محمد الطيب الأمين (الحبش) داخل الجوهرة على مسؤولية مكابي !! * أظرف حاجة .. المريخاب دايرين يتكلموا في (بلنتي) الهلال وما قادرين. * أمبارح قابلت لي مريخابي. * حاول يفتح معاي موضوع الحكم لكن حسيت بيهو خجلان. * والله صحي. * خجلان يقول لي الحكم بااااااع. * ما بقدر يقول لي كده وهو عارف حازم (المغترب) باع المريخ لمحمود الخطيب بالمحشي والكفتة. * بيعة سوق العتبة الشهيرة. * تلك البيعة التي أذاع بنودها الجاكومي وقد نصت علي: * الأهلي يغلب للمريخ الهلال رايح وجاي. * ويغلب ليهم صن داونز رايح وجاي. * ويديهم لاعبين إعارة. * ويأكلهم (محشي وكفتة). * ويفتح ليهم في مباراة واحدة. * حصل في حياتك قابلتك سذاجة زي دي؟ * حصل؟ * بس عشان تعرفوا الأهلي خطير ولما يبيعك ما بديك قروش. * الأهلي ببيعك بي بطنك. * المهم. * الحمدالله على نعمة الهلال. * ونعمة الهلال لم تكن في التأهل فحسب. * التأهل لا يعني شي. * هو المريخ إتأهل. * الموضوع عادي. * لكن الفرحة كانت في الجمهور. * في عودة الزخم والطرب للمقبرة. * المقبرة واسم الدلع الجوهرة. * داخل يا مفقود ويا كمان مفقود. * ما في خيارات. * ولا ما في هظار. * (الحبش) داخل الجوهرة على مسؤولية مكابي. * لامين ومكابي خلو ليك (أديس) في حتة و(أبابا) في حتة. * أجنحة بتعمل مصران عصبي. * سانت جورج فريق محترم. * من الدقيقة الأولى وضح إن سانت جورج عامل ألف حساب للهلال. * البشوف جمهور قدر جمهور الهلال ده لازم يعمل حسابو ولازم يخاف. * نحن ذاتنا خفنا. * حشود بشرية شجعت وكانت صاحبت أثر وتأثير. * دعمت وكانت في الموعد. * تحرك نجوم الهلال داخل المستطيل الأخضر بقوة تشجيع الجمهور. * كانوا خير زاد. * رسموا لوحة لم يشهدها تاريخ الهلال القريب. * سانت جورج في أغلب زمن المباراة كان مدافع بي عشرة لاعبين. * لو ما عملوا كده كان اخدوها سبعة. * لعبوا بتكتيك دفاعي محكم. * عارفين الهلال زي سيل الوادي المنحدر. * زي سد النهضة. * نار يا مولانا نار. * ونركب صافنات ونجيبة (حبشية) واصلو الزول بيموت والذكرى تفضل حية. * و.. و.. . * انت الجمال وانت الصفة.
