محمد الطيب الأمين سرقوا البنك والبرادو والتوسان لكن غلبهم النيل والهلال !! * دائماً تجدني ضعيف أمام مقولة سيدنا خالد بن الوليد عندما تقدم به العمر وإشتعل الشيب في رأسه أَمسك بالمصحف الشريف وبكى ثم قال : (شغلني عنك الجهاد في سبيل الله) . * سيدنا خالد بن الوليد الذي أنفق كل حياته جهاداً في سبيل الله حتى لم يبق في جسمه شبر إلا وفيه طعنة رمح أو ضربة سيف. * يبكي لأن (الجهاد في سبيل الله) قد شغله عن (كتاب الله) . * أين نحن؟ * نحن .. لا في جهاد شغلنا عن المصحف ولا المصحف شغلنا عن الجهاد . * شغلتنا الدنيا . * نسأل الله السلامة والتوبة. * مسك المصحف وبكى ثم قال : (شغلنا عنك الجهاد في سبيل الله) . * وبما أن ذلك كذلك. * ورغم ضعف المقارنة يجوز لي التشبيه . * بالأمس عندما فاز الهلال ثم تأهل (قبضني قلبي) فقلت سراً : (شغلنا عنك الوطن) . * لم يشغلنا عن الهلال إلا السودان. * نصف عام لم أكتب عن الهلال ، لم (أتونس ونسة هلال) ، بل حتى قناتي على اليوتيوب قفلتها بالشمع الأزرق. * ولكنها ستعود خلال أيام. أرتب الآن لإعادة إنطلاق بث قناة (دقايق) على اليوتيوب خلال الأيام القليلة القادمة إن شاء الله. * نبكي الآن ونقول : لم يشغلنا عنك إلا السودان. * في حياتي ما في حاجة شغلتني عن الهلال. * الدراسة لم تشغلني عن الهلال. * الأسرة لم تشغلني عن الهلال. * المرض لم يشغلني عن الهلال. * الأحزان لم تشغلني عن الهلال. * طبعاً ما بقول (الشغل لم يشغلني عن الهلال) لأنو أنا شغلتي في الدنيا دي (هلال). * الحاجة الوحيدة الشغلتنا عن الهلال هي السودان. * سودان الهلال. * دخلونا في حرب كتلت فينا (الحُب الطاهر). * شالوا كل حاجة سمحة في بلدنا. * سرقوا العربات والتلاجات والمكيفات والذهب والقروش والأخلاق والأمسيات والدافوري . * بل سرقوا حتى (الونسة) و(الضحك المعافى). * سرقوا الطمأنينة والثقة. * خلوا السودان (بيت عزاء كبير). * المرحوم (وطن). * الجنازة (بلد). * الحاجة الوحيدة الما قدروا يسرقوها هي الهلال. * الهلال زي (النيل) ما بتسرق. * يوم تسرقوا (النيلين) من أرض السودان ح تسرقوا الهلال. * بالأمس تأهل الهلال منتصراً في زمن الإنكسار والإنهزام والخسائر الكبيرة. * فوز الهلال بالأمس هو أشبه بالمطرة التي تصب في نهار رمضان. * (مطرة رمضان) لها طعم مختلف. * أدخل الهلال الفرحة في قلوبنا التي أضناها الحزن. * إدخرنا الهلال فرح للأيام السوداء فكان (بسمة في وش الزمان الشين). * يفعل الهلال الآن ما تفعله القوات المسلحة تماماً. * يتقدم الجيش ويتقدم الغربال وياسر وأبو عاقلة وصلاح عادل. * نفرح الآن ليس لأن تأهل الهلال إنجاز بل نفرح لأن الهلال فعل ذلك في وقت تجدنا فيه نخسر حتى أمام الإبتسامة . * تقول تبتسم تتذكر ما فعله التمرد تخسر أمام إبتسامتك 6/صفر. * وإنطبق علينا قول الحبيب التجاني حاج موسى (أشوف بس طرفك النعسان تخوني القوة والشدة). * نتذكر بس ما فعله التمرد تخونا القوة والبسمة. * يجي الهلال (يشيل الجراح والإبتسامة وكل حرمان اليتامى). * إنه كبير البلد الهلال العظيم. * نشكر لنجوم الهلال هذه (الرجاله). * نشكر لهم هذا التقدير والحب. * نشكر لهم هذه المعنويات. * كل نجوم الهلال بدون فرز. * ويتمد الشكر لكل الأحباب في منظومة العمل بنادي الهلال بداية من السوباط واعضاء مجلسه وعلى رأسهم العليقي وكذلك نشكر منظومة العمل الفني بقيادة فلوران وعبد المهيمن الأمين والشكر والتهنئة لكل من رافق البعثة ولكل هلالي في كل مكان في الدنيا. * ده الهلال بسمة في وش الزمان الشين. * ده الهلال كاريزما وكبرياء. * وطن داخل وطن. * و.. و… * ونركب صافنات ونجيبة (سودانية) واصلو الزول بيموت والذكرى تفضل حية.
