بسم الله الرحمن الرحيم في السلك *طبعا التوانسه شمتانين في الترجي لي الليله *بالذات ناس الافريقي التونسي *باقي قال ليك الناس ديل مع الترجي الشحمه والنار *لانو شايفين الترجي حقار *لما يلم ليهو في حمام ببشتنو *يدي ليك الحمام خمسه وسته *وناس الافريقي ما بحبوا الحقاره *بشوفوا انو قون قونين كفايه *ومافي داعي الترجي يستعرض عضلاتو قدام الحمام *وفي اربعه مباريات يجيب فيهم اتنين وعشرين قون *ياخ قال ليك واحد من ناس الافريقي قال *اكتر حاجه حارقاهو في حقارة الترجي *يوم الترجي قابل ليهو حمام *حمام ازرق *زي بتاع يا الع الشجره داك *والحمام جاب القون الاول في الترجي *وباقي ليها اطناشر دقيه تنتهي *قال ليك حقارة ناس الترجي *في الاطناشر دقيقه دي *جابوا خمسه اقوان في الحمام *وقعدوا يقلبوا ليك في الهوبه *يعني كلو دقيقتين ونص قون *قول القون جا *وناس الترجي احتفلوا في دقيقه ونص *والكورة ودوها النص في نص دقيقه *ردوها *في نص دقيقه الترجي يجيب قون تاني *كلو دقيقتين ونص قون *المهم *ناس الافريقي شمتانين في الترجي لي الليله *وقال ليك في تونس السوق كلو افريقاب *والفنادق نصها بتاعت الراسماليه الافريقيه التونسيه *قابضين السوق كده *وطبعا اليومين دي ابو الهل في تونس *وتونس غاليه *والاسعار نار *والفنادق بالدولار *صديقي جحا المبدع المريخابي *قال لي قالوا ناس الهلال في تونس *اي حته يقولوا نحنا من طرف بكري المدينه *عشان يخفضوا ليهم الاسعار *وعشان يرحبوا بيهم ويجاملوهم *لله درك يا جحا *ديل في المدينه ما تستبعد يقولوا من طرف بكري المدينه *فطومه اختي زاتها *قالوا ماخلت بوتيك ما دخلتو *في اي بوتيك بتقول ليهم انا فطومه من طرف بكري الميدنه *قال ليك الكريمات والبدر (والصن بلوك ) كلو مجانا علي حس بكري المدينه *كريم الفرد والزيوت النباتيه (الاسيتون ) ملح *كريم الاساس (الفاونديشن ) والدلال *كلو ملح كرمانا لبكري المدينه *فطومه من طرف بكري المدينه *غايتو روشا لو قال ليهم انا من طرف بكري المدينه *بضمن توزيع للاسياد في تونس *بكري ده غالي عليهم *قولها يا روشا *ويابخت من نفع واستنفع *فطومه غايتو قالتها *المهم *سيمبو ادوهوا حقو ولا لسه ؟؟ *سيمبو سمو فاير *يا تدفعوا *يا للبرازيلي ابو اسرة كريمه تجدعوا *لكن الزول ده من اسرتو لعاب لعاب لعاب *ادفعوا لي سمبو *او قولوا ليهو نحنا من طرف بكري المدينه يمكن يعفيكم *المهم *بيانات معارضتنا ايام التسجيلات دي ما طلعت *ليه وكت الدفع والدولار معارضتنا بتلزم الصمت *ولما نقول ليهم ساهموا في التسجلات دولاريا *يقربوا يقولوا لينا نحنا من طرف بكري المدينه *ايها الناس *سمعنا قالوا وزير الدفاع الكوري نام في المداولات اعدموهوا *البرازيلي ابو اسة كريمه ده كان نايم في التسجيلات *يا ربي ناس كردنه بطلعوا كوريين و بعدموهوا *ولا بطلعوا صينيين وبخلوهوا ؟؟؟؟ *غايتو لو قال ليهم انا من طرف بكري المدينه بخلوهوا *ايها الناس *هل ماخرج به اجتماع المجلس حول الاشبال والرديف يكفي ؟؟؟ *وهل اللجنه التي كونها الاجتماع تكفي لحل مشاكل القطاع الكبيره والمستفحله ؟؟؟؟ *وهل فعلا اخلاء الخانات والتسجيلات الجديده كان بامر الجهاز الفني ؟؟؟ *يعني هل الجهاز الفني اوصي بالتخلص من حسين وجرهام مثلا ؟؟؟؟؟ *الحته دي لايشفع فيها شئ يا مجلسنا *حتي ولو قلتوا نحنا من طرف بكري بكري المدينه لن نسامحكم فيها *فالاشبال والرديف هم يوم باكر *ومريخ باكر وشفوت الغد *واعدام الامل اللينا في يوم باكر *لانغفره حتي ولو كنتم من طرف بكري المدينه *ايها الناس *ان تنصروا الله ينصركم *اها *نجي لي شمارات والي الخرتوم *والينا *الخريف جايينا جايينا *عشان ماتقول اتفاجأنا بيهو زي ماكلو سنه بتقول لينا *ورمضان جايينا *وكلمناك كهربتك دي ما بتكفينا *وما واضح لينا انك سائل فيها او سائل فينا *حا نصوم ونخرف يا والينا *ولا حا نجلد ويجينا قرف مكبل وخرف مبكر من حالنا المقرف يا والينا سلك كهربا ننساك كيف ورمضان والمدارس والخريف جايات علينا ونحنا ولا علينا والي لقاء سلك عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
