لو خيّر البرنس بين (تاريخه) في الهلال (ومستقبله) في المريخ عليه ان يختار (التاريخ) كان (الرجل) ...الذي حدثتكم عنه بالامس ... بشيل (الراديو) حقو..ويطلع عنقريبه ..ووسادته ...وتربيزته ...و(جك) الموية ، ويطلع يقعد في الحوش...ليستمع لنشرة اخبار تلاتة فى (الضل) الذي اعتاد ان يجلس فيه بعد الظهيرة.
الضل الايامات دي طبعا بقى (رقراق) ساكت.
أي حاجة ..الزمن دا نقصت.
زمان ..كانوا بقولوا ليك نظرو ستة من ستة ...هسع الحكاية دي ذاتها نقصت ..بقوا يقولوا ليك نظرو تلاتة من تلاتة.
في زول هسع نظرو ستة من ستة ..وين دا؟...دا كان زمان.
مثال اخر.
في مطار الخرطوم ..بقولوا ليك الطائرة بتقوم الساعة اربعة ..تمشي تلقاها بتقوم الساعة سبعة.
أي حاجة فيها زيادة...حتى (المواعيد).
الرجل اعلاه ..كان يهمه شيء واحد في نشرة تلاتة ...يستمع لنشرة (الوفيّات)..ثم يلم (لحافه)...ويشيل عنقريبو ..ويدخل جوة.
بعد ان يقول : (الحمدلله ما في خبر كعب).
كدا بحس انه عمل العليه.
7 سنوات ...يفعل الرجل فعلته تلك ..يشيل الراديو ..ويطلع العنقريب والوسادة والتربيزة وجك الموية ويفتح اذاعة ام درمان ...يستمع لنشرة الوفيّات ..ثم يلملم حاجاته ..ويدخل جوة.
هذه هي العادة التى كان يقوم بها يوميا ...على مدى 7 سنوات...دون انقطاع او (عطب فني) طاريء.
تجرأت مرة ..وسألته ...لماذا يفعل ذلك الشيء يوميا ؟..ويصر على الاستماع لنشرة الوفيّات؟.
انت حاري ليك (متوفي)...عندكم قريبكم في (المطار) ...اقصد عندكم قريبكم في (الانعاش).
قال الرجل ...وهو يكسو ملامحه بغشاء الحكمة ...والوقار (متعمدا) ..كأنه يستعرض حكمته في طابور عرض : (الجماعة ديل انا في أي لحظة بتوقع منهم خبر وفاتي في نشرة تلاتة).
ممكن يعملوها في أي لحظة.
ديل ما بكتلوك ..ويمشوا في جنازتك بس ...ديل بكتلوك ..وبخلوك انت (شخصيا) تمشي في جنازتك.
ترفع فراشك براك ..وتشيل (الكشف).
كان الرجل قد انهيت خدمته المدنية بداعي (الصالح العام) ، قبل سبع سنوات...منذ ذلك اليوم اضحى الرجل ميت اكلينيكيا ..او (عمليا)..ينتظر فقط الخبر الرسمي لوفاته في النشرة ..ليرفع العزاء ..ويسدل الستار.
ويمشي يصرف حقوقه.
هذه قصة ...لا تخصكم ...ولا تعنيكم في شيء.
هل تعلم عزيزي القاريء ..(ودا كلام ما يطلع من العمود دا) ..ان دستة البرتقال بقوا يتموه ب (5) بصلات.
الزمن اتغيّر.
عجائب الدنيا ..هيثم بقى يلعب في المريخ.
يا هيثم ..نحن زمان لو قالوا لينا هيثم مشي كوكب (المريخ) ..بنشوفوا شوية عليك.
هسع تمشي لينا المريخ ..(الوصيف).
المريخ بتاعنا دا.
تعريجا على الخبر اعلاه ...عندنا دكتور في المستشفي ...اي زول يمشي ليه عيان ..بمسك الزول المرافق له ..وبقول ليه : (والله ما اغشك ..عمك دا حالتو حرجة).
عندنا واحد ..قلبو كعب ..من يمسكو ..بقول ليه : عليك الله (غشني)...غشني عديل كدا ..انا رضيان ..ما تقول لي عمك حالتو حرجة.
لو سقت ليك زول عندو (فكك) في اصبعو الكبير ..بقول ليك كدا : ( والله عمك دا حالتو حرجة).
حرجة ..انا جايبو ليك هنا ..عشان تطلع ليه (الرقم الوطني).
الغريبة ..الزول بجي المستشفي ماشي بي كرعينو ..وبطلع بي (نقالة).
عليك الله سيرة (النقالات) دي ما تجيبها لينا.
ما بحبها.
في (هولندا) سنة 1927..تحديدا في شهر (يونيو)...السبت يوم 19 ..بالظبط كدا الساعة سبعة ونص صباحا ...عندما كان قطار البخار يضرب (سعيا) في غابات هولندا الخضراء...كان رجل (مسن) بملامحه الهولندية (الخواجية) الدقيقة..عيون خضراء ..وشعر فضي..وقميص مزركش (تحرمني منك...حسب موضة الوقت داك) ..وخاتم فضي ..وعلاقة مفاتيح.. كان الرجل يغفو في (سنة) بسيطة...يصحو منها ..ثم يعود الي غفوته.
يلعن الحكومة الهولندية عندما يصحو...ثم يرجع ساكنا.
امام الرجل كانت شنطة حديد ..باسطة ذراعيها ...جواره ...كلما صحى ..اطمأن لوجودها بجواره.
ثم يلعن الحكومة الهولندية ..ثم ينام.
ذلك الهولندي البسيط ..كان اسمه جوزيف مايكل بيتر حاج احمد.
لا بتعرفوه ...ولا يخصكم في شيء ...شأنه شأن الرجل الاول...ولكن بالتأكيد بتسألو عن (حاج احمد) هذا ..جد الرجل الثالث.
ربما تهتموا لتفاصيله..ويشدكم خبره ...اذا عرفتم ان نغمة الهاتف (الجوال) لهذا الرجل الهولندي ...كانت اغنية محمد وردي (من غير ميعاد) التى كتبها الشاعر (التجاني سعيد) فوافقت الاغنية (نفسها) ...عندما تغني بها محمد وردي قبل ان يلتقي بشاعرها التجاني سعيد الذي كان وقتها طالبا في المرحلة الثانوية.
استمع التجاني سعيد ..لأول مرة لاغنيته بصوت محمد وردي ...وهى تبث في تلفزيون السودان..قبل المسلسل اليومي.
عندما صدح الفنان محمد وردي بهذه الاغنية لاول مرة ..التفت التجاني سعيد لبنت الجيران التى كانت تشاهد معهم المسلسل في بيت العائلة الكبير ...(وهى البنت التى كتب فيها الاغنية نفسها)...وقال لها : (الاغنية دي انا الكتبتها)...دون ان يقول لها ...انه كتبها فيها.
التجاني طبعا ما كان مصدق..هو في الثانوي العالي ..ويغني له محمد وردي (اسطورة) الغناء في السودان.
قال لنا التجاني سعيد ...بعد ان استمعت البنت للاغنية ..وشاهدت المسلسل ..طلبت مني هي ورفيقاتها ..ان يقدمهن ..(عشان بخافن).
وكان هذا اول طلب من المحبوبة ...التى كانت تترفع حتى على هذا الطلب...(كان طول عمرها بترجع براها بعد المسلسل)..إلا بعد ان سمعت هذه الاغنية طلبت (التقديمة)...لتكون هذه الخدمة هى اول خدمة تقدمها له اغنية (من غير ميعاد) في مشروعه العاطفي.
هذا شيء ..ربما هو ايضا لا يخصكم.
اعود الي الهولندي...واقول ...ان (الموبايل) سنة 1927 ...لم يكن موجودا وقتها...(اذن الرواية مشكوك في صحتها).
مفروض تعرفوا دا من حكاية (حاج احمد) دي ...التى قرنت باسمه.
وقميص (تحرمني منك) ذاتو كان موضة في التمانينات من القرن الماضي وليس في عام 1927م.
بل ان اغنية (من غير ميعاد) نفسها ..تغني بها محمد وردي لاول مرة سنة 1969م.
اذن المعلومة ..جملة (وموبايل) غير صحيحة.
انسوا موضوع (الهولندي) دا.
في الغراء صحيفة (الصدي) امس خبر في صدر الصحيفة يقول : ( نفي جمال الوالي رئيس المريخ ان يكون تدخل في قرار مجلس الادارة واقنعه بتسجيل الثنائي).
عشان بنصدقك!!.
الطريف في الخبر ...ان الصحيفة عرفت جمال الوالي بانه رئيس المريخ ..لا قالوا (المستقيل)...ولا قالوا (السابق).
براكم بتكشفوا نفسكم.
الشيء الاغرب من هذا ...ان الصحيفة بعد هذا الخبر الذي نشر في صدر صفحتها الاولي ..نشرت خبرا اخر.
عليكم الله الجماعة ديل جمال الوالي ...هو (مستقيل) بشكّل فيهم ..وبحركهم زي ما هو عاوز.
طيب لو كان جمال الوالي دا ما مستقيل ...كان عمل ليكم شنو؟.
زول (مستقيل)..يعمل فيكم كدا يا عصام الحاج.
الغريب ..نحن صدقنا ..وقلنا جمال الوالي خلاص ..المرة دي استقال بالجد.
البلد دي (الوالي) الوحيد البستقيل فيها وما بتراجع هو (الوالي) كرم الله عباس (والي) القضارف السابق.
غير كرم الله دا ..اي (والي) ..بستقيل وبسحب استقالتو.
او يمكن ان تكون استقالته (تمثيلية) ساكت.
جمال الوالي (استقال) عشان يتفرغ لموضوع هيثم مصطفى ، وعلاءالدين يوسف.
ونحن طبعا عندنا رئيس في نادي الهلال ..اسكت خليه.
بفك ليك (الخمسين) من اول جرة.
الكرت البتقفل عليه ...برمي ليك.
ما بتلفت.
خدمة خمسة نجوم.
انتوا عارفين التسجيلات دي لو استمرت اسبوع تاني..كان الامين البرير لحق ليك ناس المريخ مدثر كاريكا والمعز محجوب.
يا البرير ...في اخر اللعب ..(الدو) ما بفكو.
ويا ريت لو كان الموضوع على (الدو).
الموضوع اكبر من كدا.
الامين البرير فك (الجوكر).
عليكم الله في ازمة المواصلات ..وفي (البرد) دا ..بفكوا (الجوكر).
في زول بفك (الجوكر).
الامين البرير فك الجوكر.
نعود تفصيلا لبعض النقاط ..ونقول ان الذين يتحدثون عن تصدير الازمة للمريخ بسبب تسجيل البرنس وفييرا في المريخ ..يجافون الحقيقة وان كان قد بدأ لهم انشقاق او خلافات في المريخ الان.
خلونا نحسبها صاح.
هيثم مصطفى بخبرته ..وتمريراته قادر على ان يكسب القاعدة المريخية ...وهو يعرف ماذا يفعل؟.
لذا ..على الهلالاب ألا يعشموا في هذا الامر ..ويحسبوا هذا (التصدع) الذي ظهر في المريخ الان مكسبا لهم.
تحديدا البرير ومجموعته ما يحلموا بالموضوع دا.
الامين البرير ومجلسه ..والذي كان يتحدث عن شطب الثنائي بتقارير فنية ..صدر للمريخ (كنوز جديدة).
كنوز تتمثل في روح جديدة سوف يمنحها البرنس للمريخ....اضافة الي ان جماهير المريخ سوف تعود للمدرجات ..في ظل هذا الزخم الاعلامي والجماهيري الكبير الذي افرزه تسجيل البرنس في المريخ.
بل ان مجموعة كبيرة من جماهير الهلال سوف تزحف ..وتنزح لمشاهدة مباريات المريخ...لتحكم على الاقل على هيثم مصطفى في المريخ.
لو ان البرير ترك البرنس وفييرا في بيوتهم ..وهم في كشف الهلال لكان افضل من ان يقدمهم للمريخ على هذا النحو.
مكسب المريخ من هذه الصفقة لا يتمثل في الناحية الفنية فقط ..بل يتمثل ايضا في الدعم الجماهيري والاعلامي الذي سوف يحظى به المريخ بوجود البرنس وفييرا في المريخ.
الكورة الان كليا في ملعب المريخ.
للاسف الشديد ..يبدو ان ادارة المريخ ..قدرت هيثم مصطفى ..واحترمت تاريخه وموهبته وامكانياته الفنية ..اكثر من ادارة نادي الهلال.
تحدث امس عصام الحاج ازهري وداعة الله عن هيثم مصطفى بشيء من التفخيم والاحترام والتقدير.
بل ذهب عصام الحاج الي الايحاء ان هيثم مصطفى وبما يملكه من كارزيما وشخصية ..قادر على ان يستفيد منه المريخ يوما ما في مجالس الادارة ليكون رئيسا للمريخ كما كان ابوالعائلة الذي جاء من الهلال واصبح رئيسا للمريخ.
يعني نحن في الهلال ببساطة كدا ...بل بسذاجة نصدر (الرؤساء) للمريخ.
برانا نحن بنقوى المريخ ..ونمنحه افضل من نملك.
منحناهم ابوالعائلة لاعبا ..فاصبح افضل رئيس في تاريخ المريخ.
ومنحناهم من (منازلنا) جمال الوالي...فصار رئيسا للمريخ يتحكم فيه حتى وهو (مستقيل).
وها هو الامين البرير ...وهاشم ملاح يمنحان المريخ لاعبا ..كان يمكن ان يكون من افضل قيادات الهلال في المستقبل القريب.
ويمكن بالوضع الشايفو في المريخ دا ..يمكن ان يكون هيثم مصطفى رئيسا لنادي المريخ.
قبل كدا ..قلنا ليكم ...هيثم مصطفى دا ما بمشي المريخ إلا في مكانة جمال الوالي.
حتى لو كان لاعبا.
قعدتوا تغالطوا فينا.
جمال الوالي استقال ...وعبدالله حسن عيسي ..زعلان ..يعني (المنصب) خالي لهيثم مصطفى.
خاصة ان (جلباب) عصام الحاج فصّل على ان يكون الامين العام للمريخ ...ما اكتر من كدا.
نحن ننتقد مجلس الهلال ..ونعتبر الامين البرير سببا رئيسا في هذه الاحداث ..لكن هذا ..ايضا لا يمنعنا من انتقاد هيثم مصطفى ...فانتقاله للمريخ ..فيه تشويه كبير لتاريخه ..الذي لن يتمكن من تقديم ربعه في المريخ.
كان يجب ان يصبر هيثم وان يحتمل الاذي في سبيل هلاليته ...نختلف في هذا مع البرنس ..ونحسب ان هيثم مصطفى ذهب فقط من اجل كسب شخصي له.
ذهب دون ان يقدر تاريخه ..ويحترمه ..لأن اللعب في المريخ ينقص كثيرا من قدر هيثم مصطفى.
لقد تحدثنا وكتبنا كثيرا عن (شطب) هيثم مصطفى ..وانتقدنا مجلس ادارة نادي الهلال في هذا الامر ..واعتصمت بعض الجماهير لليوم العاشر في نادي الهلال على التوالي ...واضرب بعض اطفال الفشل الكلوي عن الطعام..وتوقفت صحيفة (حبيب البلد) في حربها الضروس مع مجلس ادارة نادي الهلال.
ولنا ان نتحدث الان ..مع التقدير لكل المبررات ..والدوافع ونقول ان هيثم مصطفى اخطأ عندما وقع في المريخ.
علاقة هيثم مصطفى مع الهلال كنا نظن انها اكبر من الكورة.
الهلال ..ليس الامين البرير.
كفى ان مجلس ادارة نادي الهلال يفقد شرعيته الان.
لقد ظلت جماهير الهلال على مدى (17) عاما ..تهتف للاعبها المفضل ...هيثم.
كانت تهتف له ..حتى وهو في المدرجات.
بل ظل هيثم مصطفى هو الهتاف الرسمي لجماهير الهلال في الموسم الماضي رغم عدم مشاركته في اغلب مباريات الهلال.
مع هذا ..احتفظ هيثم مصطفى عند جماهير الهلال بكل التقدير ..وظل هو نجم الهلال الاول ..وهو بعيد عن المشاركة.
استقال نصف مجلس ادارة نادي الهلال ..حتى فقد المجلس (شرعيته) ..تقديرا وانصافا لقائد الهلال هيثم مصطفى ، الذي جمد نشاطه.
لقد فعل الهلالاب كل الممكن والمستحيل في سبيل هيثم مصطفى ..الذي ذهب للمريخ من ان اجل ان يثبت انه قادر على العطاء.
وان كان ذلك حتى وهيثم مصطفى (مشطوب) ..كان كل الناس متفقة على قدرة هيثم مصطفى وامكانياته.
جماهير الهلال التى منحتك لقب (سيدا)..وعزتك بلقب (البرنس)..وفوضتك (سفيرا)..صعب عليها ان تراك بالزي الاحمر.
صعب ..ذلك حتى على هيثم مصطفى.
لقد حاول البرير ومجلسه ان يمحو تاريخ هيثم مصطفى ..لكنه فشل في ذلك ..وجاء الان هيثم مصطفى للاسف الشديد ليمسح تاريخه.
صعب ..صعب ..ان يلعب هيثم مصطفى في المريخ ..وهذا امر سوف يكتشفه هيثم بنفسه.
المريخ ليس الهلال.
في الهلال الاشياء واضحة ..والامور بينة ..عندما استهدف مجلس الهلال هيثم مصطفى ..وقفت كل الجماهير مع (سيدا).
كفى روعة ..ان جماهير الهلال وجدت لك العذر وانت تنتقل للمريخ ..وهذا شيء لا يمكن ان تمنحه جماهير الهلال للاعب اخر.
جماهير الهلال الان ..من تقديرها واحترامها لنجمها المنتقل للمريخ ...تمنت له النجاح في المريخ ...وهذا حدث في حد ذاته مدهش وغريب.
اتمنى ان يدرك هيثم مصطفى نفسه ..وان يخرج من هذه (العتمة) ..قبل ان يتورط في اللون الاحمر.
في زول يا جماعة بقرأ طب ...في كلية تنمية المجتمع.
اخرج من هذا (المطب) ...وابعد ...ان خيرت بين (تاريخك) في الهلال ..ومستقبلك في المريخ ..عليك ان تختار (تاريخك) يا هيثم.
تاريخ الهلال ..افضل من كل حاضر المريخ.
17 سنة ...بحلوها ..ومرها ..وجمهورها ...لن تجد منها (يوم) واحد في المريخ.
احسبها صاح.
انت الان استرديت ..كرامتك ..واثبت انك مطلوب في المريخ ...بل ان فرحة المريخاب بك كانت اكبر من فرحتهم يوم ان سجلوا الحضري ووارغو.
هذا في حد ذاته يثبت انك قيمة كبيرة ..وان امكانياتك التى شكك فيها مجلس الهلال والجهاز الفني ...امر خالي من الصحة.
الان عد ...كما كنت.
لقد فعلها (الدحيش)..يوم ان لعب في المريخ ..فوجد ان ذلك الامر بالنسبة له (مستحيل).
واظنه سوف يكون لك كذلك.
الهلال ليس الامين البرير وهاشم ملاح.
الهلال ليس غارزيتو.
الهلال ليس خالد بخيت وابوشامة.
الهلال اكبر من كدا.
ملحوظة : كلامكم بقى كتير يا مريخاب.
هوامش
خالد بخيت ..محتاج يشوف كيف استقبل محمد موسي مدير الكورة في المريخ اللاعب هيثم مصطفى؟.
فرق والله.
وبرضو يقولوا ليك ما في مشكلة.
دائرة الكورة في الهلال ...كانت اس المشكلة.
الناس لازم ..تشوف الخلل ..عشان الحاجات دي تاني ما تتكرر في المستقبل.
تاريخ هيثم مصطفى في الهلال ..تاريخ ..يجب ان يحترم ..لأنه جزء من الهلال.
الانجازات والبطولات التى تحققت في عهد هيثم مصطفى ...لم تتحق في عهد أي كابتن.
انتقال هيثم مصطفى للمريخ ..لا يعني الغاء تاريخه مع الهلال.
عمر سيدي بيه ...ظاهر عليه ..وصل في الساعات الاولى من الصباح ..تقول شغال في (اخبار اليوم).
قولوا لي عرفت دا كيف؟.
عرفت دا ..من (فانلة السقط) اللابسها هاشم ملاح.
شيء ضيّع كأس الكونفدرالية من الهلال غير (الفانلة) دي ...ما في.
معقولة ..يا هاشم ملاح ..انتوا فاكرين نفسكم في فيلم اجنبي.
بالمناسبة عمر سيدي بيه ..الذي وقع في كشوفات الهلال في الساعات الاولى من الصباح ..لاعب صاحب امكانيات كبيرة.
هذا اللاعب فعلا ..(ساحر).
الحمدلله ان اللاعب وصل ..ووقع في كشوفات الهلال ..(ابداء رغبة).
مترجم الهلال ...حزيفة في تسجيلات الهلال كلها (الزول الواقف ورا عمر سليمان).
انتوا حزيفة دا هو الامين العام للهلال ..يستقبل المحترفين في المطار ..ويسوق العربية .. ويجيبهم الاتحاد العام ..ويتابع التسجيلات.
الحاصل شنو؟.
الزول دا مترجم بس.
يمكن عشان كل اللاعبين الذين سجلهم الهلال يتحدثون اللغة الفرنسية.
الهلال بقى فرنسي عديل.
الهلال بتكلم فرنسي.
بعد كدا ..الدوري السوداني دا ذاتو مفروض ما نلعب فيه.
مفروض نمشي نلعب في الدوري الفرنسي.
نص تشكيلة الهلال من (السنغال).
والنص التاني من (مالي).
لكن على كل حال ...هذه التسجيلات تمت بتوصية المدرب.
نجي نشوف المدرب فهمو شنو؟.
لكن اقول ليكم حاجة.
انا خايف غارزيتو ..ما يرجع.
يا البرير الزول دا من هسع (تلفونو) ليه.
عصام الحاج ..وازهري وداعة الله في برنامج (ساعة رياضية)..اعتبرا ان تسجيل المريخ لهيثم مصطفى وعلاءالدين يوسف ليس كسرا لقيد اتفاقية الجنتلمان.
وهذا شيء غير صحيح.
لو ان البرنس وفييرا شطبا من الهلال بدون مشكلة ...كان يمكن ان نقبل من الامين العام لمجلس المريخ ذلك الامر.
كان على مجلس المريخ ان يحترم الاتفاقية ..طالما هيثم وعلاء خرجا بهذه الصورة من الهلال.
تقديرا لمجلس الهلال والاتفاقية ...كان يفترض ان يبعد المريخ من هيثم وفييرا.
هذا اذا كان هناك (اتفاقية).
لكن بصورة عامة ...اتفاقية الجنتلمان فيها تحجيم لطموح اللاعبين...وهى اتفاقية غير اخلاقية ..لأنها تعطل مبدأ اساسي في حركة التنقلات والاحتراف.
عندنا رأي سلبي في الاتفاقية ..لكن طالما كانت هذه الاتفاقية سارية ...كان يجب لمجلس المريخ احترامها.
مقولة ان الاتفاقية لا تشمل انتقال البرنس وفييرا للمريخ ...امر مضحك ..وفيه استخفاف بمجلس ادارة نادي الهلال.
لأن الاصل في الاتفاقية ...هو احترام النادي الاخر.
واحسب ان مجلس المريخ وجه صفعة قوية لمجلس الهلال.
الاخ الشاعر الهواري عبدالله ود جادين ..ارسل قصيدة عن هيثم مصطفى ..كما وصلتنا العديد من القصائد ...اتمنى ان اجد مساحة لنشرها.
الشارع الهلالي تجاوب من القضية ..وتفاعل معها بصورة حضارية.
خلونا نتعلم من تجاربنا.
وان شاءالله البرير يكون استفاد من التجربة.
يا معاوية الجاك ..وهيثم كابو ...والله انا ما كنت فاكركم (ممكونين) كدا.
انتوا طيب ..كنتوا بتشجعوا المريخ في شنو؟.
بالكم كلو مع هيثم مصطفى.
غايتو ضيعتو (العجب) ساكت.
الزول دا ادوه (سطر)...ما برضي منكم يا ود الجاك.
هيثم كابو ..السنة كلها شابكني محمود عبدالعزيز ..(الحوت 1)..الحوت 2 ..الحوت 3 ..الحوت 4 ..الحوت 5 ..الحوت 6...الحوت 7 ..وقت المريخ سجل هيثم مصطفى طلع ليه عدد خاص من صحيفة فنون ..ويوم الجمعة كان ..في اليوم الذي لا تصدر فيه (فنون).
يا كابو ..انت خليت ناس محمد الامين ..وعبدالكريم الكابلي.
زمان قلنا ليكم الزول دا فنان ..قعدتوا تغالطوا.
هسع كابو وود الجاك ..ما فاضل ليهم إلا يشتغلوا (كورس) وراء محمد النصري.
كل ما البرنس يجدع ليه (كورة) كدا ..ناس كابو ومعاوية الجاك ينططوا.
في نادي المريخ ..تحت الاسم مباشرة ..اكتبوا (سيدا).
هيثم مصطفى دا لو مشي المريخ بدون ما يكون ادوه (اسهم) ونسبة في المريخ ..يكون اتغشي.
الزول دا مفروض تكتبوا ليه 90% من المريخ.
باقي الاسهم ..خلوها للوالي وعصام الحاج وفيصل العجب وجيل مانديلا.
عصام الحضري ..حقو بشيلو (دولارات).
كابو بعد هيثم مصطفى مشي المريخ قالوا دخل ليه معهد موسيقي عشان يتعلم (التلحين).
اما معاوية الجاك فهو حتى كتابة هذه الاسطر ما مجمع.
معاوية دخل في حالة التشبع السريالي ..للخط المائي.
والله بعد كدا ..ناس بلة جابر مفروض يشوفوا ليهم بلد.
اوعي واحد فيكم يا بلة تاني يشوت ليه كورة في (الكشافات).
انتوا معاكم (سيدا).
كورة موسي الزومة دي يا هيثم مصطفى ..إلا تقعد ليها مع موسي الزومة شخصيا.
حاجة تانية.
عصام الحاج دا ..قرب يبقى (مدير فني).
الزول دا شكلو كدا بيضع (التشكيلة).
عصام الحاج بعد تسجيل البرنس ..بقى متعالي ..وعندو شعور كدا ..لا يطاق.
يا زول روق.
البرنس سجلو في المريخ (البرير)...ما عصام الحاج.
انتوا بتتكلموا كيف؟.
شكرا لجماهير الهلال التى تعاملت بوعي راقي مع هيثم مصطفى.
جماهير الهلال ..يوم بعد يوم ..بتثبت انها الاعلي ..والافهم.
في وجود هذه الجماهير ..يبقى لا خوف على الهلال.
حاجة اخيرة.
بلة جابر ..تاني كلوه يجي التمرين من الساعة 2.
عصام الحاج الذي تحدث عن لاعبي المريخ قبل 4 اسابيع بشيء من الاستخفاف وقلل قيمتهم ..وسخر منهم ..جاء وتحدث عن هيثم مصطفى بكل التقدير والاعجاب ..وقال يمكن ان يصبح البرنس في يوم من الايام رئيسا لنادي المريخ بالشخصية التى يملكها والكارزيما التى يتميز بها.
شفتوا الفرق.
وبرضو في ناس بغالطوا.
عاجل : يا عصام الحاج ..والله انت مفروض بعد كلامك في هيثم مصطفى امس في الشروق تمشي تنضم لفرقة (عقد الجلاد) طوالي..ناس متوكل ديل ما تشتغل معاهم.
