د. فتح العليم عبدالله رئيس قسم التاريخ والآثار في جامعة ام درمان الأهلية.. والكاتب الصحافي المتميز.. التقيناه مصادفة وأجبرناه على التنفس عبر البيت.. ? قلنا: قاعد تشتغل في البيت؟ قال في الأول: نعم بالليل قراية وكتابة.. ولكننا قلنا له.. نقصد شغل البيت التاني! - ما بعرف فيهو أي حاجة.. ما عندي معرفة بحاجات البيت وفنياته.. بس بعمل الزبادي.. وبشد الشاي لأنو «الجماعة» ما بعرفو يظبطوه كويس.. ? منو من أولادك يشبهك؟ - تعرف البنت بتشبهني.. ابنتي «أمل» في الجامعة بتزعل لمن يقولوا ليها بتشبهي ابوك.. وترد انتو ما شفتو امي.. وولدي بيشبه أبوي.. ? ومن طباعك؟ - زي طباعي.. القلق والاستعجال والزعل السريع.. ? ونتحدث عن ميزانية البيت.. وبيد من هي؟.. ويقول: - يا أخي: أنا مؤجر شقة بدفع الايجار.. وحق الدكان.. وعامل نظام للأولاد كل واحد فيهم بديهو ميزانيتو الشهرية حسب مصروفه اليومي.. ? ودخولك للبيت كيف.. زهجان أم فرحان.. أم بتتصنع؟ - ما بتصنع.. وبدخل حسب الحالة الأنا فيها.. وبعدين اصلو انا ما بعرف أشاكل زول.. ولا حتى زوجتي.. وعمري ما ضربت حد ولا أولادي.. ? منو البضحكك؟ - محمد أصغر اولادي.. وبالمناسبة انا بطلع من الصباح وبجي البيت مع آذان المغرب.. بسمع وأشاهد الجزيرة والعالم.. واذاعة لندن وعثمان حسين وحنان النيل.. ? المكاوا؟ - ما بحبها وهي نوع متخلف من التعامل.. أنا ببكي بألم لرؤية طفل كفيف.. ? بنتك من الجيل الجديد.. كيف تتمناه من بنات جيلك أم جيلها؟ - ما ح أقدر أطبق فيها امنيتي.. فهي ثقافياً تنتمي الى بنات جيلها.. ويقول د. فتح العليم: أولادي بيحبوا الأغاني الاجنبية.. تصور بشيلو مني الريموت.. عشان يغيروا القناة، وأنا واقف أتفرج عليهم.. ويضيف: أنا تزوجت باختياري.. وقد وجدت في زوجتي المواصفات التى كنت أتمناها في المرأة وشريكة حياتي..