محمد الطيب الأمين خربوا طبعنا بقينا ننوم بمحترف ونصحى بمجنس !! * فرحة المريخاب بإنتهاء التسجيلات كانت أكبر من فرحتهم بتسجيلاتهم. * فرحوا إنو التسجيلات إنتهت. * عشان يرتاحوا من أجانب الهلال. * ونحن زعلنا إنو التسجيلات إنتهت. * شهيتنا كانت فاتحة. * كل يوم محترف جديد. * ننوم بمحترف ونصحى بمجنس. * إتمنينا التسجيلات ما تنتهي. * عزة جد. * زمان المريخ بشوف الهلال فاوض لاعب محلي طوالي المريخ بمشي يفاوض نفس اللاعب. * أي لاعب الهلال يمشي عليهو هم تاني يوم بمشوا. * الآن الهلال نقل تسجيلاته للخارج. * أجانب بس. * شغل خارجي. * الهلال السنة دي عمل شغل في التسجيلات (عالي المستوى). * شغل عالي جداً. * شغل ما بقدر عليهو أي زول. * شغل حرفاء وشفاتة. * تشكيلة من المحترفين الأجانب. * دي في تاريخ الرياضة السودانية ما حصلت. * عملها الهلال الآن. * ومن غير الهلال فوق .. فوق في العالي؟ * نحن ريادة. * وسيادة. * بعد خمس سنوات المريخ ممكن يستفيد من تجربة الهلال دي. * إستفيدوا من التجربة دي عشان كلنا مع بعض نكسر الصفر الدولي. * الهلال صفر دولي والمريخ صفر دولي. * المريخ حقق كأس (دورة سلام مانديلا) 89 وتم إعتمادها لاحقاً من قبل الكاف تقديراً لدور المناضل مانديلا وتشجيعاً للسلام الأفريقي. * الهلال حقق كأس بن ياس وتم إعتماده لاحقاً من قبل الإتحاد العربي تشجيعاً للوحدة العربية. * يعني الهلال والمريخ صفر دولي. * كأس الكؤوس هو لقب لاسم دورة سلام مانديلا. * الصفر واحد يا حبايب. * المهم. * يُشكر مجلس الهلال على هذا العمل الكبير الذي تم في التسجيلات. * صراحة شغل كبير. * بخلاف الصرف المالي كان هنالك حُسن تصرف كبير من مجلس الإدارة في إدارة هذا الملف. * التجنيس لم يكن سهلاً. * تدبير الأمور والحِنكة. * شغل شفاتة. * في الأول خفنا وقلنا المجلس الشغلانية غلبتو. * لكن الحمدلله في نهاية المطاف عملوا شغل محترم. * ما قصروا تب. * أنجزوا ملف التسجيلات على أفضل نحو ممكن. * وهي التسجيلات الأفضل في تاريخ الهلال حتى الآن. * بعد ده الكرة في ملعب اللاعبين. * والتوفيق من الله. * ونحن علينا بالصبر ثم الصبر. * نتكاتف ونبطل تخوين وتنظير. * خلونا نكون محضر خير. * حتى لو في قصور وسلبيات نستفيد منها ونعالجها في التسجيلات القادمة. * ما في كلام بتقال غير شكراً مجلس الهلال. * شكراً العليقي. * شكراً فلوران. * شكراً لكن من ساهم في هذه التسجيلات. * و.. و.. * ومنايا ليك ما وقف وإتمنيت أنا … توفيق ونجاح للهلال العظيم يارب.
