شرك حزنك بصد قمحان إذا كتل الدباس ليلك... ولا يهمك... يروغولك عطاشى الناس.. يجي مدفق جفاف سيلك... تخدر بك بكار الطين.. على نية سماح نيلك... ها..شد حيلك... شد حيلك..تدفق روحك التريانة ريدة وحن.. بعادك ما براك واجعك... طحن روحنا وجلدنا طحن... خبارو النيل بتاور إيدي.. بشوفك في ترايا محن... سماحة البن ندقو طرابى.. بزعل كان سحنا سحن.. وأنا استعجلت .... حسيتك.... مرقت لساني للأحزان.. فرح في عروقي دسيتك... بدل ما أجس وريد الشوق... شنو الخلاني جسيتك مرقتك من فراغ روحك...على كيف نبضي عسيتك ... لساني الانربط بي الخوف.. وقلبي الانصدم بالحسرة ... شالو الليل عليك أفراح ..لقوك عند الصباح في مسرى كوفارة الحنين والشوق لقت جيتك يقين الكسرة... داخلاك ساكنة..أرفع رأسي شقيش ما أجيك منكسرة... وجع الروح هداك مكروب على طرف الحواس مارق.. كانت مرقة الأحزان ب تحتاج لي فرح خارق... سند خارق.. ولد خارق.. وطن شقيش يموت الضو..يجيك متل النهار شارق... جبر ...لي كسري... شهقة عافية من نص حسري... جبدة قافية في حسابات عمر فارق... ريدتك كااافية خشيت في وتيني حييت بعد ما امتا مرقت قافية.. وسدتك جليد إحساسي ..غنى وريدي..ريدتك دافية همبت الوجع والدمعة ...حمرة عين ولو عوس مافيا... جيتك وافية... مرقة شوكة من ضفر المشاعر جوة... جيتك قوة... جيتك خوسة لي مغدور ضهر في عوة... جيتك قدرة للحلق الولا قادر يكورك سيدو يا أبو مروة... شقيش ما تحوتق روحي للموت القى شوفتك عافية... لي شن هسي شايل هم... معاك أنا والفرح زافينا فوق كم الوجع فوق كم... نشف عرق الحنين في جوفي تلب فيني نبضك دم... حطب هسي الدموع نكرني.. وكنا أشقي وأولاد عم... ها قول لي الوجع فوق كم... قبلك يا بهي الطلة كان عندي الضحك بالسرقة حالف حزني بي إيمانو حامي سنوني من المرقة والنار كلما تلاقيني بتهب من أذاي منحرقة واسع كونو ماشي وجايي .. شايل هم سنين الفرقة ؟؟ ظنك يعني ماهاميني...؟؟ أنا الوالفت بيك الفرحة زح من الدمع ود عيني؟؟ أنا واجعني بعدك مني...هارد كبدتي وماذيني.. لكن طالما في قلبي ..بِرجاك بي شهية حنيني.. ما أديتك كلام معسول...عشان ما أضاري منك شيني.. أديتك رضاي...وأماني... والثقة يا الحبيب ويقيني... سافر...وبينا حبل الذكرى ممدود... والسهر توم عيني.. ما تخليني.. ياسيد ريدي...
