دندرا علي دندرا من الأقوال المأثورة للحكيم الصيني كونفوشيوس ( إذا اردت التنبؤ بالمستقبل، تمعن في الماضي) في راديو الحركة الشعبية ايام الحرب. قال رئيس الحركة الشعبية الرفيق الراحل المقيم قرنق لم ننظم الحركة الشعبية من أجل إعادة إتفاق أديس أبابا، أو توحيد الجنوب، أو منح تنازلات للجنوبيين، لا..لا..لا نظمنا الحركة الشعبية لتحقيق أهداف أكثر سمواً... نعم أكثر سمواً. (كتاب اهوال الحرب.. وطموحات السلام للعلامة الرفيق الدكتور منصور خالد). انا جنوبي والجنوبية تعني عندي عزة النفس، الشجاعة، المحبة التي لا تحسد ولا تكره ولا تظلم، الجنوبية تعني العفو عند المقدرة. وكجنوبي فهمي لاهداف الحركة الشعبية الاكثر سمواً هي الحرية، والحرية تعني ان نمتلك السلطة برشد، ونأمن ثروة الشعب، ونوجه السلاح لمن تسوله نفسه التلاعب بهذه الحرية لان الوجه الآخر للحرية هي المسئولية. السبب الحقيقي الذي دفعنا للانفصال هو عدم الاعتراف بالاخر ومقدراته!!! والكذب والخداع المبالغ فيه واللولوة الزائدة عن اللزوم يقول سير والتر سكوت (عندما تتعلم ممارسة الخداع، يالها من شبكة معقدة تلك التي تنسج خيوطها) ناس المؤتمر الوطني يعجبوك في الشغلانه، لدرجة مرات كثير انا بقول الناس ديل كويسين والله بس نحن الجنوبيين ناس مشاكل ساكت!!! ؤلكن عندما تتمعن في اعمالهم تشوف العجب !!! العجائب!!! مثال لذلك ناس دارفور في مفاوضات الدوحة طالبوا ان تكون دارفور إقليم واحد. ناس المؤتمر الوطني مباشرة عملوا العاكس قسموا دارفور الي خمسة اقاليم بدل ثلاثة نكاية في الدرارفوريين ده ياهو تصرفات قيادة المؤتمر الوطني وللتأكيد نعمل فلاش باك (Flash Back) عندما وقف الرئيس البشير في جوبا ايام الانتخابات وقال لن نحزن وننصب صيوانات عزاء على انفصال جنوب السودان، بل سنكون علي رأس المشاركين في احتفالات الدولة الجديدة وسوف نكون حرصين على اقامة علاقات طيبة مع الدولة الوليدة. ولكن شويتين الريس غير رايه وقال ممنوع مرور البضائع الى جنوب السودان يعني حصار إقتصادي. ثاني ظهر في بورتسودان وقال الناس ديل عندهم ثلاث خيارات لتصدير البترول 1/ نقسم نص بالنص (رجاله وحمرة عين) او 2/ نأخد ضريبة في كل برميل زائد ضريبة ميناء التصدير يعني ياهو النص ذاتو ( قسمة الاسد مع الضبع والثعلب) 3/ يا نفسيها ونقفل الخط. وقفت حيران ومتعجب!! وبسأل يا ناس ده منو؟؟؟ يا اهل الله... يا اهل الخير ده الريس بتاع جوبا وله ده ود عمه؟؟؟ الزول ده كذاب وله شنو ؟؟ معقوله رئيسنا كذاب؟؟؟ وللتاريخ الراجل طلع رئيسنا بتاع جوبا ذاتو بس غير جلده ورجع الي اصله كوز!! وصدق الزعيم الراحل المقيم الدكتور جون قرنق عندما قال عنهم (المرفعين لا يمكن ان يغير جلده) حكاية قفل الخط الناقل للبترول كان تهديد علشان القيادة في دولة الجنوب تخاف ويصيبهم الهلع ولكن القيادة في دولة جنوب السودان قالوا (بندورة وكشفنا دورها) الخط الناقل للبترول عبر بورتسودان قفلناه خلاص قف... وأنا كجنوبي بقول للقيادة والله يا سلفا يا كير عجبتنا!!! قرار تاريخي وفي وقته... البترول بترولنا وبينا مع قيادة المؤتمر الوطني في الشمال يفتح الله. وبقول لقيادة المؤتمر الوطني جيرانا العرب البقارة قالوا ( التسويه كريت في القرض تلقاه في جلدها) أنابيب الخط الناقل للبترول دقوه ملودة علشان ناس سد مروي يزرعوا بيه بصل وطماطم. بقول للجنوبيين ياهو ده حريه سلفا كير جابوه ليكم !!! امسكو ما تلعبو بيه ... امسكو قوي ما تلعبو بيه واقيفو وراه بقوة لانه الجلابه ذي المرقود لازم تكب ليه مويه سخن بعد كل فترة علشان ما يمص دمك.