بسم الله الرحمن الرحيم والصلاة والسلام علي رسول الله السلام عليكم ورحمة الله وبركاته اليوم التقي ابناء جنوب السودان في الخرطوم وعشان نرسل رسالة نحنا في السودان اتوحدنا شمال وجنوب وانحنا في السودان السودان كلنا سودانيين وبهمنا السودان واستقراره وامنه وسلامه ولانه زي ماقال الذين تحدثوا انحنا ظللنا خمسين سنه في حرب والحرب منذ ان بدأت في 55 ناس كتار هنا ماكانوا موجودين والزمن داك هم كانوا وين لمن انحنا كنا بنتحارب هسع لمن جبناالسلام وطبقناه ولانه في سلام حقيقي في الجنوب يجوا يعملوا لينا محكمة جنايات طيب ياجماعة الحكومة الرئيس بتاعة البشير ده هي الجابت السلام وانحنا الوقفنا الحرب وزي ماقال د لام اكول انحنا كنا بنحارب ايضاً عشان نجيب السلام وماكنا بنحارب عشان ننتصر وندمر الحركة لانه اول يوم جينا فيه والناس بذكروا في البيان الاول اول عمل عملنه حاولنا الاتصال بالحركة وانا قلت في اول يوم سلام مع الانفصال اخير مع الحرب في وحدة وقعدنا مشينا دار السلام ومشينا نيروبي ومشينا فرنكفورت ومشينا ابوجا ومشينا تاني نيروبي ووقعنا اتفاقية سلام شامل في نيفاشا وانا قلت انحنا لمن حملنا استقلالنا كان استقلال ناقص ناقص لانه في جزء كبير من البلد كان تعبان كان فيه حرب عشان كده الاستقلال كان ناقص الاستقلال تم في نيفاشا لكن اعداء السودان واعداء افريقيا واعداء الحرية والمستعمرين الجدد الكلام لم يعجبهم لانه زي ماقال د. نافع عاوزين فوضي وقالوا الفوضة خلاقة الفوضة ياجماعة معناها نقتل تقتل اي زول وتشيل حقوا ومافي قانون ومافي حكومة القوي ياكل الضعيف عاوزننا غابة نقتل بعضنا البعض ليه ياجماعة الناس ديل لانه عارفين السودان فيه مياه فيه ارض زراعية في بقر في ضان في جمال في ناس فوق ده كله في المواطن السوداني ماعاوزين الخير ده كله لاهل السودان عاوزين يشيلوه هم والناس ديل مامؤهلين يتكلموا عن عدالة وما مؤهلين يتكلموا عن حقوق انسان ، اتكلموا عن ابادة جماعية قتلوا كم من الهنود الحمر في امريكا ابادوهم ساقوكم من افريقيا هنا ساقوهم عبيد ساقوهم رقيق رموا نصفهم في البحر ووصلوا الباقي بنوا بيهوا الاقتصاد بتاعهم هسع الاقتصاد بتاعهم والمال عملوه باهلنا باناسنا الساقوهم من افريقيا الناس المشوا اليابان والضربوا هيروشيما ونجزاكي بقنبلة ذرية ابادة الرجال والنساء والاطفال والعجائز وحتي اليوم الاثر لازال باقي في الولادات للاطفال والناس المشو فيتنام وقتلوا اهلها وضربوهم بالنبال وحرقوهم وحرقوا غابتهم وبتكلموا عن العدالة والناس الرئيسهم كذب ياجماعة انا عشرين سنه كذبت عليكم وقلت ليكم كلام كذب عملت حاجة كذب الرئيس الامريكي كذب علي شعبة وكذب علي الدنيا كلها قالوا العراق فيها اسلحة دمار شامل ومشوا ضربوا ودمروا العراق وقتلوا اثنين مليون في العراق وده ماجريمة لانهم هم من حقهم يقتلوا ومن حقهم يشردوا ومن حقهم ينهبوا لانهم هم الدنيا ده كلها سخروها ليهم هم يقتلوا الناس ويشيلوا حقهم وينهبوهم يدمروا بلدهم عشان يعيشوا هم وبعد مادمروا العراق وقتلوا اثنين مليون وهجروا خمسة مليون مواطن ياجماعة القتلي واللاجئين في العراق اكثر من سكان دارفور كلها وده ماجريمة لانهم ديل ناس يموتوا لازم يموتوا عشان هم يعيشوا وخلقوا الفتنة في العراق فتنة طائفية لم نسمع بها شيعة وسنة واكرد وعرب ، مشو افغانستان ويضربوا المدنيين والرئيس كرزاي حليف امريكا قال يتمني لو عند طيران عشان يضرب الطيران الامريكي البضرب المدنيين ، اي عرس في افغانستان الليلة الامريكان يضربوه بالطيران ويقتلوا الناس ويجعلواالعرس لمأتم ، وده ماجريمة ويتكلمواعن العدالة طيب اذا كان ده محكمة عدالة هم مااعضاء فيها ليها ليه مانضموا ليها ويبقوا جزء منها نفس القرار القالوا يحاكموا السودان بنفس القرار قالوا المواطن الامريكي لايحاكم عشان كده الامريكان شغالين علي كيفهم وكلكم شاهدتم ماحدث في سجن ابو غريب وغونتناموا حتي اليوم مفتوح بدون توجيه اي تهمة والحديث انه هنالك المئات من السجون السرية الخاتين فيها الناس بدون محاكمات وهم بتكلموا عن عدالة وهم ماعاوزين عدالة وماعاوزين سلام ، عاوزين ينهبوا في النهاية ، وانحنا قاعدين عاوزين يعيدوا استعمار السودان وبنقول ليهم مرة ثانية وثالثة ورابعة وعاشرة السودان اول دولة افريقية في جنوب الصحراء نالت استقلالها ولايمكن يكون اول دولة يعاد استعمارها وين العدالة وقبل ايام العالم كله يتفرج علي غزة وكيف الاسرائليين قتلوا الناس واستخدموا الاسلحة المحرمة دوليًا وقتلوا الاطفال والنساء وقتلوا الشيوخ والمدنيين الامنين في بيوتهم في زول سألهم قدموهم لمحكمة ليه ده كيل بمكيالين لانه انحنا احرار مابنرجع عبيد وانحنا عبيد لله مابنكون عبيد لزول انحنا بنطلب من الله ما بنطلب من زول مابنذل نحن شعب كريم مابنشحذ انحنا البنكرم الضيف وبتناول الضيف ياجماعة سنة 1984 لمن جاءت المجاعة وفي السودان في مجاعة جاء اهلنا من اثيوبيا هل قلنا ليهم ارجعوا هل رفضنا استقبالهم ماقسمنا معاهم اللقمة الموجودة واستقبلنهم واؤينهم الليلة بتكلموا عن السودان ارتكب جريمة حرب لانه طرد المنظمات ده منظمات جواسيس ، انحنا بنقول لاي زول في السودان اول حاجة يحترم نفسه والمابحترم نفسه هل يستحق الاحترام ، يحترم نفسه ويعرف انه في بلد عندها اهل واهلها ناس عزاز وناس كرام لايقبلون عميل ولاخائن ولاجاسوس ولا حرامي ديل ناس حرامية بتسموا في الاعلام انهم اثنين مليار دولار لدارفور انحنا حسبنها حساب دقيق والجاء دارفور كم من الاثنين مليار اقل من المائة مليون زمان كان بقولوا والله هم يشيلوا 90% ويدوا الناس 10% الناس ديل شالوا 99.9% وادنوا واحد من عشرة في المائة ده ماعاوزنها ياجماعة نحنا البنقيث الملهوف البنكرم الضيف البجي في اخر الليل ، الليلة نسأل اخونا الجنوبيين القاعدين هنا كل واحد في بيتهم في كم واحد من اهله واقربائه ساكنيين معه ، كم واحد بياؤهم ويكرمهم وكده نمشي الدول الحولنا منوا الفاتح بيتهم لاهله ، ديل ناس مامحتاجين ليهم عندنا عيش وعندنا دخن واللحم والضرابة والزيت والبذرة ، واللحم حقنا الثور نطعنه وخروفنا نذبحه ونعمل ملاحنا بنجيب الويكة والضرابة نجيب اللقمة والدامرقة ونعمل العصيدة والول . عندنا السمك باتي للخرطوم من بحيرة نوا ونصدره بره كمان ومامحتاجين لزول وعندنا عسل نحل ولبن ولحم وويكة وحديد ومعادن وبترول وغاز محتاجين لشنوا ياجماعة ؟؟ عندنا ما وارض ونساء ورجال ورسالة نرسلها لهم من اهل الجنوب الي كل احرار العالم انه ده حملة استعمارية جديدة وانحنا الدعمنا حركات التحرر انحنا ذاتنا النلنا استقلالنا وعملنا ثورة في القرن التاسع عشر نحن ابناء الازهري القاد السودان للاستقلال والعاوزنا يجي يقعلنا والزارعنا غير الله يجي يقلعنا والناس ديل عاوزيين يوقفوا التنمية هسع انحنا في عيد السلام الفات في ملكال وقعنا المرحلة الاولي من طريق السلام وكوبري السوباط وحانكمل الطريق حتي نربط الخرطومبجوبا وبنمولي سعادتوا جوزيف لاقوا نربطها بشارع زلط الواحد يركب عربية كريسيدا من الخرطوم حتي نمولي حانعمل الكهرباء والسدود في الجنوب عشان الكهرباء تمشي اي مكان عشان نبني المصانع ونعمل المشاريع ونزيد الجامعات والمعاهد العليا وحانزيد خدمات الماء والصحة والتعليم وحانبني السودان وكلما ماهم تحركوا انحنا نجيهم بمشروع جديد بطريق جديد بسد جديد بجامعة جديدة بمشروع زراعي جديد ودائمًا ردنا ليهم كده وانا والله بحي اليوم ابناء جنوب السودان الماخذلونا ابدًا الوقفوا معنا في كل القضايا وكلنا نذكر مؤتمر جوبا عام 1947 لما ابناء الجنوب قرروا ان يكون الجنوب جزء من السودان مايكون جزء من يوغندا او كينيا ويكون دولة مستقلة ونحنا الان بنطبق اتفاقية السلام والناس ديل عاوزين يخربوا السلام لكن ماحايخريوا لانه السلام ده حقنا والبموتوا ديل اولادنا وانحنا تاني مافي زول بموت في الجنوب ومابنحارب بعضنا ومهم يعملوا لن نرجع للحرب حانحافظ علي السلام لغايت انحنا بعد سنتين يجوا ابناء الجنوب هم الاقرروا عاوزين سودان موحد ولاسودان دولتين وانحنا بنقول سودان واحد وحايظل دولة واحدة لانه السودان لو قسم افريقيا حاتتقسم اذا السودان حصل فيه حاجة انحنا الاثرنا في افريقيا وانحنا عندنا تسع دول جوار ده كلها حاتتأثر بالسودان ، نحنا سعينا ان نبني سودان موحد سودان عزيز سودان قوي المواطنيين فيه كلهم سوي سوي مافي مواطن درجة اولي ومواطن درجة ثانية كلنا مواطنيين من الدرجة الاولي انشاءالله والله اكبر الله اكبر الله اكبر والسلام عليكم ورحمة الله .
