*ناس ليفر بول عندهم المصري مو صلاح *وناس الهلال عندهم السوداني مو عبد الرحمن *وكلمة مو ما كلمة ساي *كلمة لها معنى *هي اختصار لكلمة معلم *وهو اختصار عالمي *بس اختلاف اللغات واللهجات بغير في المصطلح شويه *في أمريكا الجنوبية مثلاً *الواو عندهم ياء *فينطقون (واو) ياي *وينطقون جوبا (جيبا) *لذا تصبح (مو ) عندهم (مي) *فيقولون ميسي وهي تعني مو سي *زي مو صلاح *وأهل البادية في الأرجنتين ينطقون الواو ألف *فتصبح مو صلاح مثلاً عندهم (ما صلاح) *ومن الحتة دي جات مارادونا *هو في معلم اكتر من مارادونا؟؟؟؟ *المهم معنى (مو) هو معلم *ومو عبد الرحمن معلم *لاعب وصل بسرعة لمرحلة النضج الكروي *يؤدي باحترافية كبيرة تظهر في الاستلام والتمرير والحركة بدون كرة *وفضلاً عن الاحترافية يؤدي بحرفية كبيرة تظهر في إجادته التهديف ومهارة كسر التسلل والبرود في التعامل مع الكرة في منطقة المرمى والتمركز السليم والثقة بالنفس *الأمر الذي أدى لشفائه من جائحة الكرة السودانية وكوفيدها المزمن والذي وصل موديله لكوفيد 2021 *مو عبد الرحمن لاعب مهول *ظهرت مواهبه مع المريخ ومع الفريق الجزائري وبالمنتخب *وإن كان ألقه يخبو مع الهلال نوعا ما *لأن طريقة اللعب وصناعة اللعب في الهلال يشوبها التدني وعدم توفر المهارات اللازمة *المهم مو عبدالرحمن لاعب مهول وكبير *والناس البقولوا تيري قطع الزلط *كلامهم صاح *تيري قطع الزلط عشان يجيب مو عبدالرحمن إلى حيث المتعة *ابقوا معنا *أيها الناس *لو رجعت ليكم مو عبد الرحمن للمريخ *دحين ما بطلع لي بعشرين من مو صلاح وعشرين من الهلال؟أقصد من المريخ؟ *هو الهلال يدفع العشرين بسبب مو عبد الرحمن كم مرة أصلو!!!!!!!! *أيها الناس * سواء مو عبد الرحمن رجع المريخ ولا قعد في الهلال *الولد لعاب ونسخة خالية من عيوب كورتنا المتمثلة في إهدار الفرص الساهلة *وبمناسبة الفرص الساهلة *نعود لمباراتنا ضد أهلي مصر *كورة مفروض تنتهي ستة صفر *كان الرئيس الما محبوب جاب الهبوب *في عهدو المريخ يجيب ستة أقوان في الأهلي القاهري! *ده كان جاب لينا كتاحة عديييل مش هبوب *مفروض نغلب *لكن كوفيد إضاعة الفرص المضمونة أضاع علينا أربعة أقوان الشناوي قايلها دخلت *وأولها ضربة الجزاء المهدرة *ثم أصابنا كوفيد عدم التركيز في النهايات *فتعاملنا مع العشر دقائق الأخيرة تعاملنا في المدرسة مع الحصة السابعة *حيث نقضيها بدون تركيز تحت ضجيج بيوووووت *وهو نفسه عدم تركيزنا في النهايات مع الفريق الجزائري حيث كنا متقدمين تلاتة صفر وأحرز الخصم فينا هدفين في آخر دقيقتين *لأننا بنتعامل مع النهايات تعاملنا مع حضور الكورة *الإستاد كلو يقوم مارق في آخر عشر دقائق وكاسر رقبتو يعاين ناسي إنو الفريق بخسر تشجيع الجمهور القال بيووت ده وقام مارق *زي جمهور المرحومة السينما *قبل نهاية الفيلم تلقى البطل نصو في عنقرة الزول القدامك *والنص التاني في محل تاني في الزول الجمب الزول القدامك *وعشان نمرق من الحتة دي *يا نفهم اللاعبين إنو الكورة مية دقيقة *أو نعلمهم إن آخر دقيقة أهم من أول دقيقة *ولكن *لنا أن نفخر بالأداء الخرافي قبل دخول الزمن الخرافي *زمن النهايات *أيها الناس *إن تنصروا الله ينصركم *أها *نجي لي شمارات والي الخرتوم *كان شفت يا والينا *في بعض الحتات جميلة اتعملت لينا *قزاز وسراميك وكندشة يا والينا *وحمامات للجنسينا *حمام سيدات في بابو شكلوتة مرسومه لينا *حمام رجال في بابو صباعات أورقن تعبر عنينا *طيب يا والينا *لو كنت في المطار ومعاك بتك الطفلة يا أخينا *وقالت ليك بابا دايره ببي ودينا *بتدخل معاها حمام النساء ولا بتقطعها في حمام الرجال وهي برضك عرضك يا والينا؟؟؟؟؟ سلك كهربا ننساك كيف والكلب قال عشان الحاجات دي بنتكامل ليك أقرب عمود ونتخارج وإلى لقاء
