محمد_عبدالماجد ديك العدة رغم اعتراضي على هذا اللقب (ديك العدة) الذي اعتقد ان اول من اطلقه على محمد سيد احمد الجاكومي هو الزميل الصحفي محمد كامل سعيد ، إلّا اننا اذا نظرنا الى حقائق الاشياء فان ما يفعله الجاكومي الآن هو عين ما يمكن ان يفعله (ديك العدة). . اعتقد ان (ديك العدة) ذاته لا يمكن ان يفعل ذلك. . وكل الذي يضر بنفسه ويحطم من حوله هو (ديك عدة)... والجاكومي يفعل ذلك في المريخ. . اجبرنا الجاكومي على هذا اللقب الذي يبدو منطبقا عليه. . نفس الملامح والشبه. . لم يتضرر الهلال من الجاكومي في شيء .. ولا في استطاعة الجاكومي ان يهز (شعرة) في الهلال. . ألعب بعيد. . انت عاوز تتكسب باسم الهلال. . هذه هي بضاعتكم ردت عليكم. . جعل كيدهم في (تسريباتهم). . زول قاعد في السهلة .. أي كلمة يقولها بتطلع برة. . زول ما قادر يضبط نفسو .. عاوز يضبط غيره. . اقول ان من فضائل الله على الهلال ان جعل الجاكومي (مريخابي) ومن عظائم تلك النعم والفضائل ان جعل الجاكومي في مجلس المريخ .. نتمنى في ظل وجود هذا الرجل في مجلس المريخ ان تحكم المحكمة الرياضية لصالح مجلس حازم وتؤكد شرعية المجلس. . دا هدية من الله. . عرفت ليه جمال الوالي ما كان بجيب الجاكومي في مجالس اداراته المختلفة للمريخ؟ . وجود الجاكومي في مجلس المريخ هو اعظم ما يمكن ان تقدمه الايام والأقدار للهلال. . الزول دا جبتوه لينا من وين يا نصرالدين الفاضلابي؟ . اذا نظرت الى الجاكومي لوحده سوف تجد ان الفرق فعلا كبيرا بين الهلال والمريخ. . لا توجد مقارنة اصلا. . الجاكومي (كتر خيرو) او كتر (تسيرباته) ظهر في تسريب صوتي جديد يؤكد فيه ان المريخ مسيطر على الاتحاد وان لجان الاتحاد كلها (مريخاب) وان السيطرة سوف تكون على مدى 4 سنوات للمريخ على الاتحاد العام. . طيب نحن ما عارفين. . ليه وقت نقول ليكم كدا بتنكروا هذا الكلام (حطب).. وانتوا بتعترفوا بذلك في التسريبات. . شغل الكيزان واضح ... يظهروا خلف ما يبطنون. . ما لا يمكن ان يفعله (ديك العدة) هو ان الجاكومي قال في ذلك التسريب انه لا يريد ان يتكلم اكثر من ذلك لأن احاديثه يمكن ان يتم تسريبها .. يعني في حاجات تانية لم يتحدث عنها الجاكومي. . انت وقت عارف كدا وقاعد في السهلة .. بتتكلم مالك. . قاعد في الصقيعة. . لموا فضائحكم دي عليكم. . نحن نقول للجاكومي اذا كان الهلال قادر على كشفك وتسريب تصريحاتك بهذه الصورة وانت بتتكلم في السر والخفاء ، يبقى لا خوف على الهلال حتى وان كانت لجان الاتحاد العام تضم ابوجريشة وابوسوط والجنيد ومزمل ابوالقاسم. . بما ان الهلال يملك هذه القدرة على كشفك وانت تعمل في السر ... يبقى لا خوف على الهلال في العلن .. وهذه مناسبة لأقول للهلالاب .. لا تخشوا على الهلال من شيء ... الهلال محمي بالقوانين وقادر على ان يكسب حقه بصورة شرعية. . لم يتضرر الهلال من اتحاد كما تضرر من الاتحاد السابق الذي كان محسوب على الهلال. . اتحاد شداد كان سببا في ان يفقد الهلال قضية (كاس) بسبب تعامل شداد مع القضية لنفقد بطولة الممتاز بطريقة (مسلوبة) وهي بطولة فاز بها المريخ بعد التواطؤ الشهير بين المريخ ومريخ الفاشر في هشام جنية. . مريخ الفاشر هبط. . والنيل شندي هبط. . والنيل الحصاحيصا هبط. . وكل من يلعب تحت التربيزة سوف تدور عليه الدوائر. . الاتحاد الماضي حجز اموال غرامة الفيفا للهلال حتى تم خصم 6 نقاط من الهلال. . فقدنا ثلاث بطولات للممتاز في ولاية اتحاد شداد ... وذلك لأن الهلال لم يدخل في جدل قانوني مع الدكتور كمال شداد. . الاتحاد السابق تلاعب في عقود لاعبي المريخ وحرم الهلال من حقه في التعاقد مع ثلاثي المريخ. . تلاعبوا في البيانات. . الآن الهلال مستعد في أي لحظة ان يصل (المحكمة الرياضية) ويمكن ان يطيح بهذا الاتحاد في لحظة عبر الجمعية العمومية كما فعل مع نفس الاتحاد في دورته السابقة. . لسه ملفات الفساد مفتوحة!! . انتوا فاكرين (الكيزان) بعملوا ليكم حماية. . حق الهلال ما في زول بقدر يقرب عليه .. والجاكومي هو الآن يقدم خدمة جليلة للهلال – الزول دا خميرة عكننة .. اهل المريخ غير متفقين عليه .. بل اعضاء مجلسه نفسهم منشقين حوله. . الجاكومي وضع المريخ في وضعية (الصراع الدائم) وهذا امر يجعل المريخ يفقد التركيز ويعيش في صراعات وخلافات دائمة. . الجاكومي لم يكتف بان ادخل المريخ وحده في (ورطة).. الزول دا حتى الاهلي المصري ادخله في ورطة. . ناس الاهلي ما عرفوا يعملوا شنو؟ . الجاكومي كشف لينا المريخ. . وكشف لينا الاهلي المصري. . وهو يكشف لينا الآن الاتحاد السوداني. . الزول دا (البلاوي) دي عملها في الحرية والتغيير وعملها في الجبهة الثورية وعملها في كيان الشمال. . ديك العدة في أي عدة. . في أي حتة. . جبتوها لي روحكم براكم. . اتمنى فقط ان لا يشغل الهلال نفسه بهذه (الذبذبات) التى لا قيمة لها والتى تصدر فعلا من (ديك العدة). . الهلال بمجلسه وجمهوره وإعلامه قادر على ان يحافظ على حقوقه .. وما في زول بقدر يظلم الهلال. . الهلال اشتكى الاتحاد الافريقي نفسه ..ووصل الى المحكمة الرياضية بعد ان تم حرمان الهلال من جماهيره في البطولة الافريقية .. بقى يعني على الاتحاد السوداني. . ناس متعصب عبدالسلام ومعتز الشاعر ومحمد حلفا .. اهون على الهلال من خيط العنكبوت. . ديل تمامة (العدة). . ديل قاعدين ساكت. . تلمهم (زلابية) وتفرقهم (لقيمات). . هلال الحركة الوطنية اذا كان يمكن ان يهزه امثال هؤلاء يبقى لا داع ان نشجعه او ننتمى اليه. . القوانين واللوائح هي التى تحرس الهلال ... الهلال ما عاوز حاجة من زول. . بس يا ريت تكتبوا عنكم وتشهدوا ان الاتحاد الحالي ولجانه كلها تتكون من المريخاب. . بعدين ما تنكروا هذا الكلام. . الهلال قادر على ان ينتصر على كل هذه التكتلات. . المريخ الآن يعيش في حالة من الخلافات والصراعات لا مثيل ليها : ( تفيد متابعات سبورتاق، أن الخلافات بالمريخ تمددت بشكل كبير عقب القرارات التي أصدرها مجلس الإدارة في اجتماعه أمس الأول. وبحسب ما تحصل عليه "سبورتاق"، فإن قرار حل القطاع الرياضي والإكتفاء بالثنائي "النفطي وأشانتي" في دائرة الكرة أدى لردود أفعال عنيفة وتذمر وغضب مجموعة من أعضاء القطاع الرياضي ودائرة الكرة وهو ما دفع رئيس النادي "حازم مصطفى" لإصدار توضيح أمس نفى من خلاله حل القطاع الرياضي وأكد أن المقصود بالحل هي دائرة الكرة مشيرا لاستمرارية اعضاءها في العمل لحين التشاور بين رئيس النادي ونائب الرئيس للشئون الرياضية والمدير الفني. وبحسب مصادر "سبورتاق"، تمسك مجموعة من أعضاء المجلس بقيادة نائب الرئيس "محمد سيدأحمد الجكومي" بقرار حل القطاع الرياضي الذي يترأسه الكابتن "عادل أبو جريشة" وهو ما رفضه الأخير معتبرا اياه غير قانوني وبلا قيمة لأنه منتخب في منصب "نائب الرئيس للشئون الرياضية" وبالتالي فإنه المسئول الأول وصاحب القرار فيما يلي القطاع الرياضي. وسيطر الارتباك على المشهد في مجلس المريخ خلال الساعات الماضية في ظل اتساع رقعة الخلافات وإصرار كل مجموعة على تمرير وفرض قراراتها). . دا واقع حاصل عديل في المريخ وليس (تسريبات). . دا حال المريخ مع (ديك العدة). . نحن عاوزين اكتر من كدا شنو؟ . ..... متاريس . مع برهان ح نشوف العجب مع المنتخب. . كفاية ما شفناه من البرهان في السودان. . برهان فرحان بالتعادل مع جنوب السودان. . والله دي البرهان ما بعملها. . نحن ما عارف نلقاها من ياتو برهان؟ . الجاكومي عاوز الهلال يدفع ليه 500 الف دولار. . والجاكومي عاوز المريخ يلعب في استاد الهلال. . يا جماعة دي (ديك العدة) بعملها؟ . لو الهلال ما اجاز نظامو الاساسي كان سوف يكون تحت رحمة ديوك العدة ديل. . الجاكومي دا هدية من الله للهلال. . متعصب عبدالسلام مشى رئيس بعثة المنتخب السوداني الى المغرب تحول الى (مشجع). . الزول دا قولوا ليه اتقل شوية .. انت ما مساعد مدرب ولا عامل المعدات. . تصريحاتكم العلنية اخطر من تسريباتكم. . ليكم يوم. . قعتوا وما سميتوا. . .... . ترس اخير : الجاكومي نقل (قذارات) السياسة الى الرياضة.
