الفاضل إحيمر/ أوتاوا، مارس 2012 كلِّمني قول لي يا وطن إيه الحصل؟ متين، كيفن وليه حالنا لي ها الحال وصل؟ آلام في كل مفاصلك ونصك التحت إنفصل في عينيك طشاش وفي يديك رعاش وما عتق الضمور منك عضل. قلبك الكان كبير حنين وبحجم كون حِسا وقسا وعقلك الراجح والكان رصين صابو الخلل. بعد ما كنت فارس ساير وغاير في أكرم جياد محروس وحارس بقيت مطرطش راميك جمل تقوم تقع في مشيتك تنضم كُتر وكل سواتك هبل هبل. بعد ما كنت مقصد للغلابى وكنت لليائسين أمل صرت ما طايق عيالك واصبحت طارد للأهل كنت يوم للناجحين مثال واصبحت للفاشلين مثل كنت جنه خيرا وافر عامره بالود والمحنه وبقيت لظى نارها موقده واللهب فيها اشتعل. بعد ما كنا نفخر لمن نقول "أنا سوداني" قولا صار بي خجل وإتشتتنا في كل المجاهل بالفرادى والجماعات والجحافل نعرض لحالنا محل محل. كنت مرتع للأماني كنت ملهم للأغاني وكنت مصدر للغزل فيك وفي روابيك في أراكك في تبلديك في غابة الأبنوس واشجار النخل، كنت حر وفيك كنا أحرار بالأربعين ومش "أربعة" واليوم بقيت معتقل فيهو بنخاف من جهرنا من همسنا من غيرنا بل من نفسنا من أمسنا وكل آتي ومحتمل. كنا فيك متحابين ومتكاتفين نتقاسم قليله ولو كان بليله ما بنرضى حال الغير يميل وإحنا نرتع في العدل واليوم صبحنا كل دنيانا إحنا من أجلها لا خوف من الله ولا خجل ما بهمنا جارنا اللصيق لو بيهو الحال يضيق شبع بهدله أو حتى طش وإتكتل. كنا مستورين وبيوتنا طين وسترنا اليوم أتفضح والشرف شخ ... إنضبح ما صانتو أو زانتو شامخات قصور أو فِلل. كان العفاف لي بناتنا هو الأساس لا بعادلو دُر ولا متلو ماس من أجلو بتضيح ألف راس واليوم صبح مجرد مداس بس المهم.. البت تصل!! كان لينا دين ماسكينو زين ثابت يقين حافظنو وحافظنا من الزلل اليوم صبح تجارة وشطاره جواز للغنى واستمارة ومشروع حضاري زيو زي "أخوانو" صابو الفشل. كلمني قول لي يا وطن المآسي كيفن وليه عندنا مليون سياسي وفي المستشارين والمستوزرين فزنا بالرقم القياسي أصدرنا بليون مرسوم رياسي ولهمومنا لسه ما لقينا حل. كلمني قول لي يا وطن العجايب والعذاب كيفن وليه عندنا مليون "بروف" والدكاتره بدون حساب في كل مجال وأي باب والوطن خراب هباب وفي كل قايمه في القاع حتل. كلمني قول لي يا وطن يا نزفنا، يا جرحنا الما سكت ولا اندمل كلمني قول لي العلة فيك أم فينا إحنا كامنه العلل؟ كلِّمني قول لي يا وطن يا عشقنا الدائم أزل والفينا راسخ زي جبل كلَّمني قول لي إيه العمل؟ نقرش عليك نلبس سواد أم لسَّه فيك بارقة أمل؟ كلمني قول لي هل وهل وصلنا لآخر النفق والكتاب طويت صحايفه وانقفل أم فيه لازم تنفتح صفحات جديدة نخط سطورا بي دمانا ونقَّط حروفا بالمُقل؟
