الإنتخابات على الأبواب .. وعلى الرغم من أن بعض (المسئولين) ح يكونوا برضو (مسئولين) لأنو ربنا كاتب ليهم فى اللوح المحفوظ إنو يكونوا (من أصحاب المناصب المزمنة) ، إلا أن بعض الوجوه الجديدة سوف تعتلى بلاشك كرسى المسئولية , فنحن نعيش في دولة قاربت أعداد المناصب (العليا) فيها أن تكون بعدد السكان! وغنى عن القول أن هنالك (نقلة دراماتيكية) سوف تعيشها (أسر) المسئولين الجدد الذين سوف يتسنمون (الكرسى) لأول مرة ، ولعل أكثر من تؤثر عليه هذه النقلة هى زوجة المسئول إذ (فجأتن) تجد أنها قد أصبحت زوجة (رجل مهم) تحظى على مكانة مرموقة في المجتمع ! عندما كنت فى زيارة قبل سنوات لجمهورية (الأمازون) مراقباً للإنتخابات التى أجريت فيها ممثلاً لإحدى منظمات المجتمع المدنى ، لفت نظرى أن أحد المعاهد التدريبية المتخصصة يقوم بعقد دورة لإعداد (نساء المرشحين) الجدد الذين لم يسبق لهم تولى مناصب (مهمة) ، وتهدف هذه الدورة إلى تقديم الإرشادات الهامة لهن وإعدادهن نفسياً وسلوكياً بإعتبارهن سوف ينتقلن من كونهن (ربات بيوت) إلى (سيدات مجتمع) . وهذه بعض الإرشادات والنصائح التى إشتملت عليها تلك الدورة ولعلكم تلاحظون أعزائى القراء أوجه التشابه بين مجتمعنا ومجتمع (الأمازون) والذى يصل حد التطابق .. فإلى تلك الإرشادات والنصائح! - من الآن إعتبرى نفسك زوجة (رجل ذو منصب مهم) وتعاملى على هذا الأساس فبلادنا والحمدلله تتمتع بوفرة فى المناصب المسئولة فإذا (جلا) زوجك من (رئيس) فعندو فرصة بتاعت (وزير) واذا الحظ ما حالفو وكده ممكن يكون (والى) ولو ما لقى والى إحتمال يكون (نائب والى) أو حتى معتمد ولو (جلا) من ديل كووولهم ممكن يدخل (البرلمان) ويكون نائم أقصد نائب !! المهم إنتى يا سيدتى العزيزة جهزى روحك فالسيد (بعلك الهمام) ح يكون زول مسئول مهم ! ، من الآن تصرفى بإعتبارك زوجة مسئول عشان لمن القصة دى تحصل وتبقى المسألة جد ما تكون مفاجأة بالنسبة ليكى وتقدرى تتصرفى! - إنتبهى لحقيقة هامة جداً وهى أن المناصب فى بلادنا (يا تدوم) والزول ما يفارقا إلا لمن يفارق الدنيا ، يا (ما تدوم) والزول يشيلوهو قبل ما يقلع (البدلة) المشى حلف بيها القسم، عشان كده أول ما (زوجك العزيز) يمسك المنصب حاولى تنفيذ (خططك) والإسراع فيها فالدنيا ما مضمونة وكده! -لا تفكري فى ما سوف يكون عليه المرتب الجديد لزوجك ، فالمرتبات عموما (تعبانة) وما بتعمل حاجة (يعنى المسئولين العملو عمارات ديل) كانو قاعدين يوفروا من مرتباتهم؟ ما ده كووولو (إستثمار وظيفى) ، عشان كده خليكى (خاته عينك) على إستثمار الوظيفة ، أصلو البلد ما شغالة بى مسألة إقرارات الذمة ، ومن أين - أول ما زوجك (يمسك) بادري إلى إنشاء وتسجيل (شركة) تكون قريبة من مجال عمله ، يعنى لو كان طبيب فشركة (أدوية) أو (معدات طبية) وإذا مهندس (شركة إنشاءات) أو (طرق) ولو (خفتى) من ثرثرة الصحافة والقال والقيل و(الشمارات) والكلام الكتير فيمكنك أن تسجليها باسم صديقة موثوق بها أو باسم أمك أو أخوك .. أختك أو أبوك واحرصي على ضمان حقوقك كاملة لأنو فى حالة مغادرة زوجك (للكرسى) ممكن الناس ديل يعملو ليكى (مجانين) وينوموا بيها وحقك أقصد (حق الشعب) الرايح ده يروح تااانى! - افتحي (الموبايل بتاعك) وأشطبى كل الأسماء التي لا داعي لها ، أول حاجة أشطبى (حليمة الحنانة) لأنك يا أستاذه تانى إنتى ح تخلى (حنة البيت) وح تتحننى فى البيوتى سنترز (مراكز التجميل)،وكمان ما تنسى تشطبى معاكى (علوية الدلالية) لأنك ما ح تشترى منها (الملايات والتياب) بالأقساط ، ملاياتك تانى ح تكون (كانون أمريكية) وتيابك ح تكون (شيفون أصلية) ما خمج ، ح تجيبيها معاكى من (الإجازات) و(السفريات) الخارجية ، أشطبى وخلى ليكى مساحة معتبرة فى ذاكرة الهاتف عشان بعدين ح يكون عندك أسماء تانى جديدة خالص تتناسب و(المرحلة) أولهم (حسين الصائغ) و عم (حسنين السواق) و الشغالة (الفلبينية)!! - لا تتوانى فى زرع (الشجاعة) في قلب زوجك، ذكريه بإستمرار بمسؤولياته تجاهك وتجاه الأولاد ، رددى له بإستمرار العبارات التى تجعله يجتهد فى (التحويش) كعبارة: - بكرة كان شالوك البدفع للأولاد ديل رسوم المدارس والجامعات منو؟ - أول حاجه أعمل ليك بيت زى الناس عشان بعدين ما نرجع تانى لحكايت الإيجارات دى ! - وكمان (شقة بره) عشان نقضى فيها الإيجازات! - إنتا سمعتا ليكا بى زول مسئول (سجنوهو) عشان (زبط روحو؟) - حتى تضمنى عدم إكتفاء زوجك بمرتبه ومخصصاته (الهزيلة) ووقوفه إلى جانبك فى إنجاح مشروعاتك الاستثمارية بادري بتوريطه فى إلتزامات مالية مرهقة كشراء سيارة (آخر موديل) من الشركة باقساط عالية ، وتسجيل أبنائك فى مدارس وجامعات ذات رسوم (فلكية) ولا تترددى فى (كتابة) أى شيكات (شفتى ليكى زوجة مسئول عندها بيزنس دخلت السجن عشان شيك طائر)! - يجب أن تهتمي بمظهرك وتتصرفي باعتبارك ثرية ورثت العز والجاه أباً عن جد ولم تصلى إلى هذه (النغنغة) بفضل زوجك وأعلمى أن المظهر شئ أساسي جدا. - شاركي بأنشطة ذات طابع خيري وإنساني ولا مانع من إنشاء وتسجيل (منظمة خيرية) تقومى برئاستها والإشراف عليها ، ولا تنسى أن تقومى من فترة لأخرى بعمل زيارات لملاجئ الأيتام ودور العجزة وكبار السن وأن تحملى لهم بعض الهدايا ( هو إنتى ح تجيبيهم من بيت أبوك) ، لا تنسى بإن إنشاء (منظمة خيرية) له عدة فوائد فبالإضافة إلى نظرة (الناس) ليك بإعتبارك تقومين بنشاط خيرى وعمل إنسانى وتساعدين الفئات الضعيفة من المجتمع فهنالك (الإعفاءاات الجمركية) والتبرعات (المادية) والعينية وكده ! وبرضو الواحد يعمل ليهو حاجة للآخرة !!