محمد عبدالماجد رئيس المريخ الفخري قبل (الطائرة الخاصة) مفروض يجيب ليهم (نجيلة)
شافع لسانو متله (سبحة) اللالوبة ، جاني طالع من جوة لابس ليه فردة نعال واحدة. وقف لينا في الباب – متل (العضم) في بداية الاكل. لو اتكرعت تلقاه قدامك. نحن الواحد فينا وقت يزعل ...زعلو بيظهر في (نعالو) – موش عمر الطيب الدوش قال : (ضاقت نعالي من الزعل .. من تحتها اتململ تراب). عشان كدا – مرات الواحد نعالو بتبقى صغيرة. كراعك تكون برة النعال – متل التلفون الدولي ..لو ما عملت صفرين المكالمة ما بتدخل معاك. الشافع الذي وصفت ليكم فوق – قلنا ليه مالك في شنو؟ هسع تكون جايب ليك خبر كعب. وفي ناس طبعا ما بدوك فرصة تتكلم...بقوموا يجتهدوا من تلقاء روحهم. الشافع قبل ما يتكلم في واحد مننا قال ليه : ابوك مات؟ الشافع قال ليه ابدا. صاحبنا قال ليه : امك؟ الشافع قال ليه : ابدا. عمك؟ الشافع قال ليه : لا. حسن ود التقيلة؟...قالوا طقتو (كورونا) ، خلتو ليك زي (الجزلان) اخر الشهر. الشافع قال لينا : لا لا. وقت شفنا الموضوع ممكن يطول ...قلنا للخزين ود الخضر – اصبر خليه يتكلم براهو – يا جنا في شنو..وشك زي (كراسة الاملاء) كله (اعد). الشافع قال لينا جيبوا لي موية – نفسي اتقطع. جبنا ليه الموية. نفسنا اتقطع نحن. قال عاوز (رصيد). حولنا ليه رصيد. الشافع قال لينا : عاوز لي شاحن موبايل. جبنا ليه شاحن الموبايل. قال عاوز (طحنية). جبنا ليه الطحنية ...مشينا دكان (سعدة ود سعد) ...ما لقينا فيه طحنية ...مرقناها للسوق. عندنا سوق غير الطحنية وجركانات اللبن ما فيه شيء. جبنا الطحنية ورجعنا. قلنا للشافع : اها في شنو؟ الشافع قال لينا الطحنية دي عاوزني اكلها ليكم ساكت؟ جبنا ليه (الرغيف). الشافع قال لينا وين الشاي؟ جبنا ليه الشاي. كل دا – ونحن عاوزين نعرف الحاصل شنو؟ وقت لقينا الموضوع ممكن يجر ..مسكنا الشافع من اضنينو وقلنا ليه في شنو؟ اتكلم. خجينا الشافع. وضربناه في رقبتو. زي (الموجة) وقت تطش من الراديو. الشافع قال لينا الهلال اتعادل. نزلناه في الواطة. قلنا ليه اتعادل مع منو تاني؟ قال لينا مع اهلي مروى. قلنا ليه اهلي مروي دا غير حي العرب. قال لينا بلحيل. قلنا ليه مالو الهلال عاوز يبقى لينا زي الموبايل البطاريتو كعبة ..قدر ما تشحنو وتخليه في الشاحن بتلقى عامل 70 %. واول مكالمة تخش عليك بعمل 40 %. في واحد قال لينا الموبايل الجديد اصلو بكون كدا. ما بعطيك قراءة صحيحة لبطارية الموبايل. نحن القون في الهلال عندنا زي (عملية العيون) – الايام الاولي ما بتشوف سمح. لكن بعد كدا بتشوف صاح. عشان كدا التعادلات دي بتخلينا نستعدل. نشوف صاح. تكف مننا العين. ناس المريخ نجهونا. عندكم جيسي. وعندكم بوجبا. وعندكم ابوعشرين. ومنافسين على رمضان عجب ومحمد الرشيد. انتوا الجماعة ديل خبرهم شنو؟ الموضوع دا ناس لجنة الاستئنافات ما بحسموها ليكم. الموضوع دا احسن يمشي على ناس لجنة ازالة التمكين عديل. ما في غير لجنة ازالة التمكين لجنة بتقدر تفصل ليكم في الموضوع دا. الله يحفظ الهلال. الغربال شكى من (الضلعة). ابوعشرين اتكسر في (الانف). وضاح اتكسر في (اليد). الله يغطي عليهم. النجيهة الكتيرة ما سمحة. لكن كل هذه الاشياء ان شاء الله لخير. الهلال عبر تاريخه الطويل – كل ما يحقق نتائج ايجابية برة بيجي يتعادل جوة. الموضوع دا بقى عندنا عادة. الهلال وقت غلب الاهلي المصري في القاهرة مشى اتعادل في عطبرة مع الامل. واظن كذلك الهلال لما غلب الاهلي المصري في ام درمان 3 / صفر برضو مشى الهلال اتعادل في عطبرة مع الامل. الموضوع ما عندو علاقة بالمستويات. دي حالة طبيعية في كرة القدم. بتحصل. مرة اتغلبنا من التاكا ...تاني وقفنا ..بقينا نضرب من طرف. الهلال في كل المواسم لمن يتغلب او يتعادل في بداية الدوري بفتح في النهاية. الكلام دا احسن من ان يكون العكس. مرة المريخ اتقدم علينا بسبعة نقاط في الدورة الاولى ..وجينا شلنا الممتاز في الدورة الثانية. ومرة الهلال انسحب من الدوري. وبرضو جينا شلنا الممتاز. الموسم الماضي الهلال كان متقدم على المريخ بخمسة نقاط..جينا وفقدنا الممتاز. في 2018...الهلال ضمن الممتاز واتقدمنا على المريخ في نهاية الدوري باكثر من 6 نقاط. جاءت الفيفا خصمت من رصيد الهلال 6 نقاط. اصلو ما في حاجة مضمونة. ما تابوا التعادل في هذا التوقيت. عاوزين نصحح. عاوزين نشوف الحاصل شنو؟ ما عاوزين الناس ينفخوا كتير. كلنا نفخنا. وما خلينا حاجة. نسينا ان الكورة كدا. الكورة ما عندها ضمان. أنا في بداية الموسم كنت خايف على الهلال بعد التسجيلات الكبيرة والجهاز الفني يطلع من التمهيدي. لمن تحصل حاجات كبيرة في الاندية – دائما في البداية النتائج بتكون عكسية. لازم نكون عارفين الكلام. حكاية انك تقعد تشتم ليك لاعب كرة ..او تنتقد فيه او تقطع في سيرته ..حاجة ما كويسة. والله يا جماعة الكورة دي وقت تعاكس ..اصلو ما بتدخل. تكون بتهاجم المباراة كلها. اول هجمة عليك ..من اول كورة مرفوعة ...الكورة تضرب في لاعب تدخل قون. في حاجات كدا ما عندنا فيها ايد. لمن يغيب (التوفيق) لو عملت أي حاجة ...ما بتنجح. لمن اليوم يكون ما يومكم ..اصلو ما بتمشي معاك. ما عاوزين نقول الناس تستسلم – لآن الكورة بذل وعطاء وجهد. ولكن عاوز اقول الناس تقبل بي نتيجة. يكون عندها رضاء وقبول. وتدعم الفريق في كل الاحوال. الفريق عندما يتعثر ..فان ذلك يعني ان الفريق في حاجة الى دعم ومساندة اكبر. انسوا موضوع من الذي يلعب ...ومن لا يلعب. نحن طالبنا بي بوجبا. وطالبنا بي عبدالرؤوف. وطالبنا بي جيسي. شارك جيسي وبوجبا وعبدالرؤوف وبرضو اتعادلنا. ابعدنا الشغيل وابوعاقلة ونزار وقلنا السبب غياب هذا الثلاثي. عاد الثلاثي وبرضو اتعادلنا. غلط ابوعشرين. جاء جمال سالم برضو غلط. ما يومنا. المشكلة ما في الاسماء. كرة القدم لعبة جماعية. أي زول عندو دور. حتى (المشجع) القاعد في الواتس او الفيس ..دوره اصبح لا يقل عن دور اللاعب. ادعموا الجميع. يلعب دا. يطلع دا. دي ما قضيتنا. أي لاعب سوف تتاح له الفرصة. اللاعب الذكي هو الذي يستقل الفرصة. اللاعب الذي يدخل تشكيلة الهلال..مفروض تاني ما يطلع. زوران اعطي الفرصة للجميع. أي لاعب في كشف الهلال شارك. يلا عاوزين نشوف شطارتكم. رباعي الدفاع كله شارك اوتارا وارنق ووضاح والطيب عبدالرازق. في الاطراف شارك بويا ومؤيد وفارس عبدالله وسمؤال. كلهم شارك. حتى استفين زوي شارك في التجارب الودية. في الوسط شارك الشغيل ونزار وابوعاقلة وصلاح عادل وبوجبا ومجاهد فاروق وبشه الصغير وعبدالرؤوف. في الهجوم شارك كل العناصر كومبي والشعلة ومحمد موسي وعيد مقدم وموفق صديق ويونس شارك في تجارب ودية. يا جماعة أي لاعب يثبت وجوده بضمن مشاركته بصورة مستمرة. كل هذه الاسماء اخفقت ..عشان كدا طلعت من التشكيلة وسوف تعود. من يريد ان يثبت عليه ان يقدم مستوى ثابت. ابوعاقلة لاعب خرافي ممكن يقدم ليك مستوى ..في الكرة الارضية كله ما تلقاه. لكن ابوعاقلة وبعد هذا التألق والمستوى المدهش ممكن تلقاه في المباراة التالية زول تاني ما عندو علاقة بي ابوعاقلة. المستويات غير ثابتة. وهذا هو الامر الذي يجهجه المدرب. يا جماعة أي لاعب مفروض يقدم مستوى ثابت. أي لاعب يجب ان يعرف كيف يحافظ على مستواه. ما في حاجة اضرت بالهلال غير تذبذب المستويات. يا ابقى كويس طوالي. يا كمان ابقى كعب طوالي ..عشان تكون معروف وتبعد من التشكيلة. يا ابقى ضل. يا ابقى شمس. الرقراق ما معانا. ............ متاريس اباذر شداد قدم مستوى جيد في المباراة الماضية. أي لاعب بيلعب تحت 20 سنة ح نلقبه بي شداد. اباذر واضح ان لاعب صغير في السن وما بقدر يكمل الهجمة وتسديداته و تمريرته بعد المجهود الذي يبذله بتكون ضعيفة. انا ما خايف على المريخ من انيمبا. انا خايف على المريخ من الطيارة الخاصة. الناس ديل ما متعودين على الطيارة الخاصة. رئيس المريخ الفخري احمد طه التازي مفروض قبل الطائرة الخاصة يجيب ليهم نجيلة. نجيلتنا فترت. انا متفائل شديد بالقادم. فرحان بما هو آتي. مدوا الفرح لي غادي. اصلو ما تقيفوا. ادعموا فريقكم. وابقوا ليهو السند والدعم. ما تتوقفوا. ما تتلفوتوا. وما تسمعوا الكلام المحبط. الطاقة الايجابية اضحت اهم من اللياقة البدنية ذاتها. والطاقة الاجابية يمنحها الجمهور ومواقع التواصل الاجتماعي. ابقوا سند للهلال. راجيكم الكثير من الفرح. ........... ترس اخير : أي زول يمد كراعو قدر نجيلتو.
