بابكر سلك مابين حمدوك وهيثم مصطفى *غادرت بعثة منتخب الثوار للمشاركة في مونديال العرب بدوحة الروعة *بالتأكيد أمنياتنا أن يذهب المنتخب بعيدا في سلم التنافس *وحتى لا تكون أحلامنا أحلام زلوط *لن نحلم بالتتويج *ليس لعدم الثقة في أنفسنا *ولكن لثقتنا في المنطق والمعطيات *بالتأكيد لو قصدنا البطولة مستقبلا *وعملنا لها بمنهجية واستراتيجية *وبحب لكل المكون *بالتأكيد سنأتي بها منقادة تجرجر أذيالها *منتخبنا الحالي يكاد يكون أكتر منتخب وجد اهتماما واستقرارا فنيا *لذا يمكنه أن يؤدي بحرفية واحترافية تمسح الصورة المهزوزة للاعب السوداني الذي ينهار في دقائق معدودة وينهزم بمازيمبية وسداسية *ثقافة التركيز في البدايات والنهايات كنا نفتقدها *الآن نتمتع ببعضها *على كل *نتمنى التوفيق للمنتخب *ونوصيه بالأداء الجميل *ونوصي البعثة بالأخلاق التي تشرف السودان وتشبه الثورة *ونوصي جمهور الرياضة السوداني *بالوقوف من جوه قلبو مع المنتخب *بصرف النظر عن التشكيلة فيها منو *والجاب القون منو *القصة سودان *ولما تكون القصة سودان *ببقى العلم عنوان *ولما يبقى العلم عنوان *لازم تذوب كل الألوان *ليبقى علم الوطن عاليا خفاقا مشرقا مشرفا بين رايات الأوطان *المهم *مجلس حازم حديث العهد *بصرف النظر عن كونه المجلس الرست عليهو الرصة أو المهدد بقرار من كاس *هو المجلس الفعلي الآن *لسه أعضاؤه ما قعدوا على كراسيهم كويس *اندلعت نيران النقد الإعلامي *ونيران النقد الهلامي بالميديا *وأضحت الشائعات تطل بوجهها القبيح بين الفينة وأختها *تطارد الاستقرار *وتضايق الأعضاء وتضغطهم *حتى صرح حازم بعدم قدرته على العمل تحت الضغط *لماذا يحدث كل ذلك؟ *يحدث ذلك في المريخ فقط *لأن المريخ اعتاد أن يتدخل في شأن مجلسه مشجعون *بالتأكيد يهابهم الإداري الغير واثق من نفسه *ويحتويهم ظاهرا *ولكن في الحقيقه هم الذين يحتووه *معظمهم أصحاب مصالح شخصية *لا يملكون فكرا يقدموه للنادي ولا خبرات ولا مال *برغم كل ذلك يسيطرون على المشهد *ويزعجون الهدوء *ويجهجهون الاستقرار *يقومون بكل ذلك *لأن الإداري الهش لا يستطيع حسمهم *ولكم أن تتخيلوا *أن من أشد أنصار الوالي مؤخرا *كانوا يرسلون الرسائل المشينة للوالي من شرائح غير مسجلة *ولكن ذكاء جمال وفطنته أشارا عليه بالذي حولهم إليه *أيها الناس *جيوش المرتزقة لا تقاتل بغبينة ولا لقضية ولا استنادا على مبدأ *ولكنها تقاتل لمال *لذا ممكن تلقى المرتزق الليلة شايت كده وبكره شايت كده *القصة دي دايره عودة بالتفصيل وبدون تضليل *خلاص فترنا *المهم *هيثم مصطفي سيدا *زول موهوب شديد *ولكنه احتاج لسبعطاشر سنة حتى اتأهل من ثانوية الهلال لجامعة المريخ *هلالابي داير يموت لمن هيثم دخل الجامعة *لاقيتو بعد توقيع برهان وحمدوك *قال لي حمدوك زي هيثم مصطفى *الهلالاب معتصمين وطالعين الكشافات دايرين يقعوا منها وانتحروا عشان خاطر هيثم *هيثم طلع ووقع للمريخ *حمدوك عمل زي هيثم *قلت ليهو غلط حمدوك شنو؟ *قال لي توقيعو مع العسكر *قلت ليهو قول ما وقع الحاكمية لمنو؟ *قال لي للوثيقة الدستورية *قلت ليهو وأطراف التوقيع على الوثيقة الدستورية منو و منو؟ *قال لي العسكر *قلت ليهو العسكر ومنو؟ *قال لي العسكر والحرية والتغيير *قلت ليهو لو التوقيع مع العسكر هو الإشكالية *هيثم مصطفى في البلد دي كتاااااااار *خالتي حرية وتغيير *أمس الكهربا قطعت *قالت لي خلاس حمدوك جانا لي قطع الكهربا ؟؟؟؟ *قلت ليها الله يستر على البنزين والجاز والدقيق والغاز *البلد دي توقع يقولوا توقيعك غلط والسيستم يرفضك *ما توقع وتلعب يشتكوا فيك وتيمك يخسر التلات نقاط *أيها الناس *إن تنصروا الله ينصركم *والينا المكلف لينا *يا حليلك يا أخينا سلك كهربا ننساك كيف والكلب قال لو داير الأمان في البلد دي على شيك ما توقع يا مان وإلى لقاء