محمد الطيب الأمين الكركدي الما عرفوا لي .!! * قبل مباراة الهلال أمام الشباب التنزاني رمت جماهير المريخ كل امالها على عاتق النجم کالالا. * قالوا كالالا في أي مباراة بيسجل هاترك. * وقالوا الهلال أقل حاجة بتغلب خمسة. * وجات مباراة الذهاب بدار السلام وانتهت بالتعادل الإيجابي. * قالوا ما مشكلة .. كالالا معظم أهدافه بسجلها خارج الأرض. * أحسنوا الظن. * العاجبني في المريخاب بيحسنوا الظن في الغريب بصورة كبيرة. * بثقوا في الغريب. * قالوا كالالا في أم درمان ح يسجل هاترك. * وجات مباراة أم درمان وكالالا هبش الكورة تلاتة مرات. * نفس ما قادر يتنفس. * لما المباراة إنتهت المريخاب قالوا (کالالا زادو موية). * أول أمبارح نفس المريخاب ديل قعدوا أمام التلفاز ومنتظرين أيمن باشري الغلبهم يغلب ليهم الهلال. * والله صحي. * قالوا باشري زي ما جاب فينا قون ح يجيب في الهلال. * نسوا إنو الهلال ما مريخ. * قعدوا يعاينوا ومنتظرين. * مكابي جاب الأول.. قالوا معناها باشري ح يعادل النتيجة. * مكابي جاب التاني .. قالوا هسه باشري بسجل الأول والثاني. * فكتور جاب التالت .. قالوا باشري زادو موية. * أي فريق يراهن عليه المريخ لهزيمة الهلال بيخسر. * الهلال قهر الرابطة التي قهرت المريخ. * وتابع الأزرق سلسلة انتصاراته الكبيرة. * المريخاب التابعوا مباراة الهلال دخلتهم خوفه بسبب الثلاثي اجاجون ومكابي وجارجو. * جارجو ماشاء الله تبارك الله جراح عديل. * جارجو ده بخليك تشتهي مباراة القمة تكون اليوم قبل الغد. * المهم. * ستتوجه القافلة الزرقاء الى بربر لمواجهة الأهلي الخميس القادم إن شاء الله. * طلعة ولائية جديدة ينشد من خلالها الهلال متابعة الانتصارات والعروض القوية إن شاء الله. * مباراة الأهلي ستشهد عودة قائد الفريق محمد عبد الرحمن. * كما يتوقع عودة نجم الدفاع الطيب عبد الرازق. * مباراة الرابطة اثبتت إن أطهر الطاهر يحتاج أن يراجع حساباته. * هذا ليس أطهر الذي نعرف. * وكذلك بوغبا. * وعيد مقدم. * والشعلة. * كل هذه الأسماء تحتاج ان تجلس مع النفس قبل فوات الأوان. * نسأل الله التوفيق للهلال في مشواره القادم كما نسأله السلامة لجميع اللاعبين إن شاء الله. * و.. و.. * کرکدي وما عرفت لي.