محمد عبد الماجد في انتظار خبر سعيد . مرات بتكون قاعد منتظر ليك حاجة سمحة تحصل. . أي حاجة. . انت ما عارف ماذا سوف يحدث؟ . ماذا سوف يحدث في الساعات القادمة؟ . لكن مع ذلك بتكون قاعد منتظر ليك خبر سعيد. . أي خبر. . المهمة حاجة تطلعك من حالتك دي. . في احساس بكون حايم في الزول بهذا الشعور. . احساس بتاع ترقب. . عندنا زمان (كديسة) كان بنكب ليها لبن الساعة خمسة. . الكديسة وقت تجي الساعة خمسة وما تكب ليها اللبن بتقعد (تترقب) فيك لمن تتعقد. . وانت براك تقول الحاصل شنو؟ . شفتوا ترقب (الكديسة) دي كان بالنسبة لينا اصعب من الزول العاوز منك قروش. . والكدايس في الترقب خطيرات. . عشان كدا قلت ليك مرات الزول بكون قاعد مترقب ليه خبر سعيد. . عندك احساس بهذا الشيء. . لو طلعت الشارع …بتقوم تتلفت. . يمكن زول يوقفك ويقول ليك خبر سعيد. . تتهيأ زول يثبتك. . في نص الشارع يقول ليك خبر سعيد. . الاخبار السعيدة ذاتها بقى فيها ندرة كبيرة. . أنا زمن ما سمعت بي خبر بتاع (سماية). . خمس سنين ما سمعت بي خبر عرس. . ما عارف الحاصل شنو؟ . الاخبار التى اسمعها كلها اخبار موت. . فلان مات. . وفلان عمل حادث. . وفلان في العناية المركزة. . نشرات الاخبار كلها كورونا. . بصدروا لينا الاحباط. . الواحد يمكن سنة ما يسمع ليه خبر حلو. . تعاين للتلفون. . تقول يضرب. . ويقولوا ليك خبر حلو. . أي خبر. . بس حاجة تطلعك من هذا الجو. . الاخبار السعيدة بقينا نفتش ليها فتيش. . نفسنا اتقفلت من الاخبار الحزينة. . العجب لو كمان دخلت الفيس. . او شفت الواتس. . كل الاخبار حزينة. . موت. . وحريق. . ومرض. . وتلفون اتسرق. . اصلو ما في زول بقول ليه حاجة حلوة. . طبعا انا ما بحب الزول البكون قاعد في أي قرب وبحكي ليك عن تلفونو الاتسرق. . ناس مواقع التواصل الاجتماعي ديل الاخبار الحلوة بموتوا بيها. . بنشروا فقط الاخبار الما حلوة. . الحاجات البتسد النفس. . عشان كدا مرات بتشعر انو في كآبة عامة كدا بتعيش فيها البلاد. . تقوم من الصباح تلقى الموية قاطعة. . وقت الموية كمان تكون ما قاطعة ..ما بتلقى (المعجون). . شوفوا انا من اقوم الصباح وما القى (المعجون) بعرف ليك طوالي الليلة اليوم دا ملخبط. . مرات كمان الموضوع بكون معكوس. . ترجع البيت بدري. . تلقى الكهربة قاطعة. . بتشعر احيانا ان الدنيا دي شغالة عكس. . بتكاجر فيك. . أي زول مرات بكون عندو هذا الشعور. . رغم ان الدنيا ما جايبة ليك خبر. . ولا بتقصد ليها زول. . لكن وقت تتقفل عليك من جميع الاتجاهات بتشعر بذلك. . تبقى زول حزين. . وما عارف تعمل شنو.؟ . من خلال التجربة – انصحكم بهذه الاشياء. . وقت تكون حزين ما تأكل (قراصة). . وما تمشوا على (العدس). . اوعكم. . اخطر حاجة الحزن مع العدس. . والقراصة تقيلة على الحزن. . شوفوا احسن حاجة مع الحزن (الجبنة). . عشان تبقى مر فوق مر. . والليالي تمر. . يا الله زيدنا عمر. . الليلة تعالوا نترقب لينا خبر مفرح. . خبر سعيد. . ان شاءالله المنتخب الوطني يعمل حاجة. . عاوزين نفرح. . بقينا نفتش للفرح في أي حاجة. . في الكورة بقينا ما بنلقاه. . الليلة عاوزين نشوف (الغربال) في بطولة الامم الافريقية. . يجري. . ويمر. . ويجيب ليه قون. . مهاجم يعتبر ضمن اكثر 11 لاعب في العالم سجلوا في العام الماضي. . ان شاءالله الغربال يبدأ الليلة التسجيل في عام 2022م. . الغربال منتظرو مشوار طويل. . عاوزين الغربال يسجل اليوم. . ويسجل في نيجيريا. . ويسجل في مصر. . الغربال على مستوى الاندية سوف يلعب امام الاهلي المصري وصن دوانز والمريخ (مرتين) في مرحلة المجموعات. . يعني السنة دي طويلة للغربال. . ربنا يوفق الغربال. . ويبعد عنه الاصابات. . الليلة عاوزين نشوف عبدالرؤوف في نهائيات الامم. . عبدالرؤوف اتظلم مع المنتخب. . والليلة الظروف خدمته ولعب نهائيات. . الليلة اتوقعوا جمعة قلق لاعب الهلال والامل عطبرة سابق. . شوفوا (قلق) جديد في كرة القدم. . عاوزين نشوف الجزولي نوح مع الغربال. . وعشان تفكيركم ما يمشي بعيد. . عاوزين نشوف محمد الرشيد. . وضياء الدين. . وصلاح نمر. . كلهم – الليلة ولادنا. . ان شاءالله المنتخب يحقق نتيجة جيدة. . ان شاءالله نسمع خبر سعيد. . طبعا بتمنى الليلة اشوف الشيخ محمد. . شيخو في نهائيات الامم. . مع اني شايف ان الشغيل وامير كمال وارنق وياسر مزمل ورمضان عجب اتظلموا. . الناس ديل تعبوا ووصلوا المنتخب الى النهائيات. . وقت الموضوع بقى على النهائيات. . ظهرت اسماء جديدة. . على العموم الكورة كدا. . والدنيا كدا. . مرات بتزرع حاجة يحصدها غيرك. . الدنيا كدا. . يجب ان لا تتوقف الحياة. . كلنا ماشيين. . أي زول يخت ليه طوبة ويمشي. . ان شاءالله البناء يكتمل. . المهم نبني. . المهم نعمل حاجة. . نعمل اضافة. . ونضيع طوبة. . ازرعوا بس. . الحصاد ما شرط يكون لينا. . ممكن يجي غيرنا ويحصد. . ازرعوا بس. . طبعا امس وقت شفت مباريات الامم الافريقية وقارنتها بنهائيات بطولة العرب التى لعبت في الدوحة وجدت ان الفرق كبير. . افريقيا لسه بعيدة. . الملاعب ليس في احسن حالة. . والفنادق تعبانة. . والامن ذاتو فيه مشكلة. . حتى تصوير المباريات ليس بصورة جيدة. . انا ما عارف (الفار) شغال كيف؟ . بطولة العرب في قطر كانت على اعلى مستوى (تنظيمي). . حتى على مستوى (الفنيات) فقد كان هناك مستوى رفيع في البطولة. . اتمتعنا حقيقة ببطولة العرب. . وان شاءالله نتمتع فيما تبقى من مباريات في بطولة الامم الافريقية. . السودان يمكن يظهر. . ويمكن يقدم شيء. . وهذا شيء لوحده يكفي لأن نجعلنا نحس بطعم مختلف للبطولة. . بطولة العرب خسر فيها المنتخب السوداني بعدد كبير من الاهداف. . بطولة افريقيا يمكن ان يخرج السودان بنتائج افضل. . المستوى العربي افضل من المستوى الافريقي. . مع اننا سوف نلعب مع مصر وهى مدججة بنجوم الاحتراف الخارجي. . المنتخبات الافريقية (السمراء) يمكن ان نحقق امامها نتائج جيدة. . المشكلة في المنتخبات العربية. . أي منتخب افريقي (اسمر) المنتخب السوداني قادر على ان يحقق امامه نتيجة جيدة. . حتى لو كان هذا المنتخب هو المنتخب السنغالي. . على العموم نشوف السودان اليوم امام غينيا بيساو. . وان شاءالله الغربال يسجل. . وقلق يتألق. . وبوجا وعبدالرؤوف وصلاح نمر. . عاوزين نشوف الشيخ. . ونسمع خبر سعيد. . قولوا يا رب. . ………………. متاريس . نقوم نشوف المباراة. . بكتب ومباراة غانا والمغرب شغالة. . وما عارف الحاصل عليها شنو؟ . عشان كدا بكتب وانا مستعجل شديد. . الشوط الاول في المنتصف. . وما عارف النتيجة. . على العموم الليلة نشوف منتخبنا. . ونقعد ليه من بدري. . عسى ولعل نطلع لينا بي خبر سعيد. . … . ترس اخير : النتيجة كم؟
