محمد الطيب الأمين الحركة الأمس دي سميناها (رضا الوالدين) !! * أي زول داير يتزوج في هذه الأيام ممكن يشيل معاهو تمريرة نصر الدين الشغيل في (الشيلة). * شيل المأكولات والملابس والريحة و(تمريرة الشغيل) . * أهل العروس سيتركون كل شيء في الشيلة وسيتحدثون عن تمريرة الشغيل. * الشغيل عمل (غمزة) لفارس داخل خط ال(18) إسمها (رضا الوالدين). * إحنا وأولاد حلتنا أطلقنا على تمريرة الشغيل إسم (رضا الوالدين). * وقون ياسر مزمل سميناهو (عافي منك وراضي عنك). * وهدف الغربال الشهير ب(لو رجعت السودان ما بلعب إلا للمريخ) ، هدف الغربال سميناهو (المكون العسكري). * أما الأخ غير الشقيق اباذر ميسي فهو (9 طويلة) عديل. * اباذر عمل أي حاجة في أولاد سوداكال. * أو قول (أولاد حازم) . * عليك الله ده هسه حال فريق عندو (رئيسين و22 عضو مجلس إدارة)؟ * عدد أفراد مجلسي الإدارة في المريخ يوازي عدد اللاعبين بكشف الفريق. * قصاد كل لاعب إداري. * ونجيلة ما عندهم. * تشوف حركات العجوز بكري المدينة تحلف تقول عندهم نجيلة. * ما بدر من بكري المدنية غير مستغرب إذا كان مجلس الإدارة نفسه شغال (بونية وشلوت وطبنجة وبلاغات). * ما بدر من (بكوري) عادي بالنسبة لفريق ما معروف رئيسه منو. * كونو بكري المدينة (يتلفظ بس) دي ذاتا حاجة كويسة. * أنا اتوقعت بكري المدينة يدخل الملعب وشايل معاهو (مطوة). * مع وضع البلد ده تتوقع أي حاجة. * الجاكومي شايل طبنجة ولذلك توقعت صلاح نمر يجي شايل لينا (سكين). * عموماً بنقول لسوداكال الرئيس المنتخب هارد لك. * وبنبارك لجماهير الهلال الوفية الدوري والقمة. * ودون شك كان هذا الموسم مميزاً للهلال. * موسم تحققت فيه أرقام كبيرة جداً وحفل بالمكاسب. * (79) نقطة وخسارة واحدة. * أفضل خط دفاع في الدوري. * أفضل هجوم (79) هدف. * هداف الدوري محمد عبد الرحمن (29) هدف. * غربال لأي زول. * فحم لأي لحم. * وأعتقد أن نجم الموسم هو محمد عبد الرحمن. * الغربال نجماً للموسم يشاركه النجومية محمد أحمد ارنق وفارس عبد الله وروفا . * الحمدلله نجح الهلال هذا الموسم رغم أن لجان الإتحاد المريخية كانت تريد عكس ذلك. * ما تسمع كلام إنو الإتحاد العام ضد المريخ. * العكس هو الصحيح. * الإتحاد العام داعم للمريخ وما حدث مع سيف تيري أكبر دليل. * سيف تيري أربعة شهور بيلعب وهو خارج الكشف. * قوم على حليلك. * وما أظنك أن تقوم. * المهم. * تحية خاصة جداً لفارس عبدالله الذي طرد ظلماً بعد الإساءة له. * فارس لاعب صاحب أخلاق عالية وكضاب البقول سمع كلمة شينة من فارس. * كل لعيبة الدوري الممتاز يعرفون أخلاق فارس وتربيته السليمة. * التحية للسموأل اللاعب المجتهد. * التحية للشغيل جمل الشيل. * التحية لحامي العرين أبو عشرين الشهير ب(لون الدم). * أيضاً لابد من تحية خاصة لمجهودات مجلس الإدارة بقبادة السوباط وكل المجموعة. * وتحية كبيرة لمعالي المستشار تركي آل الشيخ. * والجهاز الفني بقيادة ريكاردو والجهاز الطبي ودائرة الكرة. * وتحية بحجم الفرح للشاب الخلوق عبد المهيمن الأمين الذي له إسهام واضح وكبير في هلال هذا العام. * والتحية والتقدير لكل من ساهم في عودة اللقب لمكانه الطبيعي. * وإن شاء الله يكون الفريق أفضل وأقوى في الموسم الجديد. * أربعة محترفين أجانب وياسر مزمل ومحمد عبد الرحمن. * على بالنعمة أفريقيا تنوم من العصر. * ياسر مزمل ماشاء الله تبارك (مكنة). * أنا ما عارف القون الجابو ياسر ده نهديهو لحازم ولا لسوداكال؟ * أنا غايتو بهديهو للجاكومي. * وأي زول طبعاً حر في (هداياهو). * شكراً يا هلال على هذا الفرح. * شكراً على الإبتسامة في بلد كل حاجة فيها بتبكي. * ونركب صافنات ونجيبة (هلالابي) واصلو الزول بموت والذكرى تفضل حية. * و.. و.. * وغربال لأي نمر.
