محمد الطيب الأمين الجاكومي (مريخابي على الشاكوش) وليس السكين !! * زمان قبل الواتساب لما تجيك رسالة نصية طويلة في التلفون ما بتصلك كلها. * بقول ليك (جزء من النص مفقود). * أنت بتكون زعلان على (الجزء المفقود) حتى وإن كان (الجزء غير المفقود) شافي وكافي. * لكن شمار كده بتكون زعلان على (الجزء المفقود). * وبما أن ذلك كذلك فإن فيديو إقتحام الجاكومي لإستاد المريخ (جزء من النص مفقود) . * زي أفلام الهنود. * والله صحي. * جابو لينا لما كان بتكلم بالتلفون. * ولابس بدلة. * وسمعنا (جدادة الخلا). * قال جدادة الخلا الطردت جداد البيت. * لحدي هنا كنا ماشين كويس. * وتابعنا فتح الباب. * والشاكوس. * ولحدي ما جا وقف قدام الزول المنعو من الدخول. * بعد ذلك تم قطع الفديو. * ليه؟ * الله أعلم. * ما شفنا أي حاجة. * ولا فهمنا الحصل بعد داك شنو. * الشمار الناقص مشكلة. * الشمار الناقص بخرب حلة الملاح. * عموماً .. الجاكومي يفعل الكثير بالمريخ الآن. * كده سؤال . * هو الجاكومي جا الإستاد لشنو؟ * عندو شنو في الإستاد؟ * جا يشوف النجيلة ولا جا يشيل عينة من النجيلة؟ * وليه تم منعه؟ * الراجل مريخابي (على الشاكوش). * الزول بقول ليك (أنا هلالابي على السكين). * لكن (مريخابي على الشاكوش) دي أول مرة نسمع بيها. * أنا صراحة متعاطف مع الجاكومي. * الراجل ما قصر. * جاب ليهم الدعم السريع عشان يعيد ليهم تأهيل الإستاد. * تأهيل ملعب إستاد ثورة الإنقاذ. * ليه تتم محاربة الجاكومي. * النجيلة دي لو خليتوها لأبو جيبين عشر سنين ما بتطلع. * محاربة المريخاب للجاكومي فيها عدم تقدير. * عموماً اتوقف هنا وسأكمل باقي قصة الجاكومي على قناتي باليوتيوب قناة (دقايق). * و. . و.. * المرة دي شاكوش والمرة الجاية مفتاح عجل.