محمد الطيب الأمين ده الحل الوحيد يا برقو !!. * مرات في زول بيكون داير ليهو سبب (للبكا). * بيكون داير يبكي لكن ما لاقي ليهو مناسبة. * تجي تقول ليهو (حمار) ناس كلتوم مات يبكي ليك لما تستغرب. * يبكي بإخلاص لما يحسسك إنو الحمار ده قرأ معاهو الابتدائي سوا. * وهو يكون ما واجعو الحمار لكن داير ليهو سبب للبكا. * وبما أن ذلك كذلك فإن ناس المريخ ما واجعهم (كلام برقو) لكن دايرين ليهم سبب للزعل. * والله صحي. * الجماعة ديل عندهم مشكلة مع المنتخب. * أو بالأصح عندهم مشكلة مع شداد. * وعشان شداد بيعادوا في المنتخب. * مشكلتهم مع شداد إنو ما شال ليهم سوداكال. * علماً بإنو سوداكال ما جابوا شداد. * جابتو جمعية عمومية. * وفاز بالتذكية كمان. * هم بدل يزعلوا من سوداكال الذي فشل في إعادة تسجيل الغربال زعلو من شداد. * بدل يزعلوا من ناس عبد المهيمن السجلوا أبو عشرين زعلوا من شداد. * بدل يزعلوا من نجيلتهم العاملة زي (وش البت الما نفع معاها الكريم) زعلوا من شداد. * عندهم تراكم بتاع زعل غير عادي. * عشان كده لما برقو قال لحازم (عيبك إنك مريخابي) هم بكوا بكا تراكمي. * بكا لحاجات قديمة وجديدة. * هم شايفين إنو لعيبة الهلال في المنتخب أكتر. * شايفين إنو تشكيلة المنتخب كلها من الهلال. * شايفين إنو قائد المنتخب من الهلال. * شايفين إنو بكري المدينة يفترض يرجع المنتخب. * تكون غلطان لو افتكرت إنو المريخاب زعلانين في كلام برقو وبس. * أبداً والله. * الموضوع كتر عليهم. * قلنا ليهم اقفلوا الموضوع ده وخلونا نركز في المهمة الوطنية المنتظرة المنتخب قالوا لا. * قلنا ليهم المنتخب حق البلد ما حق برقو ، قالوا لا. * بكا شديد. * أنا عندي إقتراح لبرقو. * شوف يا برقو : الليلة ساعة الغداء لما اللاعبين كلهم يكونوا قاعدين في البوفيه انت تعال وقول لبوغبا : (انت لعاب يا بوغبا لكن عيبك إنك مريخابي). * قول ليهو كده وخلينا نخلص من القصة دي. * ونحن على قلوبنا زي اللبن. * هكذا بقترح. * وأي زول طبعاً حر في (اقتراحاتو). * معقولة ياخ تلاتة أيام شابكننا برقو قال وأمير كمال قال؟ * نحن ما عندنا شغلة غيركم يعني ولا شنو؟ * فكروا في حاجات أكبر ياخ. * اها برقو قال وين المشكلة؟ * ح تعملوا شنو يعني؟ * ما بتقدروا تسحبوا لاعب من المنتخب. * كضب ساي. * اتحداكم تسحبوا لعيبة المريخ من المنتخب. * والله شداد ينزلكم دوري التانية. * ولا بهظر معاكم. * كده جربوا اعملوا الحركة دي عليكم الله. * إنتو ليكم ستة شهور بتحنسوا عشان بكري المدينة يرجع. * وما رجع. * اقفلوا الموضوع ده وشجعوا المنتخب وخلونا نمشي خطوة إلى الإمام. * ولو ما دايرين تشجعوا المنتخب نقطونا بسكاتكم. * معقولة دي؟ * غايتو الله يكفينا شر (المصدي) اللمعتو الأيام. * ونركب صافنات ونجيبة (إماراتية) واصلو الزول بيموت والذكرى تفضل حية. * و.. و.. * برقو والمريخ حارقو.