ما نقر به اننا لا نفهم فيما تفكر فيه الحكومة وهكذا ربتنا حكوماتنا المتعاقبة ولسنا استثناءا عن دول الجوار العربي والافريقي من حولنا بخصوص محدودية سقف تفكير المواطن العادي وفهمه و مقتنعين جدا إننا (مش حا نفهم اكتر من الحكومة) ولكن يا جماعة الشعب ده ما (ميطي) للدرجة دي (فااا) برضو بيفهم كويس ان البلد تمر بوضع استثنائي ..... ويعلم ان رئيس الدولة بحكم المنصب هو القائد الاعلى للقوات المسلحة و قوات الشرطة و كافة الاجهزة الامنية الاخرى مش كده وبس .... دى ممكن تلقاهو عضو مجلس ادارة الشركة الفلانية والعلانية تشريفا وعندو كرسي اليونيسيف او له عضوية شرفية لمنظمة (بمبر ستات الشاهي) ده كلو وارد في عالمنا المنحوس ده وما عندنا معاهو مشكلة لكن الحاجة الما فاهما خااالس .... الشرطة دي داسنها لمتين؟ تحرس القبور يعني ؟ بيضايروا فيها كده عاوزين (يخللوها) يعني؟ ياخ اااي فاهمين انها قوات ليس قتالية وانها قوات تامين وكده طيب في مناطق واسواق ومواصلات شغالة زي الساعة طلعوهم ياخ ! يعني بتاعين الامجادات ارجل منهم؟ اعتقد ان اي خطة في العالم سيكون لها بديل و مراجعة وتنقيح وتعديل او هكذا يجب ان تكون فيا ..... سيدنا مدير عام الشرطة الجديد و وزير الداخلية الكلف بنص قرار مجلس الوزراء (الزمااان داك) الناس ديل عاوزهم (يربعنو) ؟ وهو الفضل شنو عشان يحرسوه ليك تاني ؟ بعد هذه الهمجية المستفحلة اعتقد جازما .... يمكن للشرطة ان تؤدي دورا مشهودا بما لديها من خبرات و كفاءات وتدريب وتسليح وحس استخباراتي عال و بإمكانها ان تكون رسالة تطمين للمواطن وصوت ردع وقهر للمجرمين والمتفلتين من الحرامية . و اعتقد ان ..... قرار نزولها تأخر كثيرا فياااا سيدي رايكم يهم صانع القرار امنيا وهو ما سيرجح كفة اي اجتماع سيناقش هذه الازمة فهلا تقدمتم الركب ...؟ فبدلا ما كنتم تطمحون ان تعمل الشرطة وسط (زيرو)٪ جنجاويد فدعوها تعمل وسط (10٪) جنجا وقحاطة الناقصهم شنو؟ ياخ معقول ياخ .... ناس الخدار شغالين وستات الشاي شغالات والشرطة لسه !
