلام ده ما عجبني *الناس ديل معاهم الهلال في المجموعة *شنو الحقاره وعدم الاعتبار ده * والله الهلال لو قام على جنو *ناس مازيمبي ديل إلا يطيروا *هم قايلين الهلال ده هامل عشان أدوهوا خمسة في استادوا؟ *قمت احتجيت لي صديق كنغولي *قلت ليهو كيف مازيمبي وصن داونز يعملوا من أسى إعداد لمرحلة ما بعد المجموعات *قال لي عشان ضامنين الصعود *قلت ليهو الهلال حا يصعد *قال لي علي الطلاق من الكنغولية بت عمي * الفرق التلاتة المع الهلال في المجموعة لو كتلتها كلها الكورونا الهلال ما يصعد *وقال لي كاتومبي خليهو *سوباط شنو *علي الطلاق بالكنغولي رئيس صن داونز عندو منجم ومعرس بت الرئيس *تقول لي سوباط ! *بعد سمعت كلامو ده ولدوافع وطنية قررت أخاطب الكاف وأحلف ليهم إنو نتائج فحص الأشانتي طلعت سلبية *أيها الناس *الله يحفظ تيمنا ويبعدنا منو بمشاكلنا دي *أيها الناس * أن تنصروا الله ينصركم *أها *نجي لي شمارات والي الخرتوم *كي لا ننسى يا والينا *نحن خرجنا على الإنقاذ *خرجنا على تلك الحكومة *خرجنا على تلك الحقبة *خرجنا على الفساد *خرجنا على البشير *ولكن لم نخرج على الإسلام يا والينا سلك كهربا ننساك كيف والكلب قال عشان كده في الاتفاقيات وشكل حكم البلد برضو راعوا للحتة دي.. ما كل الأمور جنائية حتى تسقط حدودها عن غير المسلمين.. في أمور أخرى اقتصادية مثلا فهل ستفرضون على المسلمين التعامل بنكيا بنظام الفائدة ولا حا يكون في نظامين بنكيين متاحات لينا وإلى لقاء..
