محمد عبد الماجد يا متعلمين يا بتوع اللوائح.. دي لائحة ولّا موش لائحة؟..!! الهزيمة الحقيقية للمريخ ليس في خسارته امام الرابطة في مدينة كوستي .. عادي ان يحدث ذلك في مباريات كورة القدم – كل الاندية تخسر .. والمريخ امامه الكثير ، الدوري في بداياته والمريخ لم يلعب في الدوري غير مباراتين. يعني ما في حاجة فاتت… خسارة المريخ الحقيقية في انهم لم يتقبلوا الهزيمة وذهبوا الى ما هو ابعد من ذلك وطالبوا كمان باعادة المباراة. يعيدوها ليه؟ الناس ديل الدوري عندهم زي مسلسل (رأفت الهجان) – قدر ما افتح التلفزيون بلقى المسلسل دا شغال (اعادة). اي مباراة خسرها المريخ في الولايات طالبوا باعادتها. بس كدا تتعاد. فعلوها مع الامل عطبرة عندما خسروا امامه في عطبرة بهدف دون رد. الاتحاد وقتها قام باعادة المباراة والامل انحسب من الدوري والهلال تضامن مع الامل والحكاية جاطت. هسع ناس المريخ عاوزين يعملوا نفس الشيء وطالبوا ب (اعادة) المباراة… ربما وجود معتصم جعفر واسامة عطا المنان في قيادة الاتحاد العام جعلهم يطمعوا في (الاعادة) ويعشموا فيها .. كما حدث امام الامل عطبرة في موسم سابق. المريخاب قالوا هنالك سقطة اخلاقية وقانونية من اتحاد الكورة ومن لجنة الحكام وهي تقوم بتعيين الحكم خالد يوسف حكما للمباراة وهو من ابناء كوستي. ومزمل قال السقطة الاخلاقية في اللافتات التى رفعت من قبل انصار حازم مصطفى (زرّاف الدموع) واعترضوا فيها وهاجموا سوداكال وابوجيبين. قول الكلام دا حصل؟ الرابطة ذنها شنو؟ دا سبب يعيد ليكم (المباراة)؟ الجماعة ديل السقطة الاخلاقية عندهم بهذا الفهم … السقطة الاخلاقية في الاعتراض على سوداكال وابوجيبين ام في التواطؤ مع الاهلي المصري والاتفاق على خروج الهلال من مرحلة المجموعات .. عندهم ما سقطة اخلاقية. السقطة الاخلاقية في تسريبات الجاكومي التى اعلن فيها عن اتفاق المريخ والاهلي المصري والتواطؤ ضد الهلال. السقطة الاخلاقية في كلام الجاكومي الذي اعترف فيه بسيطرة المريخاب لجان الاتحاد العام. بقت على اللافتات. السقطة الاخلاقية في الاتفاق مع مريخ الفاشر على مشاركة اللاعب هشام جنية (الموقوف) وتمرير معلومات الشكوى للمريخ (الاب) ليتقدم بشكوى في مشاركة اللاعب اذا كانت نتيجة انتصار مريخ الفاشر على المريخ غير مؤثرة ولا تمنحه بطاقة المشاركة في البطولة الكونفدرالية بعد الانتصار الذي حققه الاهلي شندي امام الاهلي مروى. طبعا المريخ الفاشر مرر (الشكوى) للمريخ بعد ان عرف نتيجة مباراة الاهلي شندي والاهلي مروي والتى كانت تلعب في نفس الوقت الذي تلعب فيه مباراة المريخين في الفاشر. الكلام دا عندهم ما (سقطة اخلاقية). عادي. وبقع على قلبهم زي العسل. صيانة استاد المريخ من قبل قوات الدعم السريع وتكفل حميدتي بنجيلة الملعب .. الموضوع دا ما سقطة اخلاقية .. وما فيه حاجة. القروش قروش الحكومة .. والدعم السريع دعم الحكومة. لكن احتساب ضربة جزاء ضد المريخ في كوستي .. عندهم (سقطة اخلاقية). اللافتات سقطة اخلاقية. مفهوم (السقطة الاخلاقية) عندهم غريب. ادارة مباراة في الدوري بواسطة حكم من نفس المنطقة التى يلعب لها (الحكم) امر طبيعي واللائحة نفسها ذكرت ذلك. مزمل ابوالقاسم بتاع (اللوائح) ما شاف تلك المادة حتى يطالب المريخ باعادة المباراة. ناس مزمل وقت اللائحة تبقى ليس على هواهم بخلوا اللائحة .. وبنسوا القانون نهائي وبقبلوا على (السقطة الاخلاقية). بقبلوا على (اللافتات). عاوزين النظام الاساسي للدوري الممتاز يكون (لافتات). اللائحة بتقول شنو؟ يا متعلمين يا بتوع اللوائح… اللائحة بتقول شنو؟ عاوزين الاتحاد يخلي اللائحة والمواد والقوانيين ويقبل على (السقطة الاخلاقية). الاتحاد مالو ومال لافتات حازم مصطفى؟ من ناحية (اخلاقية)… خلوه القانون… نص لاعبي المريخ من كوستي .. وتاريخ المريخ ارتبط بصورة كبيرة بلاعبين قادمين من كوستي مثل اللاعب حسن دحدوح .. واشهر اداري المريخ واقطابه من مدنية كوستي الكابتن عادل ابوجريشة الذي سبق ان لعب في المريخ. يعني النظرة الى الاشياء من هذا المنطلق تعتبر نظرة ضيقة .. وهي لا تفسد للعدالة قضية. نحن بنقول دائما ان للهلال والمريخ (جماهيرية) وشعبية في الولايات اكثر من جماهيرتهم في ام درمان .. واي مدينة في السودان يلعب فيها الهلال والمريخ ملعبها يعتبر ملعب لهما وجماهير تلك المدن هي جماهيرهما. بقت على (الحكام) يعني. اكتر اندية مستفيدة من الحكام في الدوري الممتاز .. هما اندية الهلال والمريخ .. عندهما امكانيات وعندهم اعلام ومال وجمهور .. يعني اي حكم بدير مباراة للهلال او المريخ بكون عامل حساب الف مرة للهلال والمريخ .. حتى وان كان الحكم كابتن الفريق الذي يلعب احد طرفي القمة .. في كوستي او في الجن الاحمر. الضغط على الحكام يجب ان تشكو منه الاندية الاخرى .. لأن جماهيرية واعلام وامكانيات الهلال والمريخ تشكل ضغطا على كل حكم .. وهذا امر تحظى به اندية القمة في العالم كله .. الموضوع ليس قاصرا على الهلال والمريخ وحدهما. مطالبة مجلس المريخ باعادة المباراة هي عودة الى الطرق والسبل الملتوية التى ظل يحقق بها المريخ بطولة الدوري الممتاز في السنوات الماضية. اعادة تاني. قاموا تاني جابوا سيرة الاعادة. بالمناسبة ناس الرابطة لو عادوها ليهم ما عندهم مشكلة .. عشان ناس الرابطة شايفين الفوز بهدف وحيد على المريخ نتيجة ظالمة لهم .. وكان يفترض ان يفوزوا بعدد اكبر من الاهداف. احسن للمريخ يقلب صفحة الرابطة .. ما عندهم فيها حاجة .. ويركزوا في القادم. عشان من هسع بنحذركم .. وبنقول ليكم مباراة المريخ امام الاهلي شندي ما عاوزين نسمع منكم بعدها مطالبة بالاعادة. مباراة المريخ والاهلي شندي لو عاوزين تجيبوا ليها (معاوية الجاك) حكم .. ناس الاهلي ما عندهم مانع. الاهلي جاهز. وشكلها كدا .. ناس المريخ ح يطالبوا باعادة المباراة بعد ان يخسروها ان شاءالله. لمن تبدأ تنقط .. تاني ما بتقيف. ونقطت في كوستي .. وتصب في ام درمان يوم الجمعة ان شاءالله. …………………… متاريس من وقت بدري .. مطلوب من الهلال ان يراجع جوازات لاعبيه .. واي جواز تاريخه قريب مفروض يحدث ليه تجديد من بدري. راجعوا جواز اللاعب الاجنبي .. واللاعب الوطني ايضا. الموضوع دا لو حصل اثناء المباريات الافريقية كان يمكن ان تدخل الهلال في ورطة. التسجيلات قربت. وطيفور في جنوب افريقيا. الزول دا عندو شنو في جنوب افريقيا؟ جنوب افريقيا فيها تسجيلات الآن؟ بنسأل بس. يمكن عاوز يقطع الزلط من جنوب افريقيا. يمكن. الصيني يجب ان يدخل في فترة اعداد منذ الآن حتى يكون مؤهل للمشاركة بعد التسجيلات. توقف نشاط اللاعب يؤثر على مستواه البدني والفني. احسن حاجة في الهلال انهم منحوا الغربال راحة اضافية. الغربال في حاجة للراحة. العناصر المرهقة في الهلال يجب ان تمنح راحة في هذه الايام. مع التأكيد على اهمية مباريات الدوري الممتاز. ما في مباراة ساهلة. الهلال يلعب الخميس على نجيل ملعبه امام الرابطة كوستي التى انتصرت على المريخ ثم يغادر بعد ذلك الى الشمال ليلعب امام الاهلي شندي في (بربر) ويلعب امام الاهلي مروي في (مروي). بربر ومروي نقاط الشمال .. سوف تضع الهلال في حتة تانية. الاهلي شندي يقدم افضل المستويات وهو في صدارة المنافسة رغم خسارة الفريق الاخيرة امام كوبر. الاهلي شندي سوف يكون في اختبار حقيقي امام المريخ يوم الجمعة القادمة في استاد الخرطوم. مباراة الهلال امام الرابطة … ان شاءالله يحكمها حكم كوستي الممتاز خالد يوسف. ما عندنا مشكلة. الترتيب والتنظيم لنهائي كأس السودان من قبل الهلال يجب ان يكون ترتيب خاص. الاحتفال بهذه البطولة في هذا التوقيت بعد الفوز بها ان شاءالله امر مهم وضروري. الاهلي الخرطوم خصم عنيد .. ويمتلك حظوظ كبيرة في الفوز باللقب. لهذا يجب ان يمنح الهلال النهائي اهتمام خاص. جمهور الهلال والاولتراس على وجه التحديد ننتظر منهم الكثير في نهائي كأس السودان. فريق الاهلي بالعناصر التى يمتلكها سوف يجعل للنهائي اثارة ومتعة كبيرة. نحن على موعد مع نهائي مثير. اتحاد الكورة ينتظر منه تنظيم ممتاز لنهائي كأس السودان البطولة الثانية في السودان. ان شاءالله سوف نشهد عودة لقب كأس السودان للهلال. ………. ترس اخير : في كوستي عملتوا كدا في عطبرة بتعملوا شنو؟
