أنباء عن اغتيال ناظر في السودان    الصادق الرزيقي يكتب: الدعم السريع وشهية الحروب التي فُتحت في الإقليم    خسائر ضخمة ل"غانا"..تقرير خطير يكشف المثير    إسرائيل تستهدف القدرات العسكرية لإيران بدقة شديدة    "خطوة برقو" تفجّر الأوضاع في دارفور    الترجي يسقط أمام فلامنغو في مونديال الأندية    الحلقة رقم (3) من سلسلة إتصالاتي مع اللواء الركن متمرد مهدي الأمين كبة    افتتاح المرحلة النهائية للدوري التأهيلي للممتاز عصر اليوم باستاد الدامر.    فيكم من يحفظ (السر)؟    في السودان :كيف تتم حماية بلادنا من اختراق المخابرات الإسرائيلية للوسط الصحفي    من الجزيرة إلى كرب التوم..هل دخل الجنجويد مدينة أو قرية واستمرت فيها الحياة طبيعية؟    التقى بروفيسور مبارك محمد علي مجذوب.. كامل ادريس يثمن دور الخبراء الوطنيين في مختلف المجالات واسهاماتهم في القضايا الوطنية    هيمنة العليقي على ملفات الهلال    الحرب الايرانية – الاسرائيلية: بعيدا عن التكتيات العسكرية    نشاط مكثف لرئيس الوزراء قبل تشكيل الحكومة المرتقبة    نقل أسلحة إسرائيلية ومسيرات أوكرانية الى افريقيا بمساعدة دولة عربية    والي الخرطوم يصدر عدداً من الموجهات التنظيمية والادارية لمحاربة السكن العشوائي    أدوية يجب تجنب تناولها مع القهوة    شاهد بالصور والفيديو.. الفنان حسين الصادق ينزع "الطاقية" من رأس زميله "ود راوة" ويرتديها أثناء تقديم الأخير وصلة غنائية في حفل حاشد بالسعودية وساخرون: (إنصاف مدني النسخة الرجالية)    رئيس الوزراء يطلع على الوضع الصحي بالبلاد والموقف من وباء الكوليرا    إدارة مكافحة المخدرات بولاية البحر الأحمر تفكك شبكة إجرامية تهرب مخدر القات    شاهد بالصورة والفيديو.. وسط ضحكات المتابعين.. ناشط سوداني يوثق فشل نقل تجربة "الشربوت" السوداني للمواطن المصري    (يمكن نتلاقى ويمكن لا)    سمير العركي يكتب: رسالة خبيثة من إسرائيل إلى تركيا    عناوين الصحف الرياضية السودانية الصادرة اليوم الأثنين 16 يونيو 2025    شاهد بالفيديو.. الجامعة الأوروبية بجورجيا تختار الفنانة هدي عربي لتمثل السودان في حفل جماهيري ضخم للجاليات العربية    شاهد بالفيديو.. كشف عن معاناته وطلب المساعدة.. شاب سوداني بالقاهرة يعيش في الشارع بعد أن قامت زوجته بطرده من المنزل وحظر رقم هاتفه بسبب عدم مقدرته على دفع إيجار الشقة    رباعية نظيفة .. باريس يهين أتلتيكو مدريد في مونديال الأندية    بالصورة.."أتمنى لها حياة سعيدة".. الفنان مأمون سوار الدهب يفاجئ الجميع ويعلن إنفصاله رسمياً عن زوجته الحسناء ويكشف الحقائق كاملة: (زي ما كل الناس عارفه الطلاق ما بقع على"الحامل")    على طريقة البليهي.. "مشادة قوية" بين ياسر إبراهيم وميسي    المدير العام للشركة السودانية للموارد المعدنية يؤكد أهمية مضاعفة الإنتاج    المباحث الجنائية المركزية بولايةنهر النيل تنجح في فك طلاسم بلاغ قتيل حي الطراوة    من حق إيران وأي دولة أخري أن تحصل علي قنبلة نووية    أول دولة عربية تقرر إجلاء رعاياها من إيران    السودان..خطوة جديدة بشأن السفر    3 آلاف و820 شخصا"..حريق في مبنى بدبي والسلطات توضّح    ضربة إيرانية مباشرة في ريشون ليتسيون تثير صدمة في إسرائيل    بالصور.. زوجة الميرغني تقضي إجازتها الصيفية مع ابنتها وسط الحيوانات    معلومات جديدة عن الناجي الوحيد من طائرة الهند المنكوبة.. مكان مقعده ينقذه من الموت    بعد حالات تسمّم مخيفة..إغلاق مطعم مصري شهير وتوقيف مالكه    رئيس مجلس الوزراء يؤكد أهمية الكهرباء في نهضة وإعادة اعمار البلاد    إنهاء معاناة حي شهير في أمدرمان    وزارة الصحة وبالتعاون مع صحة الخرطوم تعلن تنفيذ حملة الاستجابة لوباء الكوليرا    فجرًا.. السلطات في السودان تلقيّ القبض على34 متّهمًا بينهم نظاميين    رئيس مجلس الوزراء يقدم تهاني عيد الاضحي المبارك لشرطة ولاية البحر الاحمر    وفاة حاجة من ولاية البحر الأحمر بمكة    اكتشاف مثير في صحراء بالسودان    رؤيا الحكيم غير ملزمة للجيش والشعب السوداني    محمد دفع الله.. (صُورة) تَتَحَدّث كُلّ اللُّغات    في سابقة تعد الأولى من نوعها.. دولة عربية تلغي شعيرة ذبح الأضاحي هذا العام لهذا السبب (….) وتحذيرات للسودانيين المقيمين فيها    شاهد بالفيديو.. داعية سوداني شهير يثير ضجة إسفيرية غير مسبوقة: (رأيت الرسول صلى الله عليه وسلم في المنام وأوصاني بدعوة الجيش والدعم السريع للتفاوض)    تراجع وفيات الكوليرا في الخرطوم    أثار محمد هاشم الحكيم عاصفة لم يكن بحاجة إلي آثارها الإرتدادية علي مصداقيته الكلامية والوجدانية    وزير المالية السوداني: المسيرات التي تضرب الكهرباء ومستودعات الوقود "إماراتية"    "الحرابة ولا حلو" لهاني عابدين.. نداء السلام والأمل في وجه التحديات    "عشبة الخلود".. ما سرّ النبتة القادمة من جبال وغابات آسيا؟    ما هي محظورات الحج للنساء؟    قُلْ: ليتني شمعةٌ في الظلامْ؟!    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



مصطفى عثمان ( شحادين ) العود ما ببقى ماشة . و العربي ما ببقا باشا
شوقي بدري نشر في سودانيزاونلاين يوم 13 - 03 - 2012

السيد مصطفى عثمان الذي وصفنا بالشحادين ، أين انت ؟ قلت اخاليك شوية يا مصطفى . ياخي بالرغم من شتيمتنا و وصف الشعب السوداني بالشحادين ، و الكلام الاخير السمعناه بتاع الما عاوزنا ما يولع بكهربتنا و ما يمشي في شارعنا و لا يشرب مويتنا . و دا و الله كلام ما يقولوه شافع في دافوري قدام طاحونة . لكن برضو عندنا احساس انت ممكن تودي و تجيب ، تاخد و تدي . عليك الله بالله اسي انت لمن تختلي بنفسك كدا و لا لمن تكون بتحلق عاين لي روحك في المراية ، ما بتقول و الله نحن البلد سطناها بي كنش . زمان سمعناك بتقول انكم عملتو غلطات لأن تلك كانت أول عهدكم بالسلطة .
طيب بعد 23 سنة الفاولات دي لسة مستمرة ليه ؟ الرد يا مصطفى بكل بساطة هو المثل السوداني البقول : العود ما ببقى ماشة و العربي ما ببقى باشا . الماشة انت بتعرفها يا ابو الدرش . و لكن للناس التانين ، هي ملقط بشيلوا بيهو الجمر في المطبخ . و قديماً الجيران كانوا بتسلفوا النار و بيقولوا ادونا جمرة . و طبعاً لا يمكن استعمال العود لأنه سيتحترق . العربي مقصود بيها الانسان الذي يعيش في البادية ( زول الضهاري ) ، بعيداً عن المدنية . و هذا لا يمكن ان ينزل من جمله ، و يصير حاكماً . مشكلة السودان انه لقطوكم و جابوكم ، و كان قديماً و لا يزال الولاء للجبهة و الأخوان المسلمين يأتي قبل الخبرة و الدراية .
انت يا مصطفى دحين ما قلت أنه الترابي قال ليك بعد ما رسلوك بعثة في انجلترا انه عاوزك تجي السودان . و عملوك وزير خارجية . امانة ً في زمتك أسي انت لو جاك شاب عمره 30 سنة و كان مثلاً مهندس طيران و قال ليك عاوز يبقى سفير خلي وزير خارجية ، هل بتقبل ؟ و رئيسك زاته مش جابوه معاينة للترابي بعد موت محمدين و المرشحين الآخرين للأنقلاب . و الترابي عمل نفس غلطة ناس مايو الرفضوا محمد شريف الحبيب لأنه عنده طموح و مزمل غندور لانه انسان ذكي و كان مدرسهم في الكلية الحربية . و قالوا النميري بليد و غفلة يمكن السيطرة عليه . و الترابي اختار البشير . خليه يخم و يصر .
و الله يا مصطفى حنيت عليك بالرغم من عداوتنا لسياستكم و حكومتكم . شتمت الناس بالشحدة . و الله انت ذكرتني بأحد سكان فريق عمايا في امدرمان والذي عرف ب (حق العشا يا رب ). كان كسيحاً و أعمى . و كان ينادي كل المساء حق العشاء يا رب . و أشهر شحاد في امدرمان . دفناه في المساء سنة 1963 . أحد المساطيل تضايق من مناداته و قال له : ( اديك فريني تقوم تمشي ؟ ) فلم يرد عليه . شايفك و رئيسك و كل الناس شايلين قرعكم و حايمين في المطارات .
لمن اشوفك بتذكر محمد مداعي كان يغطى منطقة حيّ السيد المكي . و يكون لافي و حايم . يبلغ عن السمايات ، الحرارات ، المناسبات ، و في بعض الاحيان يعمل دعاية لستات العرقي و المريسة و يعصروا ليه .
أهم شئ يا مصطفى كانت عند السوداني كرامته . ياخي النميري بالرغم من غلطات كتيرة إلّا انه لم يكن يفرط ابداً في كرامته خارج السودان . و لكن داخل السودان كان يتصرف كسوداني . و عندما طرده شيخ كركوج عندما ذهب لزيارته بطائرة كان يريد ان يصلى الجمعة مع شيخ الخاتم و فاحت منه رائحة الخمر ، قال له شيخ الخاتم نحن ما بنصلي مع زول يتعاطى المنكر . و رجع النميري . و عندما أراد ان يفتتح مسجد النيلين قال له الأمام : أن المساجد يفتتحها الخيرون . و عندما سأل النميري عن المقصود . قال له الشيخ : يفتتحها من لم يزني او يشرب الخمر او يلعب الميسر . فتراجع النميري . و لكن عندما تطاول هيكل أمام السادات و آخرين ، لطمه النميري و كان ان يواصل لولا أن ناشده السادات قائلاً :( لا يا جعفر لا يا جعفر ) .
و عندما اخرج النميري ياسر عرفات بطائرته في ايلول الاسود من الاردن متخفيا ، بعد ان قتلوا أعداد هائلة من الفلسطينين ، و الملك حسين يبحث عنه لأغتياله . اسمع النميري الملك حسين في اجتماع الجامعة العربية ما لم يسمعه من انسان آخر . دلوقت البشير يمشي الدوحة يقابلوه بنجاركوك . انت يا مصطفى البشير دا بقا فنان و لا نحات و نحن ما عارفين ، يقابلوه بوزير الثقافة . يعني مشى يقدم فاصل ؟ . و لا يعرض لوحات ؟ . زمان القطريين ديل كان بيجيبوا السودانيين عشان يعلموهم الدبلماسية . يلبسوا كيف ، و يقعدوا كيف ، و يتكلموا كيف ، و ينزلوا من العربية كيف . زمن وزراء الخارجية كانوا ناس مبارك زروق و جمال محمد أحمد . و بعدين يا مصطفى ياخي كترت الطلة بتمسخ خلايق الله . البشير دا بمشي قطر اكتر من حوش بانقة ، الحكاية شنو ؟ و بعد كدا البشير يمشي السعودية يجيبوا ليهو مسئول من الليق . ياخي كان ما احترمتونا نحن كشعب سوداني ، احترموا نفسكم ياخي .
سمعت انه البشير في مسجد ابوه يصلي و معزول بدرابزين . و بالرغم من كل الأمن دا خايف . . يا مصطفى ياخي في أمة في العالم 25 في المئة من سكانها عندهم حصانة ؟ ياخي انتوا بتاخفوا حتى من الحقيقة و من العدالة . و تتكلموا عن العدل و تبحثوا عنه ، و أخيراً جبتوا ابو قناية عشان يحارب الفساد . دي ينطبق عليها المثل السوداني ( عينو في الاسد قال وروني دربو ) . شوف عيني الحاياكلها الدود دي ، الحاكم العام كان بجي بيتنا في حي الملازمين راكب عربية روزرويس لونين دهبي و اسود ما معاه غير سكرتيره و سواق . و كنّا نتحلق حول العربة و معي زين العابدين محمد احمد عبد القادر ، و شقيقه النور، و الفاتح محمود حمد نصر ، و ميرغني الطيب الفكي ، و عبد الرحمن و عبد الفتاح قلندر و آخرين . و كان السائق يتبسط معنا . و عندما يخرج الحاكم العام يبتسم و يركب سيارته و يذهب . زي كأنه جاي عقد .
يا مصطفى ياخي في ايام الاستعمار كانت بتتطلع مظاهرات ، و البوليس بتعامل معاها بكل معقولية . أول مرة في الدنيا نسمع لينا بمظاهرة بتاعت عيانين . ياخي قبل ايام كان في عيانين اتظاهروا . ياخي زمان الحكومة بتعزم الناس على العلاج و بحفزوهم و العلاج مجاني . وفي الزائرات الصحيات بسكو الناس للعلاج في بيوتهم و بيوعوهم . شفنا حملات البيطري في السودان على ظهور الجمال و على العربات لتحصين الحيوانات من مرض النيني و ابو دميعة ... الخ . بدون فلوس . و حتى في اقصى الجنوب و في البادية .و كلو مجاني .
عليك الله بكرة لمن تحلق و تعاين في روحك في المراية . اتذكر انه في مرضانين بتظاهروا في وسط الخرطوم . و انت لازم بتكون بتحلق . لأنه ما شايفين لا فرشة لا مقشاشة لا زعافة . ما عارف اخو مسلم كيف . أنا صغير في نادي الاخوان المسلمين المواجه منزل عمنا عوض عمر الامام في الهجرة كانت هنالك امام زائر ابيض اللون ، يتكلم و يقول أن حلق الشارب و اللحية و العنفقة حرام . و العنفقة زي ما عارف هي زعرورة تحت الشفاه السفلى . و تعرف بالانجليزية ب ( قوتي ) . انت و رئيسك و ناسك ديل ، تحلقوا ليه ما قلتوا لينا حرام زمان . هو بقت ياخي على الصوف ديّه . ياخي البشير دا ما قال بخشموا البياكل الكسرة دا ، أنه كذب على الشعب السوداني . و تذهب الى السجن حبيساً و اذهب الى القصر رئيساً . ياخي قبضّوا اولاد الناس زي ما سيد القلوبية يقبض القبور عشان يكج الطير . و رسلتوهم الجنوب . و غنيتم . و لتسل منهم دماء و لتسل منّا دما فلتسل كل الدماء . و قال شيخكم الترابي من ماتوا في الجنوب ليسوا بشهداء ، بل فطايس . و جيتوا تاني دورتوا الفلم دا . لكن تاني المجاهدين ديل إلَا تعلقوا ليهم محلب ، عشان يمشوا يحاربوا ليكم .
انت يا مصطفى كاشا شق عصا الطاعة على امير المؤمنين عمر البشير . و كرم الله بتاع القضارف . ليه ما رسلوا ليهم الجيوش و المتحركات و الطائرات زي ما عملوا مع الحلو و عقار . و لا عشان في شرعكم ديل عبيد و ما بستحقوا الحياة . و ما بلفقوا مع المشروع العروبي الاسلامي . انت يا مصطفى قلبك كدا ما بأنبك و لا ما بتخجل ، أو تتوقف و تفكر مع نفسك انه القتل البحصل دا في جبال النوبة و في النيل الأزرق . شئ خطأ . جريمة ياخي . انت ما بتتحرك لما تشوف اجساد النساء و الاجساد الممزقة بطائرة الانتينوف . و لا أنا غلطان . ما انت زمان القلت كل الماتوا في دارفور ديل 12 الف .
تعرف ليه الناس ما حا تتغشى ليكم تاني . في قصة كان بدرسوها لينا في الوسطى . و هي أن الناس عبدوا شجرة . فذهب الناسك حاملاً فأسه ليقطعها . فبرز له الشيطان و تصارعا لمدة طويلة ، و أنتصر الناسك . إلّا انه كان تعباً فقرر ان يعود لقطع الشجرة في اليوم التالي . و تكررت العملية عدة ايام . و أقترح الشيطان ان يضع ديناراً من الذهب تحت وسادة الناسك كل صباح . حتى يطعم الناسك المساكين و يتصدق على الفقراء . و لكن بعد فترة توقف الدينار فأخذ الناس فأسه لقطع الشجرة . و لكن الشيطان تغلب عليه بسهولة . قال له الشيطان : ( انت كنت تحارب لوجه الله و لكنك الآن تحارب للدينار ). الشعب دا بعد ما شافكم ، و شاف السف و القرش دا و الضياع و القصور و النساء مثنى و مثلث و رباع ، و العلى الجنب . و مال المايقوما دي كان بتتملئ من قطع الجمار ؟ هل معقولة تكونوا لسة فاكرين انه الشباب و حتى بروفيسرات الجامعات و الدكاترة و المهندسين سيركضون للتجنيد ؟ و روسيا و أمريكا قد دنا عذابها ؟ . ياخي جبتوا لينا الأخوان المسلمين كل الموديلات و الماركات التجارية و الأشكال و الألوان . لأنهم ديل اخوانكم قبل الشعب السوداني المسكين . طيب يا ابو الدرش ربنا فتح عليكم و الأخوان المسلمين في مصر معاكم قضيم و قراصة نبق ، تمام التمام . طيب ياخي ما تخليهم يرجعوا لينا حلايب ما الحالة واحدة . و لا اقول ليك انا غلطان . ياخي المصريين ديل شحدتوهم غاز . و قالوا ليكم الطلب سكو . نميري زمان غير علم السودان عشان خاطر العرب . و كان يجعر بالبكاء عندما مات ناصر . و بالرغم من كل هذا رفضوا ان يعطوه خطين بنزين . و في نفس الوقت كانوا يتفاوضون مع اسرائيل ، مليون واحد و لا اتنين مليون برميل . ما الما بتضوقو ايدك ما ببقى نجيدك . و نفس البلطجة دي بمارسوها المصريين معاكم .
بالمناسبة يا مصطفى يا اخوي . ياخي وزير الخارجية دا بحسس الناس بأنه عنده شخصية ، مهابة ، كازما و حزم . ما شفت وزراء زمان . شوف صورة أيوب خان وزير خارجية باكستان في الخمسينات . كان مظهره بخوف الهنود . و انت تتكشم زي نار القصب ، و زي الشافع الجابو ليه العجلة ، ياخي اركز . و بالرغم من انه كرتي هو وزير الخارجية الرسمي إلّا انه انت وزير الخارجية الحقيقي . فياخي ارسى شوية . الفرعون الكان بخوفكم و تمشوا انت و البشير تقعدوا قدام الخرطة الكبيرة الفيها حلايب مقطوعة راح . و الناس قالوا : ( انفخ و لو حملك ريش ) . ياخي احترام الناس للسودان بنعكس في احترامكم لنفسكم . و بعد شحادين كمان وصفتوا الشعب السوداني بأنه كسلانين . بالله دي مش محنة يا مصطفى . زول يصف شعبه بأنه كسلان . و الله الدليل الوحيد على كسل السودانيين انه ما طردوكم .
السوداني ما يبقى كسلان ليه ؟ اذا كان انتوا كرهتوه الدنيا . كدي بالله فسر لي عليك الله تدفعوا للمصريين حيوانات حية . يعني شية و كمونية و مرارة و تقبلوا بالصدقة ، عشرة ألف من خرفان الهدي ترسلها ليكم السعودية . و يجبوها ليكم مصدرة . بالله عليك الله يا مصطفى دي مش محنة . و رئيسكم يقول مستعدين للحرب مع الجنوب . البحرينيون عندهم مثل بيقول : ( قالوله عندك تاكل قال لأ . قالوله عندك تغرم قال ايي ) . ياخي شعب عايش على الصدقات عاوز يحارب . و مال لو كنتوا بتاكلوا كافيار كنتوا حا تعملوا شنو ؟ . ياخي انتوا شدة ما جوعتوا الناس سمعنا انه محلية الكاملين عشان تجد دخل فرضت رسوم على الازيار . الازيار دي بعملوها صدقة جارية . زول مات في قبره بعملوا ليه سبيل . أول مرة اسمع بدمغة و ضريبة على صدقة . يعني المرة الجاية مافي زول يمعمل رحماتات لأنه حا تتطالبوه بقيمة مضافة و اقرار ضريبي . و كمان عملتوا مجسم للحج مدفوع الاجر . ذكرتوني ابرهه صاحب الفيل الذي بنى كنيسة في اليمن صنعاء لكي يوقف العرب من الحج للكعبة . محن محن يا ابو الدرش .
يا مصطفى ياخي العالم كلوا قايم في الاسبيستوتس الذي استخدمته تارف التي بنت بيوت حلفا الجديدة لأنه يسبب السرطان . انت يا مصطفى لمن مشيت وديت المساعدات و المستشفيات المتحركة للبنان ، ما فكرت في أهلك النوبيين و انت نوبي ياخي . حاجة تانية ياخي محيراني انت من القولد ياخ العروبة و العرب و الاستعراب و الاعراب دخلك بيهم شنو ؟ . ياخي النوبيون يتمتعون بأحسن الأخلاق و اشتهروا بالامانة و الصدق و الأخلاص . الحاجات الجديدة دي الجابتها الانقاذ ما بتشبة السودان . ياخ دي اخلاق كريهة . قبل اسبوعين كنت اتكلم مع الدكتور و الرجل السودان الاصيل سيد المقبول و الذي قضى خمسة عقود في ألمانيا كطبيب و استمتع فيها بالاحترام و المعقولية و الفهم . و كان يتكلم بكثير من المرارة و الألم و طبعاً اسمه دكتور عبد الرحمن المقبول و لكن قديماً في السودان كل من يسمى بعبد الرحمن كان يطلق عليه لقب السيد ( السيد عبد الرحمن ) . و تحدث عن قلة الأدب و بجاحة و اللؤم الذي صار سمة كل من تقلد السلطة حتى الغفير . و كيف أن ضابط صغير يكون بمثابة حفيده قال له عندما ابرز له الجنسية السودانية : ( تعرف يا عبد الرحمن انت عندك مووووشكلة . جنستك دي ما نافعة لأنه الجنسية اربعة اسماء و جنستك تلاتة اسماء ) . ما كان يؤلم سيد المقبول الرجل لا يطالب حتى بأن ينادى بدكتور و لا يهتم بلقب دكتور انه كما قال انه كان يتوقع كلمة يا حاج يا عم او أي مخاطبة بأحترام . انه لم يكتب الجنسية بنفسه في الستينات و لم يخطئ و لم يسبب المووووشكلة .
اليوم عندما كنت اتحدث مع المفكر السوداني حيدر ابراهيم ذكرته هذه الحادثة . فقال لي انها قد صارت سمة من سمات التعامل بواسطة كودار الجبهة الاسلامية ، حتى يميزوا نفسهم للآخرين . بمعنى نحن الواصلون و لا يهمنا اي شئ . و لا نحترم كبير و لا نرحم صغير . و لسوء الحظ انتقل هذا السلوك الى بقية خلق الله في السودان إلا من رحم ربي . و صارت القندفة و الازدراء و التعالي سمة الناس . و ليس بغريب ان تقتل حفيدة السلطان عجبنا في دارها و وسط اهلها و في حيّها . و الله لم يكن هنالك رجل واحد يستطيع ان يرفع يده على امرأة في السودان و إلا انتقم منه الشارع في وقتها . لقد كان احد المجانين يجوب الطرقات في الخرطوم و يجلد النساء بخرطوش اذا لم يعجبه شكلهم او لبسهم . و لقد سمعت في التلفون و لقد شاهدت في التلفزيون ان مجذوب الخليفة رحمة الله عليه قد اعطاه تصريحاً بذلك .
مرة تانية اقول ليك يا مصطفى العود ما ببقى ماشة و العربي ما ببقى باشا . ياخي البشير قال ما حا يترشح تاني . عليك الله يا مصطفى هل انتوا و لا البشير مصدقين عن جد انه هو اترشح و فاز ؟ . ياخي انتوا مجموعة من الناس اتى بهم حسن الترابي . بعد مؤامرات و خيانات . و سلمكم السلطة لم يكن فيكم من يستحقها أو يعرف ما هي السلطة . و تعلمتم الحجامة في رأس اليتاما . و لكن تعليمكم برضو كان غلط . هل يصح يا مصطفى زول كان حاشر يدينو و نخرينو في قدوم زول شغال قلع و نخر و سمكرة يقولوا ليه خلي المدقاب و المدربيتة و كجامة الاسنان دي و تعال عليك الله اشتغل لينا وزير ؟ و وزير شنو ؟ وزير خارجية يا ابو الدرش . تتذكر يا ابو الدرش هيق الكان وزير خارجية ريقن ؟ و لمن ريقن طقوه طلقة سلاخية و نائب الرئيس بوش كان مافي ، قام مشا طوالي البيت الابيض و قال انا المسئول الآن . ياخي بس عشان نبرته العسكرية و تسلطه طرطشوه . تتذكر يا مصطفى ؟. و كما متذكر اسأل ياخي ما عيب . جملة واحدة الراجل طرطشوة و انتوا مدورين في البلد طفي و شلاليت . و قدام القون كورتكم طاشة زي حبو . عليك الله يا مصطفى لمن تمش تحلق فكر في الكلام دا . كلها دقيقتين ياخي . يمكن ربنا يفتح عليك و تقول و الله ياخي الحاصل دا مافي ليه لزوم . ياخي مافي زول سألكم بدون اي مناسبة قلتوا نحن كنّا بنهرب السلاح لي ليبيا . يعني زي الزول البقبضوه سايق بدون نور و يجي قدام القاضي يقول انا امبارح كنت كاسر لي خزنة . بعدين العنتريات و التشنجات بمناسبة و بدون مناسبة لزومة شنو ياخ . تمنعوا المنظمات الجات تساعد أهلكم و تهددوا بمنعهم . حتى الصليب الاحمر و الامم المتحدة الانتو عضو فيها منعتوهم . تتذكر كلام ود دكين الشكري لمن طلب ريا بت اب كبس للعرس و قالوا ليهو ريا مخطوبة لود عمها طه ، لكن نديك اي بطحانية . قال ليهم : ( ليه يا اهلنا للبيناتنا ما بتراعوا . البقول راسه بيوجعوا تربطولو كراعو ).
قبل مدة سمعت انه الاستاذ عيسى الرشيد الناطق الرسمي بأسم وزراة الزراعة قد صرح . و عندما عرفت أن وزارة الزراعة عندها ناطق رسمي اتذكرت كلام ود دكين " البقول راسه بيوجعوا تربطولو كراعو " . وزارة الزراعة دي وزارة بتزرع . ما محتاجة لناطق رسمي . معنى كدا الخمسين وزارة ديل كل وزارة عندها ناطق رسمي و مساعد و احتياطي لمن يكون الناطق الرسمي ماشي يشيل فاتحة . يا ابو الدرش يا خوي دي مسخرة . و عوضية تموت سنبلة . و ما حا تحصل حاجة . ايه رأيك ؟ . لأنه انتوا ما ناس كويسين يا مصطفى .
ع . س . شوقي بدري

انقر هنا لقراءة الخبر من مصدره.