محمد عبد الماجد هيبة المريخ كانت وين لمن كسرت (الطبلة)؟..!! شوفوا عليكم الله (المحنة) التى نحن فيها دي. يوم فوز الاجنتين وحصول ميسي على لقب بطولة كأس العالم التى (هرم) ميسي من اجلها كثيرا نكتب عن (الجاكومي). دي زي عقوبة بالسجن والجلد والغرامة. ح اكتب عن الجاكومي .. ميسي نخليه لي بكرة .. عشان فوز ميسي بلقب كأس العالم عاوز ليه كلام تاني. اول مرة اشوف عثمان حسين في كأس العالم. شفت (قصتنا) وسمعت (شجن) ولقيت (عشرة الايام) في نهائي كأس العالم امس. عشان ما الخبط ليكم (السمع) .. ح اكتب عن ميسي بكرة ان شاءالله. الليلة خلوا لي الجاكومي. عشان نشوف الزول داع عاوز يصل بينا وين؟ في الدنيا دي ممكن تلاقيك حاجات اغرب من عجائب الدنيا السبعة. لو سمعت الجاكومي او شفت تصرفاته .. ممكن عجائب الدنيا تصل الى (21). او 120. الزول دا زي (القطر). ولا بديل للسكة حديد إلّا السكة حديد .. زمان كانت دي (حكمتنا) المفضلة. ما عارف علاقة القطر بالجاكومي شنو؟ المهم. ما تسألوني كتير .. استنتجوا براكم. طلعوا (الشبه). شوفوا الزول دا بقول في شنو؟ وبعدين تعالوا نتكلم. قال نائب رئيس نادي المريخ السابق محمد سيد احمد (الزول الكسر الطبلة) : ان هيبة المريخ ضاعت بسبب "ابو جيبين". هيبة المريخ دي بتذكرني بالزول القلب السمكة وهو معزوم على رأي الفنان كمال ترباس. الجاكومي بقلب السمكة وبعد ما يقلبها بتصور معاها سيلفي. يا ريت لو بقت على (قلبة) السمكة وبس. الشاكوشي اقصد الجاكومي قال : إذا كنا نرغب في استاد الهلال "زمان كان لعبنا بدون ان ندفع هللة واحدة"!! بالمناسبة الجاكومي دا من الليلة اسمو الشاكوشي. جاء في تفاصيل الخبر الذي نشر في المواقع امس : (علق نائب رئيس نادي المريخ السابق "محمد سيد أحمد الجكومي" على قرار الأحمر باللعب في استاد الهلال، معتبراً رئيس لجنة التسيير الحالي "أيمن مبارك أبو جيبين"، أضاع هيبة المريخ، وقال:" ابو جيبين" رضخ لشروط الهلال واضاع هيبة المريخ، لو كنا نريد اللعب في استاد الهلال" زمان كان لعبنا من دون أن ندفع هللة واحدة"، ولكن كرامة المريخ بالنسبة إلينا فوق كل شيء). تلعب وين يا بتاع (عنوة واقتدارا). انت فاكر استاد الهلال دا زي استاد المريخ .. (طبلة) وتكسرها وتدخل. كلام دا في الهلال ما عندنا. هيبة المريخ كانت وين يا الجاكومي وقت شلت ليك (شاكوش) وكسرت (طبلة) استاد المريخ؟ .. واتهجمت على الاستاد وقلت ليهم : (جدادة الخلا طردت جدادة البيت). نسيت (الجداد)؟ وين كانت الهيبة وقت عملتها كلها (جداد). الموضوع جاب ليه (جداد).. والشاكوشي بتحدث عن هيبة المريخ. طيب تعال. ح نتجاوز موضوع (الطبلة). ونعمل فيها ما شفنا أي (شاكوش) ولا سمعنا أي كلمة. ح ننسى موضوع (الجداد) دا. وين كانت هيبة المريخ ؟.. عندما اتفق المريخ مع الاهلي المصري … وحدث (تواطؤ) رسمي بين الناديين من اجل ابعاد الهلال حسب كلام الجاكومي نفسه. الشاكوشي قال كدا. وقت الاهلي مسح بكرامة المريخ الارض .. ما كان عندكم مشكلة. الاهلي ضحك عليهم. والشاكوشي بتكلم عن الهيبة. وين كانت هيبة المريخ عندما دفع الاهلي المصري للمريخ حق الاقامة وحق الترحيل وحق الملعب .. وحق الكهرباء .. وحق الشاي والقهوة والكشري.. وحافز الانتصار. عندما حدث ذلك كان الجاكومي هو نائب رئيس المريخ .. وكان جزء من الاتفاق. ابوجيبين .. جعل المريخ يلعب في استاد الهلال باحترام .. وبعد ان سدد الرسوم. يعني الموضوع ما كان تحت التربيزة .. ولا فيه (بدلات) فندق …ونثريات تنقل. ولا عنوة واقتدارا. كنتوا وين يا الجاكومي؟ وقت الاهلي المصري وعدكم بإعارة لاعب او اثنين الى صفوف المريخ .. ولم يعر ليكم (طبلة). هيبة المريخ هل سوف تتأثر لأن المريخ سوف يلعب في بلده؟ .. وبين جمهوره .. ام ان هيبته كانت سوف تضيع عندما يلعب مع الزمالك في تونس ومع الترجي في مصر. الهلال والمريخ كانوا فريق واحد. ابوالعائلة اعظم رؤساء المريخ كان يلعب في الهلال. والدكتور مزمل ابوالقاسم بدأ في صحيفة الهلال. وانت بنفسك قلت ناس الهلال وقفوا معاي اكتر من ناس المريخ. هسع الموضوع بقى ليك صعب .. عشان جاء من ابوجيبين. انت (الهيبة) بتعرف ليها شنو؟ بعت الحرية والتغيير .. ووقع منكم (تواطؤ) على الحكومة المدنية مع مناوي وجبريل واردول .. وعاوز تتكلم لينا في الرياضة عن (الهيبة). وين هيبة المريخ وقت شلت ليك (مسدس) واقتحمت استاد المريخ بقوة عسكرية؟ وين كانت هيبة المريخ عندما ذهبت الى حميدتي واتفقت مع الدعم السريع عشان تجيبوا ليكم نجيلة من تركية. الهلال ام الدعم السريع؟ اوعك تقول كلام زي دا تاني. لو عندكم (هيبة) رجعوا للدعم السريع (نجيلتهم). ما تتكلم كلام اكبر منك. استاد المريخ ليه اكثر من عامين مقفول. جاء سوداكال ما عمل شيء. جاء حازم مصطفى ما عمل شيء. جاء ابوجيبين .. ما عمل شيء. جبتوا اوكتاي. الدعم السريع. ما في حاجة حصلت. لعبتوا في مصر .. اتفقتوا مع الاهلي. ورجعتوا تاني للهلال. عارف ليه يا الجاكومي. عشان الهلال والمريخ في النهاية حاجة واحدة. نحن ممكن تحصل لينا ظروف ونلعب في استاد المريخ .. زي ما حصل قبل كدا. وممكن المريخ يلعب في استاد الهلال. عادي الموضوع دا. ما بيناتنا. اصلا لو ما الجاكومي وزراف الدموع حازم مصطفى .. الموضوع ما كان وصل لهذه المرحلة. الموسم الماضي كان يمكن ان يلعب المريخ في استاد الهلال .. مثلما حدث في الموسم قبل الماضي. لكن عشان الجاكومي وحازم ساطوا أي حاجة .. الهلال رفض للمريخ. هسع ابوجيبين .. اتكلم كويس .. واحترم الهلال .. وبقى ما في مشكلة. اهلا بالمريخ في الهلال. اصلو ما في مشكلة. انت يا الجاكومي شوف (جدادك) وين؟ وخليك عارف لا يمكن ان تكون رئيس للمريخ او رئيس مناوب او حتى عضو ساكت عن طريق كسر الطبلة. المريخ اكبر من كدا. وهيبة المريخ لو كنت فعلا خايف عليها .. كان خفت عليها من اتفاقكم مع الاهلي المصري .. وليس الهلال. يعني انت عاوز تقنعنا يا الشاكوشي .. ان (التواطؤ) مع الاهلي ما فيه شيء .. ولكن اللعب في استاد الهلال هو المشكلة بالنسبة ليكم. ……………… متاريس عليكم الله هسع الناس يقولوا عننا شنو؟ في يوم زي دا فاز فيه ميسي .. وبنكتب عن الشاكوشي. لكن بنرجع ليه ميسي. نهائي كان فيه كل العبر والدروس. نهائي كان منصف. وعادل. كأس العالم وانتهى. ننتظر التدفق الجماهيري الكبير على مباريات الهلال. بكرة الهلال يلعب في استاد الخرطوم امام الاهلي الخرطوم. ابقوا كتار. وما تتأخروا على الهلال. اتمنى أي محترف يدخل لكشوفات الهلال في التسجيلات القادمة يكون محترف جاهز. يلعب طوالي. ما عاوزين ننتظر. ما تقولوا لينا انتظروا التجانس وانتظروه يتأقلم. نحن ما عندنا وقت للكلام دا. نقوم نشوف احتفالات الارجنتين. عصام الشوالي قال اللون (الازرق) هو المسيطر على لقب كأس العالم … وهو اللون الغالب. عقبال للهلال. وخطوة عديلة. ……….. ترس اخير : بكرة ما تتأخروا عليكم الله.
