إصرار غريب من الطاهر يونس علي أن يظل مادة دسمة للسخرية والتندر في المجالس الرياضية ، ( وشهوة) رهيبة للسلطة أظهرها الثنائي الطاهر يونس وكاروري في الفترة الماضية ، أقول ليكم حاجة نخلي الكتابة بالفصحى لوقتها ، ونكتب بالبلدي الفصيح. وخلونا من الفوضى واستغلال النفوذ السياسي ، وخلونا من فشل الحزب الحاكم في سحب كوادره من الوسط الرياضي بعد أن أصبحوا بسبب ضعف إمكانياتهم وقدراتهم الإدارية خصماً عليه ، خلونا من ده كله وتعالوا نضحك ونستمتع بالعرض الكوميدي القدموا الطاهر يونس على مسرح أمس واليوم والأيام على مسرح الرياضة المليان بالعروض الرياضية هذه الأيام ، حسب الإعلانات المالية الشوارع والكبارى. بالمناسبة كان في تبشير ليهو كم يوم بقرار (سعيد) سيعيد الفرحة لجماهير الهلال الحزينة ، طبعاً زي تباشير كتيرة ، شغالة ليها فترة باقتراب موعد الفرح الكبير والمضحك في الموضوع بعد كل وعد جديد (بيت البكا) بكبر لحدي ما الصيوان بقي مالي المدينة مش الحلة. وظهر القرار امبارح وكان ( نكتة) ، نقول يا الطاهر يونس (بين) بتاع التحكيمية راجل بتاع حكومة وما بعرف يفرق بين القرار الاداري والقرار الفني إنت الإداري السابق ما عارف؟ دي فضيحة يا الطاهر يا أخوي ، يعني اسه انت فرحان ومالي الإذاعة والتلفزيون والجرائد بشنو؟ وتاني ترجع تعمل صيوان ، الموضوع واضح ده في علم الكورة إسمه ألف باء إدارة. أول حاجة كيف مجلس شرعي وما من حقو يصدر قرارات للشطب والتسجيل ؟ خلينا من ( بين) بتاع التحكيمية ، وزي ما قلت ليك نقول هو ما عارف ، إنت رأيك شنو؟ لانه كده بكون زي السؤال بتاع الأول منو البيضة ولا الجدادة؟ بالمنطق يا أبو الطا يا شرعي يا ما شرعي .. دي واحدة. السؤال التاني إنت عارف اللاعب لاعب منو؟ نقول هيثم وعلاء الدين ، طبعاً حاتقول لي لاعبي الهلال وحسب كلام (بين) شطبهم غلط أو باطل ، لكن الما عارفو إنت انه هيثم وعلاء الدين لاعبي الاتحاد العام ما لاعبي الهلال ، أشرح ليك براحة ما تندهش والموضوع ما غلاط ، إنت ما عارف قول ما عارف ، لكن ما تعمل فيها عارف وإنت ما عارف . أقول لاعب الاتحاد كيف؟ اللاعب لما يسجل بمشي يسجل في الإتحاد ما بسجل في ناديهو ، ولما يتشطب بتشطب في الاتحاد ما بتشطب في ناديهو، ابسطها ليك أكتر موضوع هيثم الأخير ، مش الاتحاد شطبو وتاني وقف شطبو ، ومش إستلم قروشو من الإتحاد ، ومش شطبو تاني يبقى ببساطة يا سيد يا جيد مفروض تقول أو يقول ( بين) شطب الإتحاد لهيثم وعلاء خطأ لأنه الهلال بوصي بالشطب والاتحاد لو لقي أي مشكلة في عملية الشطب بوقفو. بعدين يا الطاهر معقولة حتى أجسام الحكومة ما عارفها هيكلتها ، إنت مفروض تعتزل العمل الرياضي طوالي ، تحكيمية ( بين) أو إستئنافات ( بين) ولائية يعني لو عندها سلطة بكون حدها إتحاد الخرطوم المحلي ، لأنو في تحكيمية إتحادية دي كانت مسؤولة عن الإتحاد العام هسه ذاتو ما عندها سلطة الاتحاد العام بعد قرارات (فيفا) الأخيرة وتغيير النظام الاساسي الأبعد كل الأجسام الحكومية ، طبعاً الكلام انت شايفو زي اللغة الصينية. سؤال؟ لو صدقنا وآمنا بالمهزلة دي، الاستئنافات او التحكيمية بتاعة (بين) حا تطبق قرارها ده كيف ؟ عندها سلطة على الاتحاد العام؟ ورينا آلية التنفيذ شنو؟ ما في طبعاً ، لا عندها سلطة ولا آلية تنفذ بيها قراراتها. أكسب زمنك يا الطاهر يا اخوي وانسى القصة ، الموضوع إنتهى. قلت لي (بين) قال ليك شنو؟
